أوراق مبعثرة

البارت(13)

اوراق مبعثرة

للكاتبة رقية_ليث

قراءة موفقة
.
.
.
.
زهراء اجة زوج علا تعشة يمنه و شاف امي
هو شخص شخصية و ثكيل....وية علا بنفس الكلية
حضرنه العشة و كعدنه نتعشى كلنا..جان جايب بقلاوة اكلناها ورة العشة
ورة ما طلعت علا و زوجها...صاحني ابوية كلي تعاي اريد احجي وياج
ابو زهراء: حجتلي علا عل حماها مهند كالت دكتور نفسي و زين ليش متروح زهراء تتعالج
زهراء: اوووف منج علا متعرف تسكت اني كتلها مااريد اتعالج و لتفتحين الموضوع وية اي احد
ابو زهراء: يا بوية هي غير تحجي لمصلحتج..واني حسيت كلامها منطقي الي صار وياج مو قليل من ورة ابن عمتج و اخوج كل هذا بچفة ومن ردتي تنتحرين بچفة و انتي حتى باب البيت مطلعين و نفسيتج تعبت دراستج و  تركتيها...كافي بنيتي عيشي حياتج
و حاولي تتغلبين عل الخوف الي بداخلج راح احجي وية اختج واكللها تاخذلج موعد
زهراء: بس ما....
ابو زهراء قاطعتها: ماكو راح احجزلج يعني احجزلج...بدون اعتراض اني اريد مصلحتج
زهراء: لخاطرك راح اروح
ما كدرت اكسر كلمة ابوية وافقت اروح لان لازم انطي فرصة ثانية لحياتي و ابدي من جديد
عشت ٩ سنين من الاكتئاب و الحالة النفسية
كملت رابع اعدادي بس جنت منعزلة حتى صديقاتي ما رجعت وياهن مثل الاول كام يطلع علية كل يوم حجي بالمدرسة بداية الخامس اعدادي صار عندي انهيار عصبي من كثر الكلام الي سمعته و قررت ابطل من المدرسة و اعيف دراستي لان بعد مااتحمل
عمتي كلتله لابوية خلي منتظر يتزوجها هو الي غلط هاي الغلطة خلي يتحملها بس ابوية ما وافق كللها ماازوج بنتي لهيج واحد
اهلي كلهم ما وافقوا اترك دراستي بس من شافوا هيج حالاتي وافقوا
ظليت كاعدة بالبيت اخاف اطلع....حتى صرت اخاف اسمع كلام الناس علية
اهلي قرروا يخلوني اتعالج يم دكتور نفسي بس اني رفضت...بيوم من الايام اجة رامي عصبي للبيت وكال كلة بسببج الناس كل يوم تسمعني حجي شكل تهجم علية و ضربني بس بعدين اجة ابوية و رزلة كلة ايدك اذا تمدها عل خواتك اكسرها...بذاك الوقت قررت انتحر لان صار علية ضغط مو طبيعي
بس للاسف اهلي لحكوني و رحت للمستشفى و سولي غسل معدة
ورة شهر امي تمرضت بسببي لان انتحرت و بسبب الحالة الي اني بيها
ظلت بالمستشفى وكالوا حالتها خطيرة بقت بين المستشفى و بين البيت ظلينه حايرين بيها
بعدين استقرت بالبيت بس نايمة و عل المغذي و نجيبلها ادوية
كل يوم الوم نفسي اكثر و اكثر لان احس الي صار بأمي اني سببه
اهلي اقترحوا علية ارجع اكمل دراسة بس رفضت مااريد
واختي علا من تزوجت لحد الان تقترح علية اروح اتعالج يم حماها مهند
بس اني ارفض....بس اليوم بعد ما حجة وياية ابوية حسيت كلامة صح
ولازم اتغلب عل الخوف الي بداخلي لهذا قررت اتعالج

سارة من بعد مااعترفلي يزن بحبة حبيته اكثر و تعلقت بي
صارحته بحبي و بدينه علاقة حب...وجان حبنه نقي
ظلينه ٥ سنين عل علاقة حب بدون علم الاهل
جان كل ما يجي للعراق نلتقي و جان يجيبلي هدايا
جان حبنه صافي و نقي و صادق بنفس الوقت لا اني كاعده العب علية و لا هو....دخلت الكلية الي اريدها وهي قانون
بيوم من الايام امي سمعت مكالمة بيني وبينه
من كملت المكالمة صاحتني و جان مبين من نبرة صوتها عصبية
كلتلي وية منو جنتي تحجين...كتلها وية صديقتي
بس هي جانت تعرف وية يزن..من كلتلي لجذبين ادري جنتي تحجين وية يزن انصعقت مااعرف احجي بعد
ظلت تصيح و تغلط علية و تكلي شلوت تسوين هيج شيء واني جنت واثقة بيج
كتلها اني ما سويت شيء غلط...ايدي ما لمسها ما سويت شيء ينزل راسج
كدام الناس
صارت مشكلة بيناتنه و اخذت الفون مني واني زعلت منها لان فاجئني تصرفها و لا يوم تصرفت او حجت وياية بهيج طريقة
ظليت حابسة نفسي بالغرفة مااحجي وياها و اشتاقيت ليزن لان بعد مااحجي وية حتى من اجة للعراق امي ما خلتني اروح لبيت ابوية و اشوفة
ظليت شهرين اني مااحجي وية...مستوايا الدراسي نزل صرت مااكل و مااطلع من الغرفة بس ابجي لان تعلقت بي كلش مااكدر اتخيل حياتي بدونه
اكيد عسبالة عفته لان ماارد عل رسائلة و شفته من اجة للعراق
بيوم من الايام خابر عل موبايلي و امي ردت علية و كلتله انسى سارة علاقتكم انتهت...جانت مجرد علاقة عابرة هي اصلا متحبك
اني ميته من البجي لان نهت كلشي بينه اكيد راح ياخذ علية نظرة مو حلوة
جهازي كسرته و اشترتلي جهاز جديد و رقم جديد و كلتلي اذا عرفت بيج تحجين وية يزن مرة ثانية...اتصرف وياج غير تصرف
حسيت الدنيا سودت بوجهي مااعرف شنو اسوي من جهه امي ومن جهه يزن
رجعت دزيت رسائل ليزن بس ماكو ميرد اخابرة هم ماكو شهر اني ادز رسائل ماكو ميرد
كملت دراستي وراها امي قررت تزوجني اني رفضت بس هي اجبرتني عل هذا الشيء زوجتني من حسام اجباري يصير ابن صديقتها هم كلية قانون اكبر مني بسنة كلتلي انسي يزن و ابدي حياة جديدة وية حسام
جان محد يكدر يحس بالمعاناة و الالم الي مريت بي
تزوجت من حسام بس جنت جسد بلا روح ما كدرت انسى يزن و بعد ما عرفت عنه معلومات....علاقتي بأمي شبهه الي انقطعت هي دائما تخابر حسام و تسئل علينه بس اني بعد الي سوته بيه مااريد احجي وياها صار عندي بنوته اسمها رنا وهي الي جانت مصبرتني عل هذا الزواج
قررت اعيش حياتي و انسى يزن كافي لازم افتح صفحة جديدة بس للاسف طلع كدامي مثل الشبح من شفته رجعت كل الذكريات الي عشتها وية
من عرفت اتزوج مااعرف شصار بية گلبي انمرد....حبي اله رجع ينبض من جديد...