"أطلقت سوسن زغاريد متتالية عند وصول الجده إلى العروسان وبدأت مراسم الخطوبة.."
سوسن:ايييييوووووووووي يوووووي يوووووي
بدرية: ألف مبروك يا أولادي عقبال العرس والعيال
سماح:مبروك يا عروستنااا
زينب:الف مبروك يا عائشة ربنا يهينكم ويتم ليكم على خير
"تقدم الكثير من المعازيم بالمباركات لحسن وعائشة وتقديم الهدايا للعروس..قبل صالح جبين إبنته ثم همس لحسن بعدة كلمات في أذنه ثم أنفرد بعدد من ضيوفه وسط تلك الأجواء المبهجة"
حسن: مبروك علي بيك يا عائشة،الله يقدرني واقدم ليك كل السعادة والحب البقدر عليهم.
عائشة:.......
حسن:ههههه طيب طيب أنا عارف انك خجلانة مني وليك حق بس ولا يهمك أنا حاسس بكل كلمة عاوزة تقوليها لي.
"وقفت السُرة منحنية وسط "الحوش" ووجهت كلماتها لكل المدعوين والمجتمعين"
السُرة: اسمعوني..
خليل:سامعنك يمة
العم حسن: احكي يا أمي
السُرة:الحلال معروف والحرام معروف والفرز بينهم سااااهل والشاطر هو البغلط وبصلح غلطه،،والبليد هو البقول أنا ما بغلط،،السعيد هو الماسك في صلاته قووووي،،والتعيس هو الفارق درب ربنا ولاهي في الدنيا،،،العادات والتقاليد صنعوها جدودنا وحبوباتنا منها البتصلحنا ومنها البتضرنا،،زي ما كانت بتقول بت صالح الصغيرة الشلوخ والشك واللغم...
زينب:أذى جسدي يا حبوبة...
السُرة: اي الشي ده،،الاسرة سوا الصغيرة ولا الكبيرة هي المهمه ومهما لفيت ودورتا بترجع ليها،،وابوك تاج راسك وامك تشيلها بين عينيك،،والاخ عزوة وسند والاخت حنيييينة وقلبها عليك،،،والراجل ما بعيبو جيبه،،الراجل بتعاب بنقص دينه اول حاجه واخلاقه،،والمرة ما سماحتها في وشها،،سماحتها في تعاملها مع راجلها واهل راجلها واولادا،،والاخت منطقة أمان وبئر اسرار،،،والصحبة ما دايما غدارة،،،ويا قول ولدي حسن التلفونات ما كعبة هههه
"ضحك الجميع على جملة السُرة الأخيرة،،ومن ثم وقفت وسط أبناءها الأربعة وطلبت من حسن"إبن خالد" أخذ صورة جماعية لها مع أبناءها مخافة أن يأخذها الموت وهم لا يمتلكون لها صورة واحدة وهي تقف بينهم شامخه..."
حسن:يلا يا حبوبة اعملي علامة النصر لنا
السُرة: ودي كيف يا ولدي؟؟
حسن:كده يا حبوبة"وفعلها بأصبعيه الوسطى والسبابة"
السُرة:سمح اهاااا
"فعلتها السُرة وأبتسم أبناءها الأربعة وكما تمنت السُرة كانت الصورة رائعه بالفعل...💙"
"والآن.......تلك الصورة معلقة على جدار غرفة ما في منزل الشيخ صالح الأمين وحوله أبناءه وأحفاده يجلسون على مفارش وُضعت على أرضية تلك الغرفة وهو يقص عليهم قصص والدته السُرة...رحمه الله عليها....💙"
"14 يونيو 2020"
_احم احم كل قصة بكتبها نهايتها برغي كتيييييررر شديد شديد فالمرة دي اخترت ما ارغي
_اخترت أشوف الرغي حقكم انتوا والحاجات اللي طلعتوا بيها من القصة دي.
_شاكرة ليكم على حسن المتابعة والصبر وشاكرة لكل زول قرأ القصة وعلق تعليق حلو او انتقاد بناء ولكل زول اداني دافع عشان اواصل فيها ووراني قدر شنو نمطها حلوو،،شكرا بحب💙
الشكر موصول الى الحبوبة :- زهرة عمر يعقوب💙
#إيناس_آدم
#ننس_تمدين
#لو_حيين_بنتلاقى💙
