مكسوفة، مكسوفة منك مش قادرة، مش قادرة أقولك أني بحبك، لا أنا قد حبك ولا قد قلبك، لكن بحبك وأعمل إيه مكسوفة.
والدة نسيم: انتي فعلا لازم تكوني مكسوفة، راجعة من عند بنت عمك بتغني.
نسيم: مامي وحشتيني جدا.
والدة نسيم: لا ده انتي اتجننتي فعلا، قوليلي أخبار بسيل ايه.
نسيم: انتي عارفة بسيل دايما متماسكة وتبان قوية، لكن أنا عارفة أن جواها ضعف كبير جدا.
والدة نسيم: الخوف أنهم يلبسوها القضية عشان يخلصوا، والقضية ماتظهرش للرأي العام.
نسيم: لا ماتخافيش هما بيعملوا تحرياتهم بأمانة شديدة وحرص، وكفاءة فشغلهم، وأمناء جدا، وأخلاقهم عالية، ومتفاهمين ورجالة بجد.
والدة نسيم: وإيه كمان؟ في إيه يا نسيم؟ إيه اللي غير حالك كده! ده انتي كنتِ خارجة من هنا منهارة، راجعة بتغني وتقوليلى الكلام ده، وبعدين عرفتِ شادية منين؟
نسيم: مين شادية؟
والدة نسيم: اللي بتغني الأغنية.
نسيم: هي مش اللي غنتها شرين عبد الوهاب؟
والدة نسيم: شرين! لا دي فالأصل بتاع شادية.. بت!
قالتها بغضب مصطنع؛ لتداري ما بها من إحراج: احنا فإيه ولا إيه، انتي مخبية عني حاجة؟
تذكرت نسيم حديثها مع خالد قبل أن ترحل من قسم الشرطة...
خالد: احنا اتأكدنا أن القضية بتاعتك ملهاش علاقة بقضية قتل مختار، وأنا شايف أن ملهاش لازمة أننا نتكلم عنها، هي صفحة واتقفلت خلاص انسيها، والمتهم بعدما أخذ جزاءه؛ سافر بره البلد وواضح أنه مش راجع تاني، ولو فكر يرجع تاني ويقرب منك؛ هيلاقينى أنا اللي هقفله، وساعتها هيندم لو بس طيفك جه فخياله، مش عايزك تقلقي، وياريت أي حاجة تحتاجيها أو تقلقي منها؛ سيبيها عليا أنا مستعد أحميكِ بحياتي.... أحم... أحم.. أحنا واجبنا نحمي الناس بأرواحنا هي دي وظيفتنا.
نسيم: قد إيه ده عمل عظيم بجد، وقد إيه مشاعرك راقية مليانة شجاعة وتضحية، محظوظة الناس لما تلاقي حد زيكم يديها الأمان من غير مقابل، أكيد الناس معاكم هتحس فعلا بالأمان،
خالد: ده واجبنا، والقسم اللي أقسمنا بيه نضحي بأرواحنا فداء البلد، ونحافظ على الأمن والأمان.
نسيم: بجد مش عارفة أقولك إيه على شجاعتك، وقوة شخصيتك، وتضحيتك، مش لاقية كلام أقوله غير أني سعيدة بمعرفتي بيك.
والدة نسيم: هاي أنتِ روحتي فين؟ بصي يانسيم أنا ربيتك على الصدق والصراحة، وبعد حالتك دي وسرحانك؛ أنا مش هضغط عليكِ عشان تحكيلي أوتتكلمي، هستنى لما تحبي تتكلمي هتلاقينى أسمعك.
أنت تقرأ
جريمة الانتقام
Short Storyفى عالم يجمع بين الواقع و الخيال اخترت لكم بعض القصص فى احداث حقيقية لشخصيات خيالية تربطهم جريمة غامضة تحمل العديد من الاسرار عن الحب و الكراهية و عالم السادية لتحتار فى معرفه الجانى من الضحية لا تعرف ان كانت انتقام ام تحقيق لعدالة السماء . غموض و...
