بعد أن وصلنا بالأمس إلي قرية ود عجبنا وبعد أن نزلنا بمنزل أحمد بحوش باشري
نحن الآن في تمام الساعة السابعة صباحاً
زقزقة العصافير وأصوات الحيوانات التي يتم تربيتها داخل البيوت
أظنكم قد إستحضرتم المشهد معي
الصباح كما يجب أن يكون
يكاد يكون هذا أجمل صباح مر علي منذ أعوام
النوم في الحوش طعموا براهو صراحة
موش تقول لي نومة الداخلية
15 واحد نايمين جمبك وبشخرو الليل كلو 😅
من عوايدي أصحي متأخر لكن م عارف لي صحيت بدري يمكن اول زول صحيت من الشلة
قمت عليهم صحيتهم واحد واحد
عبدالله قوم اصحي خلاص
يتململ عبدالله في فراشه
: مالك ياخ مصحيني بدري كدا امتحانات وخلصت خلينا ننوم ياخ
ثم عاد لفراشه ولأحلامه
إنتقلت لمنتصر ..
منتصر قوم اصحي
: صاحي ياخ انا من 6 الصحاك بدري شنو انت ؟؟
: م عارف والله شبعت نوم ولقيت نفسي صاحي
: انا صحاني واحد من شفعهم ديل جا يلعب تحت سريري 😅
قوم ارح نطلع نقعد برا في الشارع ونشوف حياة الناس دي عاملة كيف هناا
: أرح ..
أثناء خروجنا من المنزل ونحن في طريقنا نحو الخارج
لفت إنتباهي ظل تلك الفتاة
دون قصد مني لقيت نفسي بعاين ليها
كانت بالإتجاه الأخر من المنزل
سمحة ياخ ياجماعة ، سمحة شديد بتشبه صباح العيد كداا
تفاصيلها بريئة كدا شديد ، أول ماشفتها قلت سبحان من خلق فأبدع
وقفت دون أشعر مسافة بعاين ليها وهي زاتها
رمقتني بنظرة وطوالي مشت
يمكن خجلت أو أدبها الزايد خلاها تمشي
خجلت من نفسي جدا ، ما صاح أعاين هسي لو طلعت بتبقي لي أحمد او حتي واحدة من أخواتو
قاطع سرحاني صوت منتصر
: هوي يابشر سرحان وين ارح موش قلنا طالعين
: ااااا انت معاي انا !!
: اي معاك يا أستاذ
: أنا لكن م معاك انا سرحت في حاجة تانية خالص ، حاجة كدا من كوكب الزهرة
: حاجة شنو دي ياخبيث ؟
: حاجة كدا زي الحلقة الأخيرة ، البتكون راجيها من اول حلقة
: ارح ارح بطل إستوهام يا ولدنا 😅
لما طلعنا الشارع المنظر كان مبهج وجميل شديد ، كان في بعض الماشية جات قاطعة بي جمبنا
قلت لي منتصر ..
: منتصر منتصر عاين أخوانك ماشين اجري الحقهم 😂
منتصر رمقني بنظرة قاتلة صراحة وقرب يفلقني بي شبشبو
الحقيقة انا كنت دايماً بحاول أصنع من اي لحظة بعيشها ضحكة ، كنت بحاول دايماً أضحك
يمكن شوية انسي الجواي والكاتمو من سنين
الكاتمو من سنين !!
اي الكاتمو من سنين ، م تغركم ضحكتي
وشخصية المهرج المركبها دي
حتعرفو كل شي في وقتو ، خلوها للأيام
نرجع لقصتنا ...
لمحنا من بعيد عم إبراهيم وهو قادم ويحمل بيديه بعض الأشياء
اظن كان راجع من الدكان
قابلنا بإبتسامة بشوشة وقال
: صباح الخير يا أولادي
إن شاء الله امس نمتو كويس وتعب السفر راح
الليلة احمد محضر ليكم برنامج حيعجبكم شديد
