عاشقه الشيكولاته
الجزء الثامن عشر
ملك: انا. قررت وهو ادهم ثم ذهبت نحو جاسر وقالت: انا اسفه انى علقتك بيا صدقنى انت بقيت شخص مهم وقريب منى جدا انا مش عايزة اخسرك يا جاسر ارجوك سامحنى انا اسفه بج.....
قاطعها جاسر: انا مش هخرج من حياتك يا ملك وانا مش هقولك عادى حصل خير لا بصراحة انا متضايق. و زعلان بس مبسوط فى نفس الوقت ليكي اوى بس انا لازم امشي دلوقتى انتى اكيد مقدرة موقفى صح
ملك ببكاء: مقدرة صدقنى بس يا جاسر ارجوك خليك زى صديق عزيز عندى ارجوك
جاسر: حاضر. يلا مع السلامه
ملك: مع السلامه
خرج جاسر مسرعا من منزل ملك
وانطلق بسيارته لا يعرف اين سيذهب
عند ملك كانت تبكي فى حضن والدها
جمال: يا ملك مخسرتيهوش صدقيني
ملك: جرحته وانا عمرى ماجرحت حد يا بابا
ادهم: يا ملك ده كان لازم يحصل
ملك: عارفه والله عارفه بس
ادهم: مفيش بس انا دلوقتى يا ملك بعترفلك بحبي ليكي قدام كل الموجودين وبطلب منك طلب واحد
تتجوزيني يا ملاكى
نظرت ملك لوالدها وسيف ثم نظرت لادهم وهزت رأسهت بخجل بمعنى موافقه
قفز ادهم من على ركبته وقال: بجد موافقه يا ملك
ملك: ايوة يا ادهم موافقه اتجوزك
ادهم: انا مش مصدق نفسي
سيف: ولا انا اقسم بالله المهم ابعد عن اختى ياض
ادهم: نعم يا اخويا
سيف: من اعمالكم سلط عليكم فاكر كنت بتعمل ايه معايا انا ونغم
نغم: ايوة يا سيف صح
ادهم: ده انا اخوكى يا هبله وبعدين طز يا سيف محدش هيقدر يعمل معانا حاجه
سيف: هانشوف يا دومى
ادهم: ولا مبحبش حد يقولى كده غير ملك
سيف: اوباااا ولا ووقعت يا عسل
ملك: بس يا سيف
سيف: بتدافعى عنه من دلوقتى
ملك: لا يا حبيبي مش قصدى
ادهم : حبيبي ايه ديه الكلمه ديه متتقلش لحد تانى ايا يكن
جمال: نعم يا اخويا قولت ايه كده سمعنى
كمال: استنى انت قول كده يا زفت انت قولت ايه
ادهم بخوف: لا انتم. فهمتوا غلط يا جماعه اهدوا مش كده
ملك: بالظبط هو قصده كده
ضحك الجميع
كمال: طيب عايزين فرحكم يبقي مع الباقي ولا ايه
ادهم: طبعا صح يا ملك
ملك: اكيد طبعا
جمال: طيب الخطوبه بعد بكرة والفرح بعد اسبوع زى ما اتفقنا
ادهم: يا عمى الخطوبه النهارده وكتب الكتاب بعد بكرة والفرح بعد اسبوع ايه رأيك
جمال: ايه رايك يا موكا
ملك: زى ما حضرتك تشوف يا بابا
جمال: على خيرت الله
قام ادهم وامسك يد ملك والبسها خاتم الخطبه ودبله رقيقه وهى البسته دبلته وكان مكتوب عليها اسم ملاكى ودبلتها مكتوب عليها ادهم. ولكن ادهم خلع دبلته وقال: ملك بصي مكتوب ايه من جوا
ملك: وريني
ما ان رأت ملك الكلمه المكتوبه حتى تجمعت الدموع فى عينيها وقالت: بجد يا ادهم انا فرحانه اوى
فقد كانت الدبله محفور عليها اسم ( عاشقه الشيكولاته)
ادهم: ده اسمك. وانا بعشقه
ملك: متشكرة يا ادهم على كل حاجه عملتها معايا
ادهم: بطلى بقي ديه ولا حاجه
سيف: كفايه نحنحه نحن هنا
ادهم: هادم اللذات
تضحك ملك فينظر لها ادهم بهيام ويقول: بحب اشوفك بتضحكي جدا يا ملك
ملك تخجل وتذهب الى نغم
انتهى اليوم وجاء موع رحيل ادهم
ملك: انا هانزل بكرة اجيب فساتين انا والبنات ماشي
ادهم: ماشي ..ملك هاتصل بيكي بليل
ملك بخجل: اوك باي وركضت من اماما وهو رحل
اتصلت ملك بريتاج ونغم وشيماء فى مكالمه جماعيه
ريتاج: موكا انا عندى فستانى
نغم: وانا
شيماء: وانا
ملك: هتسيبونى اروح لوحدى
ريتاج: بصى انا وشيماء هنسبقكم على المول وانتى ونغم حصلونا
ملك: اشمعنا
ريتاج: علشان انا رايحه لشيماء بكرة
ملك: ليه
ريتاج: بفكر اشتغل عندكوا فى المستشفى
ملك: ايوة يا جوجو والنبي
ريتاج: اوك يلا تصبحوا على خير احنا هنسبقكم اوك
الجميع: اوك
وجدت ملك ادهم يتصل
ملك : الو
ادهم: وحشتيني
ملك: لحقت يا ادهم
ادهم: انتى بتوحشيني وانتى معايا
ملك: بس بقي يا ادهم والا هقفل
ادهم: لا وعلى ايه كلها بكرة وتبقي مراتى
ملك: تصبح على خير
ادهم: اهربي اهربي وانتى من اهله يا ملاكى
اغلقت ملك الهاتف وظلت تفكر فى جاسر ففكرت فى الاتصال به
ملك: الو
جاسر: ازيك يا ملك
ملك: الحمدلله انت عامل ايه
جاسر: كويس
ملك: انا عاوزة اقولك على حاجه ضرورى
جاسر: ايه ديه
ملك: لازم اشوفك ضرورى
جاسر: هاشوفك بكرة
ملك: امتى وفين
جاسر: هابقي اتصل بيكي
ملك: اوك تصبح على خير
جاسر: وانتى من اهله
اغلقت ملك الهاتق ونامت. وهذه المرة تكرر نفس الكابوس معها فقامت وظلت تصرخ دخل عليها والدها والدتها وخلفهم سيف
جمال: ملك اصحي يا حبيبتي
ملك: هيموتوا يا بابا
جمال: مين ده يا ملك
ملك: مفيش يا بابا ده كابوس
سيف: كابوس ايه ده
ملك: لا عادى مفيش
روضه: طيب انا هنام جمبك
ملك: لا والله انا تمام روحى نامى فى اوضتك
سيف: طيب انام انا
ملك: لا روح اوضتك يا حبيبي انا كويسه
سيف: لا يا ستى انا عاوز انام جمب بنتى النهارده
ملك: اتفضل يا بابا
جمال: وانا مش ابوكي
سيف: خلاص يا بابا يلا راحت عليكوا
ملك: ولا بس كله الا جيمي وروضه
جمال وروضه: ربنا يخليكم لبعض
ثم نام الجميع
استيقظت ملك على صوت هاتفها فوجدت نفسها نائمه وحدها
فردت على الهاتف
ملك: الو
ادهم: صباح الخير يا ملاكى
ملك: صباح النور
ادهم: نغم بتقولك يلا هى جايه فى الطريق
سيف: موكا نغم جايه فى الطريق
ملك: اوك يا حبيبي ... هو انت قومت من جمبي امتى
سيف: فضلتى تضربي فيا قومت انا غلطت اما اتخمدت جمبك
ملك: امشى يا سيف
سيف: ايوة يا عم الله يسهلوا
ثم خرج
ملك: الو
ادهم بغضب: هو سيف كان نايم جمبك
ملك : اه ليه
ادهم بغضب: ليه بقي ان شاء الله وازاى تسمحيلوا
ملك: انت اتجننت ده اخويا
ادهم بصراخ: ولو
ملك: لا بقي يا ادهم سيف ده ابويا مش اخويا كله الا هو فاهم
ادهم: انتى مش فاهمه انا بحبك يا ملك واللى بيحب بيغير حتى من الاب والاخ
ملك: مش كده الا دول لانهم اهم حاجه فى حياتى يا ادهم
ادهم: طيب يلا قومى اجهزى
ملك: تمام يلا باى
ادهم: استني يا ملك انا اسف انى زعقتلك بس غيرت اوى
ملك: محصلش حاجه خلاص
ادهم: تمام يا ملاكى خلى بالك من نفسك
ملك: حاضر باي يا دومى
واغلقت بسرعه وتوضاءت وصلت فرضها ثم ارتدت ملابسها وخرجت وهم يتناولوا الافطار
روضه: بقولك يا جمال
جمال: نعم يا حبيبتي
سيف: ايوة بقي يا جيمي
روضه: ولا احترم نفسك
سيف: من عينيا يا قلبي
روضه: انا قلبي مقبوض
جمال: ليه بس
روضه: مش عارفه متضايقه كده وقلبي بيتعصر
سيف: اهدى يا حبيبتي ومتخافيش
ملك: بالظبط كده اهدى يا رورو ومتخافيش كل حاجه هتبقي تمام
روضه : سيف انت هاتروح معاهم ولالا
سيف: عندى عمليات مهمه مش هاقدر
ملك: روح يا حبيبي واحنا تمام متقلقش
روضه : طيب خلى بالكم من نفسكم
ملك: نغم هتيجي بالعربيه بتاعتها متخافيش
طرق الباب فقامت ملك وفتحت وجدتها نغم
جمال: حماتك بتحبك يلا تعالى افطرى
نغم: حماتى بتموت فيا وانا بعشقها
روضه: اومال ديه بنتى
ملك: يلا افطرى
نغم: مانتى عارفه ماما مسابتنيش غير لما اكلتنى يلا علشان البنات هيسبقونا
ملك : انا اصلا خلصت يلا بينا
جمال: خلى بالكم من بعض
روضه: اه والنبي
نغم: متخافوش يلا باى
ملك : يلا بينا
سيف: نغم تعالى ثانية
دخلت نغم خلف سيف للشرفه
سيف: سلمتى على الكل الا انا
نغم: علشان متضايقه منك
سيف: والله كنت تعبان
نغم: تسيبنى بكلمك وتنام ياسيف
سيف: حقك عليا مش هتتكرر
نغم: وعد
سيف: وعد
نغم: طيب انا هامشي بقي
سيف : خلى بالكم من نفسكم ثم قبلها فى خدها بسرعه وقال: انتى مراتى يا هبله
نغم: اوعى بقي وركضت من امامه واخذت ملك ونزلا وركبا السيارة وانطلقا وقامت نغم بتشغيل اغانى جميله واخذ الفتاتان يغنيان
وهناك سيارة تتبعهم ثم اتصل الرجل الذى يقود السيارة برئيسه وقال: الو يا باشا هما قدامى اهم اول لما يبقوا لوحدهم هاكلمك سلام
الرئيس: اوعى تاذيهم نغم تسيبها وتجيب ملك بس مفهوم
الرجل: مفهوم يا باشا
اغلق معه وظل متبعهم حتى وصلوا الى طريق فارغ تقريبا فوجدت ملك سيارة تحاول الاصطدام بها فقالت
نغم: ملك اركنى بسرعه
ملك: طيب طيب
ركنت ملك السيارة فنزل رجلان ملثمان واتجها نحو السيارة ونحو ملك بالاخص ففتح الرجل الباب وامسك ملك من يدها فظلت تصرخ وتدفعه وتضربه والرجل الثانى ذهب نحو نغم التى نزلت من السيارة واتجهت نحو ملك فأمسك بها الرجل الثانى
الرجل 1 : يلا بسرعه خدرها
الرجل 2: حاضر واخرج من اجيبه منديل به مخدر ووضعه على انف نغم وكل ذلك تحت صراخ ملك
ملك: انت بتعمل لها ايه سيبها والنبي سيبها
نغم: مــــلـــك ثم وقعت فاقده وعيها
ملك: انت عملتلها ايه
الرجل 1: اتهدى بقي خدرناها بس اسكتى بقي وانت يا زفت دخلها العربيه ويلا
الرجل 2 : طيب حاضر
وبالفعل حمل نغم ووضعها بالسيارة وهو يضعها وجد هاتف جميل على المقعد فقام بأخذه واغلق السيارة وذهب الى سيارته وانطلق وملك تصرخ داخل السيارة
الرجل 1 : هات المخدر
الرجل 2: خده اهو
اخد المخدر ووضعه على فم ملك وبالفعل سقطت ملك من آثر المخدر
الرجل 2 : اتصل بالباشا وبلغه يلا
الرجل1 :طيب
اتصل بالرئيس
الرجل 1: الو يا باشا حصل وكله تمام
الرئيس: اياك حد يقربلها تروحوا المكان اللى قولتلكم عليه واتصلوا بيا من هناك لما توصلوا
الرجل 1: امرك يا باشا سلام
************-*-*-*-*-*-*-*-*-*-*-*-*-*-*-*-*-*--*-*-*-*-*-*-*-*
عند شيماء وريتاج
شيماء: دول بقالهم ساعه
ريتاج: انا بتصل بملك تليفونها مغلق ونغم جرس ومحدش بيرد
شيماء: انا كده قلقت اتصلى بسيف
ريتاج: لا هاتصل بأدهم
اتصلت ريتاج بأدهم
ادهم: الو
ريتاج: ازيك يا ادهم
ادهم: الحمدلله تمام
ريتاج: ملك كلمتك هى او نغم
ادهم: لا ليه
ريتاج: اتأخروا بقالهم ساعه واكتر
ادهم : طيب اتصلتى بيهم
ريتاج: ملك تليفونها مغلق ونغم جرس ومحدش بيرد
ادهم: انتى هتقلقيني ليه طيب اقفلى وانا هحاول معاهم
ريتاج: وطمنى اوك
ادهم: طيب بس متتصليش بحد مش عايزين نقلقهم على الفاضي
ريتاج: حاضر
اغلق ادهم معها وظل يتصل على ملك ولكن هاتفها مغلق ونغم جرس ولا يوجد رد بعد مرور حوالى ساعتين اتصلت ريتاج بأدهم
ريتاج: ها يا ادهم
ادهم: كده بقالهم ساعتين برا ومحدش منهم بيرد انا هبلغ البوليس
ريتاج: ماشي
ادهم: هاتى شيماء وتعالوا على الشركه
ريتاج: حاضر مسافه السكه
ادهم: طيب سلام
كان ادهم وادم ويوسف وسيف متجمعين ولا احد يعرف لنا فأدهم احضرهم جميعا دون ان يخبرهم بشئ
سيف: فى ايه يا ادهم جبتني. على. ملا وشى كده ليه
ادهم: انا عايزكم تهدوا خالص علشان نعرف نفكر تمام
سيف وادم. : تمام
كاد ادهم ان يتحدث ولكن قاطعه دخول ريتاج وشيماء
يوسف: انتى جيتي ليه
شيماء: علشان نشوف هنعمل ايه
سيف: فى ايه بعدين فين ملك ونغم
ادهم: هو ده الموضوع بقالهم ساعتين
ريتاج: لا تلات ساعات واكتر منعرفش عنهم حاجه ملك تليفونها مغلق ونغم جرس ومحدش بيرد
سيف.: نعم انتى بتقولى ايه
ادهم: اهدى انا اتصلت بواحد صاحبي ظابط مهم وهو جاى دلوقتى
ادم: عاصم مش كده
ادهم: ايوة
سيف: انت هادى ازاى كده اختى ومراتى منعرفش عنهم حاجه
ادهم: واختى وخطيبتى بردوا يا سيف انا بولع من جوا مش لازم ابين
ادم : اهدوا علشان نعرف نتصرف
يوسف: بالظبط كده نهدى ونفكر بعقل
ادهم : طيب انا هتصل بنغم تانى يمكن ترد المرة ديه
سيف : طيب يلا بسرعة
&&&&&&&&&&&&&&&&&&&&&&&&&&&&&&&&&&&&
عند نغم
بدأت نغم. فى الاستيقاظ فوجدت نفسها فى السيارة وحدها قامت بسرعه ونزلت من السيارة وظلت تبكي وتنادى على ملك فجلست على الارض تبكي وتصرخ بأسم ملك ولكنها سمعت صوت هاتفها فركضت نحوه والتقطته واجابت عليه
نغم ببكاء: ايوة يا ادهم
ادهم: نغم الحمدلله انتى فين انتى وملك
نغم ببكاء : اخدوها يا ادهم اخدوها الحقنى يا ادهم
ادهم: مين دول اللى اخدوها !!!
ياترى مين اللى خطفوا ملك؟
ومين الرئيس اللى كانوا بيكلموه؟
ياترى ادهم هيتصرف ازاى؟
وياترى جاسر هيعمل ايه لما يعرف ان ملك اتخطفت؟
توقعاتكم بقي يا حلوين
اشوفكم الفصل الجاى من عاشقه الشيكولاته 🍫❤️
أنت تقرأ
عاشقه الشيكولاته ❤️🍫
عاطفيةلا اعلم من اعشق لكنى احاول اكتشاف ذلك ولكن غموضك يجعلنى اخاف لانى لا اعرف ما هو القادم وانت الاخر لا اعرف ما تخبئه خلف هذه البسمه ولكن اعدك سوف احاول تبين الحقيقه ❤️❤️ (مكتملة)
