#خفقة_قلب
الجزء الحادي والعشرون
#رمضان_بين_العبادة_ومعوقات_الحياة
=بصي بأى لازم تشوفيلي حل 😭😭
رمضان شهر العبادة ،
إزاي بأى هعبد ربنا وسط العزومات والإمتحانات والمذاكرة والحاجات دي كلها😵😵😵
-تاني يابنتي 🤦😂😂
أنا نفسي أعرف ليه بتحصري العبادة في قراءة قرآن وصلاة وبس😂
فاكرة لما قلنا العبادة هي إسم جامع لكل ما يحبه الله ويرضاه من الأقوال والأفعال الظاهرة والباطنة 😊
=أيوا ايوا فاكرة 😍
أنا بحاول على أد ما قدر إني أحول حياتي لعبادة 😍
-أيوا كده هو ده الكلام💪🏻
=بس رمضان مختلف أكيد 😑
-ماتخليش الشيطان يصورلك انك لو مختمتيش كل ٣ ايام ختمة ومفضلتيش كل يوم تصلي طول الليل لحد الفجر وطحنتي نفسك في العبادة يبأى كده خلاص رمضان ضاع😑
ايوا رمضان مختلف وهو موسم للطاعة ولازم نستغله على أد ما نقدر 👌
بس في نفس الوقت عندك ظروف خارجة عن إرادتك فهنعمل إيه بأى نقعد نندب حظنا😑
بالعكس بالراحة على نفسك 🤗
عندك عبادتين من أعظم العبادات أجرا👌
وهما الذكر ، والنية الصالحة في كل عمل 🤗
شوفي رسول الله صلى الله عليه وسلم بيقول إيه عن الذكر:
" ألا أنبئكم بخير أعمالكم وأرضاها عند مليككم ,
وأرفعها في درجاتكم ,وخير لكم من إنفاق الذهب والورق ,
وخير لكم من أن تلقوا عدوكم , فتضربوا أعناقهم , ويضربوا أعناقكم؟
قالوا: بلى , قال: " ذكر الله تعالى "
والنية زي ماتكلمنا عليها قبل خلي القاعدة دي منهجك:
عادة+نية صالحة =عبادة😊
=يعني أذكر ربنا وأنوي بس 🤔
-الذكر والنية هيبأى بجانب أعمال تانية 😉
=إزاي وأنا يومي هيبأى ضايع أصلا☹
-بصي بالنسبة ليومك :
مش هتعرفي تصلي الفروض ال٥ والسنن بتاعتها 🤔
مش هتعرفي تقرإي بعد كل صلاة ربعين حوالي ١٠ د لربع ساعة وبكده هتختمي القرآن مرة على الأقل🤔
مش هتعرفي تقولي اذكار (استغفار-تسبيح -تهليل...)
وإنتي مريحة عالسرير أو وإنتي ماشية في الطريق أو وإنتي بتساعدي في تحضير الفطار وبتحتسبي نية افطار الصائم😚
مش هتعرفي تحطي نية لكل عادة بتعمليها نوم.. اكل.. شرب ...ترويق ..غسل مواعين...وبكده تحوليها لعمل صالح🤔
حتى لو معرفتيش تصلي التراويح،
مش هتعرفي تصلي ركعتين ب١٠ ايات او ١٠٠ آية مع الشفع والوتر قبل ما تنامي وبكده اخدتي اجر قيام ليلة🤔
مش هتعرفي تمنعي نفسك عن المعاصي🤔
الحاجات دي كلها بسيطة واجرها كبير وسهلة انك تعمليها🤗
=😲😲😲😲😲
طيب الإمتحانات والمذاكرة والعزومات😑
-احتسبي النية وانتي بتذاكري
اولا :انتي كمسلمة لازم تكوني متفوقة لأن العلم الدنيوي بيفرق اوي مع الناس في الدعوة 👌
لما تدعي بنت او أي حد وانتي متفوقة في دراستك وهي عارفة كده هتسمعلك بمعنى ان الدين والإلتزام لم يؤثر على التعليم 😊
ثانيا: كان الله في عون العبد ما دام العبد في عون اخيه بمعنى تعيني أي حد انه يفهم موضوع مش فاهمه بسبب ان الكتب اللي بتذاكريها بتخلي الاستيعاب بتاعك اكبر،
ثالثا : بر الأم والأب وادخال السرور عليهم لما تذاكري وتجيبي تقدير😊
رابعا: على حسب كليتك تقدري تحطي نية زيادة لو طب او هندسة أو تربية او...او...
شوفتي بالنية حولنا وقت المذاكرة لعداد حسنات إزاي 😈
وحتى العزومات ممكن نحولها برده لعداد حسنات😁
=كمان إزاي ده😲😲😲😲
-هو طبعا حاولي تقللوا العزومات على اد ما تقدروا😂😂
= شر لابد منه ياختي والله😑
-طيب إيه رأيك بالنية نحوله لخييير😈😈
=وهو وشك ده😈😈يدل على خير 😏
انا حاسة إننا بنخطط لجريمة قتل😑😂😂😂
-حلوة😂😂😂😂
نرجع لموضوعنا بأى 😁
لما تحطي نية:
إطعام الطعام ونية إفطار الصائم ونية إدخال السرور على مسلم ،
ونية كان الله في عون العبد مادام العبد في عون أخيه،
لأنك بتريحي الناس إللي إنتي عازماهم دول ،
وإنتي إللي بتخدميهم في يوم العزومة ده ،
=يعني هم يستريحوا وأنا أتعب😑
-يا بنتي الأجر على قدر المشقة،
وسيد القوم خادمهم😉
إللي بيبص للآخرة وعايز الجزاء مش بيبأى فارق معاه إذا كان هو تعبان وغيره مرتاح ولا لأ😊
بالعكس ده تلاقيه بيسارع لإرضاء ربنا 🤗
والنية تجارة العلماء،
ورُب عمل صغير عظمته النية😊
=صح والله،
الواحد من كتر ما بيفكر بسطحية حاجات كتير مش بياخد باله منها 😑
-طب خدي دي كمان تخيلي مثلا لو واحدة عندها طفل رضيع😉
=لا دي بتبأى ضايعة بجد😑
-،بالعكس ده بيبأى في إيديها كنز استراتيجي😈
=كنز استراتيجي مين ياحجة😑
-تخيلي لما تغيرله ولا تأكله ولا تراعيه لو احتسبت نية إنها بتطيع أمر رسول الله صلى الله عليه وسلم
كلكم راع وكلكم مسؤول عن رعيته وكمان نية إطعام الطعام ونية الرحمة بالصغير،
هي في كل ده في عبادة👌
بجانب إنها ممكن وهي بترضع مثلا تمسك المصحف تقرأ وبكده جمعت عبادتين مع بعض 😍
العبادات كتييير بس احنا نركز 🤗
=الله جمييييل😍😍😍
إنتي إدتيني أمل إن الموضوع سهل وهقدر أستغل رمضان بطريقة مختلفة😍
طيب إيه رأيك لو ضغطت نفسي شوية يعني زي ما في ناس بتعمل على أساس إن رمضان فرصة متتعوضش🤔
-بصي كان من هدي الرسول صلى الله عليه وسلم الاجتهاد في العبادة في رمضان لأنه فعلا فرصة👌
بس في نقطة مهمة اوي 😊
وهي إن لبدنك عليك حقا👌
يعني لو ضغطتي على نفسك جامد من تقليل نوم واثقلتي نفسك بالطاعات اوي و...و... كل ده ممكن يجيب نتيجة عكسية 👌
وساعتها ممكن تسيبي العبادات العادية اصلا لأنك كلفتي نفسك ما لا تطيق 👌
=يا سلاااام ده إزاي ده😮😮
-لو لا حظتي إن كتييير أوي بيكونوا داخلين متحمسين وهم كم يوم وتلاقيهم هبطوا جدا بسبب إنهم دخلوا مرة واحدة وحملوا نفسهم ما لا يطيقون😑
فخلي عندك قاعدة أحب الأعمال إلى الله أدومها وإن قل👌
إيه الفايدة لما أدخل رمضان وأطحن نفسي أول أسبوع وأضيع نفسي باقي الشهر 😑
حتى ابن القيم يقول عن الشيطان
أنه يشم قلب العبد
فإن رأى فيه حرصاً على السنة، وتمسُّكاً في الدين؛
أمره بالاجتهاد والتشديدِ على النفس، ومجاوزةِ حدِّ الاقتصاد فيها 👌
وده طبعا مع الوقت يوصله لمرحلة إنه يسيب كل حاجة كان بيعملها حتى الحاجات العادية😑
=طيب يعني مزودش أوي وخليني عادي🤔
-برده مش كده لأن الشيطان مش هيسيبك😑
شوفي باقي كلام ابن القيم:
إن الشيطان لما يشم قلب العبد
إذا رأى فيه فتوراً وتهاوناً وتقصيراً في التمسكِ بالسُّنة حبَّب إليه البدع والأهواء, وسهَّل عليه سبُلَ الشهوات والملذَّات.👌
=ده مش راحمنا خالص يا شيخة😳😳😳
-عشان كده الحل الأسلم هو الوسط 👌
إنك تعملي ما تطيقي بدون إفراط او تفريط🤗
=فهمت💪🏻
لا لا لا إن شاء الله رمضان السنة دي غييير😍😍
-ربنا يوفقك لما يحب ويرضى😘
#Eman_shalaby
