مراهقون و لكن

٢٧

"أيها الثائر إياك أن تتوقف عن المطالبة بحقوقك أبدا،ناضل حارب قاتل حتى أخر نفس لك فلا حياة في العيش بدون كرامة،إن وطننا ينزف ونحن الوحيدون القادرون على إنقاذه من سرطان الإنقاذ الذي لطالما عانينا منه منذ ولادتنا ولا زلنا نعاني منه حتى الأن،لكن هيهات لا رجوع أو تكاسل بعد اليوم ،حانت ساعة الذروة لذلك فلتستعدو ولنمضي بوطننا نحو الأمام....؟!!! "
ـــــــــــــــــــــــــــــــــــــــــــــــــــــــ
وسن فضلت سرحانة وبتفكر في موضوع الطفل دا لحدي ما جاها سديم وفي يدو صينية أكل ختاها جمبها وقال ليها:مرت خالي قالت ليك أكلي كويس لأنك من الصباح ما أكلتي شئ،وسن قالت ليهو:تسلم بس ما عندي نفس أكل والله يا سديم،إتردد قبل ما يقول ليها:لا حاولي أكلي حبة عشان ما تدوخي من الجوع وحرام الطفل الجواك ما عندو زنب،شالت المعلقة وقالت ليهو:طيب ممكن تأكل معاي؟
سكت مسافة بعدها قال ليها:حاضر
وسن إبتسمت ليهو وفجأة نفسها إنفتحت للأكل وبدت تأكل بشهية مفتوحة بعد ما خلصو سديم ودى الصينية وجاب ليها عصير برتقال شربتو وقالت ليهو:شكرا ليك يا..يا أخوي
سديم ملامحو إتغيرت وطوالي قام وسن وقفتو وقالت ليهو:سديم حلفتك بالله أقعد وأسمعني يااخ
سديم وقف وعاين ليها مسافة بعدها قال ليها بإبتسامة:أنا عارفك حتقولي شنو فعشان كدا حأجيب ليك من الأخر وأقول ليك وسن خلاص مسامحك أنا
وسن وهي بتستوعب كلامو:لحظة لحظة قلت شنو؟؟عيييد أنت قلت شنو هسي؟؟
سديم وهو برجع ليها ويحضنها ويقول:يا هبلة انا سامحتك من زمان أصلا
_بالجد قول أقسم؟؟؟
_أقسم بالله العظيم سامحتك ياااخ ما تشغليها لي
_ طيب يا كلب يا رمة أنت ساكت ليييه وما إتكلمت من زمان ياااخي أنا لمن فقدت الأمل وقلت خلاص سديم عمرو ما حيسامحني؟؟
_أها خلاص بدينا الشتايم وقلة الأدب اه ولا تاني خلاص زمن الغتغتة والدسديس إنتهى
_زمن شنو الأنتهى يا بيبي؟؟
_الغتغتة والدسديس على قول حميدتي وفي رواية أخرى حميرتي ههههههههه
_ ما علينا المهم بما انو زمن الغتغتة والدسديس إنتهى عايزة اقول ليك حاجة؟
_أها قولي؟
_مشتاقة ليك شديد يا اخوي والله
_وأنا كمان بس تانى خلاص ما يفرقنا إلا الموت
_أسكت ما تقول الكلمة دي بقى عندي رهااب منها لأنو حرفيا أنا عانيت منها شديد أول شئ أمي وأبوي ماتو بعدها خليل زوجي الله يرحمو ويغفر ليهو وأخر حاجة خالي تاج الدين
_الموت حق يا وسن وكلنا حنلاقيهو في يوم من الأيام
_أيوا عارفة بس انا بقيت بخاف أخسر زول تانى بأي سبب من الأسباب لأني أكتفيت وجع وبقيت رهيفة شديد
_يا ستي الرهيفة التنقد خلاص تاني كل حاجة حتكون كويسة والحمدلله هسي ربنا عوضك بسعاد حتنسيك كل الفات
_سعااااد!! سعاد منو؟؟
_بتك يا سجم الحتنور الدنيا قريب
_هااا ب بتي؟؟ اه وأنت كيف عرفت أنها حتكون بت؟
_ما عارف لكن حاااسي انو حتجيبي بت تشبه أمي الله يرحمها وأكيد حنسميها علي أسمها سعاد ولو كمان طلع ولد حنسميهو عبداللطيف علي أسم أبوي في كل الأحوال ما فرقت ولد ولا بت البجي من الله كلو خير
_سديم
_هلا؟؟
_فكرك أنو الطفل الفي بطني دا حيفرحني وينسيني كل الفات؟
_أكييد طبعا يا سونا بيهو حتقدري تتجاوزي كل العشتيهو أنا متأكد ما تخافي الموضوع إيزي والأمومة دي حاجة عظيمة ويكفي أنو الجنة تحت أقدام الأمهات
_"يا الله أنا كنت حأسوي شنو يا رب سامحني اني فكرت اقتل جناي الما عندو ذنب في اي حاجة حصلت ،، كييف بقيت أنانية وفكرت بالطريقة دي أنا؟؟ سديم فرحان ومتأمل أنو ولدي يطلع شبه امي وأبوي ويشيل أسمهم وأنا كنت ناوية للمرة التانية أقتل أمي وأبوي وأحرمو منهم أستغفر الله العظيم يا رب عوضني بطفلي دا عن كل الوجع والألم العشتو وأقلب حياتي كلها فرح وسعادة يا رب"
_وسن سرحانة وين وبتفكري؟
_أأأ لا ولا حاجة بس كنت بفكر بعدين ولدي حيعيش كيف من دون أب وحيتقبل فكرة أني قتلتو وهربت منو ساعتها ممكن يكرهني ويخليني وما بعيد يمشي يقعد مع أهل ابوهو ويعيش معاهم ما عارفة يا سديم لكن انا خايفة شديد وما بقدر علي مسؤولية الطفل دا
_يا وسن يا أختي ما تتوهمي ساي انتي ما قتلتي زول الحصل كلو كان حادث وأنتي كنتي بتدافعي عن نفسك ما أكتر وأتذكري أنو الله دا ما بحملك فوق طاقتك ولو ما كنتي بتقدري علي رعاية الطفل دا ما كان ربنا رسلو ليك أنتي ما عارفة الحكمة شنو  من جيتو فما تخافي لأنو الله ما بنسى زول
_أنت عارف أنا كم مرة جاتني فرصة أنو أقتل خليل وأهرب منو بس كل مرة كنت بتراجع وأقول حأمشي وين أصلا أهلي ما حيستقبلوني ولو جيتهم وانا كاتلة راجلي عشان اهرب منو فأكيد حيتبرو مني عديل تتذكر قبل شهر وقت لاقيتكم في الشارع أنت ورئبال
_أيوا بتذكر كان اول يوم لينا في المدرسة بس أنا تعبت ورجعنا البيت اها كملي حصل شنو؟
_كان يوم عادي زي كلو يوم كنت محبوسة في الغرفة براي وقاعدة لحدي ما سمعت صوت المفاتيح في الباب ما أهتميت للموضوع كتير وفضلت سرحانة لحدي ما الباب فتح وجاني وهو ما قادر يشيل حيلو وبتنفس بصعوبة طبعا هو عندو أزمة فطوالي قلت ليهو وين بخاخك هز لي رأسو وانا فهمت أنو البخاخ انتهي فقلت ليهو بتقدر تستحمل لحدي ما أجيبو ليك وأجي؟هو عاين لي مسافة كدا وقال لي بصعوبة:القروش بتلقيها في الدولاب،، أنا طوالي جريت شلت القروش وجيت لبست لي أقرب عباية ما أكذب عليك اللحظة ديك أنا كنت خايفة عليهو شديد مهما كان هو راجلي والله بسألني فيهو فلمن كنت طالعة أداني مفتاح العربية وقال لي بصوت مكتوم:وسن عارف أنو ما لي حق أقولها بس أرجوك ما تخليني أموت،،أنا عاينت ليهو وقلت:ما تخاف ما حأخليك تموت بس إتأكد بعدها ما حأقعد معاك في البيت دا ولا ثانية
هز لي رأسو بإيجاب وقال لي:حاضر الدايراهو يمشي
ساعدتو ورقدتو في السرير بعدها مشيت وفتحت الباب وطلعت لأول مرة بعد كم شهر أشوف الشمس وأشم هواء طبيعي زي الناس فضلت واقفة مسافة وأنا مغمضة عيوني ومبتسمة البواب أتخلع لمن شافني طالعة أظن خليل كان مفهمو انو انا مريضة او مجنونة المهم أي عزر يخليني ما اطلع من البيت سألني بتوتر مالك قلت ليهو خليل عندو أزمة وبخاخو انتهي وتعبان شديد لو سمحت ممكن تمشي تقعد معاهو لحدي ما أجي قال لي خليني امشي اجيبو انا قلت ليهو لا أنا الحاجيبو بنفسي ومشيت ركبت العربية وانا بحاول اتذكر بسوقوها كيف لاني لي شهور ما سقت عربية ولا شفتها زاتو المهم بعد معافرات حتى دورت ومشيت وأنا بحاول ألقى لي في صيدلية لانو بيتنا دا بعيد من الزلط ومافي جنبو صيدليات فسألت لي ناس وصفو لي والحمدلله لقيت عندهم البخاخ وجبت ليهو أتنين عشان كان واحد خلص يستخدم التاني طوالي،المهم هو بقى كويس وكنت مفتكراهو حينط من كلامو ويحبسني بس إتفأجئت ببهو بحضني وبقول بصوت زي العايز يبكي:ما عارف أشكرك وأقول ليك شنو بس أنا بعتذر ليك عن أي حاجة زمان ولو عايزة تمشي أهلك أمشي أنا ما عندي مانع وورقة الطلاق بتجيك في محلك شيلي العربية وخليها معاك أنا بجيب لي وحدة تانية وبالنسبة للنفقة فكل شهر حأنزل ليك مبلغ في حسابك ولو أحتجتي لأي شئ حتلقيني موجود،،لأول مرة إتجاوب معاهو لدرجة أني حضنتو وقلت ليهو:خليل أنا ممكن أغفر ليك حقي بس وجع أمي وأبوي واهلي معليش ما حأغفرلو ليك وحأفضل أكرهك طول عمري لأني بسبب حبك الوهمي دا خسرت أي حاجة وما مستعدة أخسر عمري معاك أنا ماشة يا خليل،،سكت مسافة كدا بعدها قال لي:طيب يا وسن أعملي البريحك والبتشوفيهو مناسب بعدها لملمت حاجاتي ومشيت منو وأنا طايرة من الفرح بس لاقيتكم في الطريق ومن خلال ردود أفعالكم عرفت أنو ما لي مكان بيناتكم ففضلت أني أرجع لخليل ولحياتي البائسة معاهو لكن أنت عارف الحاجة الوحيدة الطلعت بيها من زواجي من خليل هو طفلي دا ولو ما كان بيان لقتني وصدمتني ما كنت حأكون هسي معاك في المكان دا وما كنت حأتعرف علي ناس جميلة وطيبة زيهم كدا حرفيا بيان دي ملاك ياااخ البت دي بتتحبى شديد والله أنا اشتقت ليها وناوية أمشي ليها قريب أوريها بخبر حملي دا أكيد حتفرح شديد
_يااااه لو كنت كاتب روايات كان كتبت لي رواية مقتبسة من قصتك دي غايتو حياتنا بقت زي الأفلام يا أختي كلو يوم شايتانا في حتة اخخخخ بس
_أي والله ياااخ
في اللحظة دي رئبال جاء خاشي وهو بفتش علي سديم أول ما شافهم قاعدين سوا مع بعض أبتسم وقال ليهم:أوووبااا من متين الصلحة؟؟ وسن ضحكت وقالت ليهو:من زمان بس اللخو دا كان عامل رايح وما عايز يقول لي تخيل بس
_أصلا أخوك العامل لي عيونو زي عيون البوتجاز دا زول غتيت وبكتم الكلام شديد يا لطيف منو
_الله أكبررررر عليك قول ماشاء الله ياااخ وبعدين بتفتني مع أختي كدا ليييه؟؟
وسن ضربتو في كتفو وقالت ليهو: ما قلنا زمن الغتغتة والدسديس أنتهي؟
_أأأ اي ما هو أنتهي ياداب فعشان كدا حكيت ليك طوالي.. عرفتي؟
_أمممممم لالا تمام ظريف
_اها يا ماما الصحة كييف؟
_فل الفل يا خالو الحمدلله ما عندي عوجة
_وي وي بقيت الخال يا رئبال كبرنا وعجزنا والله
_ههههههه ولسع ما أنجزنا كمان
غمز ليهو وقال:ما أنجزت شنو أنت أنجزت أنجاز كمان
_ههههههه في داعي هسي للكلام دا سديموه
_أحم أحم حأعمل رايحة وزي كأني ما سمعت حاجة
_يكون كدا أحسن والله..المهم أسمعني يا سجم أرح نقرا عشان بكرا ما نتلفت في الأختبار
_زاااابط يلا باااي يا مزة لسع عندي باقي كلام ما خلصناهو
_ههههه بكرا بكرا نتمو الفي شنو والماف شنو
بعدها وسن فضلت تغني وتدندن وحست فعلا أنو العوض جاها وحتضوق طعم السعادة الأتحرمت منها لشهور..بس...(يا ربي الدنيا حتمشي معاها سمبتيك وحلوة كدا ولا القدر عندو رأي تاني؟؟)
ــــــــــــــــــــــــــــــــــــــــــــــــــــــــ
#في جانب أخر.....
بيان كانت حاسة بخوف رهيب وهي بتقول للدعامي الكان ماسكها بطريقة مقرفة وبدفرها بالغصب عشان تنزل:ما تلمسني بنزل براي قلت ليك أوووعى تقرب علي،،هو حمر ليها وبقى يضربها بالعصاية بحقارة ولمن نزلت بقى يشلتها بجزمتو الكبيرة ويقول:كمان ليك عين تتكلمي يا سفيهه أصبري بس تربيتك علي يدي أنتي والشرذمة كلهم ، بعدها جابو جردل موية كشحوهو في أحمد المغمى عليهو وبقو يحاولو يصحوهو أحمد فتح عيونو وبقي يتمتم بكلمات ما مفهومة في واحد من الدعامة ضربو بالخرطوش وقال ليهو:يلا قووم يا بطل دا أنت لسه ما شفت حاجة أحنا كنا بندرب فيك عشان تقدر تستحمل ضرب الأمنجية جوة المعتقل يلا يا بطل قوم وخش جوة من سكات واي سؤال يسألوك ليهو تجاوب عليهو وتقول الحقيقة زي الشاطر طيب؟؟ المعاهو قال ليهو:ياااخ ديل ما ينفع معاهم الكلام تضربهم وتشبعهم ضرب وحيحكو ليك أي حاجة من طق طق للسلام عليكم  الواحد يكون ما عندو مروءة للحاجات دي وبرضو يقوي رأسو ويطلع شباب عطالة وشماسة ساي الله لا جاب باقيهم ياخ،كل دا وأحمد ما كان واعي ليهم لأنو مضروب شديد،،إسراء بقت تصرخ فيهم وتقول:ما شايفنو ما قادر يقوم ويتكلم حتى ياااخي أنتو ما بشر حسبي الله ونعم الوكيل فيكم يا كلاب بس مع كلامها دا حست ليها بكف ناري في وشها وإتعدلت بكف تاني ودي كانت وحدة من الأمنجيات قالت ليها بحسها التخين:شوفي هنا يا بت ال.... أوعى تعلي صوتك وتقلي أدبك انا قلة أدب الشفع دي ما بتنفع معاي فاهمة؟ إسراء كانت ماسكة وشها ومصدومة منها يمنى حضنتها عليها وبقت تعاين للأمنجية بغضب، الأمنجية قالت ليها بتحقير: نزلي عينك دي عشان ما أقدها ليك يا تافهه أنتو شكلكم ما خشيتو معتقلات جهاز قبل كدا وما بتعرفو حاجة عننا أحنا أكعب من الموت صدقوني حتتمنو الموت لأنو حيكون أرحم من معتقلاتنا يا ****وطوالي جرت يمني وإسراء وبيان من شعرهم وطبعا هي عاتية وضخمة كدا التلاتة بعدلهم رمتهم جوه وبقت تتكلم مع الدعامة وتقول: ياااخ العواليق ديل جبتوهم لينا من وين حتساهرو بينا ساي أحنا العندنا ما قادرين نتخلص منهم ما عارفة التيت ديل لسع بطلعو مواكب لييه مرضونا الله يمرضهم ياخ ،،الدعامي ضحك وقال ليها:قلنا نساعد الشرطة حبة ونعتقل معاهم العفن ديل ، الأمنجية عاينت لأحمد وقالت: والخايب الباطل دا مالو راقد زي الجثة كدا الواحد لمن يطلع الشارع عامل فيها أسد وراجل ووقت يعتقلو ويضربو سوطيين يبقي ليهو حار ويقعد يتماوت لينا قرفتونا الله يقرفكم ياااخي ،نادت ليها كم أمنجي من جوه وقالت ليهم:تعالو أرفعو الخايب الما نافع دا وأرزعوهو جوه مع باقي العواليق الزيو ديل،،الدعامي القال لبيان أدبكم علي يدي همس للأمنجية في إضانها وقال ليها كلام كدا خلاها تضحك وتقول ليهو بخبث:أبشششر يا زول ما طلبت حاجة عايز حاجة تانية؟؟
ضحك وقال ليها:لا تاني ما عايز حاجة سعادتك إلا سلامتك بس،،بعدها الدعامة ودعوها وركبو تاتشرهم وفاتو....يلا من النقطة دي حأحكي ليكم الرواية
#علي لسان بيان.....
بعد ما دخلونا جوه المعتقل أنا كنت مرعوبة وبرجف كلي أحساس ما عارفة حيحصل لي شنو وهل حأقدر أطلع من هنا تاني أو لا ؟ إتمنيت في اللحظة دي اني أكون في حضن أمي وأبوي قاعدة في البيت في أمان الله حرفيا ما إتصورت الموضوع يكون بالبشاعة دي بعد ما شالو أسمائنا كلنا رجعو يضربونا بكل حقد كأنو أحنا ما بني أدمين زيهم ما عارفة بس للحظة حسيتهم وحوش ما بشر لأنو دي ما أفعال بشرية طبيعية والله، أنا من شدة الضرب لمن جسمي خدر وعيني اليمين إتأذت شديد بقيت قافلاها وفاتحة عين واحدة بس دا غير الألفاظ البذيئة الكانو بصفونا بيها وهم بضربونا أنا ما قادرة أوصل ليكم حجم البشاعة الكانت هناك بس أنا مع كل خرطوش يلمسني كنت بتحسبن عليهم وبدعي في سري أنو الضوقونا ليهو دا كلو يجي في أخواتهم وأولادهم،بعد أنتهو من ضربنا ودونا غرفة كدا كنا أنا ويمنى وإسراء ومعانا زي ٨ بنات بس أنا كان كل همي أحمد بالجد الولد دا أنا برتاح ليهو شديد وحسيتو زي اخوي الصغير يا ربي هم هسي بعملو فيهو شنو؟؟ يا رب تلطف بيهو وتجيب العواقب سليمة في اللحظة الأنا كنت بفكر فيها في أحمد والحيحصل ليهو شنو أهلي بهناك كانو مقلقين علي وما عارفين أنا مختفية وين خصوصا انو الواطة قربت علي المغرب وأنا لسه ما رجعت البيت،أمي كانت ماسكة التلفون في يدها وكل شوية تضرب في تلفوني ويجيها مغلق عارفين ليييه؟ لأنهم شالو تلفوناتنا وأي حاجة كانت عندنا سحبوها مننا وخلونا مجردين من أي شئ،أبوي كان ثابت وقال ليها:أهدي يا حنان بتكون جاية في السكة وتلفونها قطع شاحن بس ما تكبري الموضوع بيان ما صغيرة تاني ،أمي قالت ليهو:صغيرة يا عبدالرشيد صغيرة شفت بتي دي لو بي أحفادها حتفضل في نظري صغيرة وشافعة برررري منك دمك بارد بتك ما معروف أراضيها وين وأنت ما فارق معاك شئ؟
_ما حكاية ما فارق معاي لكن بتي وبعرفها هسي بتجي داخلة وتلقاك في حالتك دي وتضحك عليك أنت يا حنان لو البت دي بتخافي عليها كدا مخلياها براها في مصر لييه؟؟
_شفت القاهرة دي تاني ما عندها رجعة هناك إلا مع راجلها بس غير كدا لا وألف لاااااا،حاولت في رقمي تاني بس نفس النتيجة قعدت بإنهيار وقالت:أنا قلبي بقول لي البت دي ما كويسة وعندها عوجة لو كانت كويسة كانت حتجي والله ما كانت بتتأخر كدا الله يستر عليك يا بتي ويحميك
أبوي قال ليها:كدي أضربي لسكينة مرت عباس أخوي إحتمال البنات يكونو رجعو وقاعدين يتونسو هناك بس،،أمي طوالي إتصلت لمرت عمي وطوالي جاها :الووو سكينة كيف...منو معاي؟؟ هييي يا سهي طمنيني عليك الله البنات ديل ما رجعو البيت لسع أنا من قبيل قاعدة علي أعصابي ؟ ... يا بتي كدي اهدي وقولي لي البنات ديل الحاصل عليهم شنو ما تخوفيني الله يرضي عليك ... شنوووو!!!! الليلة ووووووب من الجاتك في بتك يا حناااان الليلة وووووب  يا بيان بتي خلاص راااحت،أبوي أتخلع وقال ليها:في شنو البنات ديل الحاصل معاهم شنو يا حنان أنطقي؟؟
أمي بقت تبكي بأعلي حسها وقالت ليهو:بتك طلعت تتظاهر يا عبدالرشيد بتك كذبت علينا وطلعت مع يمنى المظاهرات شفت أخر دلعك عمل شنو انا أساسا ما كنت مطمنة لقصة صحبتهم العيانة دي أنا عايزة بيان يا عبدالرشيد جيب لي بتي هسي دي وطلعت الشارع وبقت تبكي بأعلي صوت عندها والجيران طلعو علي صوتها وهي بتقول:الليلة وووب يا بيان يا بتي تغفليني وتطلعي مظاهرات لييه؟؟ مقصرين منك في شنو أحنا؟؟أكل وبتأكلي أحسن اكل لبس وبتلبسي أفخمو وأغلاهو وللعربية عندك بتحرقي حشاي وبتطلعي مالك يا بتي؟؟ أنا لمن الجوطة دي بدت كنت مانعاك من الجية للسودان عشان عارفاك رأسك خفيف وتيار المظاهرات دا حيجرك زي أختك سهى وما خليتك تجي إلا بعد ما سقطو عمر البشير والأوضاع هدت وحذرت أختك أنو تجيب ليك سيرة عن الموضوع دا تجي أنتي هسي وتطلعي يا ناس شوفو لي بتي دي وين وجيبوها لي بس هسي دي أنا عايزة بيان قدامي جيبو لي بيان
الجيران بقو يهدوها ويقولو ليها:حترجع بتكون مدسية ليها في حتة وهسي بترجع
_أنا بتي ما بتعرف الحاجات دي ولا حتعرف تتصرف والناس ديل الكتل عندهم زي شراب الموية
أبوي جاء طالع وقال ليها:أنا أتصلت لحسان ولدي وحيمشي يفتشها وين ويجيبها خشي جوة يا حنان البكا ما بعمل حاجة خشي صلي ليك ركعتين وأدعي ليها ترجع بالسلامة
أمي قامت وهي ما قادرة تشيل حيلها وبقت تردد:الله يلطف بيك يا بتي ويحفظك من كل شر
أما أنا في المعتقل كانت حالتي سيئة شديد بعد ما أستجوبونا ولقو ما عندنا حاجة نقولها وكنا رافضين نعترف بالحاجة الهم عايزين يسمعوها مننا،أنا لمن سألوني تابعة لوين وبدفعو ليك كم؟تلقائيا ضحكت وقلت ليهم
بدون ما أفكر في كلامي:تابعة لمنو!!! هه أنا تابعة للشارع ولكل بيت سوداني عانى ولحدي هسي بعاني بسببكم من 30 سنة وأحنا حالنا راجع لورا وكلو يوم ماشين لأسوء وبقى تاني ما عندنا حاجة نخسرها يا أما نموت وأحنا بنطالب بحقوقنا يا نفضل علي الحال دا بس كل شئ ليهو نهاية وأحنا صبرنا عليكم 30 سنة ما حنقدر نصبر تاني لأنو الفينا كملت والبيدفعو لي دا قروش العالم كلها ما بتساويهو من بدت الثورة شهر 12 يعني قبل 8شهور شفنا حاجات أثبت لينا أنو الشعب السوداني بالرغم من أي شئ بس لسع متمسك بأخلاقو وقيمو وإنسانيتو متذكرين وقت كنتو بتقتلونا وبتسكونا وبتنطو في بيوت الناس وتخربوها أبهاتنا وأماتنا الكبار كانو بستقبلونا في بيوتهم ويخبونا منكم أحنا يوم طلعنا ما طلعنا عشان عيش ولا بنزين ولا عشان صفوف طلعنا عشانا وعشانكم وأثناء ما أنا مندمجة في الكلام وقفت فجأة لمن لقيت أني بتكلم براي ومافي زول معاي في الغرفة للحظة حمدت الله انو ما سمعوني لأنو الكلام طلع مني بدون ما أفكر ويمكن كان أكون في خبر كان بسبب كلامي دا بعد شوية جوني أمنجيات ومسكوني من يديني شديد وأنا بقيت اقول ليهم:ماسكني كدا ليييه؟؟ في شنو فكوني،الأمنجية الكانت لاقتنا برة جات داخلة ومعاها أمنجي شايل ليهو حاجة كدا وأنا من خلال خبرتي الصحفية قدرت أعرف أنو الجهاز الشايلو دا صاعق كهربائي،بقت أصرخ وأقول ليهم:لااااا أنتو عايزين تعملو فيني شنو يا كلاب،سكتتني بكف وقالت:مش ما عايزة تعترفي أنا بعرف أخليك تعترفي كييف،أنا بلعت ريقي وحسيت انو نهايتي حتكون في المعتقل دا ،حرفيا دي كانت أسوء لحظات حياتي أنا إنصعقت كهرباء لمن غمرت وأثناء ما كانو بدوني كهرباء أنا كنت عاضة يدي وبصرخ وبحركة لا إرادية مني عضيت ظفري وأتقلع بعدها ما حسيت بحاجة، لمن جاء دور يمني عشان يحققو معاها ما قدرو يطلعو من يمني بشئ وهي بذكائها وخبرتها في المعتقل كانت ثابتة وواثقة من كلامها جدا وما قدرو يعملو ليها شئ وفلتت اما إسراء فكانت محموقة شديد علي أحمد وكانت منفعلة وبتتكلم بدون حذر
الضابط:أنتو ما عايزين تعترفو بحاجة وتقولو الرسلكم منو صح؟
_لأنو أحنا فعليا ما عندنا زول رسلنا أحنا طلعنا برانا وعلشان أخوانا وأخواتنا الماتو في فض الأعتصام
_طيب بتحرقو لساتك وبتخربو الشوارع لييه؟؟
_علشان عايزين ننظف بلدنا ونجيب حق أخوانا الماتو مش قدرنا نسقط البشير في 5شهور حنقدر نجيب حقهم  ونبقيها مدنية بإذن الله
_ههههههه قال سقطنا البشير قال هو أصلا كان حيسقط سوا كان طلعتو مظاهرات أو لا وبعدين
أحنا قاعدين ليكم زي شوكة الحوت أنتو يمكن قطعتو الشجرة وبكدا قايلين أنكم خلصتو مننا خلاص لكن أحب أوريك انو الجذور لسع في وبإمكانها تقوم الشجرة دي من أول وجديد والمدنية دي تحلمو بيها حلم يا شيوعين يا كلاب
الضابطة التانية قالت ليهو:شكلهم غاسلين رأس الشافعة دي وما حتقول حاجة
تعالي معاي يا حلوة أوريك القطع من الجذور كيف ههههه
ساقتها وقعدتها مع البنات وبعد شوية جو خاشات عليهم أمنجيات وفي يدينهم مقصات في وحدة خوافة كدا قالت ليهم:لا والنبي لاااا إلا شعري أنا لسع عاملة ليهو فرد
في وحدة جات عليها ومسكتها من شعرها وقالت ليها:قلت لي عاملة ليهو فرد صح ما عارفة انو الفرد بخرب الشعر وبخليهو متقصف أمممم طيب انا عندي العلاج وطوالي بدت تقص ليها شعرها والبت تبكي وباقي الأمنجيات أي وحدة مسكت ليها بت وبقت تحلق ليها بكل حقد،في اللحظة دي أنا صحوني ليك بالغصب عشان ألحق جز الشعر دا ومن بين كل البنات انا شعري كان الأطول والأسمح ويلا الأمنجيات الغيورات ام صوفتين ديل زعمطتوني زعمطة السواد بعد ما حلقونا لينا ومشو  أي وحدة بقت تعاين للتانية وتضحك وفي بت قالت لي:واااي قلبي وجعني علي شعرك دا أكتر من شعري الله لا كسبهم أم تفة ديل ههههه
يمني جات قعدت جنبي وبقت تبكي وتقول:أعفي لي دا كلو بسببي أنا يا بيان حقك علي،،قلت ليها:لا يا يمني ما تتأسفي علي شئ أنا ما زعلانة علي شعري أبدا دا كلو ضريبة للوطن ههه
في بت قالت لينا:عاااد أنا بعد أطلع من هنا طوالي علي الحلاق أخوي عندو زبونو كدا خطير بمشي ليهو يظبطها لي ولا فاضية لنيمار زاتو ههههههه
إسراء قالت لي:لكن يا بيان الناس ديل مستهدفنك عديل وإلا ما كانو صعقوك بالكهرباء وقلعو أظفرك ،،قلت ليها:لا هم ما قلعو أظفري أنا براي قلعتو بدون قصد أثناء ما بصعقوني
_واااي لكن ديل ما بشر والله العظيم الله ياخد لينا حقنا منهم،،يمنى قالت ليها:دا أكيد الدعامي ود الحرام داك شفتو بوسوس للأمنجية في أضانها وبعاين ليك
قلت ليهم:الله ينتقم منو أنا عملت ليهو شنو لكن
_ديل ناس مريضين ساي يا بيان رددي عليهم حسبي الله عليهم ونعم الوكيل
في اللحظة ديك إسراء كل فكرها كان في أحمد والحاصل عليهو شنو مافي كان في يدها شئ غير تدعي الله يلطف بيهو ويطلعهم سريع من المكان المخيف دا
ـــــــــــــــــــــــــــــــــــــــــــــــــــــــ
حسان أول ما وصل بيتنا جاهو صوت البكاء ولمن خشى جوة البيت لقاهو زي بيت البكاء ،هرشهم وسكتهم كلهم ووعد أمي أنو حيرجعني سالمة بأسرع وقت،لتين جاتو وهي غرقانة في دموعها وقالت ليهو:بابا عليك الله رجع لينا عمتو بيان كويسة،في اللحظة دي محمد ونبيل (خطيب يمنى) جو داخلين سلمو وطوالي حسان قال ليهم:يلا نطلع نفتش عليهم البنات ديل ،لؤي قال ليهو:أنا ماشي معاكم يا حاج حسان قال ليهو:لالا أحنا كفاية أنت أقعد مع جدك وأخوانك،وطلعو محمد قال ليهم:سهى قالت لي أنهم مشو موكب في بري جنبنا وأنا سمعت أنو في ناس كتار أعتقلوهم الليلة من بري و الطائف
_طيب أنا حأمشي أشوف رويال كير وباقي المستشفيات وأنتو امشو شوفو أقسام الشرطة
_طيب كان لقيت اي حاجة ورينا
_وأنتو كمان اي خبر يطلع أتصلو لي
بعدها أي واحد دور عربيتو وفات،نبيل كان بفتش في الفيس علي أي أخبار عن مواكب الليلة وكان بسأل لو في كشوفات أسماء معتقلين طلعت الليلة وأثناء ما بفتش كدا أتفاجئ بفيديو مكتوب فيهو أعتقال 4 أشخاص في بري من قبل قوات الدعم السريع فتحو وقال لمحمد وقف العربية محمد أتخلع ووقفها طوالي وقال ليهو:في شنو مالك يا نبيل
_شوف الفيديو دا كويس وركز في الناس الفيهو
محمد حضرو كلو وأتلفت علي نبيل وقال ليهو:لالالا معقول؟؟ أنا أكيد غلطان ديل ما هم لا
_لا هم يا محمد أنا متأكد دقيقة أحمل الفيديو بدقة أعلي وحنقدر نتأكد ساعتها
_إن شاء الله هم يا رب
_الفيديو تحميلو قرب يخلص يا محمد أصبر