مراهقون و لكن

٢٥

"المجد للشهداء في عليائهم للأبد....المجد لصدورهم التي أحتضنت الرصاص بلا مبالاة....لأجسادهم التي ألهبتها سيطان التعذيب....لحناجرهم التي طالما هتفت برحيل ذلك النظام الظالم...هنيئا لهم بمحبة شعب كامل....بدعوات أمهات ثكالى....بحياة سرمدية في قلب كل ثائر..وأخيرا اللعنة علي العسكر حيثما كانو"
ــــــــــــــــــــــــــــــــــــــــــــــــــــــ
كان شايل ليهو كباية عصير عشان يديها لأختو قبل ما تمشي الدكتور ،، خبط الباب براحة وبعدها دخل ليها وهو راسم أبتسامة علي وشو بس زالت تدريجيا لمن لقاها منكشمة في الواطة وبتبكي بصوت واطي كباية العصير وقعت منو بدون ما يحس ،، جري عليها وقال:سبأ مالك؟؟ هي عاينت ليهو وزادت في البكى حضنها عليهو وقال بهمس:شششش أهدي حبيبي خلاص في شنو لييه الجميل ببكي من أول الصباح
هي بقت تشهق وتقول:عشان ما ع عايزة أمم أمشي الدكتور
_لازم تمشي الدكتور عشان يساعدك تبقي كويسة
_حسام أنا ما حأبقى كويسة أنا..أنا مجنونة صح؟؟
_دا منو القال أنو أنتي مجنونة؟
_كلهم بقولو كدا حتى ناس فصلي بسمعهم بقولو عني مجنونة وعندها أعصاب للدرجة دي مرضي سئ وما ممكن أتعالج واكون طبيعية زي باقي الناس أنا تعبت والله من نفسي وحياتي وأي حاجة
حسام دموعو نزلت وقال ليها:أنتي ما مجنونة البقولو عليك كدا هم مجانين ومريضين لأنهم بعايروك بحاجة ما ليك ذنب فيها ولو تاني سمعتي كلمة من زول ناديني عشان ادفنو حي ما عاش ولا يعيش البجرح أميرتي دي وبعدين أنا جنبك نسيتيني؟؟ لو في يوم إتضايقتي وأحتجتي لي حتلقيني جنبك ومعاك دايما يا بت أنتي تؤامي وكنتي معاي في نفس البطن وأتولدنا في نفس اللحظة حرفيا أنا ما بقدر أكمل من غيرك ما عايزك تخافي من الموضوع أنا متأكد حتتعالجي وتبقي كويسة
_طيب والأدوية الكانت بتخليني أنسى حادثي أنا وماما أكمل من غيرها كيف؟؟عارف انا أمبارح من ساعة ما وقفتها ما بطلت أفكر في الحصل الأدوية دي الحاجة الوحيدة الكانت مصبراني ومخلياني اعيش من غير ما أخاف وأتذكر الذكرى البشعة ديك أنا بموت بالبطئ يا حسام ،،مسح ليها دموعها وعاين ليها طويل بمرارة وقال:
سبأ دا كلو لي مصلحتك والأدوية دي قاعدة تضرك اكتر ما تنفعك فعشان كدا الدكتور وقفها وقال حيباشر في علاجك بنفسو بدل المهدئات والأدوية يلا هسي يا جميل حنتشجع ونمشي للدكتور ونتجاوب معاهو ونساعدو في انو يعالجنا ها؟؟حتعملي كدا؟
هزت ليهو رأسها وقالت ليهو ببراءة:بس أنت حتكون معاي وإلا ما حأمشي
_بس أنا عندي مدرسة طيب طيب حأمشي معاك بس أغير هدومي بتاعت المدرسة وأجيك أووكي؟؟
_طيييب يلا مستنياك ما حأنزل تحت وأقعد معاهو من دونك
_بكون كدا احسن 5دقائق وأكون عندك ما بتأخر
طلع منها ومشى غرفتو وقلبو بتقطع علي حالة أختو أتمنى لو قدر يقاسمها الوجع ويشيل عنها حبة من ساعة ما ماتت أمو هو بقى المسؤول عن أي حاجة في البيت عن أختو وصحتها وأكلها بالرغم من انو في شغالة بس هو كان بعمل الأكل بنفسو وبيأكل معاها والشغالة كانت بتسوي الأكل لأبوهو لمن يجي وهو تعاملو أتغير معاهم بعد وفاة امهم وبقى جادعهم وأغلب وقتو في الشغل او برا البيت وحسام وسبأ كرهوهو وقرفو منو لأنو طلع علي علاقة بالشغالة الفي بيتهم ولمن فاض بيهم وروهو انهم عارفين أي حاجة وطلبو منو  يقطع علاقتو بالشغالة بس هو ما أشتغل بيهم بالعكس بقى بتمادي ولمن يكونو قاعدين بعمل معاها في حركات قدامهم عشان يستفزهم ومرات بسوقها فوق الغرفة وهم كانو شايفين حركات أبوهم دي وما قادرين يعملو حاجة من اللحظة دي عرفو أنهم بقو يتيمين الأب والأم وحسام لقى نفسو  راجل البيت وبقى الأب والأم والأخ والصاحب لسبأ وهي كانت حاصرة حياتها عليهو وما بتقدر تستغنى عنو ،، مرات الضغوطات والظروف الأحنا بنكون عايشنها بتولد جوانا قسوة وبرود بتخلينا نتعامل بشراسة مع الناس كعزاء لنفسنا أننا اقوياء وقادرين نتعامل مع اي مشكلة لكن الما عارفنو أنو كدا تلقائيا حنتحول لعدوانيين وبنحاول ننتقص الناس ونتنمر عليهم عشان نوهم روحنا بالصلابة ونملى الفجوة الجوانا ،، فعشان كدا إذا لقيت ليك زول بتعامل مع الناس بخشونة فأكيد في سبب ورا معاملتو السيئة دي وكلنا بنمر وبظروف ومشاكل لكن لازم ما نخليها تأثر علي سلوكنا وشخصيتنا الحاليا في فترة المراهقة أحنا قاعدين نبني فيها فلو لقيت ليك زول من النوع دا حاول اتقرب منو وأعرف جواهو شنو يمكن يكون محتاج زول ينصحو ويوريهو الطريق الصح مافي زول فينا كعب أو سئ بمعنى الكلمة كلنا طيبين ولطيفين بس ضايعين ومحتاجين الزول اليوعينا ويقيف معانا عشان نتجاوز مشاكلنا ،، بعد ربع ساعة حسام كان جاهز ساق أختو سبأ ونزلو تحت لقو أبوهم قاعد مع الشغالة أول ما شافهم ختى يدو في كتف الشغالة وقال ليهم:جيتو خلاص شكلك كمان ما ماشي المدرسة الليلة
حسام وهو مثبت نظرو علي يدو الفي كتف أسيا الشغالة:ماشي مع سبأ الدكتور يلا إتأخرنا الساعة ٨ مواعيدنا
_أنا جاهز ما عندي حاجة يلا بسرعة خلونا نخلص من القرف دا عشان عندي اجتماع مهم الليلة
حسام شد علي أيدو وقال لسبأ:دقيقة واحدة وبجيك طيب ومشي جاب ليهو عصير وجاء لقى سبأ بترجف كلها وبتعاين لأبوها وحركاتو المقرفة مع الشغالة أداها العصير وحنسها عشان تشربو وأستناها لمن خلصت العصير بعدها شال منها الكباية وعاين ليهم بغضب لدرجة أتمنى يفلعهم بالكباية دي بس الحمدلله كسرها علي الأرض وقال بصراخ:خلاااااص بطل قرفك البتعمل فيهو دا ياخي أحنا أولادك أحترمنا علي الأقل وما تعمل كدا قدامنا لأنك بتجرحنا وتكسرنا كدا من يوم ما امي أتوفت وانت بقيت جادعنا وما شغال بينا عارف أنا أتمنيت ألف مرة انو كان انت التموت وأمي تفضل حية يااخي أنا بكرهك يا ريت لو ما كنت أبوي بس قطع كلامو لمن جاهو كف ناري من أبوهو قرب يكسر ضرسو وقال ليهو بتحذير:أوعى أسمعك تاني تقل في أدبك معاي والله أقطع ليك لسانك دا عشان قام ليك شنب ودقن خفيف قايل نفسك بقيت راجل على أبوك وما عندك شغلة بعلاقتي مع أسيا دا بيتي واعمل فيهو البريحني أنت ما يخصك وغصبا عن عينك أنا ابوك ولازم تحترمني
_بس أنت أحترم أمي في قبرها وبطل القرف البتسوي فيهو دا أبوس رجلك
_أقسم برب الكعبة لو فتحت خشمك تاني ألحقك ليها يلا سوق أختك دي وأنقلعو علي العربية رمم كلاب الله يحرقكم
حسام ساق أختو ووداها العربية وفضلو مستنين أبوهم وبعد دقيقتين جاء طالع آسيا الحبشية قالت ليهو بمياعة:خلي بالك من روحك حبيبتي أنا مستنياكي ما تتأخري علي تخلصي شغلك وتجي أوكي
_حاااضر يلا قفلي الأبواب كويس وخلي بالك من نفسك
جاء ركب العربية من سكات وماف أي زول فتح خشمو الطريق كلو ولمن وصلو الدكتور جوه بتاعت التسجيل ورتهم أنو في قدامهم واحد وهو هسي جوه مع الدكتور قعدو في الكراسي ربع ساعة كدا بعدها دورهم جاء وخشو أول ما شافهم الدكتور سلم عليهم بحرارة وسأل سبأ  عن صحتها وأمورها وكدا بعدها بدى يفحصها وفي الأثناء دي كان بتكلم معاها وبقول:وقفتي الأدوية قبل يوم من المقابلة زي ما قلت ليك
_أيوة ومن ساعتها موضوع حادثي ما عايز يطلع من رأسي
_طيب أنا عندي طريقة شفتها عند دكتور مشهور عملها عشان يخلى زول مصاب بهوس إضطرابي أنو يتخلص من هوسو دا وهي طريقة غريبة وخيالية شوية
_واللهي؟
_التنويم المغناطيسي
_كيف وهل حينجح؟؟
_ما متأكد بس حأجرب يمكن يظبط
رقدها في الشيزلونق وجاب ليها دوامة أبيض بأسود وبقت لافة بسرعة سبأ ركزت معاها بعدها حست انو هي ما قادرة تفكر بشئ وأي حاجة يقولو ليها حتعملو طوالي
الدكتور لمن لقاها مسهية فؤ الدوامة قرب يطير من الفرح وبدى يتكلم وقال ليها:عايزك تتجاوزي الحصل ليكي يوم الحادث بتاعك أنت وأمك وتتعاملي معاهو كانو ذكرى سيئة وأنتهت بس
سمع صوت همهمات ما مفهومة طالع منها بعدها وقف الدوامة وسألها:هاا أحسن؟
سبأ هزت ليهو رأسو وقالت بحزن:لا لسع بفكر في الموصوع وما راضي يطلع من رأسي
_أأ طيب خلاص أرجعي البيت إرتاحي هسي وبكرا نتيجة الفحوصات حتطلع وإن شاء الله كل شئ حيكون تمام
ـــــــــــــــــــــــــــــــــــــــــــــــــــــــــــ
#أما بهناك.....
لطفي جات شايلة التلفون في يدها  وقالت لمستر ياسر:حسام الليلة غائب عشان عندو أختو مشى معاها المستشفي هسي كنت بتكلم مع أبوهو وقال لي أنو بتو ما رضت تمشي من غير أخوها فعشان إضطرا يمشي معاها
_طيب تمام  ما مشكلة كدي إتصلي لي أولياء أموراللطلاب الغائيبين التانيين شوفو مالهم هم كمان
_حاضر يا مستر
وطلعت من المكتب وأثناء ما ماشة لمحت عمار وسيف قاعدين أبتسمت بخبث ومشت عليهم وقالت لسيف:صحبك الليلة ما جاء مشى الدكتور مع أختو المجنونة ديك
سيف إتمالك أعصابو من لفظ مجنونة وقال ليها بهدوء:سبأ ما مجنونة هي تعبانة من الحادث الحصل معاها قبل سنة
_أنا ما فاضية لفلسفتك دي بس حبيت أوريك سبب غياب ست الحسن وأخوها
_سعيك مشكور يا مس إلطاف
لطفي حدرت ليهو ومشت تشوف طالب مسكين تنكد عليهو علي بال مل تصل مكتبها
سيف إتنهد وقال:مرة غريبة خلاص زي كأنها بتستمع بألم الناس وشوفتهم بتعذبو
_في ناس كدا أصلا غريبين ما تركز معاها كتير بعايرو الناس علشان يبرأو نفسهم واللع مافي زول مجنون غيرها في المدرسة دي
_ياااخ دي مختلة عديل الله لا جاب باقيها مفقرة لينا المدرسة دي
_عااان خلينا من دا وأرح نتم باقي التمرين بتاع الفيزياء عشان بعدين ندى حسام كراساتنا يكتب مننا
_أوككي طيب يلا
ـــــــــــــــــــــــــــــــــــــــــــــــــــــــــــ
#العصر........
يمنى جات جارية وهي بتكورك:رجع وي وي والله رجع النت رجع أخيرا بعد 36 يوم يا ناااس يا عالم رجع رجع،،بيان طارت من الفرح وقالت ليها:بالجد خبر حلو شديد والله
_أي أي وقالو حيعوضو الناس عن الأنترنت الراح هس ي أنا رجعو لي ال2قيقا الكنت مفعلاهم قبل القطوع
_كويس والله حركة ظريفة منهم لكن
_كر علي الناس طوالي بدو ينزلو صور وفيديوهات فضل الأعتصام ومتداولين الهاشتاق بتاع#توثيق_مجزرة_القيادة_العامة دقيقة أوريكم الفيديوهات
سهى قالت ليها:لا انا ما عايزة أحضرها بموت من القهر ياخ
_مصيرك تحتضريها ولو بعد حين لأنو أول ما ترجعي البيت حتلاقي الفيديوهات في وشك وفي أي مكان
بيان قالت ليها:شغلي الفيديو مع انو حيكون مؤلم بس لازم نحضرو
يمنى عاينت ليهم وقالت ليهم: مستعدين؟؟
هزو ليها رأسهم وهو ببلعو في ريقهم ومتوترين يمنى شغلت أول فيديو كان الشهداء مرقدنهم تحت الكبري بعدها أثناء الفض في واحد من الدم السريع بصور كان ولاقوهو في كم فيديو ما عرفو الفايدة من انو واحد يصور جريمة بشعة وينشر دليل ضدو بس أكيد في مصلحة ورا كدا خصوصا انو كل الدعامية الظهرو كانو شايلين عصايات بس ما عندهم أي سلاح  ،، لمن جاء فيديو الشهيد عباس فرح في الترس ما قدرو يحبسو دموعهم بكو زي الكأنو مات ليهم زول ،،بيان صوت إنجرش وقالت ليهم: راجل راكز والله حسبي الله ونعم الوكيل في الكان السبب بس ،، أكتر حاجة وجعتهم الفيديو الظهرت فيهو البت الكانو ماسكينها كم دعامي وبقولو ليها:مدنية ولا عسكرية وهي بتقول:مدنيااااو وهم بقولو ليها قولي عسكرية عشان نفكك وتمشي البت ما لقت حل غير انها تكورك عسكرياووو هنا بيان ما قدرت تتحمل وقالت ليمنى:بس خلاص كفاية أقفليهو عليك الله قلبي حيقيف والله

يتبع.....