"نزلت دمعه حارة على خد عائشة وأحتضنت الرسالة وراحت تقبلها"
عائشة:الحمد لله الحمد لله عمري كله ما اتوقعتا أكون مرت حسن أو الحاجه دي تحصل بحق وحقيقة.
زينب:يا عائشة...في شنو بتبكي مالك يا بت؟؟
عائشة:لالا ماف شي،،انا بس مبسوطة،،مبسوطة شديد يا زينب
زينب:الله يديمها عليك بس انتي ما حاسة قرار أبوي صعب شوية،،تتخطبوا سنة كااااملة.
عائشة: أبوي أكيد عارف مصلحتي أكتر مني وما غلط لما قال كده،،وانا صبرتا السنين دي كلها وأنا داساهو في قلبي بغلبني اصبر سنة كمان عشان الحلال يجمعنا؟!
زينب: وجهه نظر برضو،،،ده شنو الظرف الفي يدك ده
عائشة:"بتمتمه" ااا،ظرف عادي مافيه شي
زينب:ياااخي طيب طيب شكلو كده من الحبيب هههه
عائشة:هسسس ما يسمعوك ناس البيت
............
سوسن:اسي في داعي لكلامك ده تخلي الولد ينتظر بتك سنة كاملة
صالح:اي ينتظرها،تخلص جامعتها وتستلم شهادتها والباقي هين
سوسن:ما قال ليك هو بتكفل بقرايتها
صالح:"رد صالح غاضبا" سوسن،،الف مرة قلته ليك بناتي ماف زول يتفضل عليهن مفهوم،وما تحسسيني أني ببيع بتي بيع ولو في فهمك بتك ح تعيش زي عيشة مرت خالد أخوي تبقي غلطانة،،الولد يدوب ببني نفسه وح يعيشها بالبسيط لما يبقى كتير.
سوسن: أنا يا صالح كل العاوزاه بناتي يعيشن عيشة سمحه ما يتهانن ز...
صالح:قصدك شنو!!؟ قصدك زيك،،انتي حاسة بإهانة معاي يا سوسن؟
السُرة:يا ولدي هي ما قصدها كده ما تفهما غلط،،كلنا بنتمنى السمح لوليداتنا
صالح: احسن نقفل الموضوع ده وما نفتحه لما يجي وقته
سوسن: أحسن.
"وأخيراً..جاء اليوم الذي حلقت فيه طائرة حجه السُرة بعيداً لتهبط في مطار السعودية ويستقبلها إبنها خليل"
"بعد مرور فترة قصيرة"
عائشة:يا حليل حبوبة
زينب:اي والله بس قربت تجي
صالح:ربنا يجيبها لينا بالف سلامة
"في منزل خالد"
حسن:يا سماح،،سماح
سماح:اي يا حسن،،في شنو؟!
حسن: إنتي ما..ما نفسك تمشي زيارة لناس عمي صالح؟!
سماح: أنا؟!،،لالا
حسن: أمشي ليهم إنتي وسارة بخلي السواق يوصلكم
سماح:امممم شكلك كده عندك حاجه عاوز توصلها لعائشة هههه،،انتو لسة ما اتخطبتوا رسمي ولسة فاضل سنة لحدي ما تجتمعوا وريني ح تصبر كيف؟!
حسن:بتهون إن شاء الله.
سماح:رايك شنو اديك رقمهااا؟!
حسن:لالا أنا ما عاوز اتواصل معاها حاليا إلا للضرورة القصوى،،ما عاوز اكسر كلمة عمي وما اظن هي زاتا تقبل تتواصل معاي
سماح:طيب طيب أكتب ليها رسالة وأنا لما أمشي هناك بخليها تكتب ليك برضو.
حسن:بالجد والله تكوني ما قصرتي معاي ابدا
سماح:امممم امممم بس كله بحسابووو
حسن: اصلا عارفك ما بتعملي حاجه لوجه الله،،المهم اتصلي عليها وكلميها انك بكرة بعد الفطور جاية تقيلي معاهم
سماح:طيب.
"أخذت سماح هاتفها وحادثت إبنة عمها،وأخبرتها بكل ما قاله لها حسن نصاً"
سماح:طيب تمام بكرة بنكون عندكم.
حسن:ح تمشي ليهم
سماح: أيوة هههه
"ذهب حسن إلى غرفته وأخرج قلم حبره الأسود وراح يكتب على دفتره القليل من الكثير في قلبه لعائشة،،وفي صباح اليوم التالي خرجت الفتاتان وإستقلتا تلك السيارة الفارهه التي إنطلقت بهم نحو أمدرمان،،وحين وصولهما أستقبلتهن سوسن وبناتها خير إستقبال"
سوسن:خشن يا بناتي لجوه،،وبدرية ليه ما جات معاكن
سارة:والله عندها كم موضوع كده بتظبط فيهم
سوسن:النمشي اسوي ليكن القهوة.
سماح:طيب
زينب:كيف ناس البيت كلهم كويسين؟!
سماح: الحمد لله والله،وحسن زاتو كويس يا عائشة
زينب وسارة:ههههههههه
عائشة: أنا اسي فتحتا خشمي
سماح:ما إلا،،عيونك فاضحاك،،يلا عايني سبب زيارتنا الرئيسي هو والرسالة دي
عائشة:رسالة!
سماح: أيوة وصراحه مسكتا نفسي بالعافية عشان ما افتحها
سارة: العجب أنا كنتا بتقالع معاها قلع ههه
زينب:كده رسالتين يا عائشة المفروض تردي ليهو برسالة برضو ولا شنووو!!؟
عائشة:كده ناوليني ليها يا سماح
سماح:هااك
"أستلمت عائشة الرسالة وفتحتها،،كانت عيناها تبرق عند قرأتها لحروف حبيبها حسن،سرعان ما ركضت إلى الداخل وأخرجت هي الأخرى ورقة وقلم وبدأت تسطر مافي قلبها"
"من عائشة إلى زينة شباب المدينة الحسن"
"عزيزي حسن.. أتعلم أن قلبي يرتجف ويرتعد وكأنه ممسكاً بالقلم ويكتُب!!،،يعتريني شعور غريب عند رؤيتك،،هالتني قسمات وجهك المبتسمه ولسانك الذي ينطق درراً،وعيناك التي تشع حباً وسلاماً،،إليك أنت:-
بالروح والدم
بالقلب والوتين
أنت لي حبيباً وزوجاً وخليلاً
وأنا لك زوجة ورفيقة وحبيبةٌ أبدية...!
#إيناس_آدم
#نتلاقى💙
