لأزلـتُ أُريـدُهـا

6

الحلقة 6
{لـِ ميار أحمد }💜...

جتنى نجلاء
نور : نجلاء انا مش قادرة نصدق بنهرب ليه انا مستحيل نعيش من غيره
نجلاء : عارفه هالشي صعب وعارفة كل الا بينكم بس يانور عمك مهبول ويدير كل شي توقعي حتى يقتل محمد
نور قعدت نبكي لو قربت منه فهالوقت بذات عمى يديرها ويضر محمد
نجلاء : فكري بعقلك مش بقلبك انتِ تعرفي عمك وشن يدير خافي على روحك وعليه وارضي بقسمة ربي لعله خير
نزلت راسي وطلعت نجلاء
محمد
نشبح للبحر ونحاول نشكيله همى مش عارف شن بنرد عليها اساسا شن بنقوللها
ثوانى واتصلت مرديتش لبعد اربع مكالمات رديت وقعدت ساكت وهيا تبكى دموعى ينزلو مع كل بحة في صوتها مع كل عبرة مع كل بكية من بكياتها دموعى الا مش راضيات يجفو دموعى الا منزلوش من وفاة بوى ، ميبوش يوقفو
نور : ربي يسعدك ياحبيبي
محمد : نور انا عنري ما نسيبك وربي نقتله ولد@&&
نور :لالا محمد انا راضية بقسمي الحمد لله وياريت حتى انت تباعد عليا وما تسببليش مشاكل ( وسكرت قلبي يعيط ويقول مش هالحواب الا نبيه كلام قلبي مختلف تماما على الا قلته)

سكرت وخديت لشفرة رميتها فالبحر ، رميتها ورميت قلبى معاها رميتها وانا محروق رميتها ومنبيش نرميها ، لو خليتها كنت ح نضعف من اول مكالمة ليها واندير حاجات تغضب ربي وانا ما تعودتش نغضبه في يوم ، الكلام من وراء قلبها وانا عارف من خوفها عليا نضت ولعت السيارة ومشيت للحوش ، طقيت ع لباب فتحت ملاك قعدت تشبحلى ودموعها نزلو قربت حضنتني لفيت ايديا عليها
ملاك : خفت يصيرلك شي معندناش غيرك ي حبيبي عشانا كون قوى
كلماتها اثرو فيا هلبا ، نادت ع امى جت تجرى بوجها الشاحب الا واضح مش ضايق ريحة النوم تمس في وجهى وتحضن فيا وتقولى الا جابها يجيب غيرها يوليدي متزعلش وتهلك روحك ي ولدي من عندي غيركم انا فهالدنيا لو يصيرلكم شي يصيرولي اضعافه ، هزيت براسي وقتلها بنركب لداري ما في حد ، قتلى خواتك كيف رقدو ولناس اغلبهم روحو قاعدة حناك وخالتك ، قتلها منبى حد يجيني وركبت قعمزت على السرير وطلعت المسدس من الدرج قعدت نشبحله وحسيتش بامي خشت
امى : هىىىىئ ، بدت تبكي ، الله يربحك ياولدي ما اديرهاش الله يهديك ماتحرقليش قلبك من عندي غيرك انا وخواتك
محمد نشبحلها وساكت
امى تبكي: قلبى غاضب عليك ليوم الدين يارلدي لو درتها ( وبدت ترعش )
محكد نضت نجري قربت منها : خلاص امى اهدي خلاص نوعدك ما نديرهاش اهدي بس
دوشت ورقدت معرفتش وين بنهرب ولا وين بنمشي غير لنوم ، بعد محاوالات استغرقت ساعات قدرت نرقد
مشفتش فيها راحة هالنومة كل شوي انرض مخلوع وعارق ، ونولى لنوم ثانى لانه مفيش غيره لو بنطلع حـ نشوف لشماته على وجوهم حـ يشوفونى ضعيف ومكسور  منبيش نظرات لشفقة وانا ما تعودتش يشوفلى حد بهالنظرات ،منبيش ننزل لأمى وخواتى انا سندهم وقدوتهم ومصدر قوتهم مكانوش يشوفولي الا بهالنظرات منبيش نغلى هالفكرة من راسهم ولا نشغلهم عليا ، نضت على صوت طق لباب
محمد : مش قلت ما يجيني حد
امي : افتح ي ولدي هاذي انا
محمد نضت فتحت خفت عليها يصيرلها شي ولا يركبلها لضغظ بسببي لقيتها شادة صفرة ماكلة خشت وسكرت لباب قعمزت على السرير وانا ساكت ، جت قعمزت جنبى
امى : اكيد من امس مش واكل شي
محمد :منبيش
امى : ميجيش يولدي على خاطري ، اشرب اميه وسمي الله
خديت منها لميه
امى : ننحرق في الف حرقة لما نشوف واحد منكم متوجع مش قادرة لا نرقد ولا حتى نقعمز مش قادرة نرتاح وواحد من صغاري مش مرتاح دموعى ينزلو ويطفو في نار قلبى عليكم يا يما ، اشكيلي واحكي انا اميمتك ما تخليهاش فقليبك تولى عليك ابكى ونزلهم دموعك مش غلط ينزلو ويطفو نار احسن ما تقعد محروق وتولى رماد
محمد نشبحلها وساكت : شن تبيني نحكيلك يما تبي نقولك سلبو روحى منى تبيني نقولك انا قاعد في حالة صدمة ومش مستوعب شي تبني نقولك نفكر نقتلها ونقتل روحى
امى بدت تبكى : لا الله يربحك يوليدي معاش لا تفكر لا تقول هالكلام من عندي غيرك انا وخواتك لمن بتخلينا ، ربك يوليدي فكر في ربك مديرش حاجة تعصيه ربي يختبر في صبرك وداسلك نصيبك من كل شي حلو بعد لعسر يسر يولدي ربي هوا الا قال مش اني ،
قعدت تبكى وتمسح في دموعها متحملتش جيت انا مسحتهملها وحضنتها قعدت نطبطب عليها
محمد : انا اسف يما اسف نزلت دموعك عمري ما نسيبك انا خليني فترة براحتي وانا ح نرجع محمد الاول فترة بس ،
طق لباب وخش مصعب ولد هناء عمره خمس سنين
مصعب : خالووو ، جي يجرى حضني
محمد حضنتها : حبيب خالو
مصعب : انت كنت وين انا نبيك تلعب معايا نستنا فيك
محمد : حاضر نلعب من حبيبي
مصعب ره ماما وخالتي فرح وملاك واقفين اهنى واشر ع لباب
ضحكت : خشو خشو مصعب شوشد عليكم
هناء وفرح وملاك خشو وراء بعض
هناء جت قعمزت جنبي وشدت على ايدي ، اما  فرح قعدت واقفة جنب لباب وعيونها معبيات دموع وملاك جت تجري  حضنتني ، هناء الا كانت مصدر قوتنا ولصدر لحنون لينا الا تكون ام ثانية كانت ام حتى لامها ، اما فرح الحساسة الا ريح تنزل دموعها وملوكة دلوعتنا
امى : خوكم مسكر راسه ع لماكلة تصرفولى معاه
هناء : لا عاد مني انا ميقولش لا
مصعب : ليش خالتو فرح تبكى
ملاك : مه يحوعو فيها عيونها
فرح قربت : مش تحب بسبوستي شوف محلاها انا درتها
ملاك : ولعصير انا صبيته ره
محمد ضحكت
هناء شدت خيارك وقتلى افتح فمك ، كليتها
فرح شدت بسبوسة : انا بنبكى ره تاكل من هناء وانا لا ، خديت منها
ملاك : حي وعصيري انا نبزعه عادي
خديت شربت منه
امى مبتسمة وتشبحلنا
ملاك : امى متبيش توكليه ولا شنى
امى : هوا انتم خليتونى ، هي افتح فمك وهاذي مكرونة امك ادفيلك مصارينك
محمد قعدت نضحك
ملاك : يما لكن لدنيا بدت تسخن ليش بتسخنيه بمكرونتك بالك ينحرق
امى : اسكتى يفرخة انتِ
مصعب : حتى مصعب يوكل خالو
هناء : حبيب ماما هاكى عطيه مكرونة
مصعب : قول اااا
محمد : اااا
مصعب : اي خالو بطل
هناء : عطك لسلامة كلها طيحتها
خدتنا اللمة الحلوة ، وخواتى الا ميبو يفتحو لموضوع ويحاولو ينسونى ويرسمو ضحكة ع وجهى ، هكى عودتنا امى يطيح واحد كلنا نوقفو جنبه لين نوقفوه من جديد ويرجع احسن من الاول ، طلعو وخلونى ع اساس اتفقنا بننزل بعدهم ، فتحت لبلكونة وطلعت قعمزت فيها
قعدت نشبح لنجوم ، رجعو بيا لذكرايات لـِ نجمتى

غاطسة في نومها نوضتها على صوت تيلفونها  يشرين باسمى
محمد :كسولتي راقدة نوضي افتحي لبلكونة نبي نشوفك
نور :شن تقول انت شن جابك عارف لوقت قداش
محمد: مش مهم اطلعي عاد
طلعت وقعدنا لصبح نور مقعمزة فِى لبلكونة وانا فالسيارة ونتفرجو ع بعض ونهدرزو بالتيلفون كانت من احلي الليالي معاها كان تحب هالجملة  تقولى مستحيل ننساها  {ارفعي راسك تشوفي فالنجوم انا كل ما نستاحشك ولا نكونو متعاركين نقعد نتفرج عليهم ونتخيل فيك وحدة منهم ونشكيلك منك ي نجمتي}
فقت من ذكرياتي بدمعةة سخونةة حرقتني مسحتها بسرعة
""صعبة على راجل يبكى ، تصعب عليه روحه وقت يضعف ، بذات لما ياخدو منه حاجته الا ماتعودش يعيش من غيرها ، كان اشبه بالموت ليا ""
سكرت لبلكونة وخشيت لسريري على امل نرقد وننسى كل شي قاعد يذكر فيا بيها انا كيف بننساها وهيا مشاركتنى في اصغر تفاصيلي ..

{لـِ ميار أحمد }💜...
يتبـع...