#دائرة_الجحيم
بقلمي:هبه محمد علي
الحلقة السادسة عشر
مع رزعة سعد للباب إهتز وما قفل بقى يتلولح بس أنا إنهرت وحيلي مات بركت في الواطة ولا دمعة ما نزلت مني من شدة الصدمة، وما كنت بفكر مخي فااااضي واحاسيسي ما فيها لا زعل لا فرح خاوية بس.. أنا في قعدتي ديك الباب فتح ودخلت مرام وراها لبنى صاحبتها ، ولما شافوني جو جايين علي ...
مرام كانت بتكورك وهي جارية علي وراها لبنى:
-بسم الله الرحمن الرحيم، هيام مالك؟
انا مارديت لبنى لمستني وقالت:
-جسمها بارد يا مرام..
-ارفعيها معاي..
دخلوني البيت جوة وختوني في السرير ، ولبنى طلعت ريحة من شنطتها الشايلاها بخت منها في منديل وشممتني ليها ، في اللحظة دي كانت مرام جابت لي موية فيها ملح وسكر وسندتني:
-هي ما مغمى عليها عشان تشمميها ريحة، دا شكلو هبوط ثبتيها معاي نشربها الموية دي..
-انا العرفني شنو بسوو موية ولا بختو ريحة اتخلعت بس...
كانت مرام مصرة اشرب الموية ، شربت بسيط ورقدوني تاني ،وبدت تحقق معاي :
-انا عارفة اتي قوية وكونك توصلي الحالة اللقيناك عليها دي معناها حصل شئ كبير، وريني مالك؟؟
ياداب بعد كلامها دا بديت أحس بالوجعة وعيوني إتملت موية.. مرام حضنتني وبقت تحنس فيني أحكي ليها، أنا دايرة اوريها لكن لما نكون برانا، وفعلاً لبنى حست بكدا وقامت على حيلها شالت شنطتها وقالت:
-يلا يا جماعة بستأذن أنا، شكلو الموضوع خاص، إن شاء الله يا هيام ما تشوفي شر ..
طلعت معاها مرام وهي بتحاول تحسسها ان الحالة واحدة وما في شئ يتدس عليها..
وصلتها وجاتني راجعة لقت حالتي صعبه من البكاء، حضنتني مسااافة بدون ماتنطق بحرف لحد ما خلصت بكاي كلو وقالت:
-حسيتي روحك فكيتي عبرتك كلها؟
هزيت ليها راسي بأاي، قامت على حيلها وجرتني من يدي :
-امشي غسلي وشك وتعالي ...
مشيت غسلت وشي وجيت لقيتها متمحنة عاينت لي أشرت بيدها على الكنبة عشان أقعد جنبها قعدت وكنا ساكتين قريب العشرة دقائق لحد ما قالت لي:
-عارفاك بتحبيه وقلبك مقطوع، وجيتو دي قلبت عليك مواجع، لكن كمان الصبر أحسن من الجرسة الإتي فيها دي، وماتشمتي الناس فيك، لأن تصرفاتك دي ح تضرك بس وما ح ترجعو ليك...!
ياحليلها متخيلاني ببكي عشان مجدي، مع إنو وجع مجدي أكبر من انو أعبر عنه بدمعتين...
-بس انا ماببكي عشان مجدي، ، أنا ببكي على روحي وحقارة سعد بي...
- دا عشان ضربك كف يعني؟؟؟
ابتسمت بدون نفس وقلت ليها :
-لو على ضربو ماكان فرق معاي، لكن انا ببكي إني إفتكرتو راجل قدر كلمتو، وزيادة على القروش الشالها مني اديتو دهبي عشان يطلقني...
قاطعتني وهي مخلوعة :
- هيام انت صاحية؟؟من شال منك القروش وما طلقك مفروض تقنعي منو وماتصدقيه في حاجة تاني.. وماتكوني أديتيه الدهب كلو؟؟؟
دنقرت وبقيت احرك جسمي لقدام ولوراء ودموعي نزلت...
-ردي علي ، أديتيه الدهب كلو؟؟؟
خلاص انا في اللحظة دي انا انهرت عديل...
-أاااي...
-لا حول ولا قوة الا بالله، الله يخلف عليك ، بس بالغتي شديد، لكن لو بتسمعي كلامي تقومي هسي توري جدي يقلعها منو...
-جدي يلقاه وين هسي يكون في الطيارة..
نططت عيونها:
-مطار شنو؟ماشي وين هو؟
-ماليزيا يقضي شهر العسل بقروشي يا مرام بقروشي!!!
-قروشك مغستها ما راحت كمان تديه الدهب؟؟
-عليك الله يا مرام مافي زول يعرف الكلام دا بالذات جدي، دهبي دا أكتر من ٧٠٠ جرام فيه شئ وارثاه من أمي، أحييي يا قلبي...
حبوبة جات داخلة من غير مقدمات ومسكتني من اكتافي هزتني وهي زعلانة:
-دهبك الشالو منو؟؟
انا كنت مخلوعة ماقدرت ارد عليها وهي كانت زعلانه وتجوط لما كررت السؤال وبصوت أعلى المرة دي مرام ردت عليها:
-سعد يا حبوبة، وعد هيام يطلقها لو أدتو الدهب، وهي صدقتو وادتو ليه لكن غشاها وماطلقها..
حبوبة فكتني وقعت بقوة في الكرسي وكانت بتتنفس بحرقة:
-الله يهديك يا هيام، تتصرفي تصرف ذي دا كيف؟
إنت سعد دا غبي عليك ؟جنو كضب ولف ودوران.. شال منك الدهب متين؟؟
رديت عليها بصوت ضعيف:
-قبيل لما شال شنطتو وكان طالع المطار..
ومرام فجأة نطت وقالت:
-دهب قدر دا يستحيل يمشي بيه المطار، ما ح يسمحو ليه يسافر بيه ح يكون دساه هنا قبلو...
حبوبة ساكتة وسرحت مسافة وقالت لي:
-الدهب دا اديتيه ليه في كيس دعايات كدا لونو اخضر؟؟؟
انا نططت عيوني وقلت ليها :
-اااي يا حبوبة، إتي عرفتي كيف؟؟
حبوبة قامت على حيلها وبتصلح في توبها قالت :
-قبيل لما جاء يودع ناس امو، أداها الكيس الوصفتو ليك دا وقاليها لمي لي الأمانة دي كويس، أنا هسي ماشة عليها بقلعو وأجي راجعه..
يتبع...
*****--------******---------*****--------*****
