الله أكبر الله أكبر
أذن المغرب وانا في خشم الباب ، جواي مخنوق شديد ومتضايق مع انو كنت قبل ساعة اكتر زول مبسوط في الدنيا ..
لكن عشان انا متعود ع الضيق والزعل كنت بزعل سريع واقل شئ بتضايق
غايتوا يا مؤتمن ما كسبت فيني خير اصلو اصلو
وانا بدق في الباب ومستني يفتحو لي إتزكرت في اللحظة ديك كلام شيخ محمد احمد لي
" اعقد يدك ياولدي وسبح واستغفر لامن ترتاح كل م تكون مهموم اعمل كداا "
أستغفرك ربي وأتوب اليك 💜
عقدت يدي وبقيت بستغفر ، وسبحان الله طوالي ارتحت نفسياً وقلبي برد
فتح لي الباب احمد ودخلت ، هو كان وراي بقفل في الباب ..
قال لي اهلين يا مجنون ليلي شرفت
خلاص بقيت تمر بينا محال تجي علينا اااا ولا بتقول ديل ناس كانو في ماضينا
ضحكت وقلت ليهوو :
ما خلاص بكرة حنشد الرحال ونرجع
وحليمة حترجع لي قديمها 😅
في الحوش كانو الشباب قاعدين وبتوضو للصلاة ، شكلهم جو قبل شوية من المسيد
وهم بتوضوا انا جيت وشلت ابريق وقعدت اتوضيت معاهم
كانو بتونسوا وبحكو عن المسيد وعن الحولية والمديح والحاجات الشافوها هناك
انا بتوضي م اتكلمت معاهم ، منتصر لاحظ لي قال لي عبد الله :
الشاب دا بتعرفوا !!
وأشر علي قام عبد الله عاين لي وقبل عليهو
وقال ايهو :
اظنو كان صاحبنا لكن هسي خلاص باعنا ولقي غيرنا
منتصر :
اللقا احبابوا نسي اصحابوا ولا شنوو!!
بنتكلم معاك ياشاب !!
ما رديت ليهم خالص وما ركزت معاهم اظنهم اتحسسوا وسكتوا
خلصت وضو ومرقنا كلنا مشينا الجامع صلينا وجينا راجعين البيت تاني
فرشنا سرايرنا لي اخر مرة وكنا حزينين اننا خلاص بكرة بدري قايمين الخرطوم والرحلة الجميلة دي انتهت
انا كنت اكتر واحد حزين بس بلعتها في حناني ساي .. فرشت لحافي ونفضتو بالملاية وفرشتها ورقدت وختيت تلفوني تحت المخدة
بس قبل اختو شفت الساعة لقيتها 6:45
طفيتو ورقدت علي ضهري وختيت يديني تحت راسي وخلفت رجلي وانا راقد
وبعاين للسماء .. وبهز في رجولي
سرحت كالعادة
خلاص انتهت رحلتنا في كوكب ود عجبنا 😅
هميت للرجعة للخرطوم والداخلية والروتين القاتل الليهو اكتر من سنتين او 3 سنين عديل
من دخلت الجامعة ...
بعد م لقيت نفسي هنا وحسيت اني بنتمي اي ودعجبنا وانها جزء مني
حمشي وأخليها .. الحمد لله بس🤦🏾♂️
الشباب بتونسوا وانا سرحان وخلوني علي كداا
فصلت سرحان وسرحان وسرحان
فجأءة جاتني رسالة وبي احساسي حسيت انها من روان
شلت تلفوني وفتحتها لقيتها مرسلة لي
" حسن بكرة اطلعو بدري ، ابوي اظنو عرف اني قبيل كنت معاك وهاج شديد وقال بكرة حيجي يعمل مشكلة معاكم ومع عم ابراهيم
وحيشيل تلفوني مني بعد شوية م تتصل علي ولا ترسل لي عشان م اعمل ليك مشكلة
لمن الاوضاع تهدا بحاول اتصل عليك 💔
تصل بالسلامة "
كأنوا الدنيا اتشقت وبلعتني وكأنو جابوا صخرة كبيرة وختوها في صدري 🤦🏾
يحرق مؤتمن وسنين مؤتمن وفي اللحظة ديك قربت امشي اقتلوا ...😪
اتضايقت شديد شديد لدرجة نفسي بقي يقوم سريع ، الشباب لاحظو لي
مالك يا حسن في شنو !!
: لالا ماف شئ ، م حبيت احكي ليهم لانو عارفهم متهورين شديد بمشو بدقو الود ويكبرو المشكلة وحنجيب الكلام لي احمد واسرتو
نحن اصلا دخلاء ع القرية وغرباء زي ما دخلناها بسلام نطلع بي مودة
رجعت تاني لسريري بعد قمت شربت لي موية
رقدت وغلبني النوم ،، بلعن في نفسي وفي حظي وفي اي شئ
بس ما كان قدامي حل غير كلام شيخ محمد احمد
"اعقد يدك و......
بقيت بستغفر كتير وبسبح لحدي ما لقيت نفسي نمت
م عارف نمت متين ، بس صحوني تاني زي الساعة 11
لقيتهم خاتين صينية فيها شاي وكيك ولبن وباسطة وحاجات كداا عملوها كوداع لينا
قلت ليهم بالهناء ما نفسي😊
منتصر جاني قعد جمبي وقال لي
عاين ما تحرجنا مع الناس المضايقك دا هسي ما وقتو قوم اتونس مع الناس م تحسسهم انك متضايق
كان عم ابراهيم جوهو اخوانو اتنين ومعاهم اولادهم فيهم شباب قدرنا اولاد عم احمد وفيهم شفع والبيت اتملي ناس
قمت وسلمت عليهم وعرفونا عليهم وكدااا
كنت بجامل م اكتر ، بس من جوا مانفسي اتكلم مع زول
المهم اثناء الونسة .. احمد عندو ود عمو كبير كداا اكبر مننا عمرو حوالي 33 سنة كداا
كان مركز معاي شديد ومتابعني بي عيونو
وساكت بس بعاين لي ..
انا لاحظت بس م اشتغلت بالموضوع كتير
بعد شوية قام لفتني قال لي يا حسن
حسن صاح !!
قلت ليهو ايواا حسن
قال لي شكلك ما غريب علي شفتك في حتة انااا تقريباً
استغربت مع انو اول مرة الاقيهو ، واعرفو هسي
قلت ليهو م اظن اتلاقينا قبل كداا كدي اتزكر شفتني وين
قال لي ماعارف بس شكلك ما غريب علي ومألوف بالنسبة لي ...
استغربت قلت ياربي دا شافني وين !!
: يخلق من الشبه اربعين 😅
قال لي اي والله وعمل رايح مني وعملت منو رايح
بنتونس لحدي قريب الساعة 1 بعدها قامو فاتوا
احمد والشباب ضايرو المحل وشالو العدة ودوها بي هناك
انا رجعت لسريري ورقدت نمت 🤦🏾
نمت مهموم ومتضايق وقافلة معاي شديد ..
وانا نايم جاني حلم غريب م عرفت افسرو ..
حلمت اني في نص المسيد وتحديداً في نص الحلقة حقت الزكر والمسيد فاضي الواطة كانت صباح والشمس دابها عاوزة تشرق ، صوت العصافير عالي كان وفي هوااا بارد وريحة البحر شايلها الهوا وانا واقف جمب العمود حق راية الشيخ
من بعيد جاي علي شيخ محمد احمد ومبتسم كعادتو ووراهو كان ماشي درويش ودعجبنا
لما قربو لي وقفو وشيخ محمد احمد قال لي
حسن ولدي ..
قلت ليهو ايوااا ابوي الشيخ
قال لي :
" ما تنسانا ياولدي اتزكرنا ، وتعال لينا كل ماتلقي طريقة ... ما تنسي ياولدي اقعد يدك اعقد يدك "
واختفي الشيخ زي الورقة بعد تتحرق والرماد يشيلو الهواء وبعدو الدرويش وبعدو المسيد واخر حاجة الراية والعمود
فضلت براي في السماء سابح واختفيت انا كمان
صحيت طوالي مخلوع شديد
بسم الله اللهم اجعلوا خير ...
صحيت ولقيت الساعة 5 صباحاً ، قمت طبقت لحافي ودخلت الديوان جواا مسكت تلفوني وبقيت بطبظ فيهو .. سرحت شوية كدا وبقيت بفتش عن تفسير للحلم
جاتني فكرة اني اقوم امشي المسيد هسي واصلي ورا الشيخ وقلبي يرتاح شوية💜
وبالمرة اودعوا واحكي ليهو الحلم يمكن يفسروا لي ..
طوالي ولا كضبت طلعت الحوش شلت الابريق واتوضيت وبراحة طلعت واتجهت علي المسيد
وبقيت ماشي سريع عشان الحق الصلاة معاهم
وصلت المسيد مع الإقامة ، خشيت الجامع ولقيت الناس قفلو الصفوف الأمامية وم لقيت طريقة اقيف ورا الشيخ طوالي
وقفت في الصف التالت .. والإمام قال الله اكبر
وشرعنا في الصلاة .. من صوت الزول البقري عرفتو دا ما شيخ محمد احمد
صلينا الصبح وسلمنا وبعد الناس اتفرقو مشيت للإمام صراحة اول مرة اشوفو ، سلمت عليهو وقعدت جمبو
قال لي :
تقبل الله يا ابني ، م عرفني لانو قال لي يا ابني
قلت ليهو الله يجزيك خير ..
سألتوا من شيخ محمد احمد وين م صلي بينا الليلة ان شاء الله بخير
قال لي انت ما عارف ولا شنو !!
اتخلعت قلت ليهو
عارف شنو !!
قال لي شكلك غريب شيخ محمد احمد معروف بعد كل حولية بخش غرفتو وبتعبد ما بطلع منها الا بعد تلاتة يوم .. بقسم الاسبوع نصو. في غرفتو بتعبد والنص التاني بطلع للناس
طوالي اتزكرت اول مرة جينا المسيد الشيخ كان طالع من غرفتوو شكلو دي يادوب طلعتو ..
المهم قلت للامام طيب انا عاوز اتكلم معاهو ضروري ينفع
قال لي ماف زول فينا حصل دخل عليهو ولا قطع عليهو خلوتو ..
وشكلوا كان خايف وبخوف فيني زيادة
قلت ليهو طيب انا حا ادق ليهو الباب اذا فتح خلاص ما فتح حا امشي
مشيت سريع علي اتجاه غرفة الشيخ ولقيتو قافلها عليهو من جوا
كان في هدوء في المكان ، عاينت يمين شمال ماف زول والنور جوا شكلو طافي ..
قربت وكنت خايف في الاول بس اتشجعت ودقيقت الباب دقة خفيفة
دق دق دق
مساافة ماف رد او زول فتح ، تاني حاولت
دق دق دق
قربت وشي من الباب وقلت بصوت مسموع
شيخ محمد احمد انا حسن لو متزكرني كنت عاوزك ضروري لو سامعني افتح لي
محتاجك ضروري
وواصلت دق في الباب
اخر دقة ودي التالتة كانت
دق د..... الباب فتح
اتخلعت ورجعت لي وراا قريب مترين ، طلع من جوا الغرفة شيخ محمد احمد
كان لابس جلابية خضراء وكانت طالعة من جوا الغرفة ريحة بخور وعود سمحة شديد
بس الغرفة مضلمة كانت م شفت جوا في شنو
سلم علي ..
حسن ولدي كيفك ، م نسيتنا يعني وجيت تاني
قلت ليهو انا كنت مخنوق ومهموم وجيت اصلي الصبح وراك
قال لي انت نسيت ومسك يدي
اعقد يدك وسبح ما تنسي
قلت ليهو برضو جيت اودعك انا الليلة قايم الخرطوم راجع خلاص قلت اودعك ودايرك تدعي لي معاك كتيييير يا شيخ
قام طوالي مسكني وقلدني شديييييد وقال لي
تصل في امامنتين السلام ان شاء الله
ربنا يوفقك في دراستك يارب 💜
بعدها كنت عاوز امشي بدون احكي ليهو الحلم بس اترددت وبقيت واقف مسافة
قام قال لي مالك !!
في حاجة حابي تقولها احكي
قلت ليهو ايوا في ...
صحيت من حلم وانا نايم وحكيت ليهو كيت كيت كيت
بعد خلصت قلت ليهو معناهو شنو !!
ابتسم وعاين لي وقال ..
المكتوب في الجبين لازم تشوفو العين ياولدي
ما عندي تفسير لي حلمك لكن حقول ليك حاجة واحدة بس وما تنساها
يومك التحس انك عاوز تجينا ما تتردد وتعال طوالي وكان ياولدي الله مد في العمر وكتب لينا لقا بنتلاقي تب 💜
ودعتك الله ودخل غرفتو وقفلها عليهو من تاني ..
وانا لفيت ورجعت علي البيت ... وخلاص الشمس الوقت داك شرقت
خشيت البيت لقيت الشباب بجهزوا في شنطتهم وحاجاتهم
رتبت حاجاتي معاهم سريع سريع ومشينا استحمينا واتسوكنا وشربنا الشاي وغيرنا هدومنا وخلاص بقينا جاهزين عشان نمرق
صراحة كلنا كنا مستائين بس انا اكترهم
لانهم كلهم عندهم حتة يمشوا عليها الا انا
جواي احاسيس ملخبطة وجايطة
احساس اني شبه فقدت روان وود عجبنا الكان جواي احساس اني بنتمي ليها وهسي حفارقها
واسوأ شئ اني بعد فسحة الأمل دي حرجع للداخلية ولي روتيني وحياتي المملة 🤦🏾
حرجع براااي طبعاً
وحكون براي في غرفتنا لحدي ما الاجازة تخلص 🤦🏾
احمد حيقعد في ودعجبنا مع اهلوا ومنتصر ماشي الكاملين لي اهلو وعبد الله برضو حيمشي طابت لي اهلو
وانا حرجع الخرطوم براي .. كان نفسي اقعد مع احمد وكنت مخطط لكدا بس في سببين خلوني ارجع
اول سبب روان ..
م حبيت اعمل مشكلة بقعادي في ود عجبنا ، بالذات بعد الحصل ..
تاني سبب لازم ارجع قبل يوم 13 في الشهر دا وهسي يوم 7
ضروري اصل الخرطوم واكون جاهز لي يوم 13
عاوزين تعرفو في شنو صاح في اليوم دا
طيب حوريكم بس م تكلموا احمد ومنتصر وعبدالله لانهم ماعارفين وماعاوزهم يعرفوا
يوم 13 عندي محكمة 🤦🏾
.
.
.
يُتبع
#أبوبكر_علي
