عائلتي جنتي وناري

البارت الثامن عشر

#عائلتي جنتي وناري

#للكاتبه ام النون
#البارت الثامن عشر

رجعت من الصفر ابني حياتي خسرت كلشي وماجنت مستعدة اخسر شي جانوا رنا وساره ومهيمن بعدهم بفترة المراهقة وصغار ميعرفون الصح من الغلط اكيد من راح يكبرون راح يدورون على الحقيقة وراح يعرفون شكد عانيت علمود اشوفهم كبال عيني ملمومين ورابين سوة عفت بيت امي وردت اجر شقة وقبل جانت بالطائفيه ب ٢٠٠٧ الا تأخذ موافقة من جيش المهدي يلة تكدر تشيل لغير بيت ف ولد من الموجودين انتبه على زراك بأيدي من وره ضرب امير
علي : اختي هاي شبيها ايدج اكو احد اتعرضلج كولي واحنه نتكفل بالباقي
ام تماره : لا خوية ماكو شي بس زوجي مشاكل اني وياه وضربني يعني اصير مشاكل عائلية
علي : طاح حظه اكو رجال يمد ايده على مره اذا تريدين نروح نسحله الج من باب بيتهم ونربي حتى ميمد ايده عليج بعد
ام تماره : صح ماعندي احد يوكفلي جان وماعندي احد يسندني ويستاهل امير واحد يسحله هيج ويكسره تكسير بس ماردت اصير مشاكل... لا خويه مشكور تسلم متقصر
ام تماره : اخذت الموافقة منهم وبديت اشيل وانقل غراض البيت واكو غراض بقن ابيت امي لان جانت الشقة مو حيل جبيرة يعني على كدي اني وامي وتماره وره اسبوع رحت للمحكمه وصار الطلاق بيناتنه كل موقف سيئ يمر بيه جان يموت اشياء بداخلي ويفقدني شغفي بالحياة ويأخذ من عافيتي رجعت للبيت وظليت ابجي وامي شافتني
ام نيفين : لتبجين يمه خلي يولي ميستاهلج هل حقير النذل عبالي ابن اختي زين واحسن من الغريب بس لو مربيه جلب جان غزر بعينه اني يمج ووياج بعد ما اخلي احد يأذيج ابد
ام تماره : اوووووف يايمه نار بقلبي تحركني حرك شلون راح اعوفهم واني مره وحدي وما عندي سند يسندني وتماره بدت تكبر لا اب ولا اخ ولا اخت عدها وابوها ولا مهتم الها ولا يريدها
ام نيفين : الها الله حبيبتي.. البشر يكطع وربج ميكطع بعبده.. الله ميعوفج ابد لان انتي على حق ومظلومه وراح تطلع حوبتج بي ان شاءالله
ام تماره : ونعم بالله يمه بس هم اظل افكر بيهم مو بيدي
ام نيفين : ام ومن حقج تفكرين بأطفالج بس مو زين تحملين نفسج اكثر من طاقتج لان تماره ما الها غير الله وانتي لازم تقوين نفسج علمودها وانتي خلي عينج بعين الله كل مغربيه ورددي حسبي الله ونعم الوكيل وربج ميضيعلج حقج ان شاء الله
ام تماره : حسبي الله ونعم الوكيل عليك يا أمير عساك بحرگة قلبي عساك ماترتاح ولا تتوفق بحياتك جزه ما اسوي بيه هيج
ام نيفين : كومي مسحي دموعج واريدج ترجعين نيفين القديمة ما اريد اشوفج ضعيفة ترى مو بس تماره تريدج اني هم اريدج ومحتاجتج منو اليه غيرج
ام تماره : ادللي حبيبتي وهاي راح ارجع نيفين القديمة لخاطرج وهاي بوسة لراسج... اهم شي رضاتج عليه يمه كولشي ما اريد بعد من هل دنيا
ام نيفين : راضيه عليج دنيا وأخره بنيتي بس ادعي من الله يسعدج ويبعد عنج الشر وكل مكروه ما تستاهلين الي يصير وياج اهم شي خلصتي منه ولو ميهون عليه تعوفين جهالج ولا اشوفج تتعذبين وتتألمين لان بعيدين عنج بس شبيدي عليج يمه
ام تماره : حتى تحسين بيه من جنت اكولج ما اكدر ارجعله وانتي جبرتيني شفتيه شسوه واختج الي تبرت من الموضوع الي اجتي تكول اني واني ومعليج وميخالف اتحملي هسه ما الها صوت ذبت واحد مريض يطلع عقده نفسية بيه.. اني تعبت يمه عاد حسوا بيه تعبت نفسيتي كافي عاد
ام نيفين : شمدريني يطلع هيج نذل ونحس همزين اطلكتي وخلصتي منه
ام تماره : هذا هم حظي وقسمتي
ام نيفين : تعالي حبيبتي بحضني ولا تنقهرين ميستاهلج
ام تماره : يريد يكسرني و يلوي ذراعي بالجهال الي ميخاف من الله عساك بحرگة قلبي يا امير
ام نيفين : حسبي الله ونعم الوكيل
ام تماره : الله كريم... مشت حياتي طبيعية أروح للدوام وارجع للبيت انظف واسوي غده وعشه واقري تمارة لان حبيبتي صارت صف اول ابتدائي وجنت اتأذى من اشوف بنات ابوهم جاي يوديهم وهيه لا حسيت بدت تنعزل ونفسيتها تتعب بس احاول كد ما اكدر اعوضها عن حنان الاب ولا اخليها تحتاج شي وامي هم جنت اداريها بحيث اروح للفراش ميتة تعب كبل انام وما احس الا الصبح وهذا الشي ريحني برغم تعبي خلاني ما افكر بأي شي كمت اعيش يوم بيومه واعيش لخاطر أطفالي الي ما الهم ذنب بس شكول حسبي الله ونعم الوكيل عليك يا أمير خطيتهم بركبتك طبعا هل فتره هو لا اجه ولا خابر ولا سئل حتى خالتي بالفترة ما اجتي عود هيه خالتي وتحبني وتريد مصلحتي رجعتني ويه واحد مريض نفسيا وهسه تبرت ولا كالت خلي اشوف بنت ابني وبنت اختي واختي عايشين ميتين اوووف يا دنيا ششوف منج بعد مو كافي الي شفته تهون ماكو شي يظل على حاله بقيت عايشه وحدي وجنت مرتاحة برغم اشتياقي والمي لأطفالي بس جان عندي امل راح يعرفون بالحقيقه وراح يرجعون الي عندي امل جبير برب العالمين راح يجبر خاطري ويطيب كسرت قلبي مستحيل الله يرضى بهذا الظلم حشى لله حاولت اتأقلم ويه الوضع الجديد وارجع اعيش حياتي واعيش لنفسي الي عانت صار سنين وما اتهنيت بكلشي جنت براتبي ادفع اجار البيت واحتياجاتي الحمد لله