السُرة:طبعا زي ما عارفين أنا ربنا ما رزقني ببنيات لكن حبستا بنات اخواتي جت عليهن،اها بعد العريس واهله يجوا يتقدموا ويجيبوا قولة الخير والشيلة،،نحنا بنبدا نحبس عروستنا.
سارة(بت خالد):بتعملوا ليها عروكات وكده صح؟؟
السُرة:اصبري،،،اول حاجه بنجهز ليها "حفرة الدخان" بتكون نضيفة وبنرمي فيها نوع واحد من أنواع الحطب يا "الشاف" أو "الطلح".
إحدى الفتيات:والعروس بتقعد فيها ساعة ولا كم بالظبط.
السُرة:والله حسب ساعة ساعتين المهم لمن تعرق عرق بكميات كبيرة وقبل ده..اول ما تقعد بتمسح جسمها كلو بزيت الودك وده زيت خاص بالدخان وبتتغطى ب "الشملة".
سماح:بتاكل شنو يا حبوبه في الفترة دي بالذات؟؟!
السُرة:مدايد عصاير نشا كسرى عصيدة طحنية مربى فواكه اااي شي ممكن يصلح ليها وزنها خلال فترة شهر او ازيد من الشهر وبتطلع مختلفة تماما عن شكلها قبل الحبسة.
إحدى الفتيات:طيب بترطب جسمها بشنو؟؟!
السُرة:ها....
عائشة: قصدها بتمسح جسمها بشنو مثلا بعد الدخان وكده.
السُرة:بتدعكو بحاجه بنسميها "اللخوخه" حاجه عبارة عن ذرة وزيت بتدي الجسم نضارة وبتصفي ليها لونها وبتكون نايرة ومنورة.
سماح:طيب يا حبوبة إنتي عارفة إنو خالتو سماح اشترت معظم العطور بناتية يعني ما حقت نسوان،،ارياح عادية وخلاص،،العطور أو الارياح الكنتو بتعملوها للعروس وبتميزها كانت شنوو؟!!
السُرة:عندنا الصندل والمحلب والعنبر والمسك،،و "الخُمرة" وطبعا ريحتها قوويه وسمحه،،وبنعمل "الدلكة" بتكون حبات صغيرة كده مدردمة من المسك ودقيق القمح برضو بندلك بيها العروس وبعدين هي بتدلك بيها العريس.
إحدى الفتيات: الله عادات حلوة لو لاحظتو يا بنات كل دول برة عاداتهم وتقاليدهم واااحده ما عدا السودان عندو نكهه خاصة وحاجه مميزة شديد شديد
عائشة:فعلا فيهو حاجات كتيرة جميلة ومميزة
بدرية: أها يا عمتي كملي ما توقفي مع إني اتحبستا كده برضو بس ما عارفة بتحمس للقصص الزي دي ههههه
السُرة: بعد كده طبعا واحده ماشاء الله عليها فاهمه وعاقلة تتبرع بنضافة العروس بسموها في الغالب "المزينة"،،بتشيل للعروس جسمها بالحلاوة،،والحلاوة بتتعمل بسكر بكمية موزونة وليمون.
سماح:حبوبة أحكي لينا عن الجرتق عليك الله عليك الله.
السُرة:لالا دي قصة براها كمان وعاوزة ليها يوم تاني،،لانو الزمن فات ولازم نرجع
سماح:ترجعي وين انتي ناسية انك ح ترجعي معانا
السُرة:لالا يا بتي الاصول دي اصول أنا قاعده مع عمك صالح من فترة وخالد كان دايرني اليجي يسوقني من بيت أخوه.
