دائرة_الجحيم
الحلقة التاسعة عشر
بقلمي:هبه محمد علي
كنت بكورك من قوة ضرب سعد لي، وفي زمن قصير البيت إتملى ناس ، وكان أولهم مجدي حجزني منو وبقى يضرب فيه وينبذ.. وسعد يكورك ويقوليه :
-دي مرتي إن شاء الله أكتلها، إت دخلك شنو؟
-دخلني المروءة والمرجلة..
-قصدك الحب؟ات قايلني ماعارف علاقتكم لسه مستمرة بالذات لما كنت مسافر؟
مجدي طوالي كفتو وقال ليهو بحرقة:
-إنت واحد حيوان ومامحترم..
وبقوا يتصارعوا مع بعض ومجدي دفرو ورماهو وهو بقى يتحلف ويتوعد ويرفع في صوتو وقال لمجدي بكتلك وبكتلها ، من يومو سعد قوتو علي انا بس لكن مع غيري قوتو في لسانو بس و عجبتني دقة مجدي ليهو ..
الحريم الواقفات قعدن يصرخن وانا كنت مبسوطة ما عشان مجدي قدر عليهو وبس لكن عشان كنت متمنية اشوف فيهو يوم زي دا ..
رغم دقوا لي لكن ابتسمت وهو شافني وابتسامتي غاظتو غيظ شديد ،جدي الشبلي وصل البيت وسمع الصراخ والكوراك وجاء لقى سعد يتوعد ويتحلف ودخل قال بحزم:
- كفى ...
وكلهم سكتوا وطردهم من بيتي حتى سعد زاتو طردو مجدي حاول يشرح ليهو لكن جدي قال ليهو:
- امشي بيتكم ما عاوز كلام مع زول وانا بعرف كل شي بطريقتي..
برة كان مجدي مشى يسأل مرام عن الحاصل لأنها أكتر زول قريب مني ،بس هي نكرت معرفتها بحاجة وحاول كتييير يحنسها تحكي لما قنع منها مشى خلاها ، وكانت لبنى واقفة قريب منهم شافت مرام راجعه بيتي مشت لحقت مجدي ونادتو، وقف ليها وبدت كلامها بمياعة:
-عارفة الحصل لهيام دا مزعلك، لكن هي اختارت شريك حياتها وشقت طريقها مافي داعي إت تجري ورا السراب..
عاين ليها بنفاذ صبر واتكلم بحزم :
-خليك واضحة وبطلي لف ودوران..
ابتسمت بدلع وهي بتقول:
-اشتري الشاريك وبيع البايعك..
-بس انا شاري ومنتظر لآخر العمر ، شيليني من راسك أحسن وشوفي مستقبلك..
كلام مجدي وقعو كان على لبنى زي الصاقعة شعرت باحباط قاتل وقعدت تبكي وهو ولا عبرها لانو اصلا ما كان برتاح ليها وقال ليها:
- دموعك دي انا عارفها دموع تماسيح وما بتهزني لاني ما حصل ارتحت ليك نهائي وتاني ما تحاولي تتكلمي معاي او تدخلي نفسك في خصوصياتي انا حر في حياتي احب واكره بمزاجي..
وفات منها انا سمعت كل شي لانو كان متنرفز وبتكلم بصوت عالي ولقى فرصتو فيها الساعة ديك جدي كان بعاين لي وانا ما كنت منتبهة ليهو وحتى هو زاتو سمع كلام مجدي مع لبنى وانا انبسطت من رد مجدي وابتسمت بدون ما انتبه،
جدي اتنحنح وانا لمن انخلعت و صلح قعدتو وقال لي:
-الحصل شنو ؟
انا ما كنت مجمعة وناسية سعد وناسية كل الدنيا ومفرحني كلام مجدي للبنى قلت ليهو:
- لبنى دي جارية وراء مجدي من زمان و..
جدي ضحك وقال:
- ما سألتك من البرة ديل ووريني الحصل شنو قبل ما انا اجي؟ من غير ماتدسي ولا حرف احكي الحصل كلو ...
طبعاً انا خفت من رد فعلو لو حكيت الحقيقة وبديت أكذب:
-اتشاكلنا انا وسعد عشان عرس فوقي وماراضي يطلقني و وقت المشكلة بينا سخنت ضربني وانا كوركت واهلي اتلمو ومجدي ضربو..
باختصار حكيت ليهو كل السواهو سعد من غير ما اجيب سيرة الدهب والدكاكين..وهو فات على كدا ماعارفة راسو فيه شنو..
كنت سرحانة في الحصل لما لبنى جات داخلة ومن غير ماتتكلم معاي دخلت الغرفة شالت شنطتها وقالت لي مع السلامة انا كنت شمتانة فيها ييني وبين نفسي وقدر ما حاولت ادس فرحتي ما قدرت وهي حست بي شمتانة وعاينت لي بنظرة غريبة ما قدرت افهمها لكن ما اهتميت بيها كتير المهم انها انذلت وعرفت مكانتها وانها غير مرغوب فيها..
بعد كدا لبنى قررت تنتقم مني ومن مجدي وقررت تخطف سعد لانها عرفت موضوع القروش والدهب من مرام وعرفت سعد زول طيرة ساي، وقالت في نفسها مجدي اباني عدييل، وسعد ساهل اشلبو لانو عينو ذايغة وسهل اشيل منو القروش والدهب حقات هيام ولو لقيتو مانافع اطلقو واشوف مستقبلي ..
انا دا كلو ماكنت عارفاه ولا فارق معاي، بس صحتي كانت كل يوم ماشة في النازل، وعدم الاكل ليه فترة مافارقني، وجسمي ماشي نحفان وبطني بقت قالبة طبيعي لحد مافي يوم مشيت اصبح على جدي وحبوبة وجيت واقعة ليهم في نص الصالة ولا نفس مافيني، جرو بي المستشفى وإجراءات وفحوصات ودربات لما فتحت لقيت جدي وحبوبة وكلهم حواليني، يحمدو لي في السلامة ويباركو لي قلت لحبوبة مبروك على شنو؟
بفرحة قالت لي :
-الدكتور قال اتي حامل...
يتبع..
****------*****-------*****------*****-------****
#دائرة_الجحيم
الحلقة العشرون
بقلمي هبه محمد علي
انا قدر الحيل الكنت حاساه بعد صحيت مات مع سماعي لكلام حبوبة ، وماعرف أفرح لأن في حياة بتتكون جواي وح أكون أم ودا حلم كل بت، ولا أزعل ان في حاجة ح تربطني مع الزفت سعد دا، والزاد الطين بلة ان سعد جاء داخل من برة يكورك:
-حامل ياهانم؟من منو؟ وجبتي المصيبة دي من وين؟مجدي مش كدا؟
كلامو دا كان حار وقاسي لدرجة جدي ما استحملو ونهرو قدام الناس وضربو كف، كل الناس اتهجمو من الحصل و سكتو وجدي كان واضح زعلو في رجفة جسمو وراسي فيه كلام كتير .
اما سعد حس بالغُبن والغضب و فات البيت زعلان زعل شديد وقرر يطلقني لكن ما داير يطلق بلاش ، خت خيارات كتيرة يساومني عليها والافكار إتزاحمت في راسو..
ولمن وصل البيت لقى لبنى واقفة جمب الباب وقال ليها:
- اتفضلي خشي البيت بيتك..
هي طبعاً ماصدقت قالت ليهو :
-جيت لمرام وما لقيت زول في البيت اتصلت عليها كتير ماردت، وصل ليها سلامي وانا بركب تكسي ارجع بيتنا..
سعد بعاين ليها بإيجابية وهي النصيحة سمحة سماحة واضحة وقاليها خلاص بكلمها وبوصلك ..
هي اصلاً متمنية فرصة بس لكن حبت تتعزز:
-انت مشغول وانا ما عاوزة ازعجك ..
عجبو دلعها وماعاوزها تمشي بسرعة :
-ماهو يا تدخلي با اوصلك ليهم في المستشفى يا اوديك بيتكم اختاري..
عملت فيها مخلوعة وقالت ليه :
-مستشفى شنو سجمي؟؟
-لالا ماتتخلعي، دي هيام بتتدلع بس..
ماصدقت لقت فرصة وجاتها سيرة هيام..
-هيام مالها في المستشفى؟؟
-طلعت حامل..
ضحكت بخباثة وماصدقت لقت ثغرة:
-حامل من منو؟
عملت فيها انها اتخلعت وناكانت تقصد.. بقت تتمتم ومن جواها ترقص فرحانة..
-قصدك شنو؟
-لالا مقصدي شئ ، بس هيام زاتها ماتستاهلك انت كتير عليها،ما انا بعرفك كويس وحاسداها والله ، مرة عندها راجل راقي ووجيه ووسيم وجنتل زيك كدا مفروض تطير من الفرح لكن هي ماشايفة غير مجدي..
وهو الغبي صدق شكرها ليه وقعد يتبسم وقال ليها:
- والله انا متضايق شديد وزهجان من البيت ومن ناس البيت ولو ما عندك مانع نمشي حتة هادية شوية نشرب لينا حاجة اتعرف عليك اكتر، وارجعك بيتكم..
تتبسم وتعمل فيها خجلانة و تقول ليهو:
- انا حاسة نفسي بحلم وما مصدقة نهائي انك في يوم تتكلم معاي , خايفة انا
_ خايفة من شنو ؟
_ خايفة انو يكون دا حقيقة وما حلم مع اني متأكدة انو حلم
_ ليه بتقولي كدا ؟
_ سعد اوجه شاب في عايلة الشبلي موصلني بعربيتو وعاوز يتعرف علي انا ؟
كل واحد كان عندو أغراض عاوز يصل ليها..
أنا قعدت اربعة ايام في المستشفى محاليل وعلاجات لحد ما بقيت كويسة الحمد لله، واخيرا الدكتور قرر يخرجني، وطبعا رجعت معاي حبوبة ومجدي المافارقوني ولا ثانية من لحظة دخلت المستشفى.. وحبوبة حلفت أقعد معاهم في البيت لحد ما تطمن علي..في الفترة دي لاحظت إن جدي بقى دايما سرحان وكلامو بسيط، شكلو برتب ليه في حاجة ..
خلاص بقيت كويسة وقلت راجعة بيتي ..جاتني حبوبة شايلة الكيس بتاع الدهب المابغباني.. قلبي نغزني وهي اتكلمت:
-هيام يا بتي، انا ختيت الدهب في الخزنة، وجدك البارح شافو، وحلف علي أرجعو ليك لما سألني انا لاماه عندي لشنو وقلت ليه خايفاك تضيعيه، وما قدرت اوريه الحاصل ، عشان كدي شيلي دهبك لميه وخليك حريصة الشيطان دا مايغشك تاني ويشيلو منك..
وعدت حبوبة أخلي بالي من روحي ومن الفي بطني ودهبي..
وصلتني بيتي هي ومرام ، وقالو لي ولا قشة من الواطة ماترفعيها..
-انا كلمت البنات الشغالات ينضفو ليك ويخدموك لحد ما الله يحلك بالسلامة..
ومرام قالت:
وانا ح احاول اسوي ليك كل البقدر عليه واونسك..
فاتو مني وما قعدت كويس جاني سعد يرغي ويذبد:
-انا مامعترف بالفي بطنك دا، وداير أعرف أبوه منو؟؟
بصوت مهزوز وعبرة ىديت عليه:
-انا ما زولة مشي بطال وات عارف يا سعد..
-يازولة هوي لا عارف لا شي، وريني بس أبوه منو، انا ذاتي بقيت ماطايقك..
-خلاص طلقني..
-كلمتك قلت ليك مابطلق بلاش.. جيبي الدهب والعمارات ونتفاهم، غير كدا مافي طلاق وانا برضو مادايرك..
بعد كلام كتير ومناكفات سلمتو الدهب بالرغم من وعدي لحبوبة..
شال الدهب وقالي لي:
-بعد كدا باقي العمارات والدكاكين ، تعملي لي تنازل عنهم..
-لكن ورقهم عند جدي اتنازل من غير ورق كيف يا سعد؟؟
عاين لي بمكر وضحك:
-جدي خاتيهم في خزنتو، واتي اكتر زول بيثق فيك وساهل جدا تفتحيها وتشيلي منها الدايراه من غير مايشك فيك..
خلعني كلامو ومططت عيوني:
-دايرني أسرق جدي يا سعد؟؟
-تسرقي شنو؟؟ ح تشيلي ورق ممتلكاتك من خزنتو بس ، ما تمدي ايدك لخاحاتو هو ، لا سرقة لا شي..
دي آخرتها؟عشان أتخارج من سعد افقد ثقة جدي وأخون أمانتو؟؟
دا شعور بطال و إحساس كعب ..
يتبع..
