جريمة الانتقام

الفصل الرابع

بعد إعلان الشمس لبداية يوم جديد يشرق بضوء النهار، بعد عتمة ليل حجبت فيه السماء ضوء نجومها وشعاع القمر عن الأنظار برداء من الغيوم، لتزيد من ظلمة هذا الليل لكن الشمس جاءت في تحدى لكل هذا الظلام، لتتسلل أشعتها بخفة مبددة هذه العتمة، وبعد أن بدلت الظلام بالنور تربعت على عرش السماء لتعطي الأمل في يوم جديد يملأه النور والحياة .

وبالرغم من إتمام الشمس مهمتها لتشرق للجميع، إلا أن الغرفة التي تم عزل إلهام بها والتي لا تحوي بداخلها أي مصدر للضوء غير مصباح وسط سقف تلك الغرفة، فلم تعلم بسطوع شمس النهار، فمنذ دخولها إلى تلك الغرفة والتي تعد صغيرة الحجم نسبيًا، فلا تحتوي إلا على مكتب خشبي متوسط الحجم متهالك الشكل بكرسي خاص به يشبهه، وفي الجهة المقابلة زوج من الكراسي الخشبية القديمة والتي تشبه تلك الكراسي الموجودة بأحد مقاهي الأحياء الشعبية، والتي تتميز بعدم راحة من يجلس عليها طويلًا، إلا أنها لم تهتم بكل ذلك فبعد إغلاق باب الغرفة عليها انفصلت عن هذا العالم لتعود بالزمن إلى الوراء تتذكر مشاهد قديمة في بداية تلك الحكاية.

- نسيم: بسيل إنت متاكدة من قرارك ده؟ إنت عارفة إنك بكده بتدخلي برجلك لجحر التعابين! أنا مش عارفة أنتِ ازاي فكرتِ في كده أصلا! طب وحياتك وبباكِ ومامتك هتعملى معاهم إيه لو عرفوا، وازاي هتقدرى تحمي نفسك.

- بسيل (إلهام): مش حقول متخافيش عليا، لإن أنا أصلًا مرعوبة، بس لازم حد يقوم بخطوة، حد يواجه، ومحدش حيقدر يواجه إلا لو كان ليه ضهر جامد يتسند عليه، عشان كده يمكن أكون الوحيدة اللي تقدر تعمل كده، شغلي مش هيتأثر ومحدش هيعرف حاجة غير في الوقت المناسب.

- نسيم: يا بنتى طب أنا يا بسيل إنتِ عارفة إني مليش غيرك حتتخلى عنى بكل سهولة .

- بسيل: إنتِ عارفة أنك أختي وصديقتي وجزء من روحي وأكيد هعرف ألاقى طريقة نتكلم ونتقابل.

- نسيم: طب ليه كل ده عايزة تقطعي علاقتك بيا.

- بسيل: افهمي قدام كل الناس احنا اختلفنا وبعدنا عن بعض، هنكتب كده في كل مواقع التواصل وإننا في حالة حزن، من غير ما هنقول إيه الأسباب أو حتى نغلط في بعض، عشان الكل يعرف إن مفيش حاجة تجمعنا وبكده لو دوروا ورايا يعرفوا إني وحيدة ميحاولوش يأذوكي .

نسيم: والله أنا خايفة تكوني مكبرة الموضوع وكل ظنونك دي تطلع أوهام.

بسيل: طب ورنا اللي انتحرت نسيتيها وأنتِ واللي اتعرضتي ليه كل ده أوهام! لازم حد يكشف العالم الخفي ده.. لازم كل الناس تعرف إيه اللي بيحصل في الضلمة عشان ميجيش يوم أخسرك زي ما خسرت رنا ويا عالم كام واحدة خسرت في العالم ده . العالم اللي بيبدأ بسحر وجمال وتشويق للتجربة والنهاية.