{لِ ميار أحمد}💜...
واقف نبخ في بارفاني ولفرحة مش سايعتني اخيرا حلم سنين بيتحقق اخيرا بنمشي نخطبها وتبدا حلالي اتصلت بيها وقتلها انا طالع من لحوش طلعت لأمي وخواتي الا كانت لفرحة باينة في عوينهم وقتلهم هيا
نسوق وانا نذكر
نور ؛ خايفة يجي يوم ومعاش نلقاك جنبي
محمد شديتلها ايدها وضعطت عليها : متخافيش من هـالشى لانه عمره ما رح يصير انتِ حبيتي راجل وامتا ما ترضي انا جاهز نخطبك
نور: بس قعدتلي هـالسنة نتخرج وساهل
محمد: لا خلاص انا ح نجي نخطبك في رمضان ياسر لينا سنين نستنو نقعدو مخطوبين وتتخرجي نطلعو لفرح
نور: اممم نفكر
محمد: مش ح تفكري واضح عجباتك لفكرة
نور ضحكت: اي نوعا ما ، تعرف فرحانة هـلبا وجودك عوضني على مكان بابا إلا فاقداته من سنين كنت ليا خو وبو وصديق وسند انا مغلطتش يوم الا حبيتك شكرا لانك فحياتي
محمد حضنتها:اشش شنو هالكلام من امتِ بيا
قعدت نهدرز ع امي ولبنات وعمى الا كان بحكم بوي جاي بيخطبلي
نعرفكم انا محمد م1989 قريت وتخرجت من الاقتصاد بوى متوفى في حادث من انا عمري عشر سنين عندي ثلاث خوات هناء متجوزة م 1992 وفرح متجوزة م1993 اما ملاك الا كانت صديقت نور من الابتدائي م 1995 خدمت على عيلتي وروحي وانا في عمر صغير لدنيا طلعت منى راجل قد لدنيا حبيت نور الانسانة الا نورت حياتي ليا سبعة سنين معاها تقدرو تقولو ربيتها كانها بنتي زي ما تقول ، خديت مكان بوي ي محمد نحس فيك لعوض ، لصدفه جمعتنا حتى هيا بوها ميت بجلطة نور م 1995 واختها وخوها تؤام م 2000 غفران واحمد على حالهم هما وامهم تسكن في مزرعة مع عمامها خشت اقتصاد هيا وملاك وفالسنة الاخيرة . وقصتي صايرة فالشرق تحديدا من غير ذكر مناطق
وصلنالهم ونعرفش شنصار مع لنساوين ،قعمزت فالمربوعة مع ثقيل الدم واحد من عمامها محبيتاش كان لقيت نضت نخنقه كان يهدرز عليه عمى مكتفي نهدرز ع خوها كل شوي قال ح نردولكم خبر ف لقريب وطلعنا مكانش في مقابلة شرعية كانت عيلتهم صعبين شوي كنت راضي بأي شي لمهم تكون حلالي
امي صدعتلي راسي فالسيارة وهيا تحكي عليهم وفرحانة وانا فرحان معاها ، وصلتهم وطلعت لسيارتي كلمتها
محمد :حبيبي لحلو
نور ضحكت وهيا اداري في حشمها
محمد :دخيل لمتحشم مش مصدق حاس روحي نبي نطير انا
نور ضحكت :مش نقولك إن الله مع الصابرين
محمد: قطعتيني بيها هـالكلمة كل ما تقوليلهالي نتنرفز بس هـالمرة مفي شي ح يعكر فرحتي
قعدنا نهدرزو وكان لفرحة ماليتنا والابتسامة مرسومة ع وجوهنا نذكرو في مواقفنا مع بعض ونقعدو نضحكو بدموعنا وندكرو الذكرايات الشينة وكذالك نقعدو نضحكو ونتجنبو فيها فرحتنا بي بعض فاقت كل شي يومها ، حبنا كان اقوا من كل شي تجنبنا كل لهموم ولمشاكل كنا لبعض سند محسيناش بالراحة والامان الا مع بعض خدتنا الهدرزة لصلاة الفجر صلينا وعاودت اتصلت بيها رقدت وانا نقرالها في القرآن زي ما تحب مش قتلكم بنتي لصغيرة ، محبيتش نسكر وقعدت نسمع في صوت انفاسها وحاس لنوم طاير من عيوني من الفرحة رقدت على صوت انفاسها
نور نضت لقيت لتيلفون طافي شحن نزلت لقيت لحوش هدوء لتؤام مشو لمدارسهم وامي اكيد ولت وقدت شبحتلساعك لقيتها ل10 حي محمد من بينوضه اكيد تاخر ركبت نحري فتحت تيلفوني وكلمته ناض مخلوع هه وكان كله بسبب لسهر الا معاي ، كان عنده محل مواد غدائية وكوشة وجزار جنب بعض فهـالبلاد لشهادة زي بيها زي بلاها وكان مسؤل ع عيلة تعودت انوض فيه كل يوم مع 8 ليوم خدانا لنوم ونسينا ، كانت عندي طاقة زايدة مزلت وتيت فطور ليا ولماما نوضتها فطرنا وضمينا لحوش مع بعض ودرت لغدي وطفيت عليه مكانش عندي جامعة ليوم ،جيت لماما فى الصالة قعمزت جنبها
نور:ماما
امي: نعم
نور:شن بتردو ع عيلة محمد
امي : احنا الا بنردو ولا انتى
نور: انتي عارفة لجواب (ماما كانت عارفه بس ادير في لحولة )
امي: كان عليا منلقاش زيهم واهم شي فرحتكم ي بنتي بس عمك مش راضي تعرفيه يبيك لفوزي
( كان عمى عماذ الا استقبل محمد امس يبيني لولده من احنا صغار ولده اسمه فوزي عايش في تركيا يخدم غادي بس هوا كان ميبينيش وهاذا الا مريحني )
نور : لا طالما فوزي ما يبيش ف. عمى ما يقدر يدير شي
ماما : يستر الله ي بنتي
زعما يديروها ويوقفو في طريقي ما نستغربهاش منهم ما شفنا منهم خير من لما مات بابا بس انا ح نوقف ضد كل شي حب سنين عمره ما ح يضيع ، تبو لحق كنت خايفة عمامى كانو شياطين تمشي على الارض عمرهم ما حبونا .
تغدينا وركبت لداري قريت شوي وخداني لنوم
محمد نضت ع مكالمتها لصبح مخلوع طلعت للخدمة مروحتش لل10 ف الليل دوشت وكليت وكلمتها ناضت من نومها بصوت ناعس وتعبان ، يخليك تتمنى معاش تسكر ولا تتكلم تقعد تسمع فى صوتها وسرحان فيه وبس ، كان الفاينل بتاعها قريب وكنت حايف على قرايتها قتلها ح نهدرزو ساعة او ساعتين فى اليوم بس الا لو تبيني نفهمك في شي.
{لِـ ميار أحمد}💜...
يتبع ...
