إنفعلت شديد انا وبقيت ما شايف قدامي وكلام عمي إستفزاني شديد ، قمت طوالي شلت الكرسي الجمي ومشيت علي بي غضب ...
لحظتها كنت بس عاوز افنو بالكرسي بس مسكت نفسي ، دا عمي في النهاية وعمي الكبير
مهما عمل حيفضل عمي
ختيت الكرسي وقعدت فيهو وبقيت مقاصدو واتكلمت معاهو ..
ياعمي الكلام دا ما صاح منك والقرار دا ما في محلوا ودا ما كلامي براي حتي أسأل عمي جمال
عمي جمال ساكت وبسمع في حوارنا داا
عمي الريح م اشتغل بي وقبل مني علي الحيطة واداني قفاهو
حسيت لحظها عمي بس بحاول يستفزني بي اي طريقة لانو اسلوبو كان ما حلو خالص
قلت ليهو ياعمي
امنية ابوي كانت انو يشوف فاطمة خريجة ما تحرمو من امنيتو دي ، انحنا بنحترمك وانت كبير البيت لكن الكبير دا ياعمي كبير بي حكمتو وقلبو الطيب
كنت بحاول ارقق قلبو عشان خاطر يرجع في قرارو ويخلي فاطمة تمشي الجامعة
عمي كان مصر وحسمني بي نفس الكلام الفات
انا قلت كلمتي وكدي زول يكسرها
انا والله م اكذب عليكم م فارق معاي زول ، الوحيدة فاطمة بس البتهمني
ومحاولتي دي بس كانت عشان امنع مشاكل ما تحصل بس الظاهر كداا المشاكل جاية جاية
قمت وطلعت وعمي جمال قال لي كدي انتظرني براا انا بتفاهم معاهو
وطلعت وانا اخلاقي في نخرتي ومتضايق وخلاص الفي راسي بعملو وطظ فيهم كلهم
وانا طالع لاقيت محمد ود عمي
قال لي :
حسن كيفك!!
سلمت عليهو وبدا يتناقش معاي واعتزر لي من تصرف ابوي وقال لي :
انت عارف ابوي وعصبيتو وكيف نحن هنا مكرهنا عيشتنا وانا م عارف والله اساعدكم كيف انا ما مع ابوي بس م حأقدر اتدخل
قلت ليهو :
م بتقصر يامحمد انا عارف البير وغطاها بس عاوز مهما حصل بيني وبين عمي البيني وبينك نطلعها برااا انت فاهمني صاح
قال لي م تخاف ياحسن انت اخوي وفاطمة اختي وانا نفسي هي تكمل تعليمها والله وتتخرج حرام فاطمة شاطرة لكن نقول شنو
حسبي الله ونعم الوكيل
استأذنتوا اني راجع البيت عشان فاطمة براها وبكرة عندي امتحان وعاوز اقراا
طلعت من بيت عمي ومشيت بيتنا ، خشيت لقيت هدومي مكوية وجاهزة شكلو فاطمة جهزتهم لي ولقيتها راقدة في غرفتي منتظراني لكن شكلها نامت 😅
فاطمة وهي نايمة شكلها بكون بريئ شديد ، طفلة بس والله ربنا يحفظها
اصحيها ولا ما اصيحها !!
وما كان نفسي اصحيها خليتها نايمة قلت اطلع امشي المطبخ اعمل لي عصير ولا جبنة عشان اراجع بي مزاج وانا طالع رجلي خبطتت في الباب ومع الصوت فاطمة صحت
رفعت راسها شافتني ..
قلت ليها معليش صحيتك قالت لي انت اتأخرت مالك مشيت وين ؟؟
قلت ليها لالا م مشيت حتة بس لاقيت اصحابي وراجعنا شوية في الجامع ..
قامت قالت لي ماش وين !!
وريتها قامت رجعتني قالت لي اقعد زاكر انا بعمل العصير وبجي اراجع معاك
وفعلاً جابت العصير وقعدنا راجعنا سوااا وجهزت نفسي لحدي م الساعة 11 جات
قلت ليها كدا كفاية م عاوز اساهر عشان اصحي بدري 💜
وسألتها اها جهزتي هدومك لي بكرة الجامعة ؟؟
قالت لي لالا
انت نسيت عمي قال شنو ؟؟
قلت ليها عمي دا مخرف ساي امشي جهزي هدومك وحاجاتك وبكرة حتمشي الجامعة وانا بعد اخلص امتحاني بجيك بهناك تمام نرجع سواا
اصلاً جامعتها قريبة م بعيدة من مدرستنا
انا مدرستي في سوق امدرمان جنوب السينما مدرسة وادي سيدنا الثانوية بنين
والاحفاد م بعيدة شديد مننا
