مراهقون و لكن

٢٢

"لاشئ أسوء من أن تفرط في ثقتك لشخص يكن لك كل مشاعر الخذلان...??!! "
ــــــــــــــــــــــــــــــــــــــــــــــــــــــــــــــــــــ
في واحد من المطاعم الفخمة،،كان في ولد عشريني شعرو كتير ولابس نظارة سوداء وبيدو الشمال كان ماسك سيجارة وبدخن فيها بشراهة،،فجأة قعد جمبو شاب طويل كدا وأسمراني في بداية الثلاثين من عمرو،،عاين ليهو مسافة بعدها قال بصوت رجولي خشن:وسام تاج الدين؟؟
وسام قلع نظارتو ورد ليهو بدورو وقال:الملازم أول سامر؟؟ وقام ومد ليهو يدو عشان يسلم عليهو،،سامر سلم عليهو وقعدوا،،الجرسون طوالي جاب ليهم المنيو ووسام قال ليهو:إتفضل تتطلب شنو؟
_أحم ما عايز أحرجك معاي فعشان كدا حأطلب واحد إسبيرسو
_حلووو أنا زاتي حأطلب زيك كدا،،2إسبيرسو لو سمحت
الجرسون شال المنيو ومشى منهم،،وسام وهو بنفث سجارتو وبعاين لسحب الدخان البترتفع وتختلط مع الهواء،،لاحظ أنو سامر بعاين ليهو بإستغراب طفأ سيجارتو وقال ليهو:بتتضايق من ريحة الدخان؟؟
_لا عادي ما مشكلة أنا زاتي أحيانا بدخن
_أيوااا،،ولع سيجارة تانية وقال ليهو:علي فكرة أهلي ما عارفين أني بدخن فأرجوك ما تجيب ليهم سيرة عن الموضوع أوكي؟
_حاضر يا سِيدي ما حاجيب ليهم سيرة كدا تمام؟
_علي كده نخش في لب الموضوع طوالي،،بما أني الولد الكبير للسفير تاج الدين فمن واجبي أني أجيب حق أبوي وأعاقب الزول الأتسبب في موتو فكخطوة أولى الليلة مشيت السفارة وهم وروني التفاصيل كلها وعلى فكرة أنت واحد من أميز ضباط الصف في لجنة التحقيق الشكلتها السفارة في قضية موت أبوي،،شبك يدينو سوا وإستأنف كلامو:بالرغم من أنو أنت لسع ملازم أول لكن عندك خبرة و
مؤهلات كتيرة خلينا نقول ورثتها من أبوك المرحوم الكان عقيد في الجيش يا باش مهندس سامر هههه يمكن الأسم دا نسيتو بس أنا هسي حأذكرك ليهو،،أحم طيب أنت أمتحنت ثالث ثانوي ونجحت أبوك أقنعك أنو تخش الجيش بواسطتو بالرغم من أنو أنت كنت عايز هندسة بس سمعت كلام أبوك وإتجندت لحدي ما بقيت نقيب بعدها أبوك أتوفى وأنت قررت ترجع تمتحن 3 وفعلا نجحت وخشيت الهندسة الكهربائية الكانت حلم حياتك ووين؟؟في جامعة الخرطوم وهناك قابلت...أخم خلاص ما عايز أزكرك وأقلب عليك المواجع المهم بعد ما أتخرجت لقيت نفسك رجعت تاني لحماية الوطن لكن المرة دي في الشرطة وأتعرض عليك أنو تترقي من نقيب لي رائد إكراما لأبوك بس انت رفضت وقلت عايز تبداء من البداية وفعلا أنت هسي ليك كم سنة ولساتك ملازم أول بالرغم من أنو إمكانياتك إمكانيات رائد ما ملازم اول بس دا شكلو عقاب ليك عشان أنت رفست النعمة هههههه،،شال نفس من السيجارة وقال ليهو:أها رأيك شنو في معلوماتي أنفع اجي إشتغل عندكم في الشرطة صح؟؟،،في اللحظة دي الويتر جاب ليهم الإسبيرسو بتاعهم وكان حار والبخار طالع منو وسامر بحبو كدا فطوالي أخد من رشفة بعدها صفق ليهو بخفة وقال:أحيييك والله شكلو الزول الوراك المعلومات دي حافظني بصمة وعارف كل صغيرة وكببرة عني
_عييييب عليك ياخي السفارة ما حتجيب ناس ساي لو عارفه ماضيها ومتأكدة هي شنو ولا كيييف؟؟
_فعلا كلامك صح
_على فكرة ملفك كلو قريتو أنا ويمكن هسي أنا عارفك اكتر من نفسك زاتها وعلشان كدا اخترتك أنت بالزات
_طيب يا أستاذ وسام أختصر وأنجز جبتني هنا علشان تقول لي كلامك دا بس ولا عشان حاجة تانية؟؟
_ما أنا جاييك أصبر لي الأستعجال ما حبابو ههههه أنا عندي معلومات يمكن تفيدكم علشان تقدرو تصلو للمجرم
_حلوو طيب أحكي يلا
وسام حكى ليهو كل حاجة عن فاندام وعلاقتو بأبوهو وأمو وأخر حاجة قال ليهو:أنا أكتشفت الحاجة دي بالصدفة بعد ما لقيت لي ورقة محروقة فيها أسم فاندام وضغطت علي أمي لمن حكت لي كل حاجة
_أحنا القصة دي كلها عارفينها وعلى فكرة فاندام دا واحد من اقوى المشتبهين بيهم وأزيدك من الشعر بيت فاندام دا مشترك في جرائم خطيرة ممكن توديهو لحبل المشنقة وأنا واحد من الضباط الكان قبضت علي رجالو وأفشلت صفقتو بتاعت الأسلحة وقبل يومين برضو عندو عملية فشلت بما أنو فترة حظرو إنتهت فانا برجح أنو حيظهر قريب في البلد دي وساعتها حنعرف نتصرف معاهو كييف
_أرجوك يا سامر لو حصل أي حاجة او لو عرفت معلومة حتساعدنا أتصل علي طوالب وأنا إذا لقيت حاجة حأكلمك تمام
_خير يا زول يلا أنا لازم أمشي،، يديك العافية
_يلا في أمان الله يا باش مهندس
سامر طلع من المطعم ودور عربيتو وفات،،كلام وسام عنو كان بتردد جواهو بطريقة أزعجتو،،أيوا هو كان حلم حياتو يقرأ هندسة وكلمة باش مهندس تسبق أسمو بس هي مسخت عليهو حلمو وبسببها حرد الهندسة وأي شئ بتعلق بيها،،ما اتوقع ابدا أنو ممكن يتغدر من أقرب زول ليهو،،بعد العِشرة دي كلها طعنو في ضهرو،،أخخخخ وسام فتح ليهو جروحو اللسع ما أتقفلت بس هو حيفضل يهرب من الماضي لمتين؟؟لازم يواجهه عشان يقدر يعيش حاضرو ومستقبلو كويس،،غمض عيونو وإستأنف ذكراهو
#flash_back
_أسمها بيان كمان لا حول ولا قوة إلا بالله
_أحييييي لو كنت عارفهها راكبة معانا كان دفعت ليها البابور دا مكسرني للدين يا مان والله مستعد اعمل أي شئ عشان تكون معاي ياخ دي جالخة الدفعة كلها ومدشدشة ميتيين السناير كلهم
_يااااا زول العاجبك فيها شنو مفترية وشايفة نفسها ساي
_من حقها تفتري كان دي خلقتها بت زي شاي الصباح
_هووبا قول باااااع
_أبيييت يا زول ما بقول
_هههههههه سمح
ومرت الأيام وسامر إتلاقى مع بيان كم مرة وكان هو الببادر أنو يتكلم معاها وهي بتتجاوب بسيط بس مع مرور الأيام أتعودت عليهو وبقو أصحاب سامر وبيان ومهيب ورنا،،رنا دي صحبة بيان الأنتيم أتعرفو علي بعض في الجامعة وبقو ما بتفارقو،،المهم في نهاية السنة بعد الأمتحانات سامر قرر يعترف لبيان بحبو وفعلا أستنى بعد ما بيان خلصت بعدها أعترف ليها بحبو وهي طلعت برضو بتحبو وبكدا علاقتهم إتحولت من صداقة لحب،،مهيب لمن عرف قال ليهم بمزاح:أها انتو كمان ربطتو وفضلنا انا ورنا ديل سناجل بائسين زيتنا مارق،،بيان قالت ليهو:خلاص ربطو أنتو كمان ولملمو شتات بعض،،مهيب قال لرنا:شوفي يا رونا من هسي أكلمك أنا باكل فسيخ وملوحة وقراصة بالدمعة وقرع
_قرررررع يععع بكرهو موت أكل السم ولا أكلو هو
_يعني أنت خليتي الفسيخ والملوحة وقلتي للقرع المسكين يعع؟؟شكيتك لي الله
_هووي يا زول راجل بيأكل حاجات زي دي ما بينفع معاي طلقان بالتلاتة
_ينطلق فيك مدفع قولي أميييين هو أنتي لاقياني وين عشان تأبيني شوفي الجاحدة دي بالله
_هوووي ما دايراك انا بي زولي منو القال ليكم اني سنجل بائسة،،بيان قالت ليها:أوباااا معناتو رجعتي للex تاني
_برررري داك نسيتو زمان هسي دا واحد جديد وقريبا حتعرفوهو  وحتتفاجأو هههههههه
_هههههه سمح إتشوقنا نعرف سيد ريدك دا
_كل شئ في وقتو حلو يا بيب
سامر قال ليهم:رأيكم شنو الليلة نمشي نتغدى في مطعم بما أنو الليلة اخر يوم وكدا
_أوكيييي حبيبي أنا موافقة
مهيب قال ليها:حبيبي؟!!أوعى يا رنا بتتدقي
_هههههه وريها بالله العفنة الشلابة
_أشلب منو يا زولة هووووي براهم بجوني أنا ما بشلب زول ههههه
_طيب طيب يلا أمشو قدامي
ركبو عربية رنا ومشو أتغدو في مطعم بعدها مشو شارع النيل قعدو لحدي العشاء وبعداك أي واحد رجع بيتهم
مرت الأيام ونتيجة الشباب مرقت وكلهم نجحو الحمدلله لكن كانت المفاجأة أنو الجامعة قفلت لحين إشعار أخر،،سامر ومهيب متعودين علي حركات الجميلة دي بس بيان ورنا كانو متجرسيين بس تاني أتقبلو الواقع وبقو كلو يوم قاضينها طلعات ومطاعم وجيب الأولاد إتقد عديل المهم علاقة سامر وبيان كانت ماشة سمن علي عسل لحدي ما جاء اليوم القى فيهو رسالة غريبة من بيان كان محتواها (يا خاين يا غشاش ملعون ابو اليوم الشفتك وحبيتك فيهو تفووو عليك بكرهك) سامر ما أشتغل كتير بالرسالة وكان فاكرهها بتهظر معاهو بس لاحظ انو الأون لاين بتاعها ما ظاهر والبروفايل كان مافيهو أي صورة جرب يرسل ليها كم رسالة بس ما أستلمتها وهي بتكون أونلاين علي طول،،أستنتج أنو بيان حظرتو وهي كانت جادة في كلامها،،أتصل ليها10مكالمات أبت ترد،،رسل ليها مسج smsبقول:لو ما رديتي علي مكالماتي حأجيكم في بيتكم هسي أنصاص الليالي دي وما حيعجبك الحيحصل،،رجع أتصل ليها تاني ولقى تلفونها مغلق،،لبس هدومو وفعلا مشى بيتهم لقاها واقفة في البلكونة متوترة أول ما شافتو جرت جري ونزلت ليهو وقالت ليهو بغضب:أنت الحابك هنا شنو امشي سريع لو أبوي شافني الليلة بضبحني
_ما حأمشي مالم توريني كلامك دا شنو كيف كذبت عليك وغشيتك يا بيان؟
_وكمان ليك عين تسأل يا غشاش يا منافق تغفلني وتخونوني انت وصحبتي قصرت معاك في شنو لامن تمشي تغدرني وتحب رنا؟؟أنا بكرهكم انتو الأتنين وما عايزة أشوف وشكم تاني
_دا شنو التخاريف البتقولي فيها دي أنتي نصيحة ولا مسطولة يا بت أنا بحبك أنتي وبس وما حأحب غيرك أبدا
_كذاااااااااب ومنافق كلكم كدا
_طيب أثبتي لي أننا خناكي رنا هي القالت ليك الكلام دا بنفسها؟
_لا بس في واحد رسل لي صوركم أنت ورنا حاضنين بعض في الواتس
_شنو شنو انا ورنا حاضنين بعض؟؟أنتي جنيتي ولاشنو يا بيان
بيان فتحت تلفونها وورتو الصور وقالت ليهو:طيب دا شنو يا أستاذ
سامر أندهش وقال ليها:دا كان يوم ضربت لي وكانت متشاكلة مع أخوها وأنا حضنتها عشان أسكتها لأنها كانت بتبكي شديد وما عارف الزول الصورنا دا مصلحتو شنو يعمل كده بس شكلو علاقتنا دي ما عاجباه وعايز يخربها بأي طريقة
_حتى لو زعلانة وبتبكي ما من حقك أنك تحضنها في مكان عام كدا هسي لو واحد من اهلها شافكم سوا ؟؟
_ما عارف يا بيان أنا عملت كدا لييه بس كانت بتبكي بطريقة تحنن بس المحيرني دا منو الصورنا ومصلحتوا شنو؟؟
_هدي المحادثة هاك شوفها
بيان ورتو المحادثة،،سامر شافها وعاين للرقم إتصدم وقال ليها:دا رقم مهيب الجديد والله بتذكر كان مقلبني بيهو قبل شهر،،أيوا صح مهيب بحب الهظار زي عيونو بس ما للدرجة دي،،طيب هو لييه يعمل كدا ومصلحتو شنو أنو يخرب علاقتنا،،أنا ما عايز أظلمو معاي بس ماف مبرر لعملتو دي
_يعني مهيب سبب البلاوي دي كلها؟عملنا ليهو شنو عشان يفتن بينا كدا
_ما عارف يا بيان والله رأسي جاط وحيلي بقى ما شايلني أنت أدخلي جوه هسي وأنا بكرا حامشي افهم منو أي حاجة
_طيب يلا تصبح علي خير
_وأنتِ من أهلو
سامر مشى بيتو وهو ما فاهم حاجة معقول صحبو يعمل فيهو كدا بس حيستفيد شنو لو خرب بينو وبين بيان،،إتذكر كلامو في المواصلات لمن قال ليهو:أنا مستعد أعمل أي حاجة عشان تكون معاي،،هل يعقل انو هو كان جادي في كلامو وفعلا عمل كدا،،لعن الشيطان وقرر أنو بكرا حيجتمع بيهو كلهم عشان يقطع الشك باليقين،،الليل كلو كان بتقلب في السرير وما قادر ينوم،،كان مستنى متين الصباح يجي عشان يفهم كل حاجة إتمنى أنو يكون مقلب سخيف من مهيب وفي النهاية حيعتذر ليهو ويستمرو عادي بس كلمة واحدة من مهيب خربت كل حاجة وعشرة 4سنة ضاعت في اللحظة القال فيها:أنا ما ندمان لأني سويت كدا ومعترف أني انا الصورتكم ورسلت الصور لبيان،،سامر ضربو بونية ومسكو من لياقة قميصو وقال:يا خاين يا كلب انا سويت ليك شنو عشان تغدرني بالطريقة دي ياخ انا كنت معتبرك أخوي الما ولدتو أمي
_عارف انا عملت كدا لييه يا سامر؟لأنك أنت أي حاجة عاوزها بتجيك لحدي عندك؟عندك قروش ووجاهة وأي شئ،،أنا عشت شقيان طول عمري بلم في مصاريف الجامعة والمواصلات حتي مرات كنت ما بجي الجامعة بسبب انو ما عندي قروش تكفيني وكنت بتحجج بالمرض أو أي شئ عشان ما أجي،،لييه انت يكون عندك أي حاجة وأنا لا ذنبي شنو أعيش كدا ياخ انا فترت مراهقتي وشبابي قضيتها كلها شغل وشايل هم مصاريف البيت وأبوي ما همو حاجة غير السكر والنسوان،،حتى البت الحبيتها أنت اخدتها مني وأنا ساكت بتفرج تتذكر وكت قلت ليك في الحافلة أنا مستعد أعمل أي حاجة عشان تكون معاي دا كان تحذير ليك عشان ما تتقرب منها بس أنت عاندت وجبرتني أسوي ما دام ما حتكون لي ما حأخليكم تتهنو سوا،،بيان ضربتو كف وقالت ليهو:أنت أكتر واحد سافل وواطي شفتو في حياتي غدرتنا كلنا وطعنتنا في ضهرنا وأستخدمت رنا وأستغليتها عشان تحقق مصالحك يا ندل،،في اللحظة دي رنا إتوترت شديد وما عرفت تسوي شنو،،جات أدتو كف وقالت ليهو:أمسح الصور دي من تلفونك فورا وإلا ما حيحصل خير أنا ما قادرة أصدق زاتو ياخ أنت كيف عملت كدا أ أنا ما قادرة أصدق وعملت نفسها منهارة وكانت عايزة تمشي بس مهيب وقفها وقال:ماشة وين يا حلوة أنت دورك لسع ما جاء من اللعبة عايزة تهربي كدا وتخليني براي في وش المدفع لا تتحاسبي زيك زيي وأنا حأحكي ليهم كل حاجة وأكشفك علي حقيقتك
_تعبانة وعايزة امشي البيت ولعبة شنو البتقولها دي ما تدخلني في البلبلة دي يا زول
سامر قال ليها: لييه مستعجلة كدا يا رنا ما تقعدي خلينا نتم الرصة
_اها أ أ لالا ما بقدر والله ماشة أنا
_لا تمشي وين الفيلم لسع ما بدأ كدي أسمعو كلامي دا يا سامر وبيان شايفين البت القدامكم العاملة فيها بريئة دي هي سبب المصايب كلها هي الخططت لدا كلو وأتفقت معاي أنو أنا أصورها هي وسامر وأرسلها لبيان عشان تقطع علاقتها بسامر زي ما أنا عايز بيان رنا عايزة سامر وهي الأقنعتني أنو نفرقكم عشان مصلحتنا أحنا الأتنين بس ما أستفدنا حاجة غير خسرناكم كأصحاب قبل ما تكونو أحباب ما حأشيل الليلة براي والله عشان كدا أنا بطلب منكم تسامحونا وتاني ما حتشوفو وشنا مشى وساق معاهو رنا،،بيان وسامر كانو مصدومين في أصحابهم وما مصدقين الحاصل في لحظات بس كل حاجة إتغيرت ،،الموقف دا كان كفيل بأنو يغير منحني علاقتهم ويحصل بيناتها برود وجفاء وفعلا من اليوم داك تاني ما شافو مهيب ورنا حتى لمن الجامعة فتحت كانو بتجنبو يلاقو بعض ومرت السنين وسامر أتخرج بتقدير ممتاز ومهيب أعتذر منو وسامحوهو ودا كان اخر يوم ليهو في البلد دي لأنو مسافر قطر عشان يشتغل بالرغم من العملو معاهو بس سامر ما كان هاين عليهو صحبو ومشى ودعو في المطار وبكى معاهو وحتي بيان سامحت رنا بس ما بقو صحبات زي زمان وبعد سنتين بيان قررت انها حتتخصص في الصحافة الإستقصائية وسافرت لندن لأنو المجال دا هنا ما موجود كتير وسامر عمل الماستر بعدها فجأة خلى الهندسة وخشى الشرطة وبيان سافرت مصر عشان تشتغل ومن ساعتها ما شافو بعض إلا في سوبا،،بس هل يا ترى كدا قصة حبهم أنحكم عليها بالأعدام ولا القدر لعبتو شنو؟؟
ـــــــــــــــــــــــــــــــــــــــــــــــــــــــــــــــــــ
بعد صلاة العشاء رئبال إستفرد بسديم وحكى ليهو كل حاجة،،سديم إتفقع بالضحك وقال ليهو:وقعت وما سميت يا صحبي،،يعني عمار بحب لتين ولتين بتحب رئبال وأنت بتحب منو؟؟
_أمممم دقيقة أعدهم ليك ديبيكا بادكون..لينا..إليسا..شيرين عبدالوهاب..نانسي عجاج..ليدي قاقا وليدي بق الدعسوقة..ومودة الحنيناااااووو أهم شئ
_يااااخ خليك جادي شوية يا رئبال أحنا هسي في مناقشة هامة عشان نعرف إستيراتيجبة وإيدولوجية قلبك الحجر دا
_شوف يا سديم عشان أكون معاك واضح لتين دي أنا لا بحبها لا بكرهها يعني نص نص وما مستعد أدخل في علاقة وهمية وعابرة ساي كدا بالبلدي كدا أنا ما عايز اكون بديل أو منظر ساي يتكاوو بي
_دا شنو كلامك دا يا زول ما تعقد الموضوع قلت ليك عرسها ما هو كلها كلمتين وبس
_تتذكر كان وكت فؤاد حكى لينا عن حبيب لتين الخلاها من فترة وهي كانت منفسنة بسببو وفي اللحظة ديك انا دخلت حياتها وهي طوالي حبتني يعني أنا نزوة منها ساي يا حبة فاهمني؟
_يا رئبال يا حبيبي ماتبقى جاحد وترفس النعمة لو ما عايز البابور دي باصيها لي طوالي بس يا فردة وأنا اخليها تنساك في يومين بس
_والله لو بيدى أديها ليك في فتيل ما تغلى عليك لكن برضو نراعى لمشاعر البت كدا ما صاح
_اااهااااا قول لي دايرها بس ما تتحجج لي
_ياااخ يا سديم ما عارف والله ما قادر أرسى علي بر أنا
_الله يهون يا صحبي قلبي معاك والله
ـــــــــــــــــــــــــــــــــــــــــــــــــــــــــــــــــــــــــــ
#في الصباح........
وسن كانت خلصت من عروستها الحزينة وورتها لبيان وسهى وهم إنبهرو بيها شديد،،بيان قالت ليها:وااااو فظيعة فظيعة يااااخ أنتي مبدعة والله
_ما للدرجة دي ياخ أنا شايفاها عادية ما واو للدرجة ديك،،سهى قالت ليها:بيبي دائما الزول البعمل الحاجة بشوفها عادية حتي لو هي في نظر الناس واو لكن بصراحة عروستك خنفشارية شديد لكن لاحظت حاجة عندها شبه من بيان هههههههه صح؟
_هههههههههه أيوا أنا عملت العروسة دي شبه بيان لاحظي العيون الزرقاء والشعر الأشقر وكدا
_علي فكرة أنا عيوني سوداء وشعري أسود فاحم كمان لكن النيولوك دا كان عملتو في مهمة في القاهرة وعجبني وخليتو لكن انا مليت منو وحأغيرو قريبا
_أي أي بكون كدا احسن انا زاتي عايزة أقص شعري حبة وأتحنن
_أوكيييه نمشي بكرا أو بعدو تمام؟
_ظاااابط يا مزة،،وسن قالت لبيان:أنا عملت العروسة ديك علشانك ممكن تأخديها كتذكار مني ليك
_واااااي بالجد لووووف يوووو يااااخ حبيبي
(حأنزل ليكم صورة توضيحية للعروسة البائسة عارفكم ما حتكون وقعت ليكم الشغلانية دي)
تاني بقو يتونسو عن الموضة والأزياء وحاجات البنات الما بتخلص دي،،سهى قالت ماشة تشرب موية وتجى وبيان ووسن لسع بتونسو،،سهى جات بعد ربع ساعة وملامحها ما بتتفسر وقالت لوسن بصوت مبحوح:مرت خالك وخالتك منتظرنك بره وقالو ليك لو عندك أي حاجة شيليها وتعالي،،وسن فرحت ونططت وحضنت بيان وقالت ليها:سامحوني خلاص أخيرا يا بيان حأقدر أرجع لأهلي وأعيش معاهو،،بيان قالت ليها:وأحنا ما أهلك برضو؟
_لا انت أهلي وربي معزتكم عندي غالية شديد وما حأنسى معروفكم دا معاي طولة حياتي وبدو يبكو ويعزو مع بعض،،بعد ساعة حتى نزلو لقو خلود وثويبة قاعدين ،،وثويبة طول شبكتها:ساعة منجحرة جوا بتسوي في شنو مش احنا رسلنا ليك وقلنا ليك لمى حاجاتك وتعالى سرعة
_أسفة بس كنت بودع بيان وبلملم في حاجاتي،،خلود مسكت ثويبة وقالت ليها:براحة عليها ما كدا يا ثويبة أهدي ياااخ،،ثويبة إنتفضت منها وقالت ليها:أهدي كيييف يا خلود والبت دي غير البلاوى ما جايبة لينا حاجة ياخي أستحى علي نفسك وأختفي من حياتنا ما بكفيك انك كتلتي أختي بالمغصة كمان هسي دايرة تجيبي لينا اللوم كتلتي راجلك وجيتي تتدسى في بيوت الناس يا كتالة يا مجرمة وأصلي أنا ما بلوم حنان علي تصرفها لأنو انتي تستاهلي وهي ما ملزمة بيك العفن مننا وفينا ذنب الناس شنو تتبلى بيهو أنتي عارفة يا بت سعاد أنا لو على أخنقك وأرتاح منك دائما فاضحانا وشارطة عينا قدام وأنحنا هسي جاين نسوقك ما حبا فيك لا عشان أحنا ملزمين فيك ما ناس تانين شفتي خالتك حنان دي إتصلت علينا وورتنا بالواضح كدا قالت ما دايراك في بيتها ولا ثانية

يتبع.....