مراهقون و لكن

٢٨

إلي ذلك العاجز الذي يحترق كلما ذُكرت أحداث فض الأعتصام في التاسع والعشرين من رمضان تلك الليلة المخيفة التي فقدنا فيها كل شئ جميل عشناه في مدينتنا الفاضلة "القيادة" ذكرياتنا وأصدقائنا الذين جمعتنا بهم تلك البقعة الشريفة... نقاط التفتيش وشباب التروس المبتسمون دائما والساهرون المضحون براحتهم في سبيل  حمايتنا بدون كلل أو ملل..صوت الهتافات الثورية الصادحة في كل الأرجاء...ضحكات الأطفال ولعبهم ومزاحاهم مع كل الأشخاص... أفطار رمضان وسحوره حتي الصلاة كانت هناك مختلفة كيف لا وقد تجمعت فيها كل الطبقات والألوان والأعمار ...كان كل شئ جميلا حتي أتى ذلك اليوم المشؤوم صدقا لن نستطيع محو تلك الندبة التي تركها العسكر على قلوبنا حتى ولو بعد ألف سنة... إن عزائنا الوحيد أن التاريخ لا ينسي وسوف تلعنكم الأجيال القادمة للأبد ف الويل لكم~
ــــــــــــــــــــــــــــــــــــــــــــــــــــــــــــــــــــــــــــ
_الووو بياااان?
_وسونة!! يا بت الشوق ويين مختفية كدا من ما مشيتي أهلك نسيتينا مرة واحدة يا بياعة
_يا بت قولي بسم الله أنساكم كيف يعني يوم طلعوكم من المعتقل ما كنت قاعدة معاكم الله!
_هيي صحي نسيت والله معليش اليوم داك كنت ما مستوعبة حاجة أنا
_ما مشكلة والله اها بقيتي كيف هسي إن شاء الله أتحسنتي ?
_والله الحمدلله ياااخ ماشي الحال بقيت متحركة عادي بس لسع وشي ظاهر فيهو أثار الضرب وعلي فكرة ظبطت شعري ما شفتي بقی كيف ياااخ بقى خرافي بالجد
_عااايني دا رقمي بتاع الواتس رسلي لي فيهو الصور بعدين
_ظااابط يا مزة
_أها جديدك شنو??
_والله إلا عرس لؤي ود أخوي حسان تاني مافي جديد والله
_ماشاء الله والله ربنا يتم ليهو علي خير مش هو أخ لتين الكبير?
_أيواااا بس ياها زاتها ههههه شكلكم اتعرفتو علي بعض
_أي أي لو شفتيها كانت خايفة عليك كيف يحليلها حنينة زي الناس الكبار ماشاء الله عليها
_اي تينو دي بتريدني شديد وانا زاتي بريدها والله
_الله يخليكم لبعض إن شاء الله
_اللهم امييين كان نفسي اعزمك علي العرس بس اتذكرت انو انتي محبوسة وكدا ما ينفع تجي لكن كلمي الشباب يجو طبعا هم اصحاب لتين بتكون اكيد عزمتهم فعشان كدا لازم يجو ما عندهم عزر
_هههههه كويس بكلمهم إن شاء الله
_ااخخخخ صحي ما سألتك علاقتك انتي وسديم رجعت طبيعية زي الأول ولا لسع?
_لالا الحمدلله رجعنا وأكتر خصوصا لمن عرف بحملي ياااخ فررررح فرح
_شنووووووو? حملك!! وسن إنتي حامل بالجد يعني أوووعى تكوني كزبتي عليهو عشان يسامحك?
_ بيان انتي عويره أنا أكذب عليهو لييه أنا حامل بالجد والله
_واااااااي ألف مبرووووك ليك والله فرحت شديد ياااخ
_بصراحة يا بيان اول ما عرفت زعلت شديد لدرجة فكرت اسقطو بس لمن شفت سديم فرحان بيهو اتراجعت في أخر لحظة
_وسن انتي مجنونة كيف فكرتي تقتلي طفلك الما ليهو ذنب في أي شئ حصل؟؟
_ما عارفة يا بيان كنت متلخبطة شديد والشيطان شاطر بس الحمدلله هسي انا مبسوطة بيهو شديد
_الجنى دا حاجة سمحة شديد والله يا وسن طفلك دا حيكون محور حياتك وما حتركزي مع اي شئ تاني غيرو صدقيني حيغيرك تماما للأحسن طبعا وحيضيف نكهة لحياتك لأنو أنتي حتعيشي عشانو هو ...
_بس المجنني أنو طفلي دا حيتربي من دون أب ولقب"اليتيم" حيكون ملازم ليهو طول عمرو أنا جربت فقد الأب وما عايزة نفس الحصل لي يحصل لولدي يا بيان أنا حمووت من التفكير في الموضوع دا والله
_شوفي يا وسن ما عايزة أبسط ليك الشغلة لأنها أساسا ما بسيطة بس ولدك دا ما حيكون أول طفل يتربى من دون أب وفي أبهات بكونو عايشين وما موجودين مع أولادهم علي الدوام يمكن بشوفوهم في السنة كم يوم وفي ناس بتتولد وتتربي بدون أب أو أم أنتي لو اهتميتي بطفلك دا ووفرتي ليهو أي شئ وبقيتي ليهو الأب والأم صدقيني ما حيتعقد من الموضوع هو يمكن يفقدو وفي لحظات بكون محتاج أب بس الأنتي الحتسويهو عشانو حيخليهو يقدر موقفك ويكون فخور بيك أنك قدرتي تسدي مكان الأب والأم مع بعض فشنو ريحي أعصابك علي الأخر
_إن شاءالله يا بيان أقدر علي مسؤوليتو ... طيب يلا بااااي
_خلي بالك من نفسك أوووكي؟
_حااااااااضر