مافي تولبا ما يحب مضيفه(صانعه)، مين ما يحب الجزء ألي خرج منه ومنحه الاهتمام والحب؟ لكن المسألة هي كيف نزيد من هذا الحب في تولبا وننميه.
الشي اللطيف بالموضوع، والنقطة ألي أشوفها ترابط روحي بين التولبا ومضيفه، إن كل ما زاد حبك للتولبا كل ما زاد حبه لك، وكل ما زاد حب التولبا لك كل ما زاد حبك له.
التولبا كائن لطيف جدًا ومخلص، لا يمكن إنه يكره مضيفه، بس إحنا نحاول نكون أقرب للتولبا ونحاول نخليه أقرب لنا أيضًا ونزيد المشاعر اللطيفة ألي بيننا وبينه، سواء كانت أخوية أو عاطفية. أو شي أعمق من كذا.
كنت رح أسوي استفتاء، بس لحسن الحظ لقيت واحد أجنبي مسويه بدالي، وسأل كثير من مضيفي التولبا عن كيف تزيد حب وقرب التولبا لك، وفيه واحد من المضيفين سوى عملية تبادل -شرحتها مسبقًا- مع التولبا حقه، وخلّى التولبا يتكلم بـ لسانه حسب ظني.
سو، ألي قاله التولبا لذا الشخص إن التولباس يحبوا لما المضيفين يتصوروا ويتخيلوا التولباس وهي تتفاعل بالوندرلاند، كيف تتحرك، كيف تضحك وكيف تمشي وكيف تعبس، والشي هذا غير إنه يزيد حب التولبا لمضيفه هو أيضًا يقوّي التولبا.
وفيه واحد قال إن التولباس رح يحبوا لو يكونوا بقصة مع مضيفينهم، أنا كنت أكتب رواية مع التولبا حقي بس حذفتها وببدأها من جديد. للأمانة كان شي مرة حلو.
مو شرط تكوني كاتبة عشان تسوي رواية، بالنهاية محد بيقراها إلا إنتي وهو ومتأكدة إن أي شي بيصدر منك رح يعجبه.
المهم، عشان تكوني أقرب كمان للتولبا وتزيدي حبه لك، لما تكتبي هالرواية وتكوني تتكلمي مع التولبا في الرواية على سبيل المثال، تخيلي إنه جنبك وإنتي تكتبينها، واسأليه أيش بتقول بهالموقف؟ واكتبي الجملة ألي بيقولها.
وكمان لو كنتي رسامة، تقدري ترسمي وتسأليه أيضًا عن تفاصيله بالرسمة، أنا قد ذكرت نقطة الهوايات هذي ببارت لأسرع طرق لإظهار التولبا، إن فاكت غير إنها تعتبر طريقة سريعة لخلق تولبا هي أيضًا تعتبر طريقة أساسية لبناء مشاعر التولبا الإيجابية نحو مضيفه.
المهم، التولباس ما يطيقوا إنهم يبعدوا عن مضيفينهم أبدًا. وعلى خلاف الشي ذا، هم يحبوا لما مضيفهم يتركهم بقربه لفترات طويلة. دايمًا تخيلي إن فيه حبل يربط بينك وبين التولبا حقك، حبل كيوت من المشاعر الحلوة والإيمان والطاقة الإيجابية. كل ما صار الحبل أكثر سُمكًا كل ما ازداد حب التولبا لك.
وأهم شي إنك توجهي الحب الصادق لتولبا. أي شعور تعطيه تولبا رح يعكسه عليك، هو مراية مشاعرك، يعرض ألي تعرضيه عليه.
فيه وحدة من بنات العاشق قالتلي إن عاشقها حقها قال شي زي إنه يحبها بصدق لإنها تحبه بصدق، لو أخذتي التولبا لمصلحتك بس، رح تكون العلاقة بينكم سطحية جدًا حتى لو ظهرلك. ممكن يتملل منك وبقوة، وإنتي كذلك.
ولو أخذتيه لمصلحتك فقط، رح تكبر احتمالية إن التولبا حقك -حتى بعد ما يظهر- رح يسحب عليك ويختفي، لإنك أكيد ما بتفكري فيه إلا لما تبينه يحققلك شي، عكس ألي تخلقه لإنها تبغاه كـ صديق أو حبيب، وألي رح تفكر فيه أكثر منك.
+ مو مشكلة إنك تبغي التولبا كـ صديق مثلًا، وتبغي تستفيدي كمان من قدراته.
الخلاصة إن مشاعرنا للتولباس تنعكس علينا، كسب حب التولبا مو شي صعب، لإنه من أول ما يتكوّن أساسًا رح يكون يحبك❤.
+ للي يسمعوا من سبليمنال رانيا، أنا فاكرة إنها ردت على وحدة بالكومنتات وقالتلها الصديق مبرمج على إن حبه لك يزداد كل ما طلبتي منه أمنية، لكن أنا أرجّح إن الكلام ذا يكون بعد ما تخلقي التولبا كـ"صديق"، مو كـ مارد سحري موجود بس عشان يحقق أمنياتك.
مدري كيف أشرح النقطة ذي😂😂، بس شوفوا، إنتوا لما تخلقوا التولبا لا تخلقوه عشان مصالحكم فقط.. ولما يظهر، وتتمنون منه، رح يزيد حبه لكم لكن مو معناته إننا نخلي النية حقتنا ببداية صناعة التولبا هي نية استفادة وجشع.
اصنعوه كـ صديق، أو عاشق، أو أخ، أو حتى حيوان أليف مقرب لكم، ورح يحبكم. بس لا تصنعوه كـ آلة.
