سامر كان متصل وقرا نصها عمل ليها " أحببته " وعلق ليها وقال:نص جميل جدا بشبه صاحبتو كدا ، بيان طوالي عملت ليهو لووڤ وجاهو اشعار انها ردت علي تعليقو ، بس قبل ما يشوف التعليق جاتو كم رسالة من اللواء حسان فتحها وكانت أول رسالة مكتوبة " أسحب نفس عميق وافتح الصورة " فتحها وكانت الصدمة!!#في المساء.....كانت قاعدة في الكرسي ودافنة وشها بين يدينها وجمبها مرت عمها بترغى في التلفون ، رفعت رأسها لمن الدكتور جاء طالع من الغرفة جرت عليهو بسرعة وقالت: اهاا يا دكتور طمني خالتو بقت كيف ؟؟_والله مع الأسف المريضة دخلت في حالة بتاعت كومة سكر... (سبات او صدمة بتحصل لمرضى السكرى لمن مستوى السكر بتاعهم ينخفض شديد وللأسف في نهاية المطاف بؤدي للفشل الكلوي عافانا الله وإياكم)إسراء قالت ليهو بعدم أستيعاب: كيف يعني ماتت؟؟_لا هي هسي نايمة في سبات ما معروف تصحى منو متين يمكن بكرا او بعد اسبوع أو بعد شهر او سنة أو اكتر ما في زول بعرف هي حتصحى متين إلا ربنا سبحانه وتعالي الله يشفيها إن شاء اللهإسراء بقت بتقول بمرارة: يعني خلاص انا بقيت وحيدة؟؟ أخوي الوحيد قابضنو في تهمة مخدرات وخالتي دخلت في غيبوبة ما معروف تصحى منها متين يا ربي لييه بس بحصل معانا كدا هسي انا اعمل شنو ولا أقول يا منو !!كان ماسك سجارتو وبدخن بشراهة ما عرف كم من الزمن مضى وهو بدخن سيجارة ورا التانية بس وقف لما جات هي وقعدت وقالت ليهو بلهفة: سامر في شنو لييه اتصلت علي وطلبت مني نتقابل الأن صوتك كان متغير شديد الحاصل عليك شنو؟؟_أأ تشربي شنو؟؟_ما عايزة أشرب حاجة عايزة أكل بيتزا بس_جدا ، جرسووون عليك الله عايزين بيتزا خضار صح? _بالظبط وكتر من الجبنة لو سمحت_زي ما سمعتها بالله عجل لينا عشان مستعجلين= حاضــر_يلا أحكي يا سامر ياخ وتترتني واللهطلع ليها تلفونو وفتح الصورة الرسلها ليهو اللواء حسان وقال ليها: أقري المكتوب دا ، بيان شالت التلفون وبقت تقرا بعد انتهت قالت ليهو بعدم تصديق: أحالوووكم للمعاش !! مقادرة أصدق والله كيف ينزلوكم معاش وانتو ما حصلتو عمر 63 سنة حتى أخوي حسان ياداب في الخمسينات لالا في حاجة غلط والله !_بالنسبة ليهم الغلط احنا ديل يا بيان وعشان كدا صفونا عمري ياداب 34 سنة وبقيت الملازم اول مهندس معاش سامر الحسيني ههههههه كلام بضحك والله حتي زاك في قبرو حاسبوهو ونزلوهو معاش زينا دا كلو عشان نصرنا الحق وخالفنا تعليماتهم القذرة ، انا خلاص فترت من البلد دي ومن المؤسسات العسكرية الفاسدة ومن الشرطة ونجاستها ومن الشعب زاتو والله فترت من اي شئ خلاص ما نفسي اكمل والله_اصلا الناس الشريفين الزيكم ديل ما حيكون ليهم مكان وسط الوساخة والفساد دا أنت خدمت بلدك ليل ونهار و في النهاية اتخلصو منك ولا كتر خيرك لكن تعال معاي للبقدروك ويرحبو بيك في اي وقت مهما عملت حاجة انت شايفها بسيطة هم حيشكروك ويحسسوك انو كان عندك دور ولو بسيط " لو الدنيا غدرت بيك تعال لاحضان الثورة حتلقى الأمان " وبراك قلتها بعضمة لسانك ملازم اول مهندس افتكر جاء الوقت خلاص انو تطلع باشمهندس سامر الجواك كفاية حابسو طول السنين خليهو يطلع للدنيا خلاصالجرسون جاب ليهم البيتزا وبقـو يأكلو وهم ساكتين ، سامر طلع ليهو علبة مداها لبيان وقال: انا ما جيت عشان أوريك الخبر دا بس ، بيان فتحت العلبة بفضول وبقت تعاين ليهو وفي وشها أبتسامة واسعة ، كان خاتم فضة وسلسل مكتوب عليهو " كنداكة "باللون الذهبي، عاين ليها في عيونها مسافة بعدها قال ليها: بيان تتزوجيني؟؟_هاااا قلت شنو؟؟_بيان انا بحبك والله العظيم_افهم من كدا انك عايز تخطبني من غير ما اهلي واهلك يعرفو لا لا دا كلام برضو!!_انتي عارفة انا ما لي في حاجات الكفار دي لكن عايز اسمع ردك بكل صراحة وأعتبري دي هدية تستاهليها يا " كنداكتي "_سامر أنا ما حالقى زيك لو فتشت الف سنة وانت بالجد الزول البتمناهو وبحلم بيهو_يعني موافقة؟؟_sure موافقة أي طبعا_ما بتصدقي قدر شنو فرحتيني والله_الله السلسل دا فظيييع لقيتو وين؟؟_دا طلب خاص ليك انت وبس _واااي يا سامر شكرا ليك ياخ_وعلي فكرة العرس حيكون بعد العيد الكبير إن شاء الله مافي وقت خلاص _لا لييه يا سامر انت مستعجل كدا ما حنلحق والله_حتلحقو يا بيان بس أنتي باركيها ياخ_ بكرا حيكون في اجتماع بين قوى الحرية والتغير والمجلس العسكري والوسيط الافريقي محمد الحسن ود لبات المفاوضات مستمرة وإن شاء الله في الأيام الجاية زي ما فرحنا لمن قالو سقطت حنفرح اكتر لمن حكومتنا تبقى مدنية_ياااه وأخيرا حتبقى مدنية معناتو يا بختنا شديد عرسنا حيكون بعد ما تبقى مدنية_أي أي ياااخ اليوم داك أنا حاطلع في الشوارع واصرخ زي المجنونة بقت مدنية أدعى انو ما يقع يوم عرسنا عشان حأكسر حنك العرس وأسوقك علي طول " ساحة الحرية "_هههههه مجنونة وبتعمليها يا كنداكتي يلا بما أنها حتبقى مدنية وكدا حابة شهر العسل يكون وين؟؟_سنغافورة طبعا يااااخ انا بموت في البلد دي والله_سنغافورة عديل يا بيان!! كدا ما عصرتي علي معاشي معناتو حينتهي كلو في شهر العسل وحنجي هنا نقعد نشحد ههههه_ما شغلتي بيك تسرق تدين المهم توديني سنغافورة بس_من بدايتها كدا دايرة تدخليني في ديون وبتاع لالا اسمعيني يا ولية انا هسي عاطل وما شغال بعد اموري تزبط أوعدك اني حأوديك اليابان لو عايزة مش سنغافورة راعي لظروفي شوية يا حبيبتي أوكي؟؟_حاضر يا سامر ما حابقى مرة نقناقة وجعجاعة من بدايتها كدا وموضوع سنغافورة دا منتهى لكن كلمتك من هسي بعدين لازم تتحمل نفسنتي ونكدي عشان بعدين ما تجي تتصدم لي وتقول لي ما كنت متوقعك كدا وبتاع مفهوم؟_ بتعرفي تظبطي المحشي؟؟_امممم يعني ما بطالة كدا فيهو_ وأنا بحب الفسيخ شديد_الدخل المحشي بالفسيخ شنو يا سامر بسم الله انت بالع حاجة!!_لا بوريك انا بحب شنو وبكره شنو عشان تكوني عارفة يعني؟_بالنسبة لي انك ما وريتني لسع بتكره شنو؟_بكره الأقاشي والشعيرية والمره الكلامها كتير _أنا كلامي كتير يا سامر؟؟_انتي شايفة عكس كدا ؟_ما ترد علي سؤالي بسؤال تاني_أحم انا لازم امشي بعد دا والله جايبة عريبتك معاك صح؟_...............دفع الحساب وقال ليها وهو بيمشي: يلا ارجعي البيت بعد دا يا مززة ، بيان شالت شنطتها وهي بتقول: غياظ دا يكلمني اجيهو ويمشي يخليني كمان والله ما اخليهو_أسمعي يا نادية أنا....نزلوني معاش خلاص_شششنووو؟؟ كيف الكلام دا يا راجل انت لسع بدري علي عمر المعاش_دا الحصل والله أحالوني للمعاش يا نادية عشان خالفت التعليمات وقبضت علي قاتل السفير السوداني في السويد بعد ما هم اتسترو عليهو بانو قفلو القضية عملو دا كلو عشان هو عميل لإسرائيل وضابط في جهاز الموساد حتى هو الكتل زكريا الكان واحد من اميز الضباط في لجنتي هو والملازم اول سامر حتي ولد السفير الكان معانا حققو معاهو ودفعو ليهو الكفالة عشان يمرق أي زول شارك في القبض علي فان دام اتعاقب وهو في النهاية انتصر علينا في الدنيا لكن في الاخرة هو الخسران وربنا حيحاسبو علي الصغيرة والكبيرة العملها_قول الحمدلله يا حسان الحمدلله دائما و أبدا أنتو عملتو العليكم وزيادة خلوهم لربهم هو الحيجيب ليكم حقكم منهم ، ريح بالك ونفسك خلاص واقعد في بيتك مع عيالك يا حسان هم محتاجين ليك تكون جنبهم اكتر من اي شئ تانيـــــــــــــــــــــــــــــــــــــــــــــــــــــــــــــــ#في اليوم التالي.....احمد كان خلاص حكمو عليهو بالسجن 5 سنة والقاضي رفض الكفالة ، في ضابطين كانو بتكلمو عن نزول اللواء حسان ولجنتو للمعاش الإجباري ومن خلال كلامهم قدر يعرف انو سامر من ضمنهم سألهم وهم أكدو ليهو ، زعل حبة لأنو كان حاسيهو متعاون معاهو وكان بحاول يطلعو من الورطة الهو فيها ، أبتسم لا اراديا لمن ملامح وش الضابطين اتغيرت وهن بشوفو سامر قدامهم كان لابس ملكي قميص ابيض وبنطلون أسود ، سلم عليهم وعاين لي احمد وقال للضابطين: انا أخدت إذن لزيارة احمد أأأ ممكن تبعدو حبة عشان عندي كلام معاهو _بس انت هسي ما ملازم اول عشان تأمرنا_أنا ما بأمركم انا بطلب منكم طلب بسيط بس بحق الزمالة الكانت بيناالضابطين عاينو لبعض وسحبو كراسيهم وقعدو بعيد وهم براقبوهم بصمت ، سامر جاء لأحمد وقال ليهو: سمعت أنو حكمو عليك بسجن 5 سنة؟_ وأنا سمعت أنو نزلوك معاش إجباري_واضح انو الأخبار بقت تنتشر بسرعة ع العموم أنا عندي ليك خبر ما حيسرك أبدا_ اللهم أجعله خير أحكي_خالتك يا أحمد دخلت في حالة كومة من بعد ما عرفت بالحصل ليكأحمد قال ليهو بصدمة: شنوووو؟؟ خالتي فاطمة دخلت في حالة كومة !! إنا لله وإنا إليه راجعون لا إله إلا الله هي هسي كيف وإسراء أختي وين؟؟_قبل ما أجيك انا كنت معاهم أختك حالتها سيئة شديد والله خالتك مافي جديد ياهو راقدة وما معروف تصحى متين شايف العملتو دا ما ضراك انت بس لا ضرا معاك أقرب الاقربين ليك ضيعت أتنين من أسرتك بسبب سكة الحرام دي مبسوط كداأحمد ضرب الباب الفاصلو بينو وبين سامر وقال بغيظ: كلو من عمي سلطان دا هو الاجبرنى أسوي كدا أنا عمري ما فكرت امشي في السكة دي بالرغم من انو مرت علي أيام خلتني اكره عيشتي بس أمي وخالتي ربوني انو لو اموت ما امد يدي علي حاجة ما حقتي بس سلطان عرف يمسكنى من اليد البتوجعني ، جانا في يوم وقال بكل بساطة انو رهن بيتنا وخشى في مشروع وفشل وكان الشرط الوحيد عشان أرجع البيت من صديقو اني أسافر معاهو الإمارت وهناك يدربونى ويلبسوني لبس الدعم السريع ويسفروني اليمن بس اكتشفت في ما بعد انهم اخطر من كدا ايوا هم خونة وعملاء لإسرائيل وكانو عايزين يجندوني معاهم بس عمى لهدف ما هو عارفو اصر علي صحبو دا اني أشتغل هنا وأتاجر ليهو في المخدرات وهو طوالي وافق وانا ما لقيت عندي خيار غير اني اقبل ابقى ديلر عشان أرجع بيتنا واقدر أعيش خالتي واختى احسن عيشة بس درب الحرام عمرو ما بودي لقدام هسي انا خسرت نفسي وخسرتهم هم كمان حتى بعد ما اطلع من السجن بعد ال5 سنة تتم ما حيرحبو بي تاني انا انتهيت خلاص حياتي اتدمرت والله_دقيقة دقيقة قلت ليك عمك وصحبو عملاء لإسرائيل وهم الاجبروك تسوي كدا عشان ترجع بيتك العمك رهنو؟؟_أيوا وكمان اكتشفت أنهم بتاجرو في الأسلحة والمخدرات وكان عندهم زعيم تقريبا اسمو فان دام ولا شنو سمعتهم كانو بقولو انو صفوهو ولا حاجة كداسامر نطر عيونو وقال ليهو: فان دام ؟؟ يعني ديل من رجال فان دام ؟؟_ وانت بتعرفو من وين؟؟ _قصة طويلة بس حاختصر ليك سبب نزول للمعاش كان اننا قبضنا علي فان دام وخالفنا التعليمات الادوها لينا وعملنا الصح هو اتسبب في اغتيال سفير والقيادات بتستر عليهو عشان كان ضابط في الموساظ وما عايزين يخربو معاهم وش بس انا مشكلتي معاهو خاصة كتل أبوي و صديق عمري كان معاي في اللجنة وفان دام كان عايز يخلص علي بس زميلي دا وف وإتصاب بدلي_الناس ديل مجرمين وممكن يعملو أي شئ عشان مصلحتهم بما اني خلاص بقى تاني ما عندي حاجة اخسرها واعترفت ليك بكل حاجة عندي ليك طلب بسيط أرجوك يا سامر خلي بالك من اختى إسراء وخالتي لغايت ما ألقى طريقة واهرب من هنا_انا حأحكي لاختك اي حاجة وأخليها تجي تزورك في اقرب وإن شاء الله نقدر نصل لعمك والمعاهو دا أنا حاعمل كل البقدر عليهو يا احمد_شكرا ليك يا سامر واللهواحد من الضباط جاء وقال ليهم: خلاص الزيارة أنتهت يا سامر اتفضل امشي عشان عايزين ننقل السجين دا مع الأشكال الزيو هناك سامر ودع احمد ومشى بس الما عارفنو كان انو الضابط الجاهم دا كان تابع لبنيامين ولمن احمد صرخ وقال كلو بسبب سلطان هو عرف انو بكون حكي ليهو بكل حاجة ، خلى الضابط التاني يودي احمد ومشى لمكان بعيد اتصل علي بنيامين وقال ليهو: ألووو ، أيوا يا زعيم ، أحمد حكى كل حاجة لسامر نخلص عليهو؟ ، طيب زي ما داير يا زعيم ، لا التاني دا خارج عن ارادتنا ، اتكلفو بيهو انتو بطريقتكم ، يلا مع السلامة#في جانب أخر.....محمد صحى على أصوات ضحك وونسة جاية من الصالة ، استغرب دا منو الجاهم من الصباح كدا وكمان سهى بتتونس معاهو وبتضحك بالطريقة دي ، ركز شوية في صوت الطرف التاني اتصدم وبقى يدعك في عيونو ويقول: لالالا مستحيل أنا شكلي لسع نايم لالالالالا معقول!!لبس التيشيرت بتاعو ومشى الصالة ، وقف مسافة وهو بصدق الشايفو قدامو ، سهى لاحظت ليهو وقالت ليهو بضحكة: مالك متنح كدا تعال سلم علي أمك واختك وصبح عليهم ، محمد من الفرحة باس راس امو وأختو يسرى وقعد ، أستاذن منهم ومشى غسل وشو وجاء قال ليهم: ممكن افهم الصلح دا حصل متين لأنو جوطتو لي راسي من أول الصباح؟؟سكينة قالت ليهو: والله يا ولدى أنا عرفت غلطي خلاص وجيت اعتذرت لسهى وهي سامحتني طوالي بكل طيبة نفس وهسي كمان عايزاك تسامحنى انت كمان لأني كنت بجبرك علي حاجة ما عايزها صدقني امبارح لمن مشيت وخليتنى مع الجماعة وسوقت مرتك انا عرفت قدر شنو انت بتحبها وبتعزها انا كان همي انك تجيب لي عيل وبس لكن ما فكرت في سعادتك أعفي لو يا أولادي وانتي بالاخص يا سهى انا ظلمتك كتير وسمعتك كلام شين وانتي كنت صابرة ومتحلاماني والله خجلانة زاتو اعاين في وشكم اعفو لي بس عليكم الله ، محمد بقى يهدى فيها ويقول: مسامحنك يما خلاص والله ما زعلانين منك عافين ليك لله والرسول وانت كمان اعفي لينا لو ضايقناك في يوم_ عافية ليكم ليوم الدين يا اولادي اوعدكم تاني ما حادخل في حياتكم الشخصية اعملو البريحكم بسيسرى قالت: يلا لازم نمشي بعد دا خليت التيمان نايمين والله _لييه ما مشو المدرسة الليلة؟؟_باسم عيان شوية عندو وجع بطن وبسام قال ما حيمشي المدرسة بدون تومو وقعد هو كمان_الله يشفيه إن شاء الله بعدين حاتصل اطمن عليهوبعدها ودعو سهى ومحمد مشى معاهم وصلهم المحطة واجر ليهم ركشة وجاء راجع البيت ، اول ما سهى فتحت ليهو الباب حضنها شديد وشالها وبقى يدورها ويقول: أخيرا اتصالحتووو يا الله ياااخ أهم مرتين في حياتي اتصالحو مع بعضهم اليوم دا عسل من اولو والله ، سهى بقت تضحك وتقول ليهو: نزلني يا محمد ياخ راسي لفى ، محمد نزلها وقال ليها: سوووري إتحمست شوية_علي فكرة ربنا دا عظيم شديد والله يا محمد امبارح بعد كلامك دا أنا فضلت ساعة ابكى وادعى ربنا انو يرزقنى ذرية ويحنن قلبك امك علي بس ما اتوقعت انو ربنا يستجيب لي دعائي بالسرعة دي وعلشان كدا أنا مؤمنة انو اذا فضلنا ندعى كلو يوم انو يجونا عيال ربنا حيجبر بخاطرنا ويستجيب لدعائنا دا تعال هسي ندعى يا محمد وعسى ولعلى تكون ساعة إستجابة والملائكة تقول أمينالاتنين رفعو يدينهم واي واحد بقى يدعى انو ربنا يرزقهم بالبنون والذرية ، سهى شالت صينية الشاي من الطربيزة وخشت المطبخ محمد جاء حضنها من ورا وقال ليها: الليلة فطورنا برة بالمناسبة السعيدة دي_هههههه طيب امشي اتسوك وتعال عشان تشرب الشاي _حاضر يا أحلي زوجة في الدنيا#الظهر....._بياني يااا كيفك الليلة؟_ما تمام _لييه كدا بس_اسكت مني يا زول ما عايزة كلام معاك_أوعى تقول لي زعلانة من حركة امبارح لسع؟_ايوا كيف ما ازعل حركتك كانت بابخة والله_معليش حقك علي والله انا أسف لاني خليتك أمبارح ومشيت اها كدا كيف؟_برضو زعلانة منك_طيب انا اعمل ليك شنو عشان تسامحيني ؟_اممممم لو عايزني أسامحك لازم تمشي معاي موكب الليلة بعد ساعة كدا نتلاقى في موقف جاكسون هااا قلت شنو؟؟_.............._موافق ولا لا؟؟_طيب اوكي موافق خلاص _yeeeessss اقفل يلا عايزة اتجهز للموكب_طيب يلا نتلاقي هناك _قداااام وراء إعدام - بعد ساعتين -#في ثانوية النخيل......تعالت الأدخنة السوداء المتصاعدة من " اللساتك المحروقة " في ميدان مدرسة النخيل الذي تجمهر فيه المئات من الطلاب رافضين ما سمي " مجزرة الأبيض " التي وقعت في" ولاية شمال كردفان " اليوم ، موكب طلاب مدارس ثانوية خرجو للمطالبة بحقوقهم ولكن القوات الأمنية وقوات الدعم السريع قابلتهم بالرصاص والغاز المسيل للدموع " البمبان " وبهذا قد أضيفت مجزرة جديدة في تاريخ الثورة السودانية " مجزرة 8 رمضان ومجزرة إعتصام القيادة العامة ومجزرة طلاب الأبيض " وأصبحت مواقع التواصل الإجتماعي تتداول الفيديوهات الموجعة وصور شهداء المجزرة تحت هاشتاق #الأببض_تنزف ، أصيب الكثير من الطلاب والأشخاص أثر هذه المجزرة ولكن قد سجلت لجنة الأطباء المركزية خمس شهداء من الطلاب حتي الأن وكان من أبرزهم الشهيد " أحمد عبدالوهاب الملقب أحمد كاكا " ذو الثامنة عشرا ربيعا ، توفي اثر رصاصة حية انطلقت من مليشيا الدعم السريع أردته شهيدا في الحال ، أستشاط الثوار من هذه الفعلة الشنيعة وخرجت مواكب أخري تنديدا لمجزرة طلاب الأبيض في الخرطوم وبحري وبعض مدن السودان الاخرى ، وقد كان طلاب مدرسة النخيل مستنكرين الجريمة البشعة التي اقترفتها القوات الأمنية إتجاه زملاءهم ، حاولت إدارة المدرسة أن تمنع تلك المظاهرة ولكن لم يستطيعو ففي كل دقيقة ينضم رهط جديد من كل ما استفزتهم هذه الفعلة الشنكاء ، بدت أصوات الهتافات عالية قد شقت عنان السماء ، "كتلو الطالب والأستاذ والتعليم ما ليهو أساس " "مقتل طالب مقتل امة كتلو الطالب وخلو الرمة " " طالب يا طالب طالب بحق الطالب " " طالب يا طالب طالب بي حق اخوانك ديل ماتو عشانك " ، أنطلق هذا الموكب الهادر في شوارع الخرطوم وألتحم مع موكب اخر من الثوار الأحرار ، وكان لابد للقوات الأمنية أن تقمع هذا الحشد ، تشابكت أيدي الطلاب الأشداء وحمو اخواتهم الطالبات في مشهد عظيم يستحق أن يخلد للتاريخ ، بدأت الشرطة بفض هذا التجمع وانهالت علب البمبان علي الطلاب كالنيازك ، وجلجل المكان صوت اطلاق الرصاص ولكن لم يتزحزح أحد ، بل بادلوهم برجمهم بالحجارة وهم يصرخون: يا نجيب حقهم يا نموت زيهم ، كان أبطالنا لتين ورئبال وأصدقائهم داخل هذا الأشتباك العنيف بين الطلاب والقتلة الخونة المدعوون " بالكجر " ، ولكن هؤلاء الغدارين قد أتو من الخلف وبدو بإطلاق البمبان ، هرع الطلبة لتتريس الشارع لحماية رفاقهم وأهتمت مجموعة اخرى برجمهم لكي يعودو ادراجهم ، ولكنهم لم يفلحو وأصبح الضرب ياتي من الأمام والخلف ، تبخر المكان بالغاز المسيل للدموع وعزفت أصوات الرصاص والقنابل الصوتية لحنا مرعبا علي مسامع الطلاب ، أصبح الوضع سيئا لذلك قررت مجموعة الأحتماء بالمحلات والدكانين لأخذ قسط من الراحة ثم الخروج للمواجهة مرة اخري .سامر كان ماسك يد بيان وجاري بيها لحدي ما لقو ليهم دكان كدا وخشو فيهو ، قعدو في الأرض وأي واحد بقحقح ويمسح في دموعو ، بيان بقت تعاين لسامر المتأزم شديد ضحكت عليهو وقالت: شوف بالله دموعك نازلة كيف لا حولااا عشان دي أول مرة بس لكن حبة حبة بتتعود هههههه ،سامر قفل ليها خشمها وقال ليها: أسكتي هوسس ما تفضحينى يااخ قدام الجماعة بتاع المحل جاب ليهم موية شربو منها سامر كان عايز يغسل بيها وشو بيان وقفتو وقالت ليهو: لا ما تغسل وشك بموية كدا حتتعب اكتر دقيقة انا شايلة معاي خل بخميرة أديك ليهو صحي برلوم والله واااي أسفةسامر غسل بالخل والخميرة وقال ليها: يااخ انا كنت شرطي العرفني بالتدابير دي شنو ؟_ما تفتح الفيس وتشوف التدابير دي خلي بالك المرة الجاية حتجي بشنطة فيها خل وخميرة وموية صحة والعلم اهم شئ والكمامة والجونتى كمان عشان ترجع بيهو البمبان بدال ما تقعد تصرخ للناس هدا ليهو تعالو شيلوهو_هو حيكون في مرة تانية يعني ؟ لا وكمان حاجي ليها بملحقات وتدابير شكلي غلطت لمن حبيت لي بت جنها ثورة مش حتبقى مدنية خلاص لزوم التعب دا شنو؟_دا كلو ما بحلك يا زول يلا ارح قوم نطلع بعد دا_بيان انتي جنيتي عايزة تطلعي تاني هسي كان كتلوكي ولا أعتقلوكي انا اقول لأمك شنو بعدين هااا؟؟_أنا ما كنت قايلاك جبان كدا يا سامر قوم ارح ما بتجينا حاجة اتشجع يلا الناس كلها طلعت برة والله_أشهد أن لا إله إلا الله وأشهد أن محمدا رسول الله أرح يلا كدا أنا عملت العلي بيان ضحكت وهي بتمسكو من يدو وتجرو ، طلعو براحة ولقو الجو برة كاتم شديد والأشتباكات مدورة ، مشو قدام وكان في مجموعة حارقين لستك وبهتفو وقفو معاهم وبقو يهتفو كدة في بت كان جنب بيان بتهتف فجأة ضربها بمبان في رأسها من وين ما معروف وهي وقعت في الواطة والدم نزل منها زي الشلال ، سامر ومعاهو 3 شباب تانين رفعوها وجرو بيها وبقو يشوفو ليهم طريقة عشان يودوها المستشفي ، فضلو يمشو بيها يمين شمال لحدي ما وقفو ليهم بتاع بوكسي وركبو معاهو وبيان اصرت انها تمشي معاهم ، بتاع العربية بقى يسأل فيهم وقال اتضربت في الموكب الشغال هسي دا ولا شنو؟ هم جاوبوهو انو اي كانت بتهتف جنبهم فجاة ضربتها علبة بمبان من مكان مجهول ، بتاع العرببة مدا لي بيان كرتونة المناديل وقال ليها امسحي ليها الدم ، بيان شالتو وبقت تمسح ليها الدم البت كانت بتئن بصوت واطي ، نظرا لأنو الشارع كان زحمة السائق بزل كل جهدو عشان يوصلهم في الوقت المناسب ، وفعلا قدر يوصلهم بسلام شكروهو ودخلوها بسرعة لغرفة العمليات الصغيرة ، بيان وسامر جو طالعين كدا من الغرفة لمحو من بعيد نادية وحسان وأصحاب لتين واقفين ، بيان اتخلعت وجرت عليهم وقالت ليهم : في شنو؟؟ دا منو الفي المستشفي دا ، حسان جاء عليها بغضب وأداها كف ناري وقال: انتي كمان طلعتي زيها اااه جيتي السودان عشان تطلعي مظاهرات ولا عشان تشوفي شغلك وأنت يا استاذ لو وافقت بيك دا ما معناتو انك تطلع معاها علي كيفك انت لسع ما بقيت راجلها ولا هي مرتك عشان تأخدو راحتكم كدا فاهميييين؟؟بيان دموعها نزلت وقالت ليهو: الراقد جوة منو يا حسان؟؟_لتييين بتي طلعت من بعد المدرسة موكب وجاها أختناق من البمبان وعلي العليهو أنتي كمان مرقتي زيها هسي كان حصل ليكم حاجة انتو الاتنين ليييه بتطلعو اصلا انتو؟؟ عشان منو؟_علشانا وعلشانك وعلشان البلد دي تتقدم وكلنا نرجع نسكن مع بعض في ظل بلد امن ومستقر_صدقيني ما بتقدرو عليهم أنا اللواء الباقي لي رتبتين واحصل برهان رئيس المجلس العسكري نزلوني معاش اجباري عشان خالفت التعليمات وقبضت علي فان دام المجرم عشان وقفت مع الحق وعملت بيهو اتخلصو مني هو السفير حقنا ما عملو ليهو قيمة و وأجبرونا نوقف التحقيقات ونقفل الملف علي انو أغتيال من مجهول مع انهم عارفين المجرم كويس ، وفي النهاية أتخلصو منو بطريقتهم وفان دام نجى من عقاب الدنيا بس عقاب الاخرة راجيهو واحنا للأسف كنا الضحايا انا وسامر وزكريا وعثمان وكل اللجنة دفعنا الثمن غالي وفي النهاية ما كسبنا أي شئ غير الخسارة_مهما عملو ومهما خسرونا ما حيقدرو يضعفونا ويزعزو ثقتنا في ثورة الوعي والتغير المهرناها بدماء شهدائنا أحنا اقوى منهم يا اخوي وحننتصر بإذن الله أتجاوزتو ومشت لنادية البتبكي واستها ووقفت معاها ، بعدها قالو لتين صحت وبتسأل منهم ، حسان ونادية وبيان وسامر خشو ليها جوة كانت راقدة ومركبين ليها اكسجين ، حسان ونادية بقو يسألوها بتلهف انتي كويسة؟؟، هزت ليهم رأسها ، بيان قالت ليها: حمدلله ع السلامة ياااخ يا لتيت، وسامر قال ليها :شدي يا حيلك يا بطلة والله يكتب سلامتك ، لتين قالت ليهم بصوت ضعيف: الله يسلمكمبعدها رئبال وسديم وباقي الرفاق خشو ليها سلمو عليها وقعدو ، سامر قال ماشي يشوف البت الجابوها مضروبة من الموكب دي ، وبيان مشت معاهو ، أول ما طلعو قالت ليهو: وي وي شفت حسان كان غضبان كيف لو كان لقانا في ظروف تانية كان هسي حنكون في خبر كان_شكلي لازم أستعجل بالزواج بعد العيد إن شاء الله وزاتو زاک يكون تمى شهر ع الأقل مع انو ما نفسي أعرس وهو ما موجود بس الله غالب _بالمناسبة ياسين عندو اخوهو الكبير صاحب شركة ممكن أكلمو ليك يشغلك معاهو_يووووه تاني ياسين دا انتي كنتي بتحبي وشوكشك ولا شنو؟؟ ما وراك غير سيرة ياسين ياسين الله!! في شنو يا بيان يااخ_بغيظك يا غبي هههههبعدها لقو البت خيطو ليها رأسها وأمها قاعدة بي برة بيان وسامر سلمت عليها وحكت ليها بالحصل ، أم البت شكرتهم وقالت ليهم: عاااد دي بتي الوحيدة سندي وعزوتي ما عندي غيرها والله كان جاها شئ بموت وراها والله_الله يخليها ليك ويحفظها إن شاء الله يا خالتب والله يديك طولة عمر إن شاء الله وتشوفيها في بيتها مع عيالها_اللهم اميين يا بتي وياك إن شاء اللهسامر خلى بيان بتتكلم مع المره وأنسحب براحة مشى دفع الحسابات وجاء لقاهم طالعين ، دخل ادى ورقة الحساب للدكتور وفي واحد من الثلاثة أولاد حلف ستين يمين الحاجات الكتبها الدكتور من الصيدلية عليهو هو ، الدكتور قال ليهم: تقدرو تمشو بعد دا ربنا يشفيها إن شاء اللهالمرة قالت ليهو: طيب بدفعو القروش وين؟؟الدكتور ضحك وقال ليها: الحسابات كلها أتدفعت يا حجة قالت ليهو بخلعة: بسم الله الدفعها منو كمان؟؟ _جاب لي الايصال الشاب دا قبل شوية وهو دفع كل حاجةالمرة قبلت عليهو وقالت بإحراج: ليييه لكن تعمل كدا يا ولدي القروش في واللهسامر قال ليها: دي حاجة بسيطة يما والله يخلي ليك بتك دي ماشاء الله عليها كانت بتهتف بطريقة كدا عجيبة_الله ما ضراك يا ولديبعدها قدموهم وطلعو ، الولد التاني قال ليها:دقيقة يا امي أشوف ليك الأمجاد دي توديكم ساكنين وين أنتو؟؟_الحاج يوسف....ما سمع باقي كلامها ووقف بتاع الأمجاد وبقى يتكلم معاهو بعدها طلع محفظتو ودفع ليهو القروش وجاهم راجع وقال: خلاص أنا كلمتو يوديكم يلا أركبو والحساب مدفوع ونتلاقي في الموكب الجاي يا كنداكة ، البت ضحكت وقالت ليهو: قدام ، المرة بقت واقفة وقالت ليهم: خجلتوني والله يا ولدي بالغتو عديل كدا ياااخ_أمشي يما امشي الله يوصلكم بالسلامة أول ما ركبو كدا وكانو متحركين الولد الثالث جاء جاري ووقفهم ، مدى كيسين للمرة وقال ليها: ما ممكن ديل يشيلو الاجر كلو وانا أطلع ميطي كدا دي شوية فواكة كدا بالهناء عليكم إن شاء الله ، المرة دموعها نزلت وقالت: معقول في شباب لسع كدا !! ، كل واحد ابتسم وعاين للمعاهو لمن المرة بقت تدعى ليهم بصوت عالي وتقول: ربنا يديكم لمن يرضيكم إن شاء الله ويسعدكم زي ما اسعدتوني الله يحميكم زي ما حميتو بتي ووقفتو معاها وقفة رجال ما حانسى ليكم المعروف دا طول حياتي وكل ما اتذكركم حأدعى ليكم والله ، الأولاد ودعوهم والأمجاد أتحركت بعد ما وصو عمك بتاع الامجاد كويس علي المرة وبتها وهو زاتو كان ظاهر عليهو راجل طيب ومحترم ، بعدها الأولاد زاتهم مشو بعد ما سلمو علي بيان وسامر وقالو ليهم: بيناتنا مواكب يا جيش ، بيان بقت تجضم في سامر زي الشفع وتقول ليهو: حبيبي ياااخ والله انبسطت منك شديد احييي الشهامة والرجالة الفيك دي ، اثناء ما ماشين كدا قابلوحسان حمر ليهم وقال: البت المضروبة وينها؟؟_أأأ خلاص خيطو ليها الجرح ومشت هي وامها البيت_احنا زاتو حنطلع بعد دا الدكتور قال لتين ما عندها اي حاجة الحمدلله_الحمدلله والله ربنا قدر ولطف_ما تفتكري انا مشيت ليك العملتي دا لا انا عندي معاك حساب بعدين_بس يا حضرة اللواء بيان ما..._ما تناديني حضرة اللواء خلاص دا كان زمان هسي بقيت حسان بس_برضو اسمح لي اقول ليك حضرة اللواء انا شاورت أهلي في الموضوع وهم ما عندهم مشكلة اني اتزوج بيان باقي انتو بس تفتحو الموضوع مع امها وابوها وبعدها إن شاء الله نجي نتقدم رسمي ولا كيف؟؟_للوقت داك ما ألقاك حايم معاها مفهوم؟؟_حاضر أوعدك اني ما اقرب عليها تاني#في جانب لتين وشلتها....كانو متلمين حوالين سريرها وبتذكرو في أحداث الموكب ، عمار قال ليهم:وحيات الله انا وزنت ليك شرطي بحجر جاهو في جبتو سمعتو ليك بسب لي سببب الكلب الباطلرئبال قال ليهو: يا مان وقت افترقنا داك انا وسديم وسيف وبراءة زنقونا ليك في زقاق وجو بالين علي بدفار الشغب اقسم بالله ما حسينا بنفسنا واحنا جارين لغايت ما لقينا ترس فاضي كدا وقفنا وراهو وجونا ناس وبقينا نفلقهم سوا والله جرو زي النسوان وفي واحد وقع وهو بحاول يركب في الدفار واصحابو خلوهو اقسم عاين كدا لقانا عملنا عملنا دايرة حواليهو بقى يرجف وقال لينا سلمية يا شباب قلنا لي سلمية السمك وحياة الله الزول دا خلينا جرى بالملابس الداخلية بس ياخ كان يوم من الموت واللهلتين قالت ليهو: يا ريت لو نعيد اليوم دا تاني غايتو الجرى الجريتو دا أظن فقدني 10 كيلو عديلإيثار: المواكب دي بقدر ما هي مخيفة هي جميلة شديد برضوفؤاد: غايتو انا اثناء ما جاري طقشت لي ولد كان عامل لايف في الفيس تلفونو دا اتدردق 3 قلبات في الواطة والعجيبة انو شغال كويس ما جاتو اي شئ غير الأستيكر أتشقى اعتذرت ليهو ومشيت وتاني لاقيتو واعتذرت ليهو قال لي بزهج ما خلاص سامحناك قلنا تاني عاين قدامك كويس وانت جاري_احرجك عديل والله ههههههبعدها الدكتور جاء وشاف لتين قال ممكن تطلعو بعد دا خلاص ما عليها إلا العافية ، اللواء جاب ليهو عربية كبيرة ورجع اي واحد بيتهم ، في البيت ليث وليان بس الكانو قاعدين لمن ناس لتين رجعو البيت ليث قال ليها:ناس الثورة حمدلله علي السلامة يااخ_الله يسلمك بس انت لييه ما مرقت الموكب شايفة ناس كتار من فصلك حتى سالم اخو سيف مررق انت وين من دا كلو_انا زاتي مرقت بس وقت كتمت داك من الخوف لقيت نفسي جاري وجاري لما قربت اصل البيت زاتو_هههههههه جبان ما كان تثبت جريت لييه؟؟_الهروب نصف الشجاعة وبعدين الحرب كر وفر وقع ليك؟_عذر اقبح من الذنب والله انا ماشي انوم مافي زول يصحيني حتى لو جاء موكب ماشي بجنب باب بيتنا مفهوم؟؟بليل بعد العشاء كدا وسن اتصلت لبيان وقالت ليها: باركي لي خلاص اتفقنا علي اي شئ باقي توقيع العقد بس وحيتم الاسبوع الجاي إن شاء الله_ايووووو يووووووووي فرحت ليك شديد والله _الفضل يعود ليك انتي بعد ربنا سبحانه وتعالي_انتي موهوبة يا وسن والله إن شاء الله تنجحي في حياتك وتلقى مراضك يا الله_اللهم اميين وإياك كمان إن شاء الله شكلك نعسانة شديد ظاهر في صوتك_اي والله تعبانة عايزة انوم بدري زي الدجاج الليلة ههههههه_يا زولة نوم العوافي إن شاء الله تصبحي ع خير_ تلاقي الخير إن شاء الله ــــــــــــــــــــــــــــــــــــــــــــــــــــــــــــــــ#تاني يوم.....إسراء كانت قاعدة براها متكومة علي نفسها في المستشفي ، مرت عمها سلطان أختفت حتى بدون ما تكلمها وهي ما ركزت معاها كتير لانو أصلا ما متوقعة منهم حاجة ، فجأة حست بزول بقومها ويحضنها عليهو ، وكانها كانت محتاجة للحضن دا اطلقت عنانها للبكاء وهي بتقول: خ خ خالتو في غيبوبة ما معروف تصحى منها متين وأ أحمد طلع ببيع مخدرات وسجنوهو انا بقيت وحيدة تماما يا بيان في لحظة واحدة اكتر اتنين بحبهم راحو مني_هششش خلاص بطلي بكى انتى ما وحيدة احنا معاك وما حنخليك براك واللهيمنى جات قالت ليها: اعفى لي والله يا سرو انا ما كنت عارفة إلا بيان كلمتنى وطوالي قلت ليها نجى ليك هنا_أنا زاتي كلمنى سامر اتذكرتيهو؟_ايوا متذكراهو امبارح جاء زارنا كتر خيرو ما قصر سامر قال ليها: أمبارح انا بعد طلعت منكم مشيت لأحمد في السجن انتي لازم تعرفي الحقيقة أحمد عمل كل دا عشانكم أنتو وحكى ليها كل حاجة من طق طق للسلام عليكمإسراء بقت تبكي وتقول: ما عارفة عمي سلطان دا لييه دايما قاعد يضرنا كدا حسبي الله ونعم الوكيل فيهو خليتو لي الله هو البجي بينا حقنا منوبيان مسحت ليها دموعها وقالت ليها:إسراء انتي من امبارح هنا أرجعي البيت استحمي وغيري واكلي ليك حاجة وتعالي هنا تاني_لالا عايزة اقعد هنا جمب خالتو بس خليني_خالتك محتاجة لدعواتك اكتر من قعادك البلا فايدة دا ارجعي بيتكم اخدي راحة وصلي ليك ركعتين وأدعى ليها_طبب بس عايزة امشي اشوفها من الشباك قبل ما امشي_أرح انا زاتي بمشي معاكمشو شافوها كانت راقدة في السرير وجهاز الأكسجين مركب فيها ، فاطمة ما قدرت تستحمل انو الولد الربتو بي يدها في النهاية يطلع ببيع مخدرات عشان يأكلهم من مال حرام ، يا جماعة راعو لتربية اهلكم وما تضيعو تعبهم في لحظات ، حق الحرام سمح وسككو كتيرة بس زي ما انت بتدمر زول عشان مصلحتك ربنا حيبتليك في اقرب زول ليك حتى لو ما عندو زنب ، وقروشك الجبتها بحق الحرام دا لو بقت قدر الجبال ما حتفيدك بحاجة في مصيبتك فأبعدو عن درب الحرام عشان بعدين العواقب ما تكون وخيمة!!_يعنى خلاص قررتو تمشو بيت ناس عمكم وتخلونا؟؟_لا يا رئبال حنرجع ليكم بعد العيد لما المدارس تفتح إن شاء الله_مالكم مستعجلين كدا هي الإجازة ياداب بدت الليلة ما كان تقعدو يومين وتمشو بعد داك_ما حنك يا زول لو اشتقت لينا تعال لينا في ايو وقت انت وسمسمخلود: حافقدك والله يا وسونة ما كان تعدي عدتك هنا معاي وبعد داك تمشي بيت عمك_كلو واحد والله يا مرت خالي ما مشكلة_سامع صوت بوري شكلو السواق الرسلو عمو سمير جاء_اي يلا خلاص بعد داسديم ودعهم كلهم ولمن جاء لرئبال حضنو وقال ليهو: شوف الشافع دا بالله عاينو مادي بوزو كيف ضحكتني والله التقول ماشي مهمة انتحارية انا_انت يا نجاو ما تستاهل الزول يزعل عليك زاتو قد يلا_ههههههه يلا مع السلامة ودعتكم الله خلود قالت ليهم: خلو بالكم من نفسكم يا اولاد يلا في امان اللهرئبال طوالي مشى اوضتو وفتح لابتوبو وركب سماعاتو وبقى يحضر ليهو في فلم#في مكان مجهول...._بصصص يا سلطان الراقل الليسمو سامر دا لازم نخلص عليه بسرعة هو الان اصبح بشكل خطير كبير علينا وميمون لو عرفشي انو هو لسع عايش وفان دام ما أتلووش حينفخنا احنا دول_منتهى اعتبرو مات من هسي يا بنيامين وبالنسبة لمرتي وعيالي انا عايز اسفرهم برا البلد لانو المكان القاعدين فيهو هسى ما امان_أعمل اللي انت عايزو بعد ما تخلصشي المهمة دي لو عايز تسافر سافر انت كمان هااا ائلت إيييه؟؟_كلام جميل جدا#علي لسان بيان....بعد ما رجعنا مع إسراء البيت وهي أرتاحت شوية شالت ليها كم غيار ليها ولي خالتها وتاني رجعنا المستشفي وفضلنا قاعدين معاها اليوم كلو لحدى بليل حتى رجعت البيت كمتتعبانة وجعانة ، أكلت وغيرت وخلاص عايزة انوم امي جات سألتني عن إسراء ووضع خالتها قلت ليها ماف جديد من خالتها وإسراء متأثرة شديد ، زعلت عليهم وقالت حتزورهم في اقرب وقت ، بعدها قالت لي انو بكرا عاملين فطور للعرسان في توتي علشان حيسافرو بعد بكرة أسمرة يقضو فيها شهر العسل وبهناك حيمشو قطر طوالي ويقعدو في بيتهم ، قلت ليها تمام يما بس هسي مرهقة والله عايزة انوم ، طفت لي الأنوار وقالت وهي بتقفل الباب تصبحى علي خير ، اتقلبت بالجهة التانية وقلت ليها وانتي من اهلو إن شاء الله بعدها نمت طوالي وصحيت الصباح عملت روتيني اليومي وبعد ساعة كدا بديت اتجهز للطلعة طبعا الحاج والحاجة ما حيمشو معاي لأنهم معزومين سماية بت قريب أبوي ،المهم سقت عربيتي في الطريق اتصلت على يمنى وطلعت ما جاية عندها دوام في العيادة من الصباح ، بالرغم من انو الساعة ياداب ماشة لي عشرة صباحا لكن شارع الجامعة كان زحمة مبالغة فأضطريت اكسر يمين وامشي بشارع النيل كان أخف شوية وقبل ما أصل كبري توتي طلعت وركبت الكبرى ، المهم وصلت توتي بركنت عربيتي ونزلت البيتش ، بقت بفتش علي ناسي وين لمحتهم من بعيد بفرشو في الملايات مشيت عليهم سلمت وقعدت أرتب معاهم طبعا جايبين شواية وضبحو خروف كامل ،قعدت اتونس شوية مع سمر مرت لؤي وقلت ليها: اها لقيتنا ولدنا كيف؟؟ ، ضحكت وقالت لي:ولدكم منو الزيو هو ، لؤي قال ليها: الله اكبر إيه الحلاوة دي ، خلتيهم بشغلوها لبعض ومشيت للتين قلت ليها: هااا الجميل أخبارو شنو؟؟_تمام التمام والله طبعا اجزو لينا خلاص_اي قبيل شفت الخبر في الفيس ما بطال اصلا كدا كدا كنتو حتاجزو للعيد الاسبوع الجاي_اي والله بيان شوفي الجاء منو؟عاينت وراي لقيت سامر قلت ليها: ودا الجابو شنو ؟_بكون لؤي عزمو او ابوي عزمو هي صحي حتتزوجو؟_اخوي حسان حكى ليكم ولا شنو؟؟_برري سمعت بي اضنيني ديل في المستشفي وقت ابوي شاكلكم_وااي يا لتين حتى وانتي في اسوء حالاتك بتحبي الشمار_أي أي يااخ لازم أعرف الشمار حار اهم شئفجأة سامر جاء سلم علي لتين وبقى يتكلم معاها وسفهنى قلت ليهو: علي فكرة السلام سنة لا ريدة لا محنة_نسيتي اني وعدت اخوك اني ما أقعد معاك لحدي ما اخطو خطوة جادة_ايوا بس ما لدرجة تسفهنى وما تسلم علي وهو زاتو ما جاء اصلا قال مرهق شديد ونفسو ينوم بس_خلاص اسف يا ستي السلام عليكم او بيان كيفك تمام_..........._ع الأقل ردي السلام طيب يا بيان _وعليكم السلام ورحمة الله تعالي وبركاته وبنى الله لك قصرا في الجنة وزادك هدى ورحمة وخيرا وإحسانا أرتحت كدا؟_شاطرة يا طالبة اقعدي يلا_هاهاها ظريفمشيت منو وسمعتو بقول للتين وهو بضحك: دي مالها هسي زعلت كدا ، ما اشتغلت بيهو ولقيت الشباب قاعدين يشوو أصحاب لؤي وأولاد اهل سمر ، قلت ليهم: عايزة اشوي معاكم عليكم، واحد من اصحاب لؤي قال لي: لا خليهو لينا احنا حنزبطو ، قلت ليهم: طيب القطعة دي دخلت نفسي طلعوها لي ، الولد ضحك وملا لي السيخ واداني ليهو وقال:عارفك بعد ما تاكلي القطعة تاني حتقولي دايرة انا الشوي بتاعي لا يقاومضقت قطعة وقلت ليهو بتلذذ: الله بالجد اللحم والبهارات والملح مزبوطات تسلم يدك ياخ_احم احم شكرا_لا بالجد ياخ والله عجبتنيعاين لي شديد وقال:أعجبتي في مهارة الشوي بتاعتي ولا حاجة تانية؟_في مهارة الشوي بتاعتك ما تفهم غلط يا زول_يا ريتو لو فهمي الغلط دا كان صح_هااا قلت شنو؟؟_لالا ولا حاجة#علي لسان سامر.....لمن شفت بيان واقفة مع ناس غريبين وكمان بتتونس معاهم وبتضحك اتصايقت شديد وبصراحة شميت بيان شمم ما حسيت بنفسى إلا وأنا جاري من يدها وسايقها معاي ، حاولت تفكى يدها منى بي كنت ماسكها قوي قالت لي بغيظ:سامر انت مودينى وين ومش قلت وعدت اخوي انك ما حتقرب علي_أنا ما ناسي وعدي وفكرت الف مرة قبل ما اعمل بس يا بيان انتي قاعدة تستفزيني كيف بتقيفي كدا مع شباب غريبين وتتضاحكى معاهم ما راعيتي لمشاعري ولا احساسي شنو وانا بشوفك واقفة مع رجال غرباء_ديل ما غريبين اصحاب اخوي واهل مرت اخوي ما نهاية الدنيا يعني لو وقفت اتكلمت معاهم كنت عايزة اشوي بس ما خلوني وادوني سيخ واكلتو وكنت بشكر في الولد الشوا اللحم لانو ظبطها والله ثانيا دا برضو ما مبرر انك تجي وتسوقني قدامهم بالطريقة هسى حيكونو قالو علينا شنو؟_خليهم يقولو العايزنو ما بهمنى غيرك انت وبس_سامر ما ملاحظ أنك بديت تتمادى شوية يعنى بقت تتحكم فيني وتمنعني من حاجات ما ليك حق تدخل فيها افهم ياااخي انا لسع ما بقيت مرتك_بيان انا بحبك وبغير عليك غصبا عني ياخ_وأنا كمان بحبك وبغير عليك بس ما قاعدة اتجاوز حدودي معاك_طيب انا أسف_هه أسف انت ما بتعرف غير الكلمة دي أسفك دا لمو عليك ما محتاجاهودفرتنى ومشت طوالى وأنا بقيت بفكر اصالحها كيف بي فجاة قلبى دق شديد وحسيت أني مراقب ، اتلفت حواليني كان الوضع طبيعي ومافي زول مركز معاي اي زول في عالمو الخاص ،ضحكت علي نفسى وقلت: شكلي بديت أهلوس دا منو الحيراقبنى دا ويضيع وقتو ، بعدها رجعت للشباب عادي وبقيت أشوى وأتونس معاهم ولا كانو في شئ حصل#علي لسان بيان....بعد ما اتشاكلت مع سامر ومشيت منو حسيت اني مخنوقة وبقيت ماشة لحدي ما قعدت في الرملة وبقيت سرحانة في البحر ، في بت كانت لابسة نظارات وماسكة لابتوبها لاحظت لي مهمومة فقامت نادتني وقالت لي: مافي شئ في الدنيا مستاهل الزعل يا اختي افرحي بحياتك وانبسطي اعملي لأخرتك وحسني علاقتك مع ربك وصدقيني تاني اي مشكلة حتهون وحتتجاوزيها بقناعة بإذن اللهقلت ليها: شكرا ليك والله كنت محتاجة اسمع الكلام دا شديد_طيب تعالي اقعدي جنبي كدي عايز أسألك في حاجةقعدت جمبها وقلت ليها: طوالى اتفضلي_انتي اسمك منو؟_بيان_الله اسم حلو انا إسراء_إتشرفت بمعرفتك يا إسراء-الشرف لي والله اممم طبعت انا دكتورة وكاتبة روايات كنت عايزة اخد رأيك في المقدمة دي هل هي زابطةأنا قريتهت وقلت ليها: رهيبة شديد والله عجبتنى_تسلمي ورأيك فى الاسم شنوو؟؟من خلال المقدمة القريتها ظاهر انو روايتك بتتكلم عن الثورة فالأسم الصراحة كويس لانو ثورتنا فعلا بدت من طلاب مدرسة مراهقين طلعو مظاهرة طلابية والشعب بعدها انتفض احلى أنتفاضة فأنا شايفة انو اسم #مراهقونولكن مناسب جدا_انا زاتي قلت كدا والله علي فكرة انتي الوحيدة السمحت ليها تشوف روايتي قبل ما أخلص حتى راجلي أبو عيالي ما خليتو يشوفها_ ماشاء الله انتي متزوجة وعندك عيال كمان ظاهر عليك صغيرة شكلك عرستي بدري_هههههه اي والله عرست عمرى 18 سنة شايفة اللابس تيشيرت اسود داك ومعاهو الود والبت الصغار البلعبو جوة الموية ديل بس هم عيالي وابوهم_ماشاء الله تبارك الله عيني باردة الله يخليهم ليك ويحفظهم من الحسد انتو عيلة حلوة شديد _تسلمي حبيبتي طبعا انا كان قصة زواجي مع د.رائد زوجي زاتها غريبة لدرجة هو أقنعنى انو أعملها رواية وفعلا عدلتها وغيرت الاسامي عشان خصوصيتنا وكدا والحمدلله نجحت يعني_لو ما فيها أزعاج ممكن تحكى لي القصة_من عيوني القصة انو في بت عايشة مع اهلها في امانة الله في يوم امهم وابوها كانو بايتين برا وهي قاعدة مع اخوانها وفي نفس اليوم بليل جاهم حرامي وهي مشت تشرب موية فقام قبضها وهددها وفي الاخير طعنها وجرى بعد ما سرق ليهو اوراق ومستندات بتخص ابوها ويلا البت السلسلة الفقرية حقتها اتضررت شوية وجاها شلل وبقت ما بتمشي المهم ابوها حيجيب ليها دكتور معاها و حيحبو بعض وفي النهاية حيتزوجو وحيطلع الحرامي دا اخو الدكتور الما شرعي (نعم يا سيادة إنها إسراء زاتها الفي روايتي الأولى أوكسجيني)_واو القصة حلوة شديد بس سؤال بسيط هل انت حصل ليك الحادث دا فعلا ولا دا من خيالك_اسفة ما حأقدر اجاوب علي السؤال دا_ طيب ما مشكلة يا ستي براحتك لكن لازم تعرفي اني صحفية ويوما ما حاعمل معاك مقابلة وساعتها ماف مهرب حتحكي لي أي حاجة ومتشوقة اعرف قصة عيونك الخضر ديل_ههههه طيب لمن الزمن داك حيجي حاحكي ليك كل حاجة_بالجد شكرا ليك يا سرو لانك فتحتي لي قلبك بالجد بسطتيني ونسيتنيي همومي والله ممنونة ليك شديد_ربنا كان عايز يجبر بخاطرك فرسلك لي_ فعلا والله يلا انا ما اعطلك خليك مركزة مع كتابتك ولنا لقاء إن شاء الله_دقيقة يا بيان انادي ليك العيال وابوهم تسلمي عليهم_أعرفك دا رائد زوجي وديل أولادي التؤام ليث ولجين ودي بيان صحبتىأنا سلمت علي راجلها وكان ظريف معاي وبقيت اجضم اولادها وأبوسهم يخخ حلوين حلا بعدهت أستأذنت منهم ومشيت لقيتهم خلصو شوى وبدو يعبو الأكل خلاص_انتي يا إسراء كلو يوم عندك صحبة جديدة ما ممكن أي زول يتكلم معاك كلمتين تصاحبيهو ما عايزة تبطلي العادة دي انتي؟_رائد الموضوع ما خطير البت شفتها زعلانة قلت أفرق عليها والكلام جاب الكلام واخدت رايها في حاجة من الرواية وبس_و بس!! ما علي الكلام دا يا إسراء انا عارفك بتكوني حكيتي ليها عن قصة زواجنا ووريتها برواية اكسجيني الكتبتيها وتجي تقولي لي بس_البت طلعت صحفية وقالت لي يوم حاعمل معاك مقابلة_لا حول ولا قوة إلا بالله غايتو عندي مرة الحمدلله بس_نعم يا أستاذ أنت مفروض تحمد الله الف مره في اليوم أنو عندك مرة عظيمة زيي_خفي علينا شوية يا اجاثا كريستي _هاهاها تعالو كدي اقول ليكم دا يا بطاتي ابوكم دا ما عندو موضوع ساي وغير يلعب معاكم ما بسوي شئقال ليها وهو برفع بتو لجين ويبوسها:خلصتي كتابة؟؟_تقريبا كدا بس عايزة أوري توينزاتي ديل حاجة كدانزل لجين في الرملة جمب امها ورفع ليث وقال ليهو: يا ترى ماما عايز توريكم شنو هااا؟_أكيد عايزة تورينا معلومة جديدة احنا ما عارفنها بس انا عايز العب ياخ ، همس ليهو وقال بشقاوة:نسمع المعلومة لو شينة نجرى منها ونمشي نلعب أتفقنا ؟_علي فكرة انا سامعاكم يا رائد يعني ما طرشاء ولو ما حابين تستفيدو من المعلومة الحاقولها ليكم سوق عيالك وامشى تمو لعبكم وخلونى أكتب بالله _وي ماما زعلت حنعمل شنو يا حبيب بابا هسي ؟؟ليث ابتسم ليهو ونزل منو ومشى اتشعبط في رقبة إسراء وقال ليها: سوستى انا اسف شالت البشكير وبقت تنشف ليهو شعرو وتقول: وااي انا الأسم دا قاعد يفور لي أعصابي اقعدو في الارض واسمعو الحاقولو ليكم كدا انت زاتك اترزع يا رائد واستفيد معاهمرائد قعد وشال البشكير وبقى ينشف شعرو وقال ليها: حاضر يا ماما سوسة دقيقة بس_استغفر الله العظيم شوفو يا حبايبي انتو عارفين انو الحكومة الشينة الكانت حاكم بلدنا سقطت صح؟؟ يلا هم كانو حازفين جزء من قصيدة نشيد العلم وانا حاقول ليكم القصيدة كاملة اسمعوها حلوة شديد والله البداية حقتها أحلى من نحن جند الله جند الوطن ، يمكن في عهدهم الكلام الفي بداية القصيدة ما كان حاصل فحزفوهو عشان لقوهو ما جاي معاهم لكن بعد الثورة حصل اكتر من كدا يلا القصيدة بتقول:نحن أسود الغاب ، أبناء الحروب لا نهاب الموت ، أو نخشي الخطوب نحفظ السودان ، في هذه القلوب نفتديه من شمال أو جنوب بالكفاح المر ، بالعزم اليقين وقلوب من حديد لا تلين نهزم الشر ، ونجزي الغاصبين ندفع الردى ، نصد من عادى نحن جند الله ، جند الوطن اعي لفداء ، لن نخن نتحدى الموت ، عند المحن نشتري المجد ، بأغلى ثمن هذه الأرض لنا ، فليعش سوداننا علما بين الأمم ، يا بني السودان هذا رمزكم يحمل العبئ ، ويحمي أرضكملجين وليث بقو يصفقو ليها ويقولو: الله حلوة شديد القصيدة دي يا ماما ، رائد غمز لإسراء وقال لعيالو : بس اكيد ما احلى من امكم أم عيون خضر ديل " يا ربااااه ويال جمال تلك العينين التي تملكينها يا إسراء ♡ "ـــــــــــــــــــــــــــــــــــــــــــــــــــــــــــــــــــــــــــــ#علي لسان سامر....بعد ما فطرنا وشربنا الشاي قررنا انو نخش البحر ما نسبح لا دخلنا وبقينا نتعاور ونرشرش بعض ونتصور سيلفيهات جوة البحر حتى العرسان كان ماسكين يدين بعض ودخلو بس ما مشو لحدي النص زينا كانو في الطرف ، بيان اثناء ما بترشرش سهى ولتين وتضحك معاهم كدا راسها لفى وكانت عايزة تقع انا طوالي مسكتها وقلت ليها:أعملي حسابك كنتي حتقعي ، حمرت لي وقالت: ما عندك شغلة بي إتفكت مني والمرة دي وقعت جد جد في الموية ، انا طلعتها بسرعة وكانت بتقحقح شديد شكلها إتشرقت ، كلهم بقو يسألوها مالك والحاصل عليك شنو؟؟ ، قالت ليهم: راسي لافي وما قادرة أثبت في الموية ، سهى قالت لي:شكلو دا دوار البحر خلى سامر يطلعك وامشي ارتاحي حبة جنب نادية وام سمر ، بيان عاينت لي وقالت:أرح ، انا ما صدقت طوالي مسكتها اول ما مشينا حبة كدا قلت ليها: قولي لي انك ما زعلانة مني وإلا حافكك وتقعي في الموية ، قالت لي بخوف: لا والنبي يا سامر الله يخليك ما تفكنى _طيب قولي انك ما زعلانة مني_اووووف خلاص ما زعلانة منك غياظ دا_انا غياظ آ بيان؟_ وأهبل ومتخلف كمان_بس برضو بحبككككك_واااااي منك_قلتى شنو؟؟_لا ولا حاجة كنت عايزة اقول ليك .....بس فجأة علت صرخة بيان وهي بتقول:سااااااامر لاااااااااااااااابس كان فات الأوان خلاص وأستقرت الرصاصة بين عيون سامر ووقع في الموية بدون حراك ، كان سلطان هو القنص سامر وبسرعة أتبخر من المكان العالي الكان مدسي فوقو طلع تلفونو وقال كلمتين ما زادهم " العملية تمت " ، الناس بقو يصرخو ويجرو من المنظر المخيف الكان قدامهم، الموية كلها دم وبيان البتفرفر جوة الموية وما قادرة تطلع ، حسان كان جاء ياداب لمن شاف المشهد دا بقى يرجف كلو وما قدر يتحرك ، في اولاد سبحو بسرعة وطلعو بيان وجثة سامر ، والباقين جو طالعين من الموية وبقو يهدو في بيان البتصرخ بأعلي حسها وتقول: واااااي قتلوه والله قتلوه قدام عيوني أنا شفت سامر وهو بتجيهو الرصاصة ويموت قدامي يا الله لي كدا بس قتلت حبيبي وحرمتني منو لييه ما خليتني اموت بدالو يا ريت لو كان مت أنا اهون من اني أشوفو هو بموت قدامي يا رب لييييييييييه كدا بس هو وعدني انو حنتزوج بعد ما تبقى مدنية وفات مشى خلاني يا جماعة انا أعيش كيف تاني بدونو ساااامر رد علي انا بيان ما تمشي تخليني عليك الله يا سامر ، حسان جاء بالعافية و رجلينو شايلاهو بالعافية ما كان متوقع انو يجي ويلقى سامر مشى بدون ما يودعو اتذكر اخر كلام بينهم لمن شاكلو وهو وعدو بأنو حيبعد من بيان بس ما كان متخيل انو حيبعد للابد ، حضن جسم سامر وبقى يبكي باعلي صوتو ، ذكرياتو مع سامر كلها بقى شايفها قدامو ، أشتاق لضحكتو و طريقة كلامو وسيادة اللواء الكان بقولها ليهو طوالي ، يا ربي هو كيف حيقدر يزف خبر وفاتو لأمو واخواتو اذا هو زات نفسو ما مصدق انو سامر مات خلاص وتاني ما حيرجع ، في لحظة واحدة بس اتغير كل شئ سامر الكان هسي موجود معاهم وبضحك عادي مشى من الدنيا بسرعة من غير ما حتى يلحقو يودعوهو ويشبعو منو ، كلهم كانو شايفين سامر راقد في سكات علي الرمال الذهبية بس بيان كانت شايفاهو في نص البحر بضحك وبقول ليها: تعالي يا بيان بقت مدنية خلاص الليلة عرسنا حيكون في الجنة مع الشهداء يلا تعالي فوق ،بيان فكت شعرها وجرت حفيانة علي البحر زي المجنونة وقالت ليهو: انا جاياك يا حبيبي .مراهقون ولكن كان لنا شرف بداية الوقوف ضد الظلم و الصراخ ب لا .مراهقون ولكن أشعلنا فتيل أعظم ثورة علي الأطلاق عندما أحرقنا دار المؤتمر البطني في عطبرة وكانت تلك بداية النهاية .مراهقون ولكن كتبنا حريتنا بدماء شهادائنا دودو وكاكا ومهند .مراهقون ولكن لا لم نهاب الموت صغارا .مراهقون ولكن سنظل الجيل الراكب رأس حتي تتحقق مطالبنا .مراهقون ولكن صنعنا ثورة سلمية ناجحة ستخلد في التاريخ وستتناقلها الأجيال للأبد♡ ." لكل بداية نهاية ولكل قصة حكاية ، وأخر الحكاية حنعمر الخراب والسنبلة تهزم أسراب الجراد ، القومة للسودان ، والمجد للشعب الأسمر دائما وآبدا " =إنتهت بحمد الله= السبت 2مايو 2020-إهـداء إلي من مهرو أرواحهم في سبيل حرية هذا الوطن♡-[ تابعو صفحة روايات بقلم أحمد محمدنور عشان يصلكم كل جديد الروايات ]مـع تحياتي:أحمد محمدنور/øřbē
