#دائرة_الجحيم
الحلقة الخامسة
بقلمي: هبه محمد علي
________
النسوان ديل بقن يتجارن ويرشوا فيني بالموية وعمتي منيرة جرت جابت ريحة... وشممتني ليها... والفنانه وقفت غناء...إشتغلوا فيني حاجات بلدي علشان اصحى وعمتي دي عشان حنينه علي قالت ليهن :
-زحن منها لغادي، كدي خلنها تتهوى .. نفسها دا إتكتم..
واحدات قالن :
-أقروا ليها قرآن ، دي عين والله وأصابتها ..
انا ماكنت سامعه باقي كلامهن كويس ، بس بجيني الكلام طشاش طشاش ..
دخلوني غرفتي واتلموا حوليني من جديد وبقوا يصحوا فيني لحد ما فتحت..
حبوبتي كانت قلقانه علي ولمن شافتني بديت افتح فرحت وقالت لي :
-الحمد لله بسلامتك يابتي..
بصوت بعيد رديت:
-الله يسلمك حبوبة...
-خلاص يا جماعه خلوها ترتاح... اتفضلوا برة العشاء جاهز...
الناس طلعوا يتعشوا، وانا دموعي دي أبت ما تقيف نهااائي...باقي لي يومين بس للعرس.. وبديت اعاتب في نفسي واحدثها ..
-دا شنو السويتو في روحي دا؟ كدا انا حكمت على روحي بالدمار!!
لكن مافي تراجع تاني خلاص...!! يا الله إنت أعلم بي من روحي ، قدر لي الخير ورضيني بيه يارب...
اليومين البعدو عمتي منيرة ما قصرت معاي مهتمه بأكلي وشرابي،، وقبل العرس بيوم ودتني الكوفير اتحننت .. ومشت معاي يوم العرس جهزوني و كانوا بيعملوا لي في مكياج العرس وانا مامعاهم نهائي ماقادرة احس بأي شئ كأني بحضر في فلم ومامنتبه فيه ولا مركزة، ،، فجأة تلفون عمتي ضرب ... وردت... جات حضنتني وهي بتزغرد... ومرة تبكي ومرة تبوسني...
أما أنا حسيت قلبي دا اتقسم نصين... نصين شنو حسيتو إتقطع حتة حتة... وكأني كبوا فوقي مويه باااردة لما جسمي دا إتجمد وخدر ... ماحاسه بأي شي... وكل بنات اهلي وجزء من صحباتهم كانوا بيباركوا لي.. بس انا بمد ليهم يدي ... لكن ماسامعه هم بيقولوا لي في شنو...!
ولا حتى شايفاهم هم منو...!! كنت بفكر بيني وبين نفسي وأقول انا كدا رسمياً فقدت مجدي خلاص؟؟؟؟؟
لااا... !
كان عندي أمل لآخر لحظة إنه تحصل معجزةلكن للأسف مافي شي حصل.!
يارب الصبر... يارب الرحمة...
بعد قريب ساعه او اكتر خلصت مكياج.. وكان مفروض من الكوفير نمشي الصاله بعد ساعه كدا... منتظرين سعد يجي...
سامعه عمتي تتكلم في التلفون وبتعاين لي...
والله بدون ماتقول اي كلمة عرفت إن البتكلم معاها دا مجدي..!
حسيت بيه لان قلبي بقى دقاتو مامنتظمة ... وتنفسي بقى صعب... سامعاها بتتكلم...
-أي عقدو.. لا نحن في الكوفير... لا ما جاء لكن بعد كدا ح يجي ونمش الصاله...
طيب ح اديك ليها...
وجات وقفت جنبي مدت لي التلفون... بدون ما تتكلم.. اترددت مسافه،، لكن مشتاقه ليهو،، عاوزة أسمع صوتوا،، عاوزة أقوليه أنا ماقادرة أعيش بدونك...!!
ختيت التلفون في أضاني ...
-الوو
- ....
-الووو.. هيام ...هيااام كيفك..!!
-.....
-الله يرضى عليك إتكلمي،، عارفك سامعاني،، ما عاوز أعاتبك.. عاوز أقول ليك إن شاء الله ربنا يسعدك ... ويهنيك... وانا عافي ليك... وحبك في قلبي لو مازاد ما ح ينقص،، لكن انت كدا مرة أخوي،، ربنا يجعل بينكم سكينة ومودة...
كنت متأكدة إنه إحساسوا بالوجعه لو ماقدري أكتر مني... وصوتوا ألمني شديد لانو واضح بيبكي..!
- الله يبارك فيك.. .!
وقفلت الخط.. ماقدرت اتحمل اكتر من كدا..!
عرفت إن خلاص مفروض نطلع علشان نمش الصالة لما عمتي قالت سعد برة...كنت حاسه بشلل.. وحاسة روحي دي مارقه مني،،بقيت أكركر في رجولي ، حاسه إني بقيت جسد بلا روح ، أعلنت بداخلي موت قلبي ، شيعت جثماني براي ، أحيي من الوجع ... الله يصبرني...
كنت ماسكة التلفون وضاغطه عليه بيدي الاتنين وماحاسه بحاجة لحد ما عمتي جات مسكتو مني.. وقالت لي يلا سعد جاء خلاص ح نمشي الصاله...
ما عارفه اقول شنو... لان الإحساس جواي أكبر من يتوصف..
-مبروك يا عروس..
ماقدرت ارد عليه هزيت راسي بس...
ركبنا في العربية.. قدام كان شوقي وعمتي منيرة...
ووراء أنا وسعد.. كنت متضايقه وحاسة روحي فارقتني،، وجسمي تقيييل ،، لما سعد يقرب مني او يميل علي أثناء الونسه كنت ببعد وبتلصق على باب العربيه.. وعمتي وشوقي عارفين الحاصل ، كانوا بيحاولوا يلطفوا الجو بيناتنا..
وصلنا الصاله وكان صوت الغناء عالي .. ولاقونا الناس جنب الباب يباركوا،، اول زول حضنتني حبوبة وحسيت إنها بتواسيني،، وانا كأني ماموجودة ما ابديت أي رد فعل لا حزن لا فرح وشي كان خالي تماماً من التعابير..
وصلنا أخيراً الكوشه وقعدنا كان الناس يضحكوا ويرقصواا مبسوطين، ماعدا أنا...
اليوم عدى كيف مابعرف بس فجأة لقيت الحفلة خلصت وسعد ماسكني من يدي واتحركنا للعربية.. مشينا الفندق ..يادوب كدا أنا بديت استوعب، واترعبت أكتر .. دا شنو السويتو في روحي دا؟!الدموع نزلت عشرة عشرة...
سعد قفل الباب حق الغرفه ورانا... وقبل علي...
-شوفي يا ريهام، ما تتخيلي إني بحبك ولا في يوم من الايام ح احبك.. كل الحصل إني إشتهيتك بس..ولو لقيت فيك فرصه كنت أخدت الدايرو من غير إلتزام زي دا،، وانا عارف الحب البيناتكم إنتي ومجدي. . ما تفتكري اننا ممكن نعيش حياتنا كزوجين، انا وقت ما اكون عاوزك ألقاك أما انتي ماعندك علاقة بتصرفاتي.....
وأعرفي إنك مامغصوبة على براك أنا كمان لو ما جدي حلف علي وانا خايف منو ما كنت بعرسك...!
انا ما دايراهو صاح.. ولا كنت حاباهو.. لكن الوجعني ، انه ما دايرني وانا فقدت بسببو حب حياتي كلها...!!!
يتبع...
