" رحال علي كف القدر قام من سفر قاصد سفر
رحال وهل كان من مفر غير الرحيل !! "
في بالي تلك الابيات الشعرية
ماشي اخر واحد في الشلة وبباري في ضل الشباب قدامي ، بدقش في الواطة ومع كل خطوة كنت ببعد عن حاجة حلوة شديد بتونسوا وانا ساكت 💔 والسكات فرضتو علي نفسي رفقاً بي حالها
من امس م اتكلمت مع زول فيهم ، حفقدهم شديد انا هم دنيتي وحياتي وبدونهم انا ولا شئ حرفياً
شايل شنطتي حقت الضهر وكيس فيهو حاجات ادتنا ليها خالتي كوثر الله يديها العافية والساعة كانت زي 7 ونص صباحاً ماشين علي السوق عشان نركب من هناك عربات صغيرة تودينا الحصاحيصا ومن هناك انا حركب الخرطوم والشباب اي واحد حيركب لي بلدو 💜
وصلنا السوق وكان معانا احمد وعمي ابراهيم عشان يقدمونا وويودعونا ، انا لسة سرحان وما اتكلمت مع زول 🤦🏾♂️
بس مركب سماعتي في اضاني حتي م كنت مشغل حاجة بس عاوز اديهم احساس م سامعهم ...
كانت العربات الصغيرة اتوز بتنقل الناس للحصاحيصا ...
انا لقيت عربية طالعة الخرطوم طوالي ، فطوالي قررت اني اركب فيها
ما كنت عاوز امشي لحدي الحصاحيصا وهناك اودع منتصر وعبدالله م حبيت اتعب نفسي وانا اصلا مليان للأخر
قلت ليهم انا حركب الخرطوم طوالي
منتصر قال لي ارح معاي الكاملين اقعد يومين معاي وارجع وكان بحاول يواسيني لانو حس بي
انا يمكن ساعتها ماف شي في بالي غير اني عاوز ارجع بس ، اعتزرت منو وقلت ليهو
لالا لازم ارجع عاوز ارتب دولابي والشيتات الما محتاجها احرقها وعندي حاجات تانية عاوز اعملها
منتصر خلاني علي راحتي ...
وفي اللحظة ديك انا كنت البطل حق قصة الفراق دي 😅
" عادي الفراق بقي عندي سُنة "
ودعتهم كلهم وودعت عم ابراهيم واصر انو بدفع لي حق تزكرة الرجعة وبعد تحانيس وجووطة حسمني وقال
ياود انا ما زي ابوك !!
سكت انا وقلت ليهو انت ابوي عديل
قال لي خلاص الموضوع دا انتهي
دمعتي قربت تنزل بس مسكت نفسي ..
عارفين في اللحظة ديك كان نفسي بس أحضنوا واقول ليهو شكراً علي كل لحظة قضيتها معاكم 😊
وأقول ليهو كمان :
" أنا خايف "
بس صعب جداً البوح بالنسبة لي ، البوح بالجواي كان أشبه بي الوجع المميت
كل العملتو اني سجنت جواي حاجاتي 💔
وفعلاً دفع لي وركبت والعربية اتحركت بينا نحو الخرطوم 💔
كنت انا اخر واحد ركبت ، عربية كلك لونها ابيض
ركبت جمب الباب وختيت راسي مع القزاز وسرحت زي كل مرة ....
لأول مرة احس اني لقيط او فاقد تربوي او اني انسان غريب ، نظراتهم قبيل لي
نظرة الشفقة ، محاولة منتصر انو يواسيني ويقول لي ارح معاي بيتنا
حسيت اني مجرد طفل اتولد وما معروف ليهو اصل والناس بتعطف عليهو 😊
شفت نفسي صغير جداً ، مابستحق اي شئ
ابتسمت بيني وبين نفسي وقلت :
العشمان ليهو شنو ياحسن ، حسن ما تنسي نفسك وتنجرف😪✋🏽
روان شنو الانت مناسب ليها ...😅
انت شكلك بقيت تحلم احلام ما قدرك انت نسيت انك محروم من الأحلام وما ينفع خالص تحلم 😅
ياتري لو عرفتك علي حقيقتك حتحبك ولا حتعطف عليك ..!!
لو عطفت عليك حتقدر تستحمل نفسك تاني ؟؟
خليك كدااا بعيد عن اي شئ م تقرب وما تخت نفسك في حتات ضيقة😊
وفعلاً حاجة سيئة لمن تلقي نفسك ما كفاية لي زول بعني ليك شديد ونفسك تكون كل شي ليهو 💔
كنت ساعتها أشبه بي انسان واقف علي بعد خطوات من حلمو وحاجتو البحبها بس بيناتهم سور من زجاج عالي غير قابل للكسر
شايف كل شئ حلو قدامو وقريب ليهو بس صعب يصلو 💔
في اللحظة ديك وانا منكسر وحاسي اني ضايع بعدما لقيت نفسي🤦🏾
اكتشفت انو مهما حاولت اهرب او اتغير ما حل ، ماف زول بهرب من نفسو
استسلمت لواقعي المرير ورضيت بالمكتوب
لحظتها قررت اني حنسي الكم يوم ديل من حياتي واشطبهم خالص 🙂
حنسي روان وحنسي ود عجبنا وكل شئ✋🏽
طلعت تلفوني وجبت رقم روان وضغط خيارات .. حذف جهة الاتصال
وقفت مسافة
امسحوا !! ما امسحوا
م قدرت امسح رقمها واتضايقت اكتر ،
اخدت نفس طويل وطلعتو😪
عقدت يدي وبديت اسبح واستغفر ، يمكن دي الحاجة الوحيدة القدرت اشيلها من ود عجبنا
بدون م تسبب لي مشكلة او ضيق
فضلت بسبح لحدي ما غرقت في النوم
نمت وانا ما نعسان ، نمت وانا مخنوق ومهموم ،
شايل هم الراجيني وهم دنيتي الهربت منها كم يوم وقبضتني تاني
احساسي كأني سجين هرب وبعد حس بالحرية اتقبض عليهو تاني 🤦🏾
ااااااه يادنيا كسبتي تاني وفزتي علي ، قدرتي تكسريني وتقهريني
بس اقول ليك شئ حا أواصل حياتي والانتي عاوزة توصليني ليهو م حيحصل
" الانتحار "
ورددت في بالي كلام كأنو كنت برد بيهو علي حياتي والبحصل لي ..
لملم فتات الآهه من طرف السكات
وشيل عليك جمر الصبر فاتحة ممات
بي نية صادقة استودع انت الراح وفات
واتعلم انك ترضي بي حكم القدر
وانسي ماضيك دون ندم واعتبرو مات
حكم اللي مات في الدنيا تعجيل الدفن
خلي قلبك مقبرة حاتدفن انت كتير حاجات
ادفن الخزلان وراك
واتعلم انو تعيش براك
ما ببقي ليك
الليلة جمبك
بكرة م بتلقاهو معاك
انت بس شيل الصبر جواك زاد
حشيل الصبر زاد وححاول انسي الكم يوم الفاتو ديل بي اي طريقة ...
ورجعت اسبح واستغفر من تاني زي ما علمني شيخ محمد احمد
المهم دي كانت رحلتي في قرية ود عجبنا ، وبي كدا نقدر نقول انو اول جزء من القصة دي انتهي
وبالمناسبة دا احلي جزء فيها 😅
بس م علينا حنعرف كل شي في وقتوو
طبعاً كلكم بتكونو عاوزين تعرفو قصتي شنو
قصة حسن !!
مع انو كنت معاكم خلال الرحلة دي خطوة بخطوة بس ماعرفتو قصتي شنو وسري شنو
قصتي الماف زول عارفها اصلا ولا حتي اصحابي زي م وريتكم
المهم ...
من هنا حنمشي الخرطوم وفي الخرطوم حنعرف كل شئ عني وحا احكي ليكم بالتفصيل 💜
وحنبدا قصة جديدة في زمن تاني غير زمنا داااا
بس وصيتي ليكم 🤦🏾♂️
ما عاوز اشوف نظرة شفقة في عيونكم
في أمان الله
وإلي اللقاء في الجزء التاني 💜
.
.
.
.
يُتبع
#أبوبكر_علي
