قبل عرض الفيديو ساعتين FLASH BACK
حازم: برافو عليك يا فتحي، قدرت توصلنا من غير ما نتوه فالصحرا، قولي أنت تعرف التفاصيل الفيلا كويس.
فتحي: والله يا باشا أنا أعرف مكانها بس، وأعرف البدروم لأني كنت كل لما أجي هنا الحرس يدخلوني البدروم آكل وأشرب، وأتفرج على الدش لغاية ما الباشا يخلص وأمشي معاه.
حازم: والبدروم ده كام أوضة؟
فتحي: هو أوضة واحدة، والفيلا زي ما حضرتك شايف دور واحد ومحندقة أوي، يعنى تيجي كده تلت أوض وصالة، وأوضة البدروم.
حازم: ده أنت حافظها!!
فتحي: في مرة جينا هنا الكلام ده قبل الحادثة بأسبوع، وكانت أول مرة الباشا يجي هنا لوحده مايبقاش حد مستنيه، وطبعا دخلت المطبخ عملتله القهوة وجبتهاله على المكتب، ومرة واحدة تعب جريت أدور فالأوضة التانية على علاج ليه فشوفت ساعتها أوضة نوم، وأوضة صالون، غير الرسبشن وأوضة المكتب، ومطبخ، وحمام.
حازم: لماح أنت يا فتحي، لأ و ذاكرتك حديد، طب يا فتحي هتستنى معانا هنا شوية لغاية ما نخلص معاينة، ونرجع على القسم نقفل المحضر.
فتحي: تمام يا باشا.
خالد: حازم باشا رجالتنا مسحوا الفيلا كلها، مفيش فيها لا كاميرات مراقبة، ولا غرف سرية، ولا حتى مكتبة.
سمير: أنا نفسي أفهم أنت مجرجرني وراك ليه، ما أنا عندي شغل هناك عايز أقفله عشان أجهز التقرير لجنابك، وأجهز كمان العرض اللي أنت طلبته.
حازم: يا سيدي كنت فاكر أنها هتطلع نرى الفيلا التانية، ونلاقي فيها بلاوي.
سمير: يبقى أنت لسه مفهمتش دماغ الراجل ده ماشية ازاي.
حازم: يعني إيه مش فاهم؟
سمير: الراجل ده مش هيسمحلك تعرف حاجة إلا اللي هو عايزك تعرفها، بس وهو كان عارف أن فتحي أكيد هيبلغنا بالفيلا، ومادام كان بيجي هو وفتحي وتكون الناس موجوده يبقى مش هيحتفظ فيها بحاجة يقدروا يوصلوها فى غيابه، وأكيد مفيش كاميرات عشان محدش يعرف حاجة من اللي كانت بتحصل.
حازم: فلتت منك المرة دي، فتحي قال أنه جه هو ومختار قبل الحادثة بأسبوع ومكانش فيه حد فالفيلا، معنى كده أنه سايب حاجة فالفيلا، وعايزنا نلاقيها، فالدور عليك تلاقي الخيط اللي هو سايبه.
العسكري: حازم باشا لقينا خزنة ورا اللوحة اللي فأوضة المكتب.
حازم: اتفضل يا سمير باشا مش قولتلك هحتاجلك.
بعد مرور عدة دقايق
حازم: طبعا عشان نفتح الخزنة هنحتاج لأيام عشان نعرف الرقم السري، لأنها من نوع خاص جدا أكيد مش هتفتح بسهولة.
أنت تقرأ
جريمة الانتقام
Contoفى عالم يجمع بين الواقع و الخيال اخترت لكم بعض القصص فى احداث حقيقية لشخصيات خيالية تربطهم جريمة غامضة تحمل العديد من الاسرار عن الحب و الكراهية و عالم السادية لتحتار فى معرفه الجانى من الضحية لا تعرف ان كانت انتقام ام تحقيق لعدالة السماء . غموض و...
