SerO_ona
"ظروفنا تعاند الوجهة
ومابان لينا لا ساحل ولا مرفأة
وموج الدنيا يضرب فينا دون رأفة
بحر الدنيا نحن نعومو دون عرفة "
الدنيا ظالمة ياحسن يا أخوي ، قاسية وما منصفة أصلو
نسأل الله العافية بس ...
هذا ما قاله أحمد صديقي بينما كنا نسير نحو منزله بقرية ود عجبنا
خلصنا جامعة وادونا اجازة شهر وأحمد ساقنا قريتهم بدعوة من اسرتو الكريمة
والد أحمد الله يدي العافية عم إبراهيم ، إمام المسجد وخطيب الجمعة وراجل حافظ كتاب الله
وماشاء الله عالم في الدين
بس أحمد للاسف م ماسك طريق ابوهو أصلو
جنو كورة ولعب 😂
ازيكم أنا حسن بشير طالب في كلية الهندسة المدنية جامعة الخرطوم ، من أولاد أمدرمان
وديل أصحابي أحمد ومنتصر وعبد الله
منتصر وأحمد بقروا سوا إقتصاد اما عبدالله بقرأ آداب جمعتنا الداخلية وجامعة الخرطوم وبقينا شلة واحدة
هم تقريباً أسرتي وأهلي بقو وأكتر من أخواني
نسبة لظروف إطريت أسكن في داخلية رغم إني م بحب السكن الجماعي
لكن لقدام حنعرف انا لي سكنت في داخلية ..
لما عرفت الشباب ديل قدرت أتعود وأتأقلم مع الداخلية ويمكن أكون حبيتها عشان هم فيها
كفاية كلام عننا ..
خلونا في تفاصيل حكايتنا
المهم ونحنا ماشين بعد وصلنا القرية
والواطة كانت مغيرب كدااا ، وماشة علي ظلام
زي البنية الزعلانة تبدا تحمبك ووشها يحمر شديد
شوية شوية لامن تنزل دمعة واحدة بس
وأول ما الدمعة تسيل علي خدها الندي وتحس بي برودتها في خديدها
أخوانها بجن جاريات وتنفقع بالبكاء 😅
أها نحن ماشين والواطة خلاص دمعتها قربت تنزل
هديك شفع الحلة ملمومين ليهم فوق شي!!
وشغالين يكوركو ويصفقوا
أنا م فهمت شئ ياربي ديل مالهم المسلطين ديل
طبعاً ماشي ومستغرب !!
: أحمد اااخوي ديل مالهم الجنون ديل !!
أحمد سكت م رد علي وجرا عليهم
الدهشة كاتلاني كتل ، قريتهم سمحة ياخ وشجر النيم دا مالي الشوارع وبيوتهم كبيرة وواسعة
ودعجبنا هادية شديد الا كان صوت الشفع المسلطين ديل😅
م زي الخرطوم
اها يا أحمد إنت قوم أجري علي الشفع وأنهرهم
وبين شك وظن جا مارق من نصهم وسايق ليهو مخلوق ، لكن م عرفتو راجل ولا مرة
الشعر دا قايم عجاجة بس
والهدوم مدبلات فوق بعض ما تفرز شئ
أول إنطباع أخدتو إنو الزول دا درويش ساي
لانو قريتهم فيها مسيد كبير
أكبر مسيد في الضواحي الجمبهم" مسيد شيخ ود النيل "
ودا طبعاً قصتو قصة براها
شيخ ود النيل دا هنا عندهم حاجة عظيمة جداً
الغريبة انو ميت ليهو اكتر من 50 سنة 😂
ونص الساكنين هسي م بعرفو لكن مصدقين كراماتو وبحلفو بيهو
بحلفو بي إسمو طبعاً
يعني عادي م يصدقوك اذا حلفت بالله لكن تحلف بشيخ ود النيل
" وحياة سيدي النيل "
بقولوا إنوا اذا حلفت كاذب بيهو بقلبك كديس خلا ودي من كراماتوا هناك
وفعلاً في قصص كتير بحكوها عن إنو في ناس إتقلبوا كديس خلا ..
لكن ماف زول بقول ليك انا شفت بعيني
قالوا زمان زمن شيخ النيل في حرامي غريب إتقبض لما مسكوا حلفو بي اسم الله حلف قال م سرقت قاموا حلفو بي شيخ ود النيل
برضو حلف فقامو سابوا
ورجع سرق تاني
اها الناس قالت شيخ ود النيل دا كذاب ساي
اها بعد فترة الحرامي دا إختفي وماف زول إتسرق تاني
القصة دي شاهدها واحد من سكان قرية ودعجبنا إسمو حاج موسي حيلاقينا قدام
دا عارف اخبار القرية كلها
حاج موسي دا قال انا مرة ماشي في الخلا مغيرب كدا لاقاني كديس خلا
وقفني وقال لي أنا الحرامي وشيخ ود النيل دعا فوقي والله سخطني كديس
ودي قصة معروفة شديد وبتحاكو بيها في المجالس
ويمكن للسبب دا قرية ود عجبما خاالية من الحرامية وما اتسجلت فيها ولا حالة لي سرقة
ودي قصة من قصص كتيرة في القرية دي
زول يقلب زول كديس خلا 😂
خرافات لكن ابقي راجل قول شئ فوقو يدفنوك حي
م علينا بشيخ ود النيل كتير
أحمد إستأذن مننا ووصي عبد السميع ود أختو يوصلنا حوشهم
ما ركزت كتير مع الموضوع لأنوا كنا تعبانين من السفر والطريق كان طويل
دي طلعة الساعة 9 صباحاً من الخرطوم
من الداخلية
اتحركنا علي حوشهم
" حوش باشري "
هناك طبعاً بالحيشان اي اسرة بكون عندها حوش كبيييير وبقسمو وبسكنوا فيهو
وهنا بتظهر القروية والبدوية واضحة وجلية
البدو بطبعهم بعيشو براهم وم بحبو يخالط جنسهم جنس غريب
المهم حوش باشري دا أكبر حوش في قرية ود عجبنا
قرية ود عجبنا من اكبر القري وأشهرها في الجزيرة ، وحيدة ومشيحيدة واقعة علي البحر
براها ماف جمبها قرية قريب
عشان كدا بسموها برضو المشيحيدة 😅
موش قلت ليكم القرية دي كلها قصص
المهم ...
القرية دي سبب شهرتها دي قصتين
زمان قصة وليها علاقة بشيخ ود النيل دا
والقصة التانية حنجيها لقدام
قبل سنيين عديدة بحكوا برضو انو شيخ ود النيل دا سكن ودعجبنا
اصلا هو م عندو محل ثابت
رحال زي م بقولوا من قرية لقرية ، في كل قرية بمشيها كان بعرس منها وبقعد وبعمل مسيد وبسافر لقرية تانية
المهم بقولوا انو شيخ ود النيل دا قال انا اخر قرية بمشيها دي أرض الله المباركة 😅
اي والله دا كلامهم
انو آخر قرية بموت وبندفن فيها
الأرض دي او البقعة البندفن فيها دي جزء منها من مكة وجزء من المدينة
يعني شالوا الواطة من هناك وجابوها هنا
دي كراماتو كداا😅
المهم حظ مشيحيدة الشيخ جا سكن فيها ومات واندفن
زي م بقولوا
" حظ الكيشة يقع يلقي الواطة مافيشة 😂 "
ومن ديك كسبت قرية ود عجبنا شهرتها
ومن ديك قرية ود عجبنا بقت مزار لكل مريدين الشيخ ود النيل
بجو بتبركوا في ضريحو كل جمعة
من بعد الصلاة لحدي المغرب كداا
واحدة من القصص السمعنها انو الشيخ فتي فتوة وقال الما قدر يحج في مكة يحج في ضريحي دا
لانو الارض دي من مكة 😂
البضحك اكتر انو في ناس جات وادت موسم الحج في ضريحو
كيف ما تعرف 😅
حاجة غريبة موش وياما حتشوف قصص وعجايب في قرية ود عجبناا
وصلنا البيت وفرشوا لينا السراير بعد غيرنا وإستحمينا
أكرمونا كرم شديد ربنا يعزهم
عمنا إبراهيم زول واجب وزول حارة ، إستقبلنا بالأحضان ووقف أولادو صف في خدمتنا
بما فيهم أحمد زاتو
الحاجة السمحة في القري إنهم بعقدوك بي كرمهم وطيبتهم
راقدين في السراير زي الجنايز تعب شديد
انا راقد في السرير وبعاين للسماء
اول مرة اشوف السماء دا كبير كدا
والقمرة كبيرة زي قراصة أمي زمان
وبقيت بفكر في الحصل قبيل ، ياربي دا شنو
مجنون ولا درويش ولا زول راكبوا جن
سبحان الله كان شاغل تفكيري الموضوع شديد ، بس طبعاً كنت منبهر جدا بتفاصيل قرية ودعجبنا
وشوارعها الكبيرة وبيوتها الضخمة المبنية من الطين والزبالة وبعض البيوت الأخري المبنية من الطوب الأحمر
كانت رائحة الزبالة تفوح من جميع الشوارع حتي عكست عبقها علي أجساد ساكنيها
