عائلتي جنتي وناري

البارت الثاني عشر

#عائلتي جنتي وناري

#للكاتبه ام النون
#البارت الثاني عشر

ام تماره : اي متأكده من قراري وماكو تراجع
خالد : ماكو امل يعني
ام تماره : لا ماكو الله يعوضك بالاحسن مني
خالد : اممممم ماشي
ام تماره : عم السكوت وبعدين صاحوا اسمنه وجان  ندخل للقاضي
خالد : ها مستعدة؟
ام تماره : اي
خالد : يلة امشي نفوت
أم تماره : دخلنه للقاضي وظل يسئلنه عن سبب انفصالنه بديت اشرحله كلشي بس العجيب خالد جان ساكت من احجي بس عيونه جانت تحجي وياي عيونه جانت كفيلة تحسسني بندمه بس بعديش اتأخر الوقت وفات الأوان حاول القاضي يصالحنه ويرجعنه سوه اهواي بس من شاف القاضي اثنينه متفقين على الطلاق ومتفاهمين وافق وكال بعد اسبوع اخر جلسة وتطلكون رسمي وظل خالد ساكت ويباوع بعيوني كملت الجلسة وطلع خالد بسرعة بس جان عصبي حيل انقهرت كولش عليه بس شسوي تعبت من راح حيل ضعفت ودمعت عيني ورجعت كبل للبيت كبل حبست نفسي بالغرفه وأخذت اجازه من الدوام ردت اصفي بالي واموري وارجع لان ما اتحمل بالدوام اطلع قهري وعصبيتي بالطلاب وهمه ما الهم ذنب ب الي دا يصير بيه حتى بنتي هملتها بهذا الاسبوع ردت استعيد نفسي امي جانت ملاحظة عزلتي وحزني بس عبالها ضايجه على خالد متدري انه راح نطلك الموضوع جان حيل صعب بالنسبة اليه بس ماكو حل غيره ما اتفاهمنه ابد نار وثلج مننجمع سوه
ام تماره : مر الاسبوع بصعوبه حيل بس هل فتره اختفى خالد ما خابرني ابد ولا حاول وياي حتى نرجع او اغير رأيي اعتقد حس انه هل شي صح النه اثنينه كالعاده كمت غسلت وبدلت بس تفاجئت قبل لا اطلع بأتصال من خالد
ام تماره : خير ياستار شكو خلي اجاوبه
خالد : صباح الخير شلونج
ام تماره : صباح النور.. زينه
خالد : طلعتي لو بعدج
ام تماره : لا بعدني هستوني ردت اطلع وخابرتني... ليش صاير شي؟
خالد : لا ماكو شي بس عندي طلب اخير
ام تماره : شنو هو اتفضل
خالد :جيبي تماره خلي اشوفها لااخر مره وبعد ما اشوفين وجهي لان مشتاقلها حيل
ام تماره : ماشي بس شلون اجيبها شكول لا امي لان متدري راح نطلك
خالد : طلعي اي عذر اني انتظرج يم باب المحكمه
ام تماره : ماشي اتفقنه
خالد : لتتأخرين مع السلامة
ام تماره : ماشي.. الله وياك
سديت الخط منه وظليت محتاره شسوي شكول لا امي خلي ابدللها بسرعة واكعدها قبل لتكعد امي وعود من ارجع اشوف عذر الها رحت كوه كعدتها خطية نعسانة ما متعلمة تكعد من وكت بدلت الها وأخذتها وياي وكتبت بورقه "ماما اني اخذت تماره وياي للدوام ليظل بالج" وخليتها على فراش تمارة حتى اشوفها من تجي لغرفه تماره طلعت بسرعة لان اتأخرت وصلت ولكيت خالد كبالي
خالد : هلوو شلونج
ام تماره : كلت بقلبي كل شوية شلونج يعني شلوني مثلا !!!.. زينه الحمد الله
خالد : ها حبيبتي تماره تعالي يمي
ام تماره : ختلت وراي.. امشي روحي لعمو حياتي
خالد : تعالي شوفي شجبتلج حلويات
ام تماره : ليش مكلف نفسك
خالد : ماكو لا كلافه ولا شي
ام تماره : راحت تماره يمه وظل يوكلها حلويات ويلعب وياها ويضحك جنت اشوف الحب بعيونه الها لحد ما اجه دورنه ودخلنه سوه للقاضي اتفقنه على كلشي واطلكنه وجان اصعب يوم بحياتي ودعني وكال
خالد : اسف سامحيني على كلشي سويته وياج خاف اذيتج وقهرتج ابريلي الذمه
ام تماره : مسامحتك ومقبول اعتذارك ومبريه ذمتك... وانته هم سامحني وابريلي الذمه خاف غثيتك لو ضوجتك
خالد : مبريه الف ذمه ومسامحج دنيا وآخره ديري بالج على نفسج وعلى تماره وشتحتاجين اني موجود وما اقصر ابد لترددين اذا صار وياج شي
ام تماره : تسلم خالد متقصر طول عمرك أصيل
خالد : تعالي تمورتي ابوسج بوسه اخيره.. احبج َ... راح اشتاقلج اهواي
ام تماره : انقهرت حيل شفت عينه دمعت وباوع بعيوني نظره اخيره وعافني وراح متت قهر ظليت الطريق كله ابجي وتماره جان تنطيني حلويات حتى اسكتني طفلة متدري بالدنيا شنو اووووف وصلت للبيت وجان يجي الموقف الأصعب شلون راح أواجه امي واحجيلها بالحقيقه وشلون راح أقنعها دخلت للبيت وامي تلكتني
ام نيفين : الله يساعدج يمه شلونج
ام تماره : بخير ماما الحمد لله
ام نيفين : تعالي ولج اشتاقيتلج اليوم مكانج وحشة
تماره : ثوفي بيبي عمو خالد ثابلي حلويات
ام نيفين : شنو رحتي شفتي خالد اليوم
ام تماره : اي ماما رحت اشوفه
ام نيفين : وليش اخذتي تماره وياج
ام تماره : مو هو طلب يشوفها
ام نيفين : ليش شصاير.. اكو شي؟
ام تماره : يمه راح اكولج شي بس ارجوج افهميني لا اصيرين انتي والدنيا عليه
ام نيفين : شكو ولج شصاير
ام تماره : اني وخالد اليوم اطلكنه
ام نيفين : عزه العزاج تريد تجلطيني انتي راح اموت قهر من وراج وين انطي وجهي كدام العالم
ام تماره : ماما لا تلطمين قابل مسويه شي غلط لو حرام اني وياه ما اتفاهمنه شسوي
ام نيفين : ما اجوزين من طبعج سويتي الي براسج
ام تماره : هاي حياتي لا أحد يدخل بيها اني مسؤوله عن قرارتي
ام نيفين : روحي من وجهي.. لا بارك الله بيج
ام تماره : دا تحسسيني مسوية جريمة
ام نيفين : اهون من الي دا اسويه بيه ولج حرام عليج