"كانت سوسن تجلس على "بمبر" وأمامها صينية عليها القليل من اللحم المقطع،ممسكة بيدها اليسرى سكين حاد وتنظر إلى زوجها صالح مخاطبة إياه": أها يا صالح ح نمشي العرس وح تخليني امشي مع البنات حنه العروس؟؟
صالح: إن شاء الله يا سوسن بس هي الحنه متين؟!
سوسن:يوم الاربعاء الاسبوع الجاي ويوم الجمعه بعد الضهر العزومة والعرس في صالة بالمساء
صالح:ماشاء الله تبارك الله ربنا يتم على خير
سوسن:عقبال بناتنا بالسعد السمح الزي ده
صالح:المهم الشهامه والتقوى وحب الله الباقي هين يا سوسن.
سوسن:"أخذت تحدث نفسها ومن ثم أخذت القليل من الزيت وبدأت بمسح اللحم المقطع" النقوم اعلق الشرموط ده وبعدين ادقو نفسي هافاني الايام دي على ملاحات الام رقيقة والتقلية.
صالح: اقوم انا أشوف أمي والعيال ديل بتكلموا في شنو
سوسن:خليهم بتونسوا مع حبوبتهم واقعد ونسني
صالح:"أخذ يمرر يده على لحيته السوداء المشوبة ببعض الشيب مع إبتسامة خفيفة" كويس يا أم العيال
"كانت السُرة تجلس وسط عنقريبها المتين ممسكة بسبحتها البيضاء الثقيلة وحولها أبناء صالح يستمعون إلى ما تقوله"
السُرة:النبدأ ليكم بقصة الشلوخ،،زمان يا اولادي الشلوخ دي بعملوها النسوان والرجال،،حاجه بتميز الواحد وتخلي جميل وكدي،،
علي:بشلخوكم كيف يا حبوبة؟!
السُرة:بالموس يا علي
"صعُق الأبناء وهم يتبادلون النظرات في هلع وإستغراب واضح"
زينب:عشان كده العادات دي تقريبا انتهت لأنو فيها ضرر للإنسان.وخصوصي المرأة
السُرة:هاااا...بتقولي في شنو إنتي
عائشة:ههه خليك منها يا حبوبة تمي تمي
السُرة:المهم يا اولادي الشلوخ دي بعملها زول عارف الشغلانية يعني ما اي زول عشوائي يجي يشرط ليك شدوقك ويمشي،،
"ضحٍك كل من عائشة وعلي وزينب وعباس حتى سال الدمع على وجوههم من كثرة الضحك"
السُرة:بعدها بختو ليك كحل محل الجرح لمدة سبعة أيام وبعدين ببرا عادي.
زينب:طيب طيب عرفنا قصة الشلوخ أها السواد التحت ده قصتو شنوو؟"وأشارت إلى شفة جدتها"
السُرة:ده اسمو شك،،يلا انخلعوا أول وبعدين اوريكم ههههه،،الشك ده برضو عندو زول معين بعملوا بكون بشوك اللالوب بجيبوا سبعة ربُط شوك لالوب ويبدوا يشكو بيها الشلوفة التحت لمن تكب دم ويدقوك في صدرك وعندو أغاني معينة ولحدي ما الدم يخلص وتجي بعده موية
