خماري لا يعكس أخلاقي (زوجوني فقيه الجامع 2 )

الجزء: 11

طلع لداره كيحس براسه مخنوق معصب لأبعد حدود كيفاش رفضاته وهو البنات كيطلبو منو غير نظرة !!
زفر بضيق و جلس على الفوطي مسند راسه كيحس بيييه غيطرطق ، هز كاروه وبدا يكمي على لله النار لي ف قلبو تطفى ولكن العكس ..!

صباح جديد ☀️ ..

فاقت كأي يوم غير هو هاد اليوم العلاقة بين أمها و باها متوثرة شوية من الموضوع و النقاش د لبارح

صلات صلاتها وخرجات لكوزينة كيف العادة كانت أمها كدير الفطور ..

بسمة : ماما كيف صبحتي ؟
سعيدة : بيخير الحمد لله
بسمة : ماما عفاك متقلقيش مني وسمحيلي ولكن راك عارفة
سعيدة : صافي ابنتي هاد لموضوع نيييت تسد مكاينش لاش نجبدوه
تنهدات براحة منين شافت أمها تقبلات رفضها عادي ..
بسمة : فاش نعاونك أماما ؟
سعيدة : الغداء و صافي ونجمعو نخرجو لسوق مور لعصر إن شاء لله نتقداو
بسمة : ضروري ليوم ؟
سعيدة : اييه ضروري وغتمشي معايا متقوليش ثاني لا

داز النهار عادي جمعات الصالون و لبيوت وجا وقت لخروج كان وذن العصر هادي عشرون دقيقة
لابسة خمار ف لون الغوز بيبي ودايرة كحول عادي مزين بشرتها البيضاء ..

خرجو هي و أمها غادين ف إتجاه السوق كانت الدنيا عامرة هادشي معروف على الأسواق المغربية ..
وقفات أمها قدام الخضار وبدات تعزل ف لخضرة

أما بسمة واقفة حداهاا ومرة مرة تشوف هنا و هناا ممسوقة لحد

بان لييها شي واحد وجهو مخبوش لابس سوفيطمة ديال الصماطي و مركز النظرة مع مها ..

مركزاتش فييه و معمراتش راسها فيييه أصلا
هزات ميكة ديال الجلبانة لي خداتها أمها وخلاتها كتخلص
وقفات ثاني مرة جنب مول البطاطا مع الدنيا عندو عامرة و البطاطا عندو رخيصة كلشي باغيها ..

محسات غييير بهداك الوجه لي كان حاط على أمها خطف ليها البزطام ب لفن وهرب ..
غوتات بالجهد كتحرك ف أمها و تشير ناحية الشفار
بسمة : ماما راه هداك سرق ليييك الزطام
طاحت سعيدة على وقفتها كتشوف مصدومة
سعيدة : اويلي خمسين ألف ريال شحال و أنا نجمع فيها مشات " غوتات بحسرة " أ ميمكنش اهههه ا عباد لله تبعووووه

الدنيا عمرات فين مكان شي واحد حبس و بدا كيتفرج ف سعيدة لي انهارت ب البكاء شاف فيها راجل واقف وهاز تلفون فيديه ..

: اصبري اشريفة ها البوليس يجيو دابا واش عاقلة علييه على وجهو ولا لا ؟

نطقات بسمة بالزربة وشاف فيييه كتحرك فراسها و عينيها عامرين بالدموع ..