"ظلت الجده تنظر إلى ياسين وهالة في هلع وخجل لدرجه أنها غطت وجهها بطرف ثوبها"
السُرة: ده شنو البعملوا ده ما بخجلوا.
سماح:عادي يا حبوبة دي رقصة برقصوها اي عرسان
السُرة:العادي شنو امها وابوها واعمامها والناس الكبار ديل كلهم قاعدين،بري بري منكن يا بنات الزمن.
سارة: أحم أحم يلا يا زينب وعائشة ارح نرقص
عائشة:لالا امشن انتن أنا ح اقعد مع حبوبة
زينب:طيب أنا بمشي معاهن اقلاها اشوف امي وين
عائشة:طيب
"أستمرت الموسيقى الصاخبة فترة طويلة حتى أحست السُرة بعدم الإرتياح والرغبة في إكمال هذا الحفل،حتى جات فقرة رقص العروس حيث غادر جميع الرجال خارج الصالة عدا ياسين،كانت هالة تتمايل وتنحني على أكتاف ياسين ويبادرها هو بمسك خصرها أو تقبيل رأسها"
السُرة:اسي ده رقيص عروس ليهم،،اريتني ما قلت لبدرية تعملو ليها،،هدومي ما شايلاني من الخجلة.
عائشة:ههههه معليش يا حبوبة ما فضل شي بس الجرتق وخلاص.
السُرة:اسي ح يكون عندهم عين يتجرتقوا كمان
عائشة:اي طبعا
"بعد أن أدت العروس رقصتها،شبكت أصابعها مع أصابع العريس وإرتدت فوق رأسها "القرمصيص" جلسوا على "الكوشة" وسط كم هائل من الزغاريد والأغاني السودانية الخاصة بهذه الطقوس "أغاني السيرة" وأمامهم صينية الجرتق التي تحتوي على حناء وبعض أرياح العروس والبلح،قامت والدة العروس بعمل الطقوس اللازمة لجرتقة العروسان"
السُرة:جرتقك ماسخ ماسخ،،وين كبايات اللبن وين الصندل والمحلب ووين السبح.
سماح:يلا يا حبوبة إنتي كده جيتي في ملعبي،،يلا احكي لينا عن الجرتق
السُرة:يا حليل زمان وجرتق زمان وعرس زمان،،،الجرتق بكون عادة في بيت أهل العروس،،،اول حاجه بنجيب سرير من الخشب المخروط مزين من فوق أو مربوط بسعف النخيل "البرش" ملون باللون الأحمر والملاية باللون الأحمر وصينية الجرتق بتكون باللون الأحمر أو عليها ورود حمراء صينية كااااملة.
عائشة: أها والعروس وشها أثناء الجرتق بكون فاتح؟!
السُرة:اول ما تقعد كدي وشها بكون مغطى بالقرمصيص لفترة طويلة لحدي ما يجي الزمن المفروض تتجرتق فيه.
سماح: أها بتكون لابسة فستان أحمر طبعا.
السُرة:ممكن فستان أحمر وممكن اي لون تاني المهم التوب احمر،،،يلا الفستان نحنا بنسمي فستان الرقيص " سكر سكر" واتسمى كده لانو ابيض ونااعم بكون مفتوح من الصدر وقصير مصنوع من قماش فضي،،بعد كده تلبس دهبها من زمام لحلق لغويشات لخواتم،،انا زمان لبستا بت اختي نوع من انواع الدهب اسمو سن الفيل وتاني نوع اسمو حجول الفضة،،بلبسها حجول الفضة قدام وسن الفيل ورا.
