مراهقون و لكن

٢٦

" أيها الظالم المستبد،،كن علي يقين بأنك ستعاقب علي كل جرائمك النكراء التي ظننت أنك قد أفلت منها ونجوت بفعلتك،،نحن الثوار الأحرار سنقتلعك إقتلاعا من أرضنا وسنناضل حتى أخر رمق في حياتنا،،صدقنى لن تستطيع معنا صبرا فنحن ذوو القضية لا نتعب ولا نمل والله الناصر معنا...♡ "
ـــــــــــــــــــــــــــــــــــــــــــــــــــــــ
يمنى قفلت الفيديو وقالت ليها بصوت مبحوح:أسفة
بيان ردت ليها بنفس الصوت المبحوح:مافي داعي تتأسفي أصلا كدا كدا كنت حأشوفها
_أيوا بس شفتك إتأثرتي شديد وأنت بتشوفي الفيديوهات بيان لو ما بتقدري حاولي ما تشوفيها بأي شكل يعني ما تحضري قناة الجزيرة والحدث أو أي قناة تانية بتجيب أخبار السودان وحاولي ما تخشي الفيس الفترة دي
_لا لازم أشوف لكن والله قلبي وجعني عليهم شديد ياااخ شباب صغار في عمر الزهور ما شافو للدنيا شئ وابشع حاجة الجيش الكان بتفرج فيهم وهم بقتلوهم زي الحشرات هم جو عشان يحتمو بالجيش بس للأسف خذلونا وطلع ما عندنا جيش نافع
_ما كلهم والله يا بيان وقفة النقيب حامد معانا ما حننساها طول حياتنا ولو هو ما كان حمانا يوم7 إعتصام القيادة العامة ما كان حيستمر وحتبقى مجزرة 7أبريل
هنا سهى ياداب أتكلمت وقالت ليها بوجع:حامد يا جامد ويين دفعة حامد كلو ما أتذكر الهتاف دا والمشهد الكان فيهو ماسك الدوشكا وموجهها علي افراد الجهاز جسمي بقشعر في اللحظة ديك كانو الثوار محاوطينو زي الحصن في التاتشر وحامنو بأجسامهم وفي واحد ربط ليهو علم السودان في رقبتو حسيتو بشبه بطل من أبطال مارفل ودي سي صورتو بالوضعية دي وبعدها سجلت فيديو بحضر فيهو للأن وبدعي أنو ما يحصل ليهو حاجة ويكون بخيير
يمنى قالت ليها:أنا كنت حاضرة وقت إنصاب في يدو الشمال ياااخ ما ممكن تتخيلي قدر شنو هو زول راكز والله لو كان في 100نفر زيو في الجيش بس كان السودان حيكون بخير
_اليوم دا كان مشؤوم حرفيا لأنو خسرنا فيهو مآب وتبيدي وكم فرد من شرفاء القوات المسلحة
_كان نفسي أحضر الأيام ديك وربي،،يمنى قاطعتها:أنا بس دايرة أعرف لييه الناس كلها مركزة مع فض الأعتصام وناسيين معاناتنا في ال4شهور الأولى من الثورة عشنا فيها كمية بتاعت هلع وخوف وإتعرضنا للقمع سواء من الناس الكانو بحبطونا وبقولو لينا الثورة ما حتنجح وحيحصل ليها نفس الحصل في2013وما حنغفر للكجر والأمنجية الكانو بضربونا وبعتقلونا بس في سؤال محيرني أحنا كنا بنجيب القوة دي من وين??بالرغم من عددنا البسيط وبالرغم من عدم التشجيع وكسر المجاديف الأتعرضنا ليهو إلا أنو كنا مستمرين وبنواصل مع كل شهيد يسقط مننا كنا بنعاند زيادة وبنتمسك بثورتنا أكتر لحدي ما الناس أمنت بالقضية وعرفت أنو خلاص تاني مافي حاجة حتوقفنا وطلعنا كلنا الشارع في موكب مهيب يوم6أبريل حرفيا ما حأنسى اليوم دا طول حياتي
_يا جماعة يعلم الله أنا ياداب حسيت أني بحب البلد دي شديد وفخورة بأني سودانية وربي لو ما كنت سودانية كان إتسودنت برااي ههههههههه
_بيان مافي زول فينا ما بحب بلدو ومهما كان راحتك ما بتلقاها إلا في وطنك ووسط أهلك وزي ما قال الشاعر بلادي وإن جارت علي عزيزة وأهلي إن ضنو علي كرام
_أي والله علي قولك تاني باي باي يا مصر صاباها هنا دا بلدي أفوتها وين تاني عااااد
_ههههههههه سمح بس حتتجرسى من قطوع الكهرباء والموية أما موضوع الصفوف دا ما بحتاج أتكلم عنها طبعا
_يا بت التنظيم أهم حاجة يقطعو الكهرباء يجيبو الموية وهكذا....
_عااااد أنتي شايلاك الهاشمية ساي يا بيان بكرا تعرفي كلامي دا كويس
_يا زولة هوووي بلا هاشمية بلا عنترية أسكتي ساي بس
بعد شوية يسرى جات داخلة لقتهم بتونسو قالت لبيان:المجنونة دي أكيد ماعطاك بالثورة وبتاع حيرتنا البت دي التقول فاطمنها ببمبان جنها ثورة
_هههههههه لالا عادي ما ماعطاني ولا حاجة بالعكس أنا مستمتعة بكلامها دا شديد
_أوعى تملأ ليك رأسك بالكلام الفارغ دا وتجرك معاها
_أنت مالك محسساني أني رئيسة شبكة إرهابية وبقنعها عشان تنضم لي?
_عشان بيان ما بتعرف الحاجات دي ولا شبهها
_يعني أنا شبهها??
_أنت ما زيها أنت مخطوبة وقريبا حتبقي علي زمة راجل فشنو سوي التسوي ما لي دعوة طالما بتأخذي أذن أبوك وخطيبك
_خطيبي دا أنا ما بعمل حاجة من وراهو وهو عارفني بطلع مواكب وهو زاتو بطلع معاي وما بخليني وأوريك حاجة هو الشجعني في البداية ولولاهو ما كنت هسي حأطلع وأبقى قوية كدا أنت طبعا ما يحتاج أوريك زمان كنت خوافة كييف ولو في زول حمر لي ساي كنت ببكي أما إبوي زيو زي ناس زمان وموقفو معروف شنو من البيحصل دا وطالما نبيل معاي ما حيجيني شئ وما تنسى أنو أنا ساكنة البراري أسطورة الثورة بلا فخر
_ويعني شنو لو ساكنة بري خلاص معناتو لازم تبقي مطلوقة زيهم
_يا زولة خليني في الفيها ما عندك شغلة بي
_ببسسس عليك كريهة دي إن شاء الله تولعي بجاز أنا مالي ومالك هسي نسيتيني مرسالي الجاية عشانو زاتو..سهى أمي قالت ليك تعالي سوي الجبنة لمحمد أخوي عشان بشربها زي الساعة دي،
سهى كانت راقدة ولمن سمعت كلامها دا قامت وقالت ليها:قولي ليها حاضر هسي بجي
_أنا ما خدامة عندك عشان أترسل ليك أمشي لشغلتك وخلي الرقاد بدل ما منبطحة لي في السرير كدا زي المرة النفساء وفكت ليها ضحكت إستهزاء كدا ومشت
يمنى قالت ليهم:أجججي دي مالا هسي بتضحك كدا
سهى طوالي مشت عشان تسوى الجبنة لمحمد راجلها وبيان ويمنى واصلو ونستهم عادي
_يسرى أختي دي خوافة خوف ما تشوفي لسانها القدر شارع المطار دا ما حصل طلعت ليها موكب وأنا كنت بحنس فيها تحانيس لكن كانت بترفض مع أنو حلتنا كلو يوم خميس بطلعو لكن هي يوم الموكب من عتبة البيت دا ما بتمرق
_هههههه بالجد?أها البرنامج دا لسع قائم ولا الفهم شنو
_كيييف يا بت بالعكس الناس بقت مصرة عليها زيادة كمان
_خلاص تاني أنا معاكم لكن ما تجيبي سيرة لسهى أختي حتقتلني لو عرفت يوم 30يونيو بالعافية حتى وافقت لي
_لالا أطمني خلاص منتهى
_سهى تاني ما حتفضى للمواكب والجو دا بما أنو محمد زوجها قاعد لكن الحمدلله هسي لقيت لي رفيقة مواكب ههههههههه
_أنتي شكلك موضوع الثورة دا لاحس عقلك
_أسكتي ساااي يا بت دا عامل لي هوس عديل
_قدااااام أنتي زولتي تاني يا بيب
_نسوطها ونجوطها سوى ورانا شنو هههه
أما بهناك في جانب سهى نزلت تحت لقت أم محمد قاعدة في الهول وماسكة سبحتها،،كانت عايزة تمشي طوالي بس حماتها وقفتها وقالت ليها:أنت وين من قبيل يا بت مش بنادي ليك
_قاعدة جوة مع بيان ويمنى يا مرت عمي
_العمى إن شاء الله قاعدة منجحرة جوا بتسوي في شنو ما تجي تعملي القهوة لراجلك ولا أقوم أسويها أنا دي عاااد مرة لا بتلد لا بتخدم راجلها دي يودوها ويين أنت شكلك دايرة ليك فوقك ضرة عشان تتأدبي وتنعدلي لكن أصبري لي أنا بعرف أربيك كويس
سهى العبرة خنقتها وما قدرت ترد علي كلامها طوالي جرت علي المطبخ وبقت تسوي في الجبنة وتبكي وتتذكر في كلام أم راجلها الحار الكانت بتعايرها بعدم الولادة كل يوم بصورة متكررة
أثناء ما بتصفي في الجبنة محمد جاء خاشي وفي يدو كريستالة كبيرة بتاعت موية زمزم ختاها في التلاجة وقال ليها:دي جبتها هدية ليك أنتي ما تدي زول معاك فيهم كلهم أديتهم أنا كويس؟؟
لمن ما سمع ردها عاين ليها ولقاها بتمسح في دموعها إتخلع وقال ليها:حبيبي أنتي بتبكي??
_لا بس دي الحساسية بتخليني أدمع كدا
جاء عليها وقال ليها بشك:من متين عندك حساسية في عينك أنتي؟
سهى إرتبكت وقالت ليهو:ما هو جاتني قبل كم شهر
سهى عايني لي في عيوني دي رفع ليها رأسها وقال ليها:ممكن تكذبي علي أي زول إلا أنا ما حتقدري لأني بعرفك كويس يلا أحكي لي منو الأتكلم معاك وزعل لي عسلي دي
_ما عايزة أخلق مشكلة من مافي فعشان كدا أنسى
_ما تقولي لي أنسى وبتاع ما حأنسى يا سهى والله وما حأخليك إلا توريني مالك
_طيب يا محمد مش عايز تعرف أنا كنت ببكي لييه عشان كنت قاعدة جوة مع بيان ويمنى بتونس وما سويت ليك القهوة فأمك شاكلتني وأخر حاجة قالت لي مرة لا بتلد لا بتخدم راجلها يودوها وين وكمان قالت لي لازم محمد يدبل فيك عشان تتأدبي أنا تعبت والله من كلام الناس ومطاعاناتهم لي بحسسوني أنو أنا المانعة نفسي من الإنجاب والله لو بي يدي أجيبهم ليك دستة بس الله ما أراد لي أسوي شنو يعني?
محمد ضماها عليهو وقال:ما بهمني كلام الناس عنك والله أنا بحبك وأخترتك أنت وما شايف غيرك ومالو يا ستي لو ما جبنا أطفال الدنيا خربت? عمرو الزواج ما كان عيال وبس في ناس كتيرة ما أنجبت ومستمرين في حياتهم الزوجية سمن علي عسل وعشان تكوني عارفة أحنا ما مستعجلين وكلو حاجة بيد الله أما بالنسبة لكلام أمي فما تركزي معاها كتير هي أصلا بترمي الكلام وما بتكون قاصدة كلامها سامحيها عشاني وأمسحيها لي في وشي أنا أوككي حبيبي?
_لو بتعرف قدر شنو بحب كلمة حبيبي دي لمن تقولها لي بتخليني أنسى أي حاجة يااخ طالعة منك زي العسل أوعى أسمعك تقولها لزول غيري وربي بكتلك
_حتى لو قلتها لي بتنا الحتجي??
_محمد العرفك شنو أنو حتجينا في المستقبل بت
_أممممم لأني عايزها تطلع زيك في الطبع غيورة وحنينة ومجنونة أهم شئ طبعا
_مجنونة في عينك أنا عايزة ولد يشبهك ويشيل جيناتك الوراثية كلها
_ديششششااااك معناتو حيكسر المزز كلهم فيهو
_ههههههههههههه واثق من نفسك يعني
_أيوا طبعا لازم أهم حاجة
_محمدي
_عيون محمدك
_أنت ليييه كدا
_كيف يعني ما فهمت؟
_بتعاملني بطريقة مختلفة عن باقي الرجال وكلو مره بتخليني أحمدالله أنو أتزوجتك حرفيا مع كل كلمة بسمعها منك بتأكد أني أخترت صح ويا بختي بيك زوج وشريك وود عم
_أنا بعاملك كدا عشان أنتي مرتي الكلبة البحبها شديد
_محمد يااااخ جادة أنا
_حبيبي إتذكري أنك متزوجة راجل ما زول أي كلام وخلاص ويكون بعلمك أنو أنا المحظوظ بيك ما أنتي فهمتى يا قلبي??
_واااي منك ياخ الله لا يحرمني منك في يوم وووبعلي وووبعلي من سماحتك التهبل دي
_أممممم بعد سمحاتي دي كلها ما حتديني حاجة حلوة في خدي،جرتو من لحيتو وقالت ليهو:محمد بطل يااخ هسي لو شافنى زول حيقول علينا شنو،قرب منها وقال ليها:مش مرتي حلالي مافي زول حيقدر يمنعني وقرب منها أكتر بس قطع كلامهم صوت عباس وهو بنادي علي محمد،سهي طوالي ناولتو الجبنة وقالت ليهو:
أبوك راجي الجبنة وأحنا قاعدين نرغى هنا كلو بي سببك أنت جيت ولخمتني بالكلام
_أنتي بتشتغلي بخشمك ما بتعرفي تتكلمي وتستغلي وتجي تختي اللوم علي أنا
_خلاص خلاص أسفة يلا أمشي
أدتو الحاجات وفضلت قاعدة ومبتسمة براها إبتسامة خاصة ما بتبتسمها إلا لمن يكون محمد موجود
ـــــــــــــــــــــــــــــــــــــــــــــــــــ
#في جانب أخر......
فتح عيونو ببطئ ولقى نفسو في المستشفي وحوالينو أمو وأخواتو الأتنين،ما كان عارف هو جاء هنا متين والحصل معاهو شنو بالضبط،،مسك راسو وبدى يتذكر الحصل تلقائيا، لبس هدومو وطلع بعد ما اللواء حسان إتصل عليهو وقال ليهو انو جاتو معلومة عن مكان وجود فاندام وهو أتحرك طوالي،قلبو إنقبض شديد لمن إتذكر كيف صاحب عمرو#زاك ضحى بنفسو ووقف قدامو وإنضرب بالرصاصة بدلو،ساعتها بقى يبكي بحرارة علي خسارة صاحبو وأخوهو الوحيد،أمو إتخلعت وبقت تهدي فيهو بس ما قدرت أما هو فكان مواصل وبقول من بين دموعو:مات بسببي ز ز زاك حماني وأتقتل بدالي يا أمي أحنا كنا في أي حاجة مع بعض ليييه يمشي ويخليني بالطريقة دي؟؟ يا ريت لو مت معاك يا صحبي تاني أنا أهظر مع منو ولا إتشاكل مع منو يا أمي الدنيا دي لييه دايما بتقلع مننا الناس البنحبهم لييه دايما معاكسانا وبتعاندنا علي أي حاجة بنعملها أنا تعبت والله الفيني كملت حرفيا يا أمي أنا حأجن أقسم بالله الأتحملتو مافي بني آدم حيتحملو تعبت من تمثيل دور القوي والشجاع أنا زول ضعيف وهش شديد يا أمي
_يا ولدي أصبر وما تنهار كلنا بنمر بظروف وفترات صعبة بس لازم نستمر زكريا دا كنت بعتبرو ولدي زيك واحد يشهد الله موتو واجعنى وحارق كبدتي لكن الحياة كدا يا ولدي ما دايمة لزول كلنا ضيوف ومصيرنا نمشي ونخليها
_أمي انا ما قادر أتقبل فكرة
أنو زاك مات خلاص يا أمي مش هسى كنا بنضحك سوا متين فات وخلاني براي يا أمي أنا حاسي بوحدة قاتلة ما عارف حأواجه الدنيا دي من دونو كييف؟؟
_يا ولدي قول إنا لله وإنا إليه راجعون ما غالي علي ربو
سكت وإنقلب علي جهة الحيطة وذاكرتو رجعت لمكان الحادث...
#flash_back
#قبل_كم_ساعة
صوت تفحيط عربية نزل منها
الرائد عثمان ومعاهو سامر وزكريا وكم أفراد تانيين جاتهم معلومة مؤكدة بأنو
فاندام شخصيا حيعقد صفقة كبيرة في واحدة من المناطق المهجورة القريبة من الخرطوم وبعد تحريات قدرو يحددو المنطقة وحاوطوها من كل الجهات ما كان في أي اثر لوجود عربية او شاحنة بس في مخزن قديم كانت مفتوح وطالع منو صوت الرائد عثمان أشر للمعاهو أنو يجو وراهو بدون ما يعملو صوت في اللحظة دي فاندام كان فوق المبني ومعاهو قناص أستعد عشان يضرب بعد ما فاندام أداهو الإشارة صوب على إتجاه سامر الكان واقف وما جايب خبر للوراهو بس زكريا قبل وراهو وشاف المنظر دا وما كان عندو وقت عشان ينبه صحبو رجلو ساقتو تلقائيا ووقف قدام سامر بكل بسالة واحتضن الرصاصة الأستقرت في نص صدرو ،سامر أول ما شاف المنظر دا حسى بأنو قلبو حيقيف صديقو وأخوهو مضروب رصاصة كانت مفروض تضربو هو بس حماهو،صررخ بأعلى صوتو:زاااااك،أشر ليهو بأصبعو وقال بتثاقل:فان دام ه هرب،سامر عاين فوق العمارة شافو بركب في المروحية وحيهرب بس الوقت ما حيسعفو عشان يحصل فإستسلم وقال ليهو بصوت مبحوح:ليييه بس يا زاك تعمل كدا؟؟
_لأنو أنت الحياة ق قدامك لسع لسع طويلة خلي بالك من الوطن وما أوصيك بتي ومرتي أمانة في رقبتك يا سامر وبدى يكح ويتأوه بعدها أحتسب مع الشهداء بإذن الله،سامر جاتو صدمة وبقى يهز فيهو ويقول:زاك زاك أصحى يا زاك بطل هظار ياااخ عارفك انا بتاع حركات
الرائد عثمان قال ليهو:أتعقل يا سامر زكريا خلاص مات
_ما ماااات قولت ليك هو حي دا شنو كلامك الفاضي دا كيف حأقدر احمى الوطن بدونك؟صدقني أنا بلاك ما بكون ولين حتتقبل فكرة انو ابوها مات كيف انت عارفها متعلقة بيك قدر شنو يا زاك عليك الله أصحى
عثمان جاء قومو وقال ليهو:لا إله إلا الله الكلام ما حيفيد بحاجة يا سامر أدعي ليهو يلا شد حيلك وقوم
عشان نمشي نودي زكريا لأهلو يشوفوهو ونبدا نسوي معاهو اللازم هم السابقون ونحن اللاحقون البقاء لله الواحد الأحد
ــــــــــــــــــــــــــــــــــــــــــــــــــ
#عن بيان.....
بعد ما رجعت البيت مسكت تلفونها وبقت تتصفح في الميديا إستجمعت قواها وخشت الفيس وأول منشور قابلها كان عن فض الأعتصام كان عبارة عن توثيق ضخم للمجزرة أكتر من 59فيديو فتحت اول 5فيديوهات بعدها ما قدرت لكن الحاجة الصدمتها انو الكان بصور الفيديوهات دي كلها زول واحد من الدعم السريع وما كان مغطى وشو كان بظهرو كم مرة ما لقت ليها سبب منطقي هل دا أستفزاز عاطفي ولا لعبة من المجلس ما عرفت كل القدرت تعملو انها إتحسبنت عليهو ونزلت تحت قابلها منشور كمل دموعها كلها والمنشور كان كالأتي: