#دائرة_الجحيم
الحلقة الثامنة والعشرون
بقلمي:هبه محمد علي
وقفت في مكاني داك وانا مامستوعبة شي، قدر مافكرت وخمنت ماجاني راي مفيد،ياربي زُحل دي حركاتها مالها كترت كدي؟
اسئلة كتيرة في راسي دايرة ليها اجابات انا سمعت كل الكلام دا لكن الراجل دا منو؟ وقروش ؟شنو وعمل لزحل شنو؟ وجدادة وبيضها؟
انا لازم اعرف كل شي ، فكرت اوري مرام تاني قلت لا احتمال كلامها صاح وزحل هي الكتلت علياء ولو وريتها وزُحل قتلتها برضو ما ح أقدر اسامح نفسي اي حاجة ولا مرام لانها الوحيدة البتحس بي، وعي أختي وصاحبتي وكل شئ سمح بالنسبة لي في الدنيا دي.. رجعت بيت جدي وقررت باكر ما اخلي زُحل تغيب من عيني لحظة وعندي كاميرا سوني في دولابي من زمان كان جابها لي مجدي هدية من امريكا محتفظة بيها ولسة جديدة استعملتها مرة او مرتين مشيت طلعتها وطلعت برة الشارع وقفت في المكان الكان فيه الراجل وعاينت لبيوتنا عشان اشوف انسب مكان ممكن اقدر واصورهم منو ، سبحان الله لقيتو بيت مجدي ، واكيد زُحل اختارت تقابل الراجل دا هنا في المكان مخصوص لانها عارفة مجدي في السجن وعلياء في المقابر والبيت مقفل وما في زول اصلا بفتحو ،وانا في بيت جدي وبيتي كمان مقفل علشان كدا مافي زول ح يحس بيهم او يجيب خبرهم.
وقررت اخش بيت مجدي لكن كيف ؟ مافي زول بساعدني في الموضوع دا غير مرام ومشيت ليها وقلت ليها :
-انا دايرة الورق حقي العند مجدي.
وهي عارفة مجدي شالو مني وقالت لي:
- خلاس بجيبو ليك..
قلت ليها انا دايرة اخش بيت مجدي مشتاقة ليهو ونفسي أشم ريحتو واتطمن بيها..
وهي عرفت اني ما دايرة اخش عشان الورق فهمت إن دا من الشوق لمجدي وقالت لي
-حاضر امرك، يللا .
انا مشيت معاها وعارفة ما بستفيد شي لانو زُحل والراجل بجوا بكرة لكن عاوزة اتأكد هل بقدر اشوفهم واصورهم ولا لأ؟
دخلت البيت وطوالي مشيت البلكونة عاينت منها للشارع لقيت انها دي انسب مكان عشان اشوفهم بوضوح لكن ما بقدر اسحل الصوت، معناها اشوف بلكونتي أحسن.
وقررت اشحن الكاميرا وقبل يجوا امش ادسها واصورهم فيديو حتى لو بس اعرف شخصية الزول البهدد فيها دا منو ولو عرفتو كل شي ببقى لي واضح..
مشيت بلكونة بيتي، إتأكدت إنها أنسب مكان عشان اصورهم واسجل ليهم صوت وصورة..
اليوم دا ماعارفة تدى بطئ كدا مالو؟ لحد ما جاء زمن اللقاء مابين زُحل والراجل الغريب داك ، كنت واقفة في بلكونة بيتي براقب في الشارع، كم مرة شوفت زُحل كانت تطلع تراقب الشارع كل شوية وترجع جوة تاني لحد ما الراجل جاء..
انا على طول فتحت الكاميرا وبديت التسجيل..
الراجل كان بينهرها
-أها جبتي الأمانة؟
-جبتها أي، لكن ماكلها..
-نحن كلامنا واضح ياكلها، يا اقدم فيك بلاغ من مجهول واحكي السويتيه كلو...
بقت تكورك فيه:
- يا راجل هي إت داير تجنني، بطل ابتزاز،وامسك دا كل العندي، واذا ماراضي أنا مابشتغل بيك تاني..
مسك منها الكيس وهزاه كدا وقاليها :
-يازولة هوي نحن لنلعب ولا شنو؟ديل على السم الشربتيه المرة شوية، خلي كمان دايرة تحاسبيني بيه على كتل راجلك برضو؟؟
اتخلعت منو واتكبكبت وقربت منو وبقت تحكي:
-أنا كلمتك ان القروش في حسابي فعلاً، لكن لما إكتشفت إن الراجل الملعون دا قاعد يخوني و واجهتو مشى سحب القروش كلها و غتس حجرها وخلاني على الحديدة، حتى القريشات ديل والاديتك ليهن قبل كدا بعت دهبي، واتصرف في كم حاجة، إت كمان خليك مراعي لظروفي شوية..
الراجل شال الكيس وقاليها بتهديد:
-نحن شغلنا دا مافيه عواطف، لا اراعي ليك لا تراعي لي، انا قتلت ليك زول وساعدتك في قتل التاني، يبقى عندي عندك حقوق يبقى تتصرفي وتجيبيها لي.. باخد يومين وبجيك تكوني إتصرفتي يا بتصرف بمعرفتي، وفات خلاها واقفة وشكلها بتبكي..
أنا كنت واقفة جسمي خدران ولا يمكن مشلول ؟ معقول تكون زُحل أجرت الراجل دا كتل ليها سعد؟
لكن لشنو؟ وتستفيد شنو؟
طيب ساعة مجدي الجابها منو وداير يورطو لشنو؟؟
