مراهقون و لكن

٤

" صدقا!!ليست هنالك علاقة سرمدية مقدسة كالصداقة....
#أصدقائي كونو بخير لأجلي♡ "
ـــــــــــــــــــــــــــــــــــــــــــــــــــ
خبت الباب مافي زول فتح ليهو لفحتو نسمة الهواء البارد لانو الباب كان شبه مفتوح دخل الاوضة الباردة والشبه مظلمة فتح النور قبل ما يمشي علي الولد النايم في السرير ويصحيهو
_رئبال... يارئبال قوم يلا الغداء
_همممممممممم
_قوووم يخخخ بطل سغالة الناس ديل مستنينكم تحت
_طيب خمسة دقائق بس واقوم
ومشي لسديم البرضو ما صحى ليهو وقف يعاين ليهم لمسافة بعدها خطرت في بالو فكرة
ابتسم بخبث قبل ما يطلع وهو بقول ليهم:ابوي منتظركم تحت وشكلو زعلان شديد هببتو شنو انتو الجوز??
الاتنين نطو في زمن واحد وبقو يجارو في الغرفة زي المجانين
_الليلة حيكتلنا وي وي نعمل شنو يا سديم
_لازم نفكر في حل عشان نطلع من البلوة دي احسن حاجة انو نحكي ليهو الحقيقة بس
_اي اي لازم وبسرعة لبسو سنفجاتهم وفحطوو
وسام اتفطس بالضحك وقف قبل ما يقفل الباب ويقول:عالم ما بتجي الا بالعين الحمرة
رئبال وسديم نزلو وهم ببلعو في ريقهم ساي لقوهم قاعدين في الصفرة ومستنينهم يجو اول ما قعدو لنا اخت رئبال الصغيرة قالت:
الوارثييين دا كلو نوم??الاكل برد واحنا مستنين سيادة حضرة جنابكم عشان تشرفو
_احسن ذاتو الاكل الحار ما فيهو بركة وبعدين انتي حارقة روحك لشنو كن بارد هداك ليهو المايكروويف سخنيهو وأطفحي بس المشكلة انتهت
_البركة الما تلم فيها ان شاء الله يا بعيد
ابوهم جرى ليهم نور :لنا رئبال اخرسو خلاص ما اسمع صوتكم دا نهائي اكلو وانتو ساكتين طوالي فصلو واحترمو نفسهم
بعد ما اكلو ولمو الصحون تاج الدين نادى رئبال وسديم في الصالون
وسام ختى يدينو في كتف رئبال وسديم قبل مايضحك و يقول:قلبي وربي معاكم بالتوفيق هههههه
_قلبك دا خليهو معاك أحسن يا خفيف انت
_أشوف فيك يوم يا وسام
_هههههه اطمن انا عامل حسابي ما بتقبض زيكم كلو مرة يا كييش
_ارح ارح دا ما عندو موضوع ساي
مشو الصالون واي واحد فيهم بلز في التاني عشان يدخلو ومن شافو العكاز اتصمغو في مكانهم وبقو منطرين عيونهم ضرب العكاز بالارض وقال ليهم
:ما تقعدووو مالكم الله!!
رئبال وهو ببلع ريقو وبقعد:خ..خير يا ابوي كنت عايزنا في شنو??
_خير يا ولدي خير..قبلي ما نخش في موضوعنا الاساسي كنت عايز أكلم سديم انو حيقعد معانا الفترة دي لانو عمو سمير مسافر لاولاده كم شهر ومافي زول حيكون معاهو عشان كدا احسن يجي يقعد هنا ولا رأيك شنو يا زول??
_والله انا ما عندي مانع يا خالي البتشوفو كويس اعملو
_طيب خلاص هسي تمشو انت ورئبال البيت وتجيب حاجاتك كلها خلي وسام يوديكم
_حاضر يا خالي
_وبالنسبة للموضوع التاني
رئبال وسديم طوالي صلحو قعدتهم وبقو يعاينو لبعض بتوتر
صرا ليهم وشو قبل مايضرب الطربيزة بقوة ويقول:الليلة ما مشيتو المدرسة مالكم??قايلني ما حاعرف يعني?? لنا ورتني كل حاجة...
رئبال قال جوا نفسو"اصلا لنا سبب المصايب كلها خليها تصبر لي المعفنة دي ان ما ربيتها من اول وجديد"
قام من كرسيهو عايز يجي يضرب رئبال بس سديم وقفو وقال
:دقيقة يا خالي انت ما فاهم حاجة والله يا خالي حصل كدا وكدا وعشان كدا رجعنا البيت رئبال ما عندو زنب والله لو عايز تضرب زول اضربني انا بس ارجوك ما تضرب رئبال
_لالا يا حاج اضربني انا
تاج الدين بقا يعاين ليهم وهم بتشاكلو في منو الحيضرب مشي يدو في دقنو وقال
:خلاص اهدو يا أولاد انا ما حاضرب واحد فيكم ووسن الله يسامحها هي ما كانت عارفة انو حيحصل كدا صدقني يا ولد لو كانت عارفة ما حتعمل كدا اكيد في النهاية ديل امها وابوها ومافي زول بقدر يشيل مكانتهم اي كان ربت علي كتفو وقال:اياكم تعملو كدا تاني اوك
_حاضر ان شاء الله يا ابوي
اول ما مشى رئبال وسديم
اتنفسو الصعداء
_ااااه الحمدلله ربنا سترنا ساي يا صحبي
_والله وكت جاي يضربني داك قربت اجري لكن قلت يقوم يفلعني بعكازو داك يجيب اجلي(طبعا هو ما عجوز للدرجة ديك بس بمسك العكاز لمن يكون غضبان يعني لو اتلولوت معاهو  بخبطك بيهو طوالي ولا بهظر)
_وربي لو ما أخوك شفت وحريف كان الليلة كسر ليك عضامك
_تشكر يا فردة عارفك ما بتقصر ودائما اوكاتك مظبوطة
_احم احم لا شكر علي واجب ولوو ما بيناتنا يا خوة
بعد شوية وسام جاهم وهو مكشر وشو ويطنطن براهو
_مالك مكرفس وشك كدا زي اخر الشهر
_يخخ دا الحاج شغلااا لينا لقاني بلعب بليستيشن مع لنا نهرني وقال لي انت شافع تلعب في البتاع دا وخالي قرايتك وانتي يا سنيورة امشي ساعدي امك بدل ما قاعدة كدا زي الاولاد وقفل البليستيشن وشالو مننا +قال لي امشي سوق سديم ورئبال بيت عمكم سمير عشان سديم حيقعد معانا كم شهر
رئبال وقع في الارض وبقا يضحك وسديم شغال لي:ما عجبني ليك لكن يا ود خالي شفت الله دا ما بيظلم زول دائما كنت بتضحك علينا شايف هسي انقلبت الطاولة عليك
رئبال رفع ليهو حاحبو:ما قلنا شفوت وما بنتقبض وكدا هههههاااي
وسام وهو بحك راسو بٳستهبال:والله يخخ الحاج باغتني وما اداني فرصة
_ابقى المرة الجاية اعمل حسابك
_اطمن يا حبة ما حيكون في مرة جاية انا حردت البلي خلاص
_ههههههااي قلت كدا??
_ايوووون
ركبو فوق ووسام شال مفتاح عربيتو ونزل
...مشو بيت عمو سمير وسديم شال حاجاتو كلها بعدها قعدو ليهم في محل ظريف كدا اكلو ايسكريم ورجعو البيت
ـــــــــــــــــــــــــــــــــــــــــــــــــــ
لتين كانت دافنة وشها في المخدة وبتبكي قدرتها سمعت صوت الباب بدق مسحت دموعها بسرعة وقالت:ميييين??جاها صوت ايثار:انا والشباب جينا نشوفك افتحي الباب دا
_طيب دقيقة بس
فتحت ليهم ووشها محمر من شدة البكي
البنات مسكوها وقعدو يعزوو معاها زييين
ايثار مسحت للتين دموعها
وقالت:بالرغم من انو ود عمي بس العملو دا ما بيغتفر بعتذر ليك بالنيابة عنو يا لتين امسحيها لي في وشي حقك علي
_انتي ما غلطتي عشان تعتذري الغلط غلطي انا الصدقتو ووثقت فيهو بس طلع حقير وواطي وما بيستاهل حبي ليهو
براءة: معليش يا ايثار بس مضطرة اقولها ليك ولد عمك دا طلع ما راجل واوطى من الموس علي البلاط تفوو عليهو تربية زبالة يعلم الله
عمار ضرب الحيطة بكل قوتو وقال:اياد الكلب الواطي ان ما ربيتو انا الباطل دا ابقي ما راجل
براءة:اوعك تتهور يا عمار خليك عاقل وبطل جنون
يوسف وقف علي حيلو:وانا معاك يا عمار لازم ننتقم من الكسر صحبتنا وبكاها وحنبكيهو بدل الدموع دم
ايثار بقت تعاين ليهم وهي مخلوعة وخافت عليهم من اياد لانو عارفاهو لو خت زول في رأسو حيندمو اليوم الاتولد فيهو
عمار طلع وهو متجاهل مناداة براءة ليهو
_يوسف قوم الحق المجنون دا قبل ما يعمل حاجة
يوسف ودع لتين والبنات ولحق عمار طوالي

يتبع.....
نتــلاقي