"إياك أن تحزن أبدا عندما تخفق في القيام بشئ ما فربما لم يقدر لك بعد إنجازه وتأكد تماما أن الله إذا رأك متعلقا بشئ ما ولم تستطيع الوصول إليه الأن فقط لأن وقته لم يحن بعد وليس هناك سبب أخر عليك التيقن بأن هذا حتما سيكون خير لك فيما بعد فأنت لا تدري ربما سيكون أخفاقك هذا أكبر دافع لك لكي تبدع في المستقبل فلا تحزن "ــــــــــــــــــــــــــــــــــــــــــــــــــبيان كانت ماسكة تلفونها وبتقلب في الفيس بملل لقت منشور رائج من...(تجمع المهنيين السودانيين)فتحتو وبقت تقرأهو بصوت عالي لكن ما قدرت تفهم منو حاجة لأنو كان مكتوب بلغة الياو الياو (الراندوك) وفي نهاية البوست كان في هاشتاق#يوم الزح...بالرغم من أنها ما فهمت حاجة بس شعرت بالحماس بتملكها همست وقالت بفرح:مع أني ما فهمت التكتحني لكن شكلو في موكب قرب الله ياااخ!! أنا من زمان نفسي أمشي موكب يعني لا أحضر أيام القيادة لا أطلع مواكب كده أووفر أصلا الأيامات دي أنا قاعدة ساي ما جاتني معلومات عن العصابة من بعد فشل مهمتهم ديك شكلهم كسرو الحنك خلاص نستغل الفرصة دي ونخدم الوطن حبة ههعععههععع أما الكلام اللاتيني دا بعدين الا أسأل سهي من ترجمتو لأنها متابعاهم من زمان وعلي حسب كلامها لي قالت أنو كانت بتمشي القيادة بالدس...المهم واصلت تصفحها وأثناء ماهي نازلة لقت أقتراح للإنضمام لمجموعة أسمها كان (الردمية) قرت الشروط ولقتو بنات بس طوالي عملت طلب إنضمام وفي ثواني بس قبلو طلبها وهي طوالي بقت تشوف المنشورات أحساس كانت قايلة أنو قروب إستشارات وكدا لكن لقتو كلو قصص فارغة ونشر غسيل وفضائح وحاجات ما أنزل الله بها من سلطان إتخلعت وبقت فاتحة خشمها بدهشة وتاني لقت أقتراح لمجموعة تانية عملت إنضمام وقالت تشوف أخرتهم شنو والقروب جاب القروب التاني وووو.............هلم جرة...لمن طلعت من الفيس كانت خشت ليها قريب العشرين قروب بعدها دخلت الواتس وبقت تشوف في الحالات وترد عليها وفجأة جاتها رسالة من رقم غريب وما مسجل عاينت للساعة تلقائيا لقتها12بليل فتحت الرسالة وبدت تقرا وكانت الصدمة؟؟!!!__________#في الصباح......اللواء حسان وسامر ومعاهم الرائد عثمان والملازم أول زكريا كانو خلاص جهزو وحيغادرو الجنوب القعدو فيهو أكتر من شهر ودعو زملاءهم الجنوبيين وشكروهم علي كرم ضيافتهم وحسن إستقبالهم بعدها ركبو الهيليكوبتر المرسلاها السفارة مخصوص عشان تجيبهم الخرطوم وأي واحد دخل شنطة السفر الصغيرة بتاعتو جوة الهيليكوبتر وختاها تحتو..اللواء حسان ركب قدام مع الكابتن السايق الهيليكوبتر وسامر وعثمان وزكريا كانو ورا،،الكابتن عمل إجراءاتو كلها وأستعد عشان يطير وما هي إلا ثواني وكانت الهيليكوبتر محلقة في السماء وبعد دقائق من إقلاعهم جاهم صوت زول في اللاسكي بقول بشخشخة:المروحية(د)،،المروحية(د)،،معاك القاعدة(أ) من الخرطوم طمنونا عنكم؟ انتو كويسين ،،حول الكابتن مسك اللاسلكي ورد عليهو:القاعدة(أ) معاك الكابتن(....) من المروحية(د) تم الإقلاع بنجاح وأحنا بخير والأمور كلها تمام الحمدلله،،حول_ممتاز جدا،،أفيدونا باي جديد لو حصلت حاجة،،حول _علم وينفذ،،حول وأنقطع الإتصال بعد المحادثة اللاسلكية القصيرة دي واللواء حسان غمض عيونو في محاولة منو أنو ينوم لأنو الرحلة طويلة لسع حتستغرق من٦-٨ ساعات بس ما قدر ينوم بسبب النقاش الحاد الكان مدور وراء ومن خلال أصواتهم قدر يعرف الطرفين كانو منو (الرائد عثمان و ال م.أ زكريا ) أستغرب شديد كيف شخصين زيهم بتناقشو بحدة كدا مع أنهم مختلفين في أي شئ،،الأول لسع شاب وفي بداية الثلاثينات كدا من عمرو مرح وفرفوش وبحب الهظار زي جوع بطنو والتاني زول خمسيني جادي ورسمي شديد حتي في حياتو العادية لا وكمان الرتب فرقها كبير زي أعمارهم واحد ملازم أول والتاني رائد،،أبتسم إبتسامة جانبية وقبل عليهم عشان يتابع كويس،،طبعا كانو بتناقشو في الثورة وما أدراك ما الثورة وطبعا عم عثمان بعيد عن أنو من الشرطة وكدا بس زيو زي أي عمك كبير معارض للثورة والثوار وشايف أنهم مجموعة شباب شماسة وصعاليك ساي وما مقتنع بإنجازاتهم وتضحياتهم البذلوها في سبيل الوطن دا ومفهم نفسو أنو الحصل دا كلو مجرد حظ أو لعبة قذرة من الكيزان،،زكريا لمن فاض بيهو قال جملة خلت اللواء حسان يندهش من صراحتو بس الرائد أعتبرها بجاحة وبقى يعلي صوتو وينهر:هووي هووي انت نسيت نفسك منو يا كلب أنا ممكن بإشارة مني أجردك من رتبتك وأخليك تسلم أسلحتك ولبسك وأنت منزل رأسك في الواطة كمان جابت ليها قلة ادب شباب،،زكريا إتمالك أعصابو وقال ليهو ببرود:هسي أنا ما قلت شئ غلط عشان تعلي صوتك علي وتهددني مع أحترامي الشديد ليك يا سعادة الرائد بس كون أنو أنت شايفنا مجرد هاملين ومطاليق ساي دا شئ بعكس عقم تفكيرك بس ما أكتر وثورتنا دي ثورة وعي وأحنا عارفين نفسنا بنسوي في شنو،،واجهتنا عراقيل كتيرة وقدرنا نتخطاها كلها الحمدلله،،أنا واحد من الناس ما قدرت أحضر أيام القيادة لأني كنت في الجنوب هنا وكنت كلو يوم بدعي ليهم ومتابعهم في اللايفات والفيس لحدي يوم فض الأعتصام وأذكرك المجزرة زضرب الرصاص الحصل يوم ٨ رمضان ما حتقدر تنكر أنو أحنا في شهور قدرنا نعمل الما قدرتو تعملوهو في ٣٠سنة من بدت ثورتنا دي ولحدي سقوط البشير مرت ١١٧يوم وفي اليوم ال١٨ بعد ال١٠٠ سقطنا أبن عوف وبعدها جاء المجلس العسكري الإنتقالي وتجمع المهنيين السودانيين شكلو قوي الحرية والتغير(قحت)معليش أحنا هسي بتناقش مواطن لمواطن بعيد عن رتبنا والجوطة ديك كلها بس أنا زول صريح برصها ليك طوالي كدا فما تزعل مني أوكي؟؟_هههااي نشوف قحت حقتكم دي حتعمل شنو وأنت قايل الشباب دي هم الوحيدين الحمو الوطن وأحنا بنسوي شنو طيب يا غبي يا غبي_أنت لحدي اللحظة دي كنت بتحمي الجنوب وللأسف الحظ ما حالفك انو تتشرف وتقدر تحمي المدينة الفاضلة الظهرت يوم وأختفت ويمكن لو كنت هناك كنت ما حتقدر تعمل حاجة غير تدسى في بيتك،،هنا اللواء حسى أنو حتحصل مشكلة في أي لحظة وقرر يدخل وسكتهم الأتنين قبل ما يتفجرو في بعض،،منظرهم كان زي الأطفال أي واحد نافخ جضومو ومادي تلاليشو مترين ومربع يدينو ومقبل وشو علي الجهة التانية اللواء كتم الضحكة بالعافية عشان ما تضيع هيبتو وفصلتو الفصلها ليهم،،عشان ينقذ روحو عمل نفسو بقح،،نظرو وقع علي سامر الكان سرحان وساكت أستغرب لأنو في المواضيع البتخص الوطن بكون أول المتحدثين بس كان غارق في عالم براهو وفاقد الإتصال بالحواليهو،،اللواء قدر يستشعر هالة الحزن العميق الكانت محيطة بيهو وخمن أنو مجبور علي الرجوع للخرطوم مع أنو بقول أشتاق لأهلو بس شكلو عندو زكري أليمة هناك مانعاهو أنو يرجع،،نظراتو المتسائلة دي قدرت تخترق سامر وعاين ليهو،،كان في لمعة حزن واضحة في عيونو،،من خلال نظراتو عرف اللواء بفكر في شنو أبتسم ليهو إبتسامة باهتة ورجع في سرحانو اللواء عقد حواجبينو بإستغراب بس حاول يتناسي الموضوع وطلع ليهو جهاز صغير فيهو قرأن شغلو وركب السماعة في أضنينو وبقى مسترخي علي الأخر،،علي عكس سامر الكان حاسي بينو وبين نفسو بالوحدة القاتلة بالرغم من أنو صحبو ورفيق دربو قاعد جمبو بس ما شغال بيهو كتير وكان بتكلم بالتلفون بس الأشارة كانت ما واضحة قفلو وبقى يزفر بضيق وينقنق كأنو رسالة العتاب بتاعت سامر وصلت ليهو فجأة قطع كلامو وقال ليهو بقلق:سامر أنت كويس؟_أيوااا كويس شديد لييه؟؟_ما عارف بس حاسي بيك ما تمام لأنو من ساعة ما ركبنا الهيلوكبتر دا وأنت سرحان وما نطقت بحرف واحد_تعبان وعايز أنوم أول ما أصل أنت ما تشغل بالك بي يا زول_طيييب مع أني حاسي أنك داسي مني شي لكن تمام_________رئبال حسى أنو عايز يزور أبوهو قام كلم وسام ووافق أنو يمشي معاهو وبالصدفة لنى سمعتهم وبرضو قالت حتمشي معاهم لأنو أمبارح ناس أمها مشو خلوها وهي كانت نايمة وطوالي أي واحد مشى غرفتو ولبسو هدومهم وشالو مصاحفهم معاهم وفي الطريق إشترو ليهم باقة ورد ولما وصلو المقابر وكانو متوجهين علي جهة قبر أبوهم لنى ماقدرت تحبس دموعها وبقت مغطية خشمها بيدها عشان ما تبكي ولمن وصلو مكان القبر لنى حست بالحزن والوجع والضعف في أن واحد وسرعان ما إتحولت الأحاسيس دي لدموع وبقت تنزل بغزارة شديدة علي خدها وبقى حيلها ما شايلها قعدت في الواطة وفضلت تبكي بحرقة وقهر وسام حضنها عليهو وقال بمرارة:أصبري يا أختي دا إمتحان من الله كلنا نهايتنا الموت وما ينفع نبكي علي زول في المقابر لأنو كده ما صح وحيتعذب فعشان كدا أقري لروحو قرأن دا الحينفعو صدقيني البكاء ما بفيد بشئ،،لنى قالت ليهو بحشرجة وصوت مبحوح من البكاء:ما قادرة يا وسام وربي ما قادرة إستحمل البيت بدونو كل زواية بتزكرني بيهو،،صدى صوتو بتردد في أضاني وبقى ما بفارقني حتي في الأحلام،،مرات لمن أدخل مكتبو بشوف طيفو وبسمع صوتو بناديني،،عع عارف أخر مرة زارني قال لي شنو؟؟قال لي أنا زعلان منكم كلكم لييه بتعملو فيني كدا وبتعذبوني وما قدرت تتم كلامها وبكت تاني،،رئبال حضنها بالجهة التانية وقال بصوت مهزوز:أنا،،كمان حلمت بيهو أمبارح بليل وما كان مبسوط مننا أبدا والله،،لني ووسام عاينو ليهو بخلعة أما هو هز رأسو وواصل:جاني كان لابس ملابس بيضاء نضيفة ووشو كان منور وباهج شديد،،كان مبتسم لي وبضحك وأنا كنت ببادلو الإبتسامات لحدي ما جاء عندي ومسكني فجأة ملامحو إتحولت لغضب وبقى يهزني من كتفي شديد ويقول لي بصوت مرعب:أنا تعبان ساعدني يا رئبال أرجوك،،ساعد أبوك يا ولدي،،أنا غلبني اعمل حاجة وكل الطلع بيدي أني بكيت ،،بكيت شديد وما قدرت أنطق بحرف وأخر حاجة متذكرها أنو كان بربت علي رأسي وأنا كنت ببكي بس فجأة رجع لي وراء وبقى يكرر في كلامو الأول داك وحبة حبة الصوت بقى يبعد ويتلاشي لحدي ما فجأة أختفى من جمبي كأنو أتبخر وأنا بقيت أفتشو وما لقيتو،،وبعدها صحيت ودا كل البتذكرو،،فعشان كدا أول ما صحيت الصباح قررت أزور قبرو وأقرا لروحو الفاتحة عسى ولعلى يرتاح،،أبوي محتاجنا شديد يا أخواني والله،،لازم نساعدو بالدعاء والصدقة وكلو يوم نقرا ليهو قرأن ونهديهو ليهو عشان يرتاح ويكون راضي علينا ورضاهو من رضا الله علينا صح؟؟وسام وهو بقشقش في ديمعاتو ويقوم:طيب يلا هسي نقرا ليهو قرأن ونترحم عليهو،،ختى طاقة الورد فوق قبرو وهمس:ربنا يرحمك يا أبوي الغالي،، وفضلو ساعتين يقرو ليهو في قرأن ويستغفرو ويترحمو عليهو وما وقفو ولا ثانية لمن حارس المقابر جاهم في النهاية وقال ليهم:خلاص كفاية يا أولادي ما قصرتو مع المرحوم والله هسي بكون إنبسط منكم شديد الواطة بقت سخانه وأكيد بتكونو ما فطرتو أمشو وتعالو ليهو بكرا الصباح إن شاء الله لو ربنا مد في العمر،،أمام المسجد الجنب المقابر دي زول صالح شديد والله ماشاء الله عليهو حأوصيهو أنو يدعو لأبوكم دا إن شاء الله مش هو أبوكم ولا أنا غلطان؟؟_أيوا فعلا هو أبونا،،وتسلم كتير ياخ عطلناك عن شغلك يا عم_ولا يهمكم يا أولادي يلا أنتو هسي أمشو البيت عشان أنا أقدر أشوف شغلي بعدا مش كده؟؟؟ههههه يلا في رعاية الله يا أبنائي،،وسام وهو بعاين لأخوانو:أصلا كنا ماشين يلا يا أولاد ويديك العافية يا عمي وقوم لنى ونفض ليها هدومها ومسكها من يدها وختى يدو في كتف رئبال وطلعو سوا،،من اللحظة المات فيها أبوهو وعد نفسو أنو حيرعاهم وحيبقي ليهم الأب والحصن المنيع،،كان بحاول يحسسهم بالأمان ويعوضهم عن السند الفقدوهو وهم لسه في بداية حياتهم،،بعد أبوهو مات بقى يكره السياسة عمى،، وبلعنها ألاف المرات لأنها لعبة قذرة للقذرين فقط مافيها مجال للأشراف والطيبين أبدا،،للحظة حسى بنار الإنتقام بتتبدد في قلبو وأتمنى لو قدر يعرف بس العمل كدا ساعتها حيقتلو بيدو ويقتص لأبوهو،،بس لييه يستني السلطات والسفارة تدخل وتقبض المجرم ويمكن للزمن داك يقدر يفلت ويهرب من يدهم وكدا حيكون دم أبوهو راح هدر،،قرر أنو حيحاول يعرف الكتل أبوهو منو بنفسو،،أيوا هو لا شرطي ولا محقق بس حسى أنو حل القضية دي حيكون في يدو،،هو بس،،فكر حيعمل شنو وحيبدا من وين،،أيوه صح مكتب أبوهو،،لازم أول خطوة تكون أنو يخش مكتبو ويفتش في أوراقو يمكن يلقى حاجة توصلو لطرف الخيط ،،بس كدا حيكون أنتهك خصوصيات أبوهو وخان أمانتو وما حفظها بعد موتو،،بس هو دافعو شريف وحيعمل دا كلو عشان يجيب حقو،،بعد صراع نفسي طويل حسم أمرو خلاص حيبحث ورا الأمر دا بسرية وما حيحسس زول بالبعملو،،عاهد نفسو بأنو حيرجع حق أبوهو ولو علي جثتو،،قطع سرحانو صوت رئبال وهو بهمس في أضانو بصوت أقرب لفحيح الأفاعي وبقول بخبث: الشاغلة بالك تتهني بيهو يا سمسم إبتسم ليهم وقال بحماس:أنا عندي فكرة رأيكم شنو نساعد المحتاجين ديل ونديهم ملابسنا القديمة والما بنستخدمها بدل ما نرميها أحسن ينسترو بيها المساكين ديل وحنكسب ثواب عظيم أها قلتو شنو_فكرة حلوة والله أنا حأمشي أطلع ملابسي القديمة كلها وأغسلها وأكويها وتبقي زي الجديدة_وأنا فساتيني وبناطليني البقو ما قدري حأتبرع بيهم كنت عايزة أديهم لي سعاد بت رقية جارتنا لكن الغلابة ديل أولى بيهم منها_طيب تمام أحنا بكرا الصباح نطلع نمشي نوزع الملابس ونشتري شوية حاجات كدا تفرحهملنى:إتفقنارئبال:قدام يا مانمشي حبة كدا بعدها وقف العربية وقال ليهم:عايزين إيسكريم؟؟ ،،رئبال ولنى عاينو لبعض بإبتسامة وفي لحظة وحدة قالو:أكيد طبعا_________ اللواء حسان صحى علي صوت سامر بقول:عم حسان أحنا وصلنا الخرطوم خلاص صحي النوم يلا قوم،،فتح عيونو وأستوعب كويس وعاين لقا الكابتن علي وشك الهبوط قال للرائد عثمان:الساعة كم؟؟_١٢ ودقيقتين_الظهر باقي ليهو ربع ساعة ننزل نصليهو طوالي وبعداك نخش في أقرب فندق وناكل وأي زول يمشي يرتاح في بيتو وبكرا حيكون يوم راحة وبعدو الصباح بدري حنتلاقي هنا ومنها حنمشي موقع الإجتماع،،أومأو ليهو بالفهم وزكريا بقى يتكلم مع سامر في موضوع الإغتيال وقال ليهو:تفتكر حنقدر نعرف القتل السفير منو؟؟_أكيد حنمسكو والقاتل مصيرو يظهر مهما إتخبئ_بس الموضوع دا فيهو بلدين تفتكر لي السويد ما أدخلت لحدي هسي في الموضوع وعاملة رايحة منو_في شئ ما مظبوط ولازم أعرفو _ايوا أنا زاتي حاسي في حاجة_علي العموم كل حاجة حتظهر في الأيام الجاية،،الهيليكوبتر هبط وجماعتنا نزلو ومشو طايرين علي أقرب فندق وفطرو وشربو الشاي وأي واحد إتجه علي بيتو بعد ما أتفقو أنهم يتلاقو هنا بعد بكرة_________يا أصلية البخر شتنو؟!سهي كانت شغالة في تلفونها ولمن سمعت بيان قالت كدا مسكت رأسها وصفقت بيدينها بمعني أنتهيتي وقالت:لا حول ولا قوة إلا بالله العلي العظيم البوظك منو يا بت؟؟لحقتي تتعلمي الراندوك متين بالسرعة دي أنا شهرين بتعلم فيهو ماشاء الله عليك لكن ما أسحرك_بررررري حافظة بس لا أتعلمت لا حاجة أمس دخلوني في قروبات كتيرة شئ الردمية شئ الشماعة شئ بمبرشات غايتو جنس قروبات كتيرة خلاص_ووووب عليييناااا أنتي بديتي تنحرفي وتمشي في السكة البطالة+القروب دا إسمو منبرشات ما بمبرشات ههههه عجبني الأسم لكن الصراحة نصيحتي ليك أبعدي من القروبات دي لأنها ضارة بالصحة_بمبرشات منبرشات كلو باسطة ياااخ لكن حلو القروب دا تقدري تسألي عن أي ولد وتجيبي زيتو حتي لقيت وحدة منزلة صورة ولد وقالت جيبو لي زيتو يعني دايرة أقل تفاصيل عنو بنات الذين ديل جايبين حتى رقم حبوبتو وسيد الدكان الجنب بيتهم البقعد معاهو غايتو ما بنقدرو البنات ديل أصلو برررري صعبات_ههههههه عادي يا بت أنا كان نزلت صورة محمد راجلي وجابو لي زيتو وزيت الشلابة الكانت عايزة تشلبو مني لكن أنا قادرة وردمتها ردم الجن العفنة دايرة تخرب بيتي لكن أنا حسمتو معاها ووريتها المغطي والملان شطة _بررررري منك عاد ما بسألك لكن _أختك ما هينة بنووب_بنووب؟؟!!! ائه ما علينا عايني كنت عايزة اسألك قبيل شفت لي بيان ما بيان أنا بيان يعني بيان بتاع تجمع المهنيين لكن ما فهمت منو حاجة شكلو كاتبنو بالراندوك دقيقة أوريك ليهو وجابت تلفونها وورتها البوست سهي بقت تقرا و إبتسامتها كلو ما ليها تعلى لحدي ما خلصت زفرت بإرتياح وقالت:خلصت_اها وقالو شنو قدرتي تفهمي حاجة؟؟_كيييف يا ما أفهم ألا أنا قالو طالعين موكب يوم 30يونيو الحيقع يوم الأحد عشان نجيب حق أخواننا الشهداء يا سلاااام حيكون يوم من الموت_يعني معقولة الكلام اللاتيني دا كلو عشان دعوة لموكب بس أنتي متأكدة؟؟_لا في كلام تاني طبعا _اي فهمينا كويس ناس قام بالضلام ولحام ستلين داشنو؟؟_دقيقة أترجمها ليك وحدة وحدة أول شئ ياو ياو:طبعا دي إفتتاحية لازم تتقال في أي بيان لزوم حماس وكدا عرفتي؟ لحام ستلين:معناها من دون فراغات بين المتظاهرينوابنص صاجة:تحرك بأقصي سرعة شتات ومليان مطاط وخالي من المطبات:مدد متواصل بدون توقفخالي بلاغات والقسم زاتو اتقفل:مافي زول يخاف من الأعتقالات لأنو الشرطة حتعمل إضراب وامريكا حزرت ولمحت أنو الجيش ما جاهز والسجون زاتو ما بتكفي لأكتر من ٥٠٠٠متظاهر٦أبريل دي كان قلبة جزرة:يعني تسخينة غلش عفانات:تحركات بذكاءتقفيل طبلون تظليل سبورة:سرعة قصوي وعدم أكتراث بالعوازل قام بالضلام:باغت وفاجأ وزاغ من الناس الجواسيس قفل وأحتفل:دي عشان أنتي مجندة راندوك حاخليك تعرفيها براكيوم الزح:مليونية30يونيو مليونية تسليم السلطة والأقتصاص للشهداءوووشكرن وعفوووون......._وااااو ياخ اللغة دي جميلة جمال بالرغم من أنها معقدة ودايره ليها مترجمين مختصيين عدييل كدا ههههه_الشكر كلو لدكتورنا مهند محمد حامد هو البكتب بيانات التجمع بالراندوك وهو برضو صاحب المقولة المشهورة(الحل في البل)_عاد ما قصر نهاي أها الأحد كيييف؟؟حتطلعي الموكب_قدام يا زولة_بااااس أنا معاك يا مزة_شنو؟؟؟ أنتي عايزة تجيبي لي كبوة ولا شنو مع أمي وأبوي يا زولة هووي بلا موكب معاك أتلمي في بيتك أحسن ليك أنو ترجعي حية وبعدين أمك وأبوك يجوطو فيني انتي الودتيها وورتيها و وووب برنامج_النبي فيك الله يخليك سوقيني معاك الموكب دا يا سهى الله يخليك،،الله يدخلك الجنة،،إن شاء الله تسافري باريس وتلاقي هناك فين ديزل ويتصور معاك_فين ديزل وووب علينا البجيبو هناك شنو يا بت ما تسوقيني بالخلاء+صرعتيني يااخ تنفعي متسولة(شحادة)والله _انا متسولة وشحادة وعفنة ونتنة وجزمة وعبيطة لو دايرة كمان بس المهم تسوقيني معاك اها قلتي شنو؟؟_ما حينفع يا بيان انت لسع ما متعودة علي جو المواكب والبمبان دا والكجر لو قبضوك حيتسلو بيكي لأنك حتخافي وتتعولقي وكدا ما حيفكوك بالساهل حتكوني فرجة لليسوي والمايسوي ههاااي_أنتي مش بعضمة لسانك قلتي أنو ناس التجمع قالو ما نخاف من الأعتقال والكجر دا شنو؟؟أوووففف منك ياخ أنتي شكلك موضوع المواكب دا خاشي ليك في رأسك و ما حتقتنعي بكلامي الا تجربي بنفسك خلاص أمري لله حأسوقك لكن وقسما عظما يا بيان تجيبي سيرة لبابا ولا ماما تاني المواكب دي تشوفيها في أحلامك سامعة؟_حاضر أوعدك أني ما حاجيب ليهم سيرة عن الموضوع وحأسكت خالص _تمام كدا أنتِ حبيبتي_yes yes أخيرا وافقت يلا أنا أستأذن بعدا تجااو يا قمراية_ هه مصلحتك خلصت معاي خلاص؟_لا ما كدا لكن عندي موضوع مهم مع لتين ماشه ليها فيهو_خير إن شاء الله موضوع شنو بالزبط؟_بعدين أبقى أحكي ليك عنو بمزاج_زاااابطمشت غرفتها لقت وسن نايمة ما حبت تصحيها وخلتها علي رأحتها لبست هدومها وطلعت وفي الصالة قابلت أمها وأبوها كانو قاعدين بشربو في الجبنة حنان أول ما شافتها قالت:طالعة وين من غير صحبتك ومخلياها براها في البيت الكبير دا_ماشة بيت حسان أخوي عندي موضوع مع لتين بتوعبدالرشيد:موضوع شنو يا بتي الحاصل شنو ما تدسي مننا عليك الله_أطمن يا أبوي ماف حاجة بتخوف موضوع بسيط بسحنان:طيب وصحبتك المحبوسة دي ما تشوفي ليها حل ما ممكن احنا نقعد لينا مرة أرملة في بيت ما بيت أمها أو راجلها وخاصة لو كان البيت دا فيهو ناس متزوجين دا فال ما كويس وبجيب العارض الله لا يبتلينا تتتفف تتتف برا من البيت_يا ماما دا شنو التخاريف البتقولي فيها دي دا كلام ما ليهو اي أساس من الصحة وأنتي مرة متعلمة ومثقفة عيب تقولي كلام زب دا وأفتكر أنا كان حكيت ليكم ظروف وسن وقلت ليكم ما بتقدر تقعد مع أهلها أستحملوها حبة كدا يعني شنو هي بت طيبة ومظلومة والله وتستاهل كل خير أكسبو فيها ثواب يا جماعة يعني تمشي تقعد ليك في الشارع عشان ترتاحي أتقو الله في المخلوقة دي ياااخييي _خلاص ما تقعدي تقلبيها لينا محاضرة وتدينا دروس عن الأخلاق والأصول مش قلتي ماشة عناس بت أخوك يلا أتوكلي دربك أخضر _قتنادة ازتو يا حجة ومشت بسرعة بعد ما فكت ليها ضحكة قصيرة وخلت أبوها وأمها بوراها محتارين من أخر كلمتين قالتهم ديل حنان لطمت خدها وقالت بأسى:البت دي جنت رسمي والله،،وسن كانت متابعة المشهد من البداية وسمعت كل حاجة حست بأنها عبئ ثقيل عليهن بس تسوي شنو ما عندها غيرهم،،قررت أنها حتمشي منهم أول ما الفرصة تسمح ليها،،وبهناك بيان كانتلبست الفريم بتاعها وإتوجهت لليدي صوفيا وركبتها وما هي إلا ثواني وكانت كاتحة بيها في الزلط أما بهناك في جانب ناس لتين كانو متلمين كلهم سوا مع بعض ويضحكو ويتونسو الفرحة أكتملت برجوع أبوهم وأخوهم الكانو غايبين عن البيت فترة طويلة والكلام جاب الكلام لغايت ما إتفتحت سيرة عرس لؤي حسان قال ليهم:بعد دا مافي أي داعي للإنتطار وأنا ما حأقعد كتير عشان كدا لازم نعمل العرس في خلال٣أسابيع لأنو مافي زمن اها قلت شنو يا ولدي_والله انت طالما قلت كلامك أنا ما عندي مانع حنسوي العرس في أقرب وقت إن شاء الله يا أبوي وأنا حأكلم سحر تجهز نفسهانادية:أيووووو يوووووي دا يوم المنى يا ولدي الحمدلله اخير حأشوفك عريس وأفرح بيكليث بمزاح:أبشششر يا عريس يا سلام حنعمل لينا موضوع حبة ونلم الجكس في بيتنا عشان أختار وأعزل علي كيفي وألحقك ولا كييف يا حاج_هههه أنت كدي أتخارج من الثانوي وخش الجامعة بعداك الله كريم_دايرين ننجز بدري بدري ما زي لؤي عجز ولسه ما أنجزلتين:هوووي لؤي ما عجوز يا زول دا لو عمرو بقا ١٠٠حيكون قرضة وكسار أخوي منو الزيو يا ناسلؤي:وحيااات الله الكلام دا من ورا قلبك وأنا متاكد في حاجة أصلو بكشك دا ما ساي_دايما كاشفني ياخ الصراحة عايزة لي فساتين للعرس وأنت كعريس مفروض تبذر حبة وتغمت لأختك حبيبتك ٥مليون كدا عشان تقشششر في العرس،،لؤي قلع عيونو وقال ليها بصرخة:كككككمممم؟؟؟٥مليون!!! أنتي عايزة تفلسي بي ولا شنو أنتي لو مرتي ما بديك ٥مليون عشان تمشي تشتري بيها دلاقين وكلام فارغ ساي_يخخخسي عليك يا بخيل سجم سحورة بعدين حتنصدم فيك يلاحسان قال ليها:خلاص ما تزعلي قولي عايزة كم وأنا بديك يا بتي،،بأست رأسو وقالت للؤي:ياخ أتعلم من الراجل الرائع الوجيه دا وأنت زاتك شين ومجلح يلا وطلعت ليهو لسانها،،ليان لوت بوزها وقالت لأبوها بغيرتها المعتادة:وأنا ما بتك كمان ولا بس بتدو لدلوعتكم البكر ديحسان ضحك وقال ليها:العسل زعل يا ناس،،ياخ أنتي لو طلبتي عيوني أديك ليها وباسها في خدها ليان الإبتسامة حصلت أضانها عديل،،لتين قالت ليها:غيييرة وروح شريرة دايما مداقراني في اي شئ أنت بسسس عليك كريهة ديليان بتريقة:بسسس ولا بسسسه هاهاها_ولا ظريفة ويييييلاااااااافي اللحظة دي بيان كان وصلت بيت ناس حسان بركنت ليدي صوفيا وخشت جوه بعد ما سلمت علي الجنايني الكان بقص الشجر بشكل جميل رنت الجرس لعدة مرات وإنتظرت بهناك العائلة كانو قاعدين وسمعو صوت الجرس بدق ليث قال ليهم:منتظرين زول؟؟كلهم قالو لا ليث مشى فتح الباب ولقاها بيان سلم عليها وقال بفرح:جيتي في وكتك يا عمتو عندي ليك مفاجأة حتحبيها شديد_مفاجأة شنو يا ليث؟؟_أنت بس تعالي وراي وحتعرفي كل حاجة وجراها من يدها وجابها الصالة وقال:تررررااااررراااارااااااارااااا أقدم ليك السيد الحاج حسان عبد الرشيد أخوكككي،،بيان نزلت الفريم الكانت لابساهو قبل ما تدعك عينها بعدم تصديق وتقول بصوت باكي:ححح حسان أخوي أصلو ما بصدق والله متين جيت أنت يا زول وجرت عليهو وحضنتو وبقت تبكي معاهو لعدة دقائق بعدها هدو وقعدوبيان حضنتو تاني وقالت :3سنة ما شفتك يا أخوي شفت السنين دي مرت كيف؟؟ معقول تمت3سنين بالسرعة دي أصلو ما مصدقة_ودا كلو من عمرنا يا أختي ماشاء الله والله كبرتي وأحلويتي أكتر ياخ قريب دا كنت بوديك الروضة والمدرسة بيدي وأستناك لحدي ما تخلصي وأجي أسوقك_أي وأنا وكت يجي إجتماع أولياء الأمور كنت بجيبك معاي وبقول ليهم دا ولي أمري وأبوي كان بزعل مني وفي الأخر بهدي وبقول لي:أصلو هو شايل مكانتي وباقي ليك أبوكي فأكيد حتجيبيهو وتقولي دا ولي امري لأنو هو رباك اكتر مني،،حسان ضحك وقال:أبوي حنين ياخ،،الله يديهو الصحة والعافية إن شاء الله أشتقت ليهو والله كيف عمتي حنان وكيف سهي مشتاق أشوفهم والله_كلهم كويسين الحمدلله دقيقة أتصل ليهم وأكلمهم يجو_لا ما ينفع كدا عيب مفروض أنا الأمشي ليهم ما هم يجوني_ما مشكلة خليهم يجو يشوفوك سرعة ويرجعو وأنت إرتاح وتعال لينا بكرة إن شاء الله،،شالت تلفونها وضربت لي سهي وقالت ليها بدون مقدمات:تعالو هسي سرعة...يا بت مافي حاجة والله..طيب حأوريك ها جاهزة؟؟...حسان جاء الخرطوم وهسي أنا قاعدة جمبو...حسان ياخ عندنا كم حسان أنحنا؟؟أي بالجد وربي هاك إتكلمي معاهو،،حسان شال التلفون وبقا ساكت دقيقة وهو بسمع في بكاء سهي أستناها بعد ما خلصت وسلم عليها وأتكلم معاها وهي سألتو جاء متين،،قال ليها:والله ياخ جيت لي كم ساعة حتي ناس البيت كانو ما عارفين جيت طبيت عليهم فجأة والله،،بعدها بقى يقول:عيب ياخ تجوني أنتو أنا حأجيكم طيب...بعدين بجي أرتاح...أحرجتوني والله طيب في إنتظاركم..يلا في أمان الله،،بيان قالت ليهو:مشتاقاك شديد يا أخوي حضنتو وبقت تبكي وتشهق:٣سنة ما شفتك يااخ فراقك حار والله الحمدله أني شفتك بعد السنين دي كلها تاني ما دايرة شئ من الله_طمنيني عنك أخبارك صحتك وأمورك كلها بخير؟_كيف ما تكون بخير وأنا شفتك أتونسو كتير بعدها بيان ساقت لتين الأوضة وقالت ليها:في موضوع مهم عايزة اقولو ليك بس أنتي أمسكي أعصابك أوكي؟؟لتين بلعت ريقها وقالت ليها:موضوع شنو الأمسك أعصابي فيهو دا أحكي أنا سامعاك يا بيان،،بيان غمضت عيونها وإستجمعت قواها وقالت ليها:ما عارفة أقولها ليك كيف لكن لازم أقولها،،أخدت نفس عميق بعدها قالت بأسى:للأسف الشديد أنتي ما إتأهلتي في مسابقة الصحفي الصغير يا لتين
يتبع......
