مراهقون و لكن

٩

"عزيزي القارئ لا تضمر النوايا السيئة في قلبك فستنقلب عليك أحسنوا النوايا فعليها ترزقون "
ــــــــــــــــــــــــــــــــــــــــــــ
#في بيت الإمام.......
لنى كانت قاعدة بتشاهد في التلفزيون وخاته ليها صحن مكسرات قدامها وبتاكل فيهو وسام جاء قاطع فيها بسرعة ومشي بعد مسافه تاني رجع ليها وهو بحك في رأسو بتساؤل..قعد جمبها قبل ما يشيل ليهو شوية فستق ويأكل فيهو:لنلون
لنى وهي لسع مركزة مع التلفزيون:خير يا طير في شنو؟؟
وسام وهو بمرر يدو في شعرو ويقول بإستهبال:أحم أحم أصلا عارف نفسي طيارة ما جبتي حاجة جديدة يا أختي
لنى وهي بتخت يدينها في وشها وبتهمس:وكمان وهمان أستغفر الله العظيم يا رب يافرحتك يا لنى بأخوانك وسندك...واحد غياظ وثقيل وبرفع الضغط والتاني وهمان وفاكيها في روحو غايتو أصلي ما عندي أخوان نعيمين زي باقي الناس...الشكية لله بس
وسام ختى يدو في كتفها وهزاها قبل ما يقول:بتطنطني بتقولي في شنو يا بت هووي
_لالا ولا حاجة كنت عايز شنو أنت يااخ خربت علي المسلسل ودي كانت الحلقه الاخيرة
_أحضري الاعادة بكرا وحاولي خففي لي من المسلسلات الهنديه دي حبه اوووكي؟؟
_نهييييييييي(لااااا)
_شنوووو؟؟؟؟
_كووووش نهييييي(لاشئ) أقصد ولا حاجة
_لنى
_ياخ خلاص بحاول
_شطورة ايوا خليك كدا بتسمعي الكلام ..كنت عايز أسالك جوز اللوز ديل مختفيين وييين؟؟
_قصدك رئبال وسديم؟؟
_أيوووون في غيرهم يعني
_قاعدين فوق بذاكرو تصدق؟؟
_لا لا أبدا والله انا ماشي أشوفهم بعيوني دي
_طيب باي باي يا طيارة
_تطيري ما تركيي ان شاء الله
(لنى دي خربت الأولاد كلهم من ورا دعاويها دي بقو زي العجايز اليوم كلو يدعو)المهم وسام طلع للشباب فوق لقى سديم ماسك تلفونو وخاتي سماعات كبار في إضنينو ورئبال مقبل علي الحيطة وبرسم فيها بيدو وهو وراقد...وسام وهو بصفق:الله الله الله ويييين قرايتكم يا ممتحنين يا علميين أنتو؟؟لنى قالت أنكم بتذاكرو بس ما صدقتها وجيت أشوفكم وفعلا زي ما إتوقعت
(دائما أهلك ما بشوفوك الا لمن تبطل تقرا)
رئبال وهو بتعدل علي جهتو:أنت جابوووك ليها؟؟قرينا وإنتهينا أمشي شوف شغله غيرنا
سديم قلع السماعة وقال ليهو:
بالظبط كدا
وسام وهو بمسك كتاب العربي:خلاص تمام نشوف قرايتكم دي سمعو لي داعية السلام يلا قبل ما تسمعو شاعر المعلقة دي أسمو منو؟؟
رئبال وهو بحك رأسو وبحاول يتذكر:امممم أعتقد إمرؤ القيس...لا داك بتاع مكر مفر اه اه اتذكرت زهير  أبو سلمي مش كدا؟؟
وسام:لا غلط اسمو زهير بن أبي سُلمى ما أبو سلمي وبضم السين ما بفتحها يا أستاذ
سديم وهو شغال في تلفونو لسع:كلو باسطه ياااخ رئبال وهو بيأشر عليهو ويقول:بالظبط كدا الراجل دا بقول كلام زي العسل
سديم بضحكة:الله ما ضراك والله
وبدى يسمع وطبعا لخبطة شديدة ويقول بيت ويفط بيت ومرة يخرف ليهو بيت من رأسو غايتو حالة بطالة جدا لمن جاء دور رئبال كانت الصدمة أخير سديم والله إتخيلو قال شنو؟؟

فأقسمت بالبيت الذي طاف حوله*رجال بنوه من قريش وجهرم....
يمينا بالله لنعم السيدان وجدتكما *علي اي حال من سحيح ومضرم...
تداركتما عبسا وذبيبانِ(لاحظو ذبيبان ما ذبيان)بعدما*تقاتلو ودقو بينهم ريح مشنم...
وقد قلتما إن ندرك السلم واسعا*بمال ومعروف من الأمر نسلم....(الله أكبر أخيرا قال بيت صح)
وما الحرب الا ما علمتم وذقتم....
وسام وقفو عشان ما يواصل في إهانة حكيم الشعراء بالشكل دا ضرب كفينو بحسرة وقال:بس اسكت ما تكمل ابوس إيدك ياها دي قرايتكم ؟؟لو حتستمرو بحالتكم دي كدا أبشركم السنه الجايه بدري(الكلام الدمرني كتييير)
سديم وهو برقد علي بطنو ولسع شغال في تلفونو:بالظبط كدا(صاحبنا علق)
رئبال وهو بتعدل عشان ينوم:فال الله ولا فالك
ما تشتغل بيهو دا داير يحطمنا ساي يا سديموه
سديم وهو بركب السماعة تاني:أصلا ما شغال بيهو كتييير أنا
وسام وهو بنهار ويقعد في الواطه:منو العوض وليهو العوض ديل ياهم أنتو الراجينكم تبقو مهندسين وترفعو رأسنا يحليلنا أحنا زمان قسما عظما أنا لمن كنت ممتحن زيكم كدا كنت من البيت ما بطلع واليوم كلو ماسك كتابي وبقرا وبس كنت شغال من المسجد للبيت وبقيت ما بتابع "الأصحاب" و"شلة يخسي"شفتو ديل ياهم البطلعوكم بقد القفة ناس الحفلات والكتمات والجمبات والحمدلله ختيتهم وإجتهدت شديد وجبت٩٣%...هسي أنتو بحالكم دا كان جبتو ٧٢.٣ أحلق شنبي دا...(أعزائي المتابعين الشمشارين ما تركزو مع النسبة لانها ما حقتي تمام؟؟سامعني؟؟النسبة ما تركزو فيها النسبة شنوو؟؟ما تررررككككزوووو فيها..فهمتووو؟؟ما تسفهوني ياااخ ) 
مليحظه:وسام عمرو٢٠سنة وبقرا طب بشري المستوي الثالث حلبي طويل وعندو عضلات شخصيتو مجنونة وهادئة أحيانا يعني لمن يكون في بيتو أو مع أصحابو بتصرف بشقاوة وعفوية كدا لكن ما بيتظارف مع اي زول الا يفهمك ويدرسك كويس ويرتاح ليك هو عموما كدا يا جكس شخصية حبوبة(بضم الباء) وجذابة شديييد أما#لنى عمرها ١٥ سنه بتقرا في تانيه ثانوي أكيد بتكونو عرفتو شخصيتها من خلال حواراتها مع أخوانها هي أولا:مزة مزة مزة..ثانيا:مجنونة ومشاغبة شديد..ثالثا:لميضة وقطيمة ودعايية طبعا دي أهم حاجة..رابعا:بتحب الجمال والموضة لأبعد الحدود يعني عادي لو لقتك مبهدل/ه ممكن تسمعك كلام زي السم وتديك محاضرة طويلة عريضة في اللبس والموضة ولمن تهدى وتروق بتديك نصائح وتمعطك معط لمن براك بتقتنع بكلامها...خامسا وأخيرا:مزززززززززززززة(أنا شخصيا دي شخصيتي المفضلة) أحم أحم كنت بهظر معاكم والله كلهم زي بعضيهوووم نرجع لي روايتنا كنا وين اها إتذكرت...
رئبال ببرود:يا زول هووي أطمن لسع في وقت عشان نجتهد ونتضغط ياداب دي بداية السنه (شوفتو الكلام دا ياااهو البوديكم أسألوني أنا)
سديم:ااي احنا لسع في السليم يا مان ما تخاف حنجتهد ونتفوق و٣ دي تبقي لينا من الذكريات الجميلة
وسام وهو بطلع:طيب نشوف اقرو كويس بعدين بجي بسمع ليكم كويس؟!
رئبال:دسيس
سديم:زييييت
رئبال وهو بقبل علي سديم:السان دا كلامو صح والله لازم نجتهد عشان نفرح أهلنا ونخليهم فخورين فينا هم الفيهم مكفيهم ما عايزين كمان نجي نصدمهم بنتيجتنا
سديم:.................(مسهي)
_سديييييييم
سديم:.................(لسع مسهي)
_ولد
_هاااا؟!!
_سرحان وييين؟؟
_لالا ولا حاجة الزول ما يسرح معاكم حبة يعني (جلا من لا يسهو ما عارف الدخلها شنو بس حبيت أشارك)
رئبال فهمو أنو هو إتذكر أهلو أبتسم ليهو وقال:طيب يلا أرح نقرا
_اووووكي يلا
***************************
#في بيت القرشي......
ليث جاء وهو شايل ليهو عنقود عنب وبيأكل فيهو بتلذذ حب يغيظ لتين وقال ليها:أمممم ياااممممميييي عنننننب
لتين وهي بتقفل كتاب الجغرافيا وتزفر بزهج:أنت يا ود الناس مالك عندك ديدان في بطنك دي؟؟لا بالجد لازم تمشي تفحص اليوم كلو تكوضم زي الغنماية دمرت إقتصاد البيت ياااخي
_غنماية التنطحك إن شاء الله وتريحنا منك
لتين بإبتسامه:إن شاء الله يومك قبل يومي هي قصدي إن شاء الله يومي قبل يومك يا أخوي أكل أكل ينفعك إن شاء الله حبيبي أنا
ليث وهو بتجاهلها ويجدع ليهو عنباية فوق ويكرمشها بأسنانو:عااايني أنتي حتمشي لعمتو بيان متين؟؟
_المساء كدا زي الساعة ٨ هسي طالعه مع صحباتي وحنمشي لواحد صاحبنا جاء من السفر أختو كانت عيانه وعملت عمليه في مصر والحمدلله نجحت وبقت كويسه و....
قاطعها:خلاص خلاص عرفت اي ما طلبت منك تحكي لي قصه حياتك كلها
_أستغفر الله العظيم يا رب صبرني
ليان وهي ماسكه دفتر الرسم وبتلون:والله أنتو قاعدين تحيرو أم أفكاري مره مركبين مكنة أتراك وأنا بخير ما دام أنتي بخير أختي حبيبتي/أخوي حبيبي وحركات اليشوفكم يقول أحلي أخوان فيك يا دنيا ومرة تتشاكلو وتضاربو زي الضرات أمركم عجيب والله
لتين وهي بتبوسها في خدها وتضحك:يا فصعونة أنتي قاعدة تجيبي الكلام دا من ويين؟؟
ليان:من ناشونال جيوغرافيكヘ(￣ω￣ヘ)
ليث بضحكة:خطيييرة وبتعرفي تتعرصي كمان
لتين:تتعرصي!!يعني شنو(-_-)؟؟
ليث:دا كلام أولاد ما عليك بيهو(͡° ͜ʖ ͡°)
لتين:تمااام ͡° ͜ʖ ͡°
بعد ربع ساعة جرس الباب رن لتين نطت بسرعة وجرت فتحتو وكانو ديل براءة وإيثار دخلو سلمو علي ناس البيت وأستنو لتين لحدي ما تلبس بعدها قالو ماشين
نادية:هياا بناتي ما تقعدو تشربو ليكم حاجه تمشو كدا ساي
براءة:معليش مستعجلين والله يا خالتو مرة تانيه إن شاء الله
نادية:أعملو حسابكم في الشارع يا بناتي وما تتأخرو ولمن توصلو إتصلو علي عشان ما أقلق عليكم
إيثار:يخ في زول عندو أم عسل زيك كدا بتأخر عليها أقسم أنا لو مكان تينو دي بحرد المشية والله يا خالتو لتين بتك دي جاحدة للنعمة
نادية:كلميها يا بتي
لتين:اها خلاص دايرة تفتني بيناتنا يا حقودة
إيثار:منو دي أنا دي؟؟
براءة إنفعلت صفقت وقالت:برررري بررررري برررررري برررررري بررررري فجأة عاينت ليهم بخلعة كدا وقالت:هييي أسفه إنفعلت حبه
نادية:خلاص يلا أمشو يا بنات الله يحفظكم ويغطي عليكم ان شاء الله
لتين وهي بتأشر علي ليث وليان وتقول بتهديد:أنتي وأنت أجي ألقاكم جاهزين تمام عشان نمشي ونجي قبل العشاء(بفتح العين والشين)
ليث:خلاص يلا غوووري
طلعو بره وإشترو ليهم شوية شوكلاتات وحاجات كدا تفتح النفس من السوبر ماركت (شفتو الذوق)
إيثار:أرح نركب الركشة ديك عشان نمشي ونجي بسرعه
براءة:هووووي ما بنركب اي ركشه وخلاص دايرين لينا ركشه فيها بيز حنين ياااخ
لتين:إنتي الله يخليك للزي دا
براءة:اللهم أميين ياااخ
بعد دقائق وقفو ليهم ولد صغير كدا عمرو بكون١٣سنه
لتين:السلام عليكم ماشين شارع......
_جدا أتفضلو أركبو ما بنختلف في السعر والله
أول ما ركبو إيثار لكزت لتين وقالت ليها:لتين ارح ننزل
_لي مالك في شنو؟؟
_شوفيهو صغير كيف يقوم يقلب بينا الركشه لالا انا ما قنعانة من نفسي والله
الولد سمعها وقال:هههه ما تخافي يا مزة معاك معلم
إيثار:ما دا ياهو الكلام المخوفني زاتو كلهم بقولو كدا وفي الأخير ...الولد قاطعها:أطمني أنا ما أربعة(٤ دي يعني فارة وما بعرف يسوق يعني عادي بعمل حادث ويخش ليهو في أقرب عمود والظلط فاضي..أحم الكلام دا لأخواتنا البنوت يعني أما الأولاد فما داعي أوضح طبعا)
المهم الشبلي أتحرك وشغل ليهم أغاني غربية
وبراءة شغالة هزاز وتغني قدرتها بعد شويه قلب زنق وفي زولة كدا بقت تقفل إضنينها من شدة الصوت العالي وأنتو عارفين القونات ديل بجعجعو كيف ماشاء الله ساوندات متحركة بس
يلا إيثار شغاله تتململ وتزهج ما عاجبها الوضع لمن خلاص فاض بيها قالت ليهو:ما عندك أغاني كورية؟
_ههههههه لالا والله ما قاعد أسمعها لكن ممكن ترسليها لي في الواتساب وأشغلها ليك
_لالا خلاص خليتها ما دايراها
_لي ياااخ ما عايزة تديني الرقم ولا شنو؟
_رقم شنو يا شافع هوي أتلمى أحسن ما أقوم المك بطريقتي
الود ضحك بطريقة مغيظه وقال:أبردي أبردي ما كدا لكن يا عسل أمك وأبوك
_كدا ولا ما كدا أسكت مني بس وما تقول لي عسل فاهم ولا لا؟؟
_فاهم يا...ياعسسسس هههههههههه
_نزلني هنا سرررعععععه يا كلب
لتين مسكتها من يدها:نازلة ويين؟؟ما تشتغلي بيهو دا طفل ياخ
براءة:أرح ننزل أصلا بيت ناس فؤاد ما بعيد من هنا لو سمحت نزلنا هنا يا ولد
_أنتي تأمري أمر يا عسلية أنتي ووقف
براءه وهي ضاغطه علي أسنانها بغيظ:اهااا كم يا شفاتي؟؟
أبتسم بخبث وقال ليها: سجلي عندك.....٠٩٩٥١٢
براءة حدرت ليهو وكفكفت يدين عبايتها وخلاص دايرة تتشاكل كدا إيثار ولتين جروها وقفلو ليها خشمها..
وقبل ما يمشو لتين جدعت ليهو ١٠٠جنيه ومشت وهي بتلزلز في براءة عشان عارفاها فضيحه وما بتسكت بعد مشو مسافه حبه كدا فكوها ليك
براءة بصرخة وغيظ:ليييه ما خليتوني أقعدو في علبو الشافع القليل الأدب دا والله يحرم تاني يرفع ليهو بت في ركشتو دي
لتين:يااااخ دا شافع فرحان ساي ما توجعي رأسك بيهو
إيثار:قليل أدب بشكل خيالي ووقح شديد
لتين وهي بتكشر زي الشفع وبتقول بلهجة شرسة:بغض النظر عن أنو شافع قليل أدب لكن قاليكم أنتو الإتنين يا عسل وأنا ولا عبرني بحرف زي كأني ما موجودة ولا ياربي من كترة جمالي أتبلم وفقد النطق وعشان كدا ما شاغلني..فشلني فشل كلوي إن شاء الله
إيثار:الناس في شنو والحسانية في شنو والله أنتي الطلعتي قليلة أدب وتافهه
_ما لكن دا ظلم يشاغلكم أنتو ويسفهني أنا يا نتشاغل كلنا يا ماف(خلاص أنا بشاغلك والله يغفر لي...ماشة ويين تعالي هنا يا عسل يا سكرة يا قشطة يا مربي يا شوكلاطة يا كريمة يا باسطة يا إسكريم بالفراولة يا منقة يا بسبوسة متجيبي بوسه يا حلاوه لكوم أنتي  أحم أحم أنا إتشرقت من كترة السكريات دي المهم تكون إنبسطتي عندنا كم تينو أحنا) براءة وهي بتزفر بزهج:خلاص أقفلو السيره دي
بعد دقائق كانو قدام البيت رنو الجرس وما استنو كتير فتحت ليهم الشغالة قعدو في الصالة تحت وكلمو الشغالة أنو تقول لي فؤاد انو أصحابك جوو ومنتظرنك تحت بعد شوية عمار ويوسف جو داخلين وهم شايلين أكياس في يدينهم
لتين بتهكم:متاخرين كالعادة دائما طبعا
يوسف:الطريق زحمه والله وعلي العليهو الحيوان دا كان نايم وقعدت سنه عشان أصحيهو
عمار وهو بحك رأسو يإحراج:والله لمن أنوم تاني ما بحس بشئ بفقد السمع والبصر وببقى زي الميت واحد(حنكك حبة لكن)
لتين بطريقة بتدل علي أنها متفاجئه لكن بتتريق:أنا زاتي كمان بحس زيك كدا سبحان الله في تطابق عجيب بيناتنا
_حكمة الله
جاهم صوت فؤاد من فوق:
عمار ولتين أنتو لسع ما خليتو مناقراتكم دي حتعقلو وتكبرو متين؟؟
عمار قبل عليهو وقال بإبتسامه عريضة:يا ود يا فوفو ليك شوكة يا مان
فؤاد بضحكه:عمار المجنون ههههه الشوك بطعن والله ياخ وحضنو ليك ورفعو فوق وعمل نفس الشئ ليوسف بعدها سلم علي البنات بكل أدب وزوق
وطلعهم فوق سلمو علي سحر وأدوها الحاجات شكرتهم وأتونسو معاها كتير خلوها عشان ترتاح وقعدو في الصاله تحت عشان يتمو ونستهم بمزاج
براءة:فوفو ان شاء الله تكون جبت لي الشوووز الطلبتها منك اوعى تقول لي نسيت وبتاع بكتلك هااا
فؤاد وهو بهز يدو زي حركة باي باي:جبتها وربي جبتها ولونها أسود كمان زي ما طلبتي(بربرة يا هراشة)
_ياخ انت منو الزيك حقي براااي يا ناس
لتين بزعل مصطنع:ماشي يا فؤاد يعني هي صحبتك بس تجيب ليها هدية واحنا ما أصحابك مش??  الفيك ظهرت يا كلب
براءة وهي بتغيظها وبتشمشم بنخرتها:شامه ريحه الغيره الكريهة ههههااااي
فؤاد:علي فكرة جبت ليكم كلكم معاي هدايا والله
عمار:حبيبي والله طول عمرك راقي وفاهم
يوسف بمزاح:فؤادي أنت يااااخ ما تجيب بوسة لأخوك
كرفس ليهو وشو وقال:أحترم نفسك أحسنلك..ولد قليل أدب
_خلاص أنا أسف ما تزعل عشان هديتي ما تروح
لتين إبتسمت لبراءة قبل ما تطلع ليها لسانها وتقول:فوفو حقنااا ياااخرسان السان وأخو الأخوان ملك الرصه ومدمر المنصة سيد التقيل وملك التقفيل الزول الفرحه الود الضكران المؤدب الهادي الرزين الوجيه الكسار(هناية معذورة أول مرة تجيها هدية)
إيثار:خلاص كفاية بكيش الود رأسو بقى قدر المنطاد (محتاج)
فؤاد ضحك لمن دمع:أحيييي منك يااااخ
لتين وهي بتعاين لفلانة بطرف عينها:بالمناسبة عندي giftتانية ماشه أستلمها بعدين(براكي هبشتيها إشربي يلا)
إيثار:يا بت المحظوظة يا لتين هديتين في يوم واحد
لتين:مرزقة اعمل شنو يعني
براءة وهي بتتجاهل في مغرزة لتين ليها وتخت يدها في كتف يوسف:وما تنسو روميو زمانو دا كمان
فؤاد بإستغراب:لسع بحنك البنات وبشيل منهم هدايا النسونجي دا(فضحوك وشرطو عينك يا يوسفنجي)
لتين:يب يب واخر وحدة دي شكلها الأخيرة
عمار وهو بعضي شفتو بغيظ:ود الزين دا مجازف ليهو مزة من المووت ظهر شبح إبتسامه في وشو وواصل:لكن لصقة وجلدة لمن بهناك اي نعم بتديو هدايا سمحة واي حاجة لكن لو أتلولو معاها وعمل حركاتو الكلنا بنعرفها ديك بتنجمو وبعدين بتجي تحاسبو بالمليم
فؤاد:دي وقع فيها كييف
لتين:نجضتوا نجيييض بت القادرة وشكلو حتخليهو يتوب عن السكة البطالة دي عفيت منها والله
يوسف وهو بغلي من فت أصحابو ليهو:اي أشمتو فيني كويس عشان سناجل عفنين ومافي زول شغال بيكم صح??
عمار وهو برفع حاجبو ويقول بإستعلاء:منو القال ليك يا زول وحاااتك البنات الجارين وراي أكتر من البنات العرفتهم في حياتك كلها لكن ما قاعدين نديهم وش بس
فؤاد بضحكة:يا ود يا تقيييل(بصوت سعاد حسني)إيثار:كدي خليكم من دا تينو ما وريتيني الحيجيب ليك الهدية منو أوعي تكوني ربطي من ورانا تاني ومقعدانا زي الطراطير
لتين:إطمني يا ستي الهدية من عمتي بيان براءة:الصحفية
لتين:أيووون ياها زاتها
إيثار:وجججججعععع
براءة:قدمني ورجع
عمار وهو بقوم:هوووي خلاص بعد دا أي ستة علي حتة أنتو يا بنات يلا طيرو بيوتكم عشان أهاليكم ما يقلقو عليكم
يلا أرح قدامي
ودعو فؤاد وسحر بعد ما أتمنو ليها الشفاء العاجل والصحة والعافية بعداك إستلمو ال...الإحم وزي ما قال عمار أي ستة في حته
(بالنسبة للإحم أنا حأوريكم أي زول وهديتو بسم الله نبدا:
لتين:علبة مكياجات ماركة
عمار:جزمةpuma
يوسف:جاكيت من adidas
إيثار:مناكير+نظارةRayban 
براءة:مع الشوز الطلبتها جاب ليها ساعه برضو
أنتو عارفين أنا وريتكم ليها ليييه??عشان تعرفو أنو الهدايا بتزيد الصلة والمحبة بين الأصدقاء أُقسِمتِ بالله ما شرك)
لتين وصلت البيت ولقت
أمها كمان لابسة وجاهزة مع ليث وليان
لتين بإستغراب:أمي أنتي ماشه معانا؟؟
نادية:أجي يا بتي؟؟أخليكم تمشو براكم في الليل دا وأصلا عمتي حنان وعمي عبد الرشيد أصرو أني أجيبكم وأجي وما بقدر أرفض شينه مني والله
_طيب أنا جاهزة يلا أرح طوالي
طلعو بره بعد ما قفلو الابواب كويس وقبل ما يركبو العربية
ليان وليث بدو يتشاكلو في منو الحيركب قدام
ليث:أنا الراجل هنا وأنا الحأركب قدام أنتي أمشي طيري ورا مع لتين
ليان:ماااام أبييييت أنا الحاركب قدام بس أمي شوفيهو أبى يخليني أركب قدام ولدك دا
نادية:يا ولد ما تخلي أختك تركب وبطلو شكل خلونا نمشي للجماعة إتاخرنا
_يا أمي كيف يعني أمشي أقعد مع البت ورا وهي حضرتها تقعد قدام لا لا يا أمي أنا حاقعد قدام منتهي
_بت في عينك البت دي ما ياها أختك ما غريبة يا ولد
لتين وهي بتحسم النقاش:البت الحتركب قدام لا أنتي ولا هو يلا ومشت ركبت قدام وقفلت الباب وأمنتوا كويس عاينت بالمراية لقت ليان وليث مكشرين ونافخين جضومهم ومافي أي واحد فيهم طايق التاني
ما اشتغلت بيهم وفضلت تتونس مع أمها طول الطريق وهناي وهناية سكتم بكتم
وصلو فلة عبد الرشيد القرشي نزلو بسرعة وجرو علي الباب بعد ما سلمو علي عمو البواب رنو الجرس وفي لحظات فتحت ليهم بيان الباب
بيان بفرح:اهلا وسهلا البيت نور والله
لتين بإبتسامة:منور بي ناسو وجرت حضنتها
وخشت جوه أخدت ليها كم جضيمة وبوسة وحضن من حبوبة حنان منبع الحنان لتين وليان جرو علي  عمتهم سهي إتشعبطو فيها زي القرود وليث مشى لجدو عبد الرشيد حضنو وباسو في يدو
وراسو بعد السلام والاحضان دي قعدو كلهم في الصالة يتونسو
عبدالرشيد وهو بعاين ليهم بإبتسامة:أحفادي الحلويين كبرتو والله لتين وليان بقو نسوان خلاص وليث بقى راجل وقام ليهو شنب ماشاء الله الله يحفظكم يا أولادي
سهي جات ناطه وقالت بهظار:كن ديل بقو نسوان معناتو أنا بقيت عجوزة وخرفت خلاص مش يا أبوي
عبدالرشيد:شفتي أنتي لو عمرك بقى ١٠٠سنة ياكي أنتي زاتك ما بتتغيري ههههههه
سهي:يعني أنا حاكون مزة طول عمري كدا يا أبوي أسناني ما حيقعو وشعري ما حيشيب وضهري ماحينعوج وكرعيني ما بيبقو تقال حأفضل شابه كدا زي المحقق كونان
بيان وهي بتصلحها:كونان طفل ما شاب يا بت
_اللهم عمرو ما قاعد يزيد برري الحبوب البلعوها ليهو دي قوية شديد ليهو كم وعشرين سنه ولسع عمرو ١٠سنه ما زاد وأحنا عجزنا خلاص شكلو الكاتب دا حيموت ولسع كونان ما حيكون تم الحداشر وما لقى العصابه
كلهم ضحكو من كلامها شديد
لتين وهي بتهمس لبيان:العربية الجامدة الواقفة بره دي بتاعت منو؟؟
ليث سمعهم وقال بتعالي:قصدك ال kia sportage  الواقفه بره دي2019
بيان بفخر:دي بتاعتي أنا
لتين:وااااي حديثة ورهيبة وblueكمان وجععع وجججعع ياخ النبي فيك لفلفيني بيها يا بينبو
_حاضر إن شاء الله هسي قومي أرح معاي الغرفة عايزاك في موضوع مهم شديد
_طيب وناس جدو وسهي وحبوية ما ظريفه نمشي نطلع فوق ونخليهم
_ارح ياخ هسي بنجي وأنا زاتي لو ما الموضوع مهم ما كنت فارقت اللمة دي
وركبو فوق بعد ما أستأذنو منهم وطلعو الغرفة
لتين وهي بتسترخي في المرجحانية(نوع البتكون معلقة في الغرفة ديك أنا ما بعرف أسمها بالضبط شنو لكن أتمنى تكونو فهمتو قصدي):أها خيير إن شاء الله
بيان وهي بتطلع ليها إستمارة من الكومودينه بتاعتها وبتقول:في مسابقة أسمها الصحفي الصغير حتقام في دبي الشهر الجاي
وأنا عايزاك تشتركي فيها لانك بتحبي الصحافة وشكلك موهوبة شديد زي عمتك تتذكري وقت وريتيني المقال الكتبتيهو عن جاركم البستحضر الجن وياكل الديدان
مع العسل مقال غريب ولا يصدق لكن شيق وبجذب إنتباه القراء ليهو
لتين وهي بتفقع بالضحك:ما عايزة أحبطك لكن المقال دا ما حقيقي وألفتو من رأسي وما دا بس كل المقالات الكتبتها وهمية أنا لا صحفية لا حاجة يعني عشان عندي كاميرا وبنشر مقالات أصلا وهمية في مدونة مافي زول بقراها غير أمي و ع.سهي وشلتي في المدرسة معناها خلاص بقيت صحفية عيب عليك يا بيان أنتي صحفية عظيمة تتغشي بشوية تخاريف زي دي
بيان وهي بتتعدل في قعدتها وبتقول بجدية:شوفي يالتين الصحافة دي ما شئ ساهل وورطة ما حتقدري تتخلصي منها بسهولة وقد يمكن كمان تكوني أعداء وكارهين ليك لانو الصحفي ممكن يكشف أسرار مخالفات شركة أو مصنع أو جرائم خطيرة أو حتي فساد سياسي وخاصة في الصحافة الإستقصائية يمكن تقضي شهور أو سنين ورا البحث وأعداد التقرير عشان كدا إذا حسيتي نفسك ما بتقدري علي السكة دي طوالي إنسحبي المهم هسي خلينا في موضوع مسابقة الصحفي الصغير أنا عندي زميلي حيكون حكم في المسابقة دي وحكيت ليهو عنك وعن مقالاتك ورسل لي إستمارة الإشتراك دي عشان تمليها
لتين وهي بتقوم بخلعه وتدق صدرها:سجمي أشترك فيها كيف يعني؟؟أنتي براك قلتيها بعضمة لسانك أسمها مسابقة الصحفي الصغير يعني دي حقت شفع الأساس يا بيبي شايفاني منزلا شعري ضفيرتين ولا بشيل لي زمزميه ولانش بوك وبمشي المدرسة جنيتي يا بيان شكلك كدا المصريين ديل كتبوك كر عليك يا عمتو جننوك وأنتي لسع في عز شبابك
بيان وهي بتتمالك في أعصابها:يا بت ما تسيبيني أتم كلامي هي مسابقة من مستويين حاليا بادية الجونيور الهي من عمر ٧سنوات لحدي ١٢سنة والشهر الجاي بتاعت التيينز من عمر ١٣ لحدي ١٨فهمتي والجائزة حتكون ١٠٠٠دولار وشهادة صحفي مبتدئ معترف بيها دوليا للثلاثة مراكز الأولى صدقيني دي فرصة عشان تثبني نفسك للناس وحيكون في تغطية إعلامية كبيرة يعني مجرد تأهلك وظهورك علي التلفزيون دا إنجاز ليك
_طيب مبدئيا كدا أنا موافقة لكن بابا وماما اليقنعهم منو أنتي عارفة بابا لو مشيت أبيت عن صحباتي ما بخليني فما بالك بأني أسافر دبي وبراي كمان من دون أهلي
_مسألة أمك وأبوك دي خليها علي أنا حسان صعب شديد لكن أنا عارفاهو ما برفض لي طلب ومنو القاليك حتمشي براك أنا حاكون معاك إن شاء الله هسي عندي قضية جديدة مستلماها لكن لسع ما عملت فيها شئ لحدي الشهر الجاي بكون خلصتها كدا
_موفقة إن شاء الله فجأة عملت كدا وقالت:ااااخخخخ طيب المدرسة أنا ما بقدر اخليها وكدا خصوصا أني ممتحنة اووووف نحلها كيف دي هسي
_يا بت دي فرصة لا تفوت وكلها فترة أسبوعين تلاتة بس ونرجع أنا حامشي بنفسي أخد أذن من المستر بتاعكم اها قلتي شنو
_توكلنا علي الله
أدتها الإستمارة ومعاها كاميرا Nikonحديثة بعدها جاتهم ليان وقالت ليهم بنادوكم عشان تشربو الشاي
نزلو تحت وقعدو يشربو الشاي بالكيك والبسكويت وبيان لفلفتهم بي عربيتها لف كانو فاتحين سقف العربية وقاعدين في الابواب وبصرخو ويضحكو بأعلي صوتهم كانو حلوين حلا أي زول بيشوفهم بيبتسم تلقائيا ويقول في قرارة نفسو
"الله يحفظكم ويكملكم بعقلكم" رجعو البيت وهم مبسوطين من نفسهم لأنو في كمية ناس ضحكت علي منظرهم وعلقو فيهم وفي الصورهم لكن ما لحق لانو بيان كانت سايقة بسرعة جنونية
أول ما رجعو ليان كان عايزة تفت أي حاجة ليهم لكن لتين منعتها ورشتها بأنو حتخليها تقعد قدام في الرجعة وطبعا زي أي شافعة بريئة واقفة ورجعو البيت بعد ما ودعو ناس بيان وشكروهم علي القعدة الظريفة دي زي الساعة ١١لتين كانت عايزة تنوم كدا ليث جاء وأداها التلفون وقال ليها:هاك دي إيثار عايزة تتكلم معاك متصلا بتلفون أختها ووصلني خبر تلفوناتكم الشالوها منكم تاني حتهروني إتصالات وحتبقو فوني المسكين وسيط بينكم إتجاهلتو وردت بنعاس:خير يا طير؟؟
_تينو حبيبه آلبي مشتاقين يا قلب
_تنشقي واقفة بطلي طلسك دا قولي عايزة تعرفي عمتو بيان جابت لي شنو وخلاص
_دايما كاشفاني أنتي اهااا يلا قولي جابت ليك شنو
_أبييييت ما بوريك هسي بتعرفي بكرا الصباح كل حاجة لانو كلام ما بتحكي في التلفون الا face to face
_أنعل أبوك يا بت الحرام....وقبل ما تخليها تتم كلامهل تيييت قفلت الخط
وأدت ليث التلفون وطردتو من الغرفة قال ليها دا جزاء حسنتي فيكم أنتي وصحبتك لكن تاني تلفوني دا تشمو قدحة ما اشتغلت بيهو وقفلت الباب في وشو طاااخ قعدت في السرير قبل ما تضحك وتقول:حيوانة دي الليلة موتي غيظا والشمار بكتلك يا حمار ههههههعععععههععع(ضحكة الاشرار ديك)
أمها جات طابه فجاة وقالت:بسم الله الرحمن الرحيم جنيتي يا لتين بقيتي تتكلمي وتضحكي براك زي المجانين كر علي سحروك يا بتي ومشت جابت بخور ولعتو في الغرفة وبقت تقرا في أيات وتتفل في كل جهات الغرفة(سلام قولا من رب رحيم )
وجات رقدت جمبها وبقت تقرا ليها في أيات في رأسها لتين وكتمت الضحكة ونامت وهي بتفكر في المسابقة الظهرت فجأة دي!!

يتبع.....