"بعد أن فرغت الجده من صلاتها،كانت تبتسم إبتسامة ماكرة،جلست مقابلة بدرية وسوسن"
بدرية: أها يا عمتي أحكي
سوسن:يلا احكي لينا النشوف الأصول دي شنو
السُرة: أول شي لقيتكن مسطحات زي ما بقولوا،،رقيص العروس ياهو رقيص العروس ههههه بس معقولة ما بتعرفن العمرة دي شنو؟؟
بدرية:لا يا عمتي ما بنعرفهاا
السُرة:العمرة دي عندنا زمان زي الشنيطه الانتن بتختن فيها النصايب حقتكن دي من روج لبدرة ولا بسموها شنو،،يلا نحنا زمان ك صحبات العروس بنخت فيها الكحل والمحلب الاسود والكمون والقرنفل والكمبة السوده وبنقفلها من قبل كم يوم لمن تتخمر وأول ما تتفتح بتبقى ريحتها سمحه وبتمسك في المكان وقتي.
بدرية:عادات غريبة يعني في الآخر فهمها شنو العمرة دي!؟
السُرة:بنريح بيها العروس وبتشيل باقيها معاها بيتا،،
بدرية:طيب وتجهيز العروس بكون كيف؟!
السُرة:بنمشطها مساير ومن العمرة دي زاتا بنسوي ليها في شعرا بنشق الشعر ونسوي فيه ونرجع نلفوو ببقى تقيل وكتير وريحتو سمحهه وبخلي صدر العروس بارز لبرة وهي بترقص،،التدريب حقها بكون في مكان بعييد عن بيتهم ولما تجي للرقيص ماف حاجه اسمها العريس يجي وهي ترقص معاه
سوسن:اجي ليه مش زوجها...
السُرة:يا بتي عيب وفضيحه،،كيفن يجي ويتراقص معاها،هو زمان الرجال زاتهم بخجلوا وقبل العرس الطريق البمشي بيه هو لو انتي لقيتي تغيري طريقك،ما بتتلاقوا الا في بيتكم،،المهم ما علينا
بدرية:طيب المكياج حق العروس كان كيف،،امممم اقصد يعني بتعملوا ليها روج وحاجات زي دي؟
السُرة:سجم خشمك روج شنو،،،بتكون عاملة شك لشلوفتها شك جديد لونو اخدر وبتلبس زمامتها مع الحلق الكبير وتعمل حكل في عيونها وخلاص،،بتتميز بالحاجات دي هي ماف زول غيرا يمشط نفس المشطه أو يلبس نفس الزمام والحلق وبعدين عروس زمااان ظااااهرة،،ما زيكن اسي الواحد يمشي الحوش البتسمو صالة ده ويلقى اشكال والوان ما يفرز العروس الا من حنتها المشخبطه
سوسن: وانتو زمان ما بتعملوا حنه مثلا؟
السُرة:في ناس بعملوا وناس ما بعملوا،،بس نحنا كنا بلخ الحنه مع موية الهبيل بتكون صفراااا زي الكركم وندعك بيها جسم العروس،،بعدين الرقيص بكون قدام نسوان بسيطات وبأغاني سمحه خلاص،،والرقيص الاتعلمتو واتدربت عليه بكون قدام زوجها وبس.
سوسن:طيب ساعة العريس بخجل البجي يسوقا بيتها منو هههه
السُرة:بعد الرقيص بجهزوها صحباتها بليل وبودوها بيت زوجها وبرجعوا،،وبعد كم يوم العريس بجي يجيب لصحبات العروس هدايا ولام العروس قريشات "الشرف" ولو ما شالتهن بتديهن لصحبات بتها
بدرية:يا الله ناس زمان ديل خجولين شديد ههه،،
سوسن: أي وغرييبين ما تنسي
السُرة:يا يمة غريبين شنو انتن بتخلن العروس تتشخلع قدام الخلق كلهم وقدام زوجها بلا خجلة وتنزل وتطلع زي الضب
"أطلقت بدرية وسوسن عدة ضحكات مُتتالية،،وتتطرقت الجده تشرح لهن كيف كانت تبخر العروس ثيابها ب "بت السودان" والمسك وكيف كان يبدو لونها موحدا سوا أكانت سمراء أو شقراء،،،بعد أن أنهت الجدة حديثها،قامت بدرية بتقديم الدعوة مرة ثانية وأستأذنت بالرحيل،،،بدأت سوسن بالحديث عن كيفية تجهيز نفسها وابناءها لزواج هالة.."
"وفي المساء إجتمعت العائلة الصغيرة حول مائدة الغداء كعادتهم،كل منهم إلتزم بأداب الطعام فسموا الله وبدوأ بالحديث الشريف ومن ثم الاكل من أمامهم فقط وعدم التحدث أثناء الطعام،،إن صالحاً عود أبناؤه على الآداب الحميدة والأخلاق الرفيعة وكان أقرب منهم إليهم."
زينب:يلا يا حبوبة نصلي المغرب عشان بعده عندي ليك سؤال مهم جدا
السُرة: سؤال شنو يا زينب؟!
علي:عاوزة تسألك من...
زينب:"مقاطعه علي" أسكت أنت بعد الصلاة هي ح تعرف السؤال.
السُرة:قولي يا بتي وبعد نصلي بجاوبك.
زينب: عاووزة اسألك من الشلوخ دي وليه شفتك التحت سوده كده وهل ده برضو كان نوع من أنواع الجمال..؟؟
السُرة:الليلة سهرتنا ح تطول شكلها.
"رفعت الجده شفتها العلوية وظهر ما يسمى ب"اللغم" بعدها نظرت إلى زينب وخاطبتها قائلة: وده كمان كان نوع من أنواع الجمال اسمو اللغم..
"إنهَٓ الجميع صلاة المغرب وكعادتهم إجتمعوا عدا صالح وسوسن،،فلقد انشغلت سوسن ب"تشقيق الشرموط" والحديث مع صالح عن زواج هالة"
#إيناس_آدم
#نتلاقى💙
