جريمة الانتقام

الفصل السادس

في مكتب حازم

حازم: اقعدي يا الهام، اتفضل يا متر، راح فين المتر صادق؟

المحامي: هو عند النائب العام بيطالب بوقف النشر عن القضية، طبعا حضرتك عارف أن موكلتي كشخصية عامة ممكن سمعتها تتأثر، وخصوصا أن لسه التحقيقات مخلصتش.

حازم: وده اللي خلاني أطلب المتهمة، عشان تساعدنا فالتحريات، وتجاوب على الأسئلة، ويمكن ده يساعدك أنت كمان .

المحامي: يا باشا موكلتي مش هتتكلم إلا قصاد النيابة.

إلهام: استنى يا متر أنا اللي أقرر أجاوب على ايه.

قالتها بنظرة حادة وجهتها نحو عيني المحامي، جعلته يصمت في لحظة كطفل وبخته أمه؛ ليصمت عن الكلام، تعجب حازم من رد فعلها وقوة شخصيها، التي تثبتها مرة بعد الأخرى، ونظرتها الحادة، ليعود إليه إحساس بأنها إحدى المشعوذات التي تطلق سحر ما بعينها؛ ليخضع لها الماثل أمامها مهما كانت شخصيته، دار ذلك بذهنه للحظات قبل أن يتدارك الموقف ليعود لسؤالها، بعد ما أيقن برغبتها في الكلام.

حازم: طب نبدأ من الأول، أنتِ تعرفي إيه عن الملفات دي!

قالها مشيرا بيده لعدد من الملفات السوداء، والتي تم إحضارها من فيلا مختار السياف.

إلهام: أعرف جزء منها، مكنش فيه فرصة اني أعرفها كلها.

حازم وقد أمسك بيده الملف الذي كان يتميز عن الباقي لكبر حجمه: تعرفي إيه عن الملف ده؟

إلهام: دي دراسة كان عاملها مختار، كان مستخدم فيها أبحاث ميدانية لعلم النفس والاجتماع عن المجتمع المصري، وكان فيها بيانات ومعلومات لكل محافظة من محافظات مصر.

حازم: جميل جدا، إيه السبب اللي يخلي مختار يعمل الدراسة دي، وهيستفيد منها ايه؟

المحامي: أعترض، أنت بتسأل موكلتي عن سبب حاجة هي ما شاركتش فيها.

نظرة حادة من إلهام إلى المحامي ليلتزم الصمت من جديد.

الهام: سبق أني قلت لحضرتك أن مختار كان بيدرسلي تنمية بشرية، وأهم حاجة أنه يعرف كل معلومة عن المجتمع، اللي هيقدمله نصايح وطرق لمشروعات يقوم بيها عشان ينجح.

حازم: بس أنا هنا مش شايف دراسة اقتصادية للمشروعات اللي قلتي عليها، وأظن أنك خريجة إدارة اعمال وفاهمة، الدراسة دي عن الحالة الاجتماعية وأسباب الطلاق، والمشاكل الزوجية، ولا أنا بقول كلام غلط!

نظر حازم بشدة لعينيها هذه المرة، كاسرا حاجز الخوف من نظراتها في محاولة لفرض سيطرته عليها، لعله ينتصر تلك المرة في حرب العيون.

إلهام: أهم مشروع ممكن تعمله فالحياة؛ هو الارتباط وتكوين أسرة، لو بدأت فيه لازم تكمله لغاية ما ينجح، مينفعش تسيبه وسط الطريق لأنه لوفشل؛ هنخسر معاه كل حاجة، فلازم من الأول تختار مشروع صح على قد إمكانياتك، وتدرسه كويس وتنفذه صح، وتعمله تسويق يخليه ينجح.