عداوة عشاق

6

#عداوة_عشاق_6
كانت الساعه اربعة الفجر وكلهم في المستشفى ورشا في غرفة العمليات
السيد:يارب مايصير لولدي شي
القرياشية:اهدء ياخوي ما يصير الا كل خير
وكانت اليس مقعمزة وتدعي انه يلي في بطن رشا يموت ومادبيها تموت رشا معاه
فاطمة:كيف صار بس
القرياشية:منعرفش فجاة لقينها طايحه
زينب:باذن الله خير
_____________
اما في القصر كانت زمزم تحكي
جواهر:لهدرجة تحبي مرت بوك وخائفه عليها
زمزم:اي
وبدت تبكي بشكل مش طبيعي
جواهر:لا اكيد مش على خاطرها قولي خيرك
زمزم:ارجوك خليني في حالي زينب
جواهر:نخليك في حالك بس نعرفك ح تجي تحكيلي هي نوضي توضي الفجر شوية وياذن
زمزم:حاضر
____________
اذان الفجر
كان عمر واقف في الروشن ويدكر في رشا كان قلبه حاس انه رشا فيها حاجة
منى:صباح الخير
عمر:شن منوضك توا
منى:بنصلي الفجر
عمر:اهاا
منى:تحب نوتيلك الفطور بعد تصلي
عمر:تمام
فرحت منى وحست في شي في عمر غريب
___________
الدكتور طلع من غرفة العمليات
السيد:طمني كيف حال مرتي
الدكتور:مرتك بخير ويلي في بطنها بخير خيطنا الدماغ
السيد:الحمد لله بارك الله فيك
الدكتور:وعندها كسور وياريت من هني لشهر معاش توقف على رجليها وبعدين عادي تقدر تتحرك بس متركبش من الدرج
القرياشية:المهم الطفل كويس
السيد:ولدكم و وريث عائلة السيد بصحة ممتازة
فجاة الكل نصدمو
القرياشية:كيف
الدكتور:في جهاز جايبينه من برا يفحص الجنين لو كان بنت او ولد
القرياشية:اي به وشن متاكد
الدكتور:اي متاكد ولي العهد في الطريق
السيد قعد يحضن في اخته القرياشيه ويبكو
وزينب كانت فرحانه هلبا هيا وفاطمه
اما اليس حست كانه حد طعنها بموس
اليس:انا بدي روح على البيت
السيد:شن مفيش مبروك عقباليك حبيبتي
اليس:ان شاء الله انا رايحه
زينب:عمتي روحي مع اليس
القرياشية:لا اني مش ح نروح لين تفيق رشا
زينب:امها تقعد معاها كلنا بنروحو ونرجعو بعدين
السيد:اي اي خلي نروحو
فاطمة:سيدتنا زينب عادي نطلب منك طلب
زينب:شن في يافاطمة
فاطمة:عادي تتصلي ببنتي منى وتقوليها انه اختها طاحت من الدرج
زينب:حاضر
فاطمة:كثر خيرك
زينب:هي اطلعو
____________________
عند منى جهزت الفطور وقلبها يدق حاسه بشي مش طبيعي
منى:الفطور جاهز
خدي عمر منها السفرة
عمر:تسلم يدك
منى:تبي حاجة ثانيه
عمر:خيرك واقفه شن متبيش تقعمزي تفطري
منى:كيف
شد عمر منى من يدها
عمر:قعمزي انتي مرتي مش خدامتي
منى:اااا
عمر:هي صبيلي الشاهي جعان
منى:من عيوني يانور عيوني
{عمر يشبح لي منى }
منى:اليوم تصرفاتك غريبة شوية
عمر:عارف انك مستغربه
منى:ممكن
العنود:صباح الخير
عمر+منى:صباح النور
العنود:في شي غريب صح
عمر:شي شن الغريب انه راجل ومرته مقعمزين يفطرو مع بعض
منى:خالتي العنود نجيبلك صونية
العنود:لا نوضي ديريلي قهوة يلاا
منى:حاضر
وناضت منى بدير قهوة
العنود:هه ولدي ونعرفك
شبح عمر لي امه وابتسم
________________
روحو من المستشفى
زمزم:شن صاااار
زينب:الحمد لله هيا وخوك حالهم باهي
جواهر:خوووي
زينب:اي طلعت حامل بولد في جهاز جابوه جديد يعرف جنس البيبي
جواهر:اي نعرفه بس هدا الجهاز لمه يبدا عمر البيبي 5شهور يعرفو ايكو
زينب:كيف
جواهر:متنسيش انه حلمي نقرا طب وصاحبتي سالمه لمه روحت من امريكا جت حكتلي عليه الجهاز هدا
زينب:انتي غالطه
جواهر:اقسم بالله
زينب:متقوليش الموضوع قدام حد فهمتي
جواهر:حاضر
الخدامه:شوية والفطور يكون واتي
السيد:استعجلو لانه بنرقد
جت اليس لي زمزم
اليس:زمزم تعالي بدي احكي معاكي
زمزم:شن تبي
اليس:والله اذا بتحكي شي رح افضحكك
زمزم:ح يخطبني عن قريب واني يلي ح نفضحك يامرت بوي
اليس:الايام بينا زمزم
{ ليلة الحادثة}
زمزم:المقابل
اليس:روح اخوكي يلي في بطن رشا
زمزم:كيف
اليس:خدي زبدة وحطيها بدرج وفوتي قولي لي رشا انه ابوكي بدو ياها
زمزم:لالا انتي مش طبيعيه تبي تقتلي روح ونكون معاك اني شريكه بالجريمه
اليس:اختاري روح اخوكي يلي في بطن امه ولسه ما وعي على الدنيا ولا روح حبيبك خالد
زمزم:الله يلعنك
___________
قعدت زمزم تدكر شن صار لين فاجت القهوة على الغاز
الخدامه:سيدتنا زمزم خيرك شن في
زمزم:كنت سرحانه امسحي الغاز
الخدامه:حاضر
زينب:وين راكبه
زمزم:بنركب لداري
زينب:الفطور شوية ويجهز اقعدي افطري معانى
زمزم:صحتين حبيبتي
وركبت زمزم لدارها وهيا ترعش
جواهر:على فكرة البنت مش طبيعية
زينب:حسيت اسمعي
جواهر:نعم
زينب:خودي الرقم هدا رقم تلفون خالتك العنود
جواهر:قلتي لي زمزم تكلمها اني منبيش
زينب:هيا خالتك ولا خالة زمزم
جواهر:خالتي اني وياك على فكرة
زينب:اني غيرك انتي بري كليمها
جواهر:لا
زينب:كليمها قوليلها رشا في المستشفى كان منى تبي تجي تزور اختها
جواهر:وااااك منك واااك به حاضر
زينب:كلميها والحقيني على الفطور
جواهر:اوامر ثانية سلطانة
زينب:مايامر عليك ظالم ياروح السلطانة
وباست اختها ومشت
جواهر:ربي يحنن قلبك علينا يارب يازينب ويهديك على الطريق يلي ماشيه فيه
___________________
العنود:شن صار به في الاراضي
عمر:كلهم شربتهم بس السيولة ناقصه توا على البني
العنود:اني مش ح نرتاح الا لمه نشوف العائلة هديكا منهاره
منى:عمر تحب نطيبلك حاجة معينة على الغدي
عمر:يلي يجي منك باهي حبيبتي
ورن التلفون الارضي ومنى كانت بتنوض ترد
العنود:خليك اني بنرد
عمر:خيرك مصدومة
منى:لالا ولا شي
عمر:نبيك ديما تبتسمي
منى:حاضر
العنود:الو
جواهر:السلام عليكم خالتي
العنود:طيب فيك ادكرتي انه عندك خالة مفروض تسالي عليها
جواهر:اني مش متصله مش نسال عليك
العنود:هه تربية القرياشية شن نتوقع منها الله يرحمك ياختي وخلاص
جواهر:جاية بنقولك انه رشا طاحت من الدوج وصارلها نزيف بس يلي في بطنها بخير
العنود:تنوض بالسلامة
جواهر:اي قولي لي منى
العنود:به يوصل
__________
صكرت العنود الخط وهيا كلها غل وحقد
جواهر:هههه على اساس كانت مدايرة خير لي ماما الله يرحمها
__--
عمر:مني التلفون
العنود:جواهر بنت خالتك
عمر:خيرها
العنود:جاية تقول على رشا انه طاحت من الدرج
منى ناضت نخلعت على اختها
منى:وكيف حالها
العنود:حالها كويس هيا ويلي في بطنها
منى:الحمد لله
العنود:علاش مقلتيش انه اختك حامل
منى:نسيت
فجاة العنود ضربت منى كف
العنود:والله لمه نقتلك ونشرب من دمك
عمر:امي اهدي
العنود:وانت كنت تعرف
عمر:اي كنت نعرف
منى:كيف
عمر:نعرف من فترة قصيرة
العنود:وعلاش مقلتش
عمر:علاش نقول
العنود:يلي في بطن رشا اكبر عدو لينا
عمر:امي خلاص ارجوك
العنود:فيق على عقلك ره نهايتك ح تكون لو جابت ولد
منى:و وظيفة ام الجن شن امالا
عمر:كيف شن تقولي انتي
فنصت العنود في منى
عمر:منى تكلمي
منى:ولا شي
عمر:بري البسي نرفعك تزوري اختك
منى:بجديات
عمر:اي هيا
منى:شوية ونكون واتيه ياتاج راسي
ومشت منى تلبس
عمر:خلاص ارجوك
العنود:ضروري يموت السيد قبل ما ينجاب يلي في بطن رشا
عمر:صدقيني ولد رشا قبل ماتشوفه امه ح يكون عندي
العنود:كيف
عمر: ح تعرفي كل شي عن قريب
_____________
زمزم:رقيا
رقيا:نعم سيدتنا
زمزم:خودي المكتوب هدا
رقيا:شن فيه
زمزم:ارفعيه لي خالد
رقيا:علاش
زمزم:ارفعيه لي خالد قتلك وبلاش كثرت كلام
رقيا:حاضر
_______________
فريال:شن امتى بتمشي المستشفى
القرياشية:مزال
فريال:خيرك شن فيك
القرياشية:خودي شوفي الفوطه هادي
فريال:هادي متاع شني
القرياشية:شميها
فريال:زبدة
القرياشية: اي
فريال:وين لقيتيها
القرياشية:لقتها ام السعد ملوحة في الحديقة
فريال:به وكان يعني
القرياشية:انتي تعرفي انه الدرج متاعنا صح صعب بس انه تزلق منها في حاله فيه امية وامس ام السعد مسحت الدرج في الظهر مش في الليل
فريال:به يعني القصة مدبرة !
القرياشية:زي ما نشوف فيك
فريال:الله يبارك على قوة التركيز يلي عندك
القرياشية:ههه مش من فراغ اسمي القرياشية
جت ام السعد جابت القهوة
القرياشية:جيبيلي الشبشب يلي كانت لابساته رشا
ام السعد:حاضر
وشبحت القرياشية لي فريال
القرياشية:توا تشوفي
فريال:ربي يستر
________________
عند اليس كانت تبي تحاول تتصل والتلون الارضي ميخدمش
اليس:ولييي تعالي ام السعد
ام السعد:نعم
اليس:ليش التلفون الارضي مابدو يشتغل
ام السعد:التلفون متاع جناح حضرتك مايخدمش
اليس:شوفيلي حل ليه وتعالي انتي لوين رايحة
ام السعد:لدار المدام شهد نبي ناخد الشبشب يلي طاحت فيه امس
اليس:ليش
ام السعد:القرياشية تبيه
اليس:طيب تعالي انتي جربي التلفون وهل اني رح جيبلك الشبشب
ام السعد:حتى انتي حامل منبوكش تتعبي
اليس:لالا يلا انتي شوفي شغلك
ام السعد:حاضر توا نقعد نجرب
اليس:اااه راسي
ام السعد:خيرك شن في
اليس:روحي جيبي ميه بسرعه
ام السعد:حاضرررر
ومشت ام السعد بتجيب اميه لي اليس
خشت اليس تجري لدارها وطلعت شبشبها يلي قبل ماتستخدمش فيه وبعمره محد شافها بيه وجت وقفت في مكانها الاول
ام السعد:تفضلي اشربي بشوية
اليس:الحمل متعبني الفترة هي
ام السعد:ان شاء الله تنوضي بالسلامة
اليس:خدي رحت على جناح رشا وجبته
ام السعد:مسرع
اليس:تحركي من قدامي يلا
ام السعد:عن ادنك مدام
ومشت ام السعد
اليس:هه مو اليس يلي رح تلعبو معاها
__________
منى وعمر كانو في الطريق
عمر: اي منى احكيلي على نفسك
منى:زي شن تبيني نحكيلك
عمر:علاش تكرهي رشا
منى:مفيش اخت تكره اختها
عمر:بس انتي تكرهي اختك
منى:عمر اني منكرهش اختي
عمر درس السيارة
عمر:نسالك سال وتكوني صريحة معاي
منى:شن هوا
عمر:في هديكا الليلة ندكر انه صارو اني ورشا بينا هلبا حاجات
منى:اا به كمل
عمر:حق رشا مش بنت كنت كنت سكران ومش واعي
منى:اي وانت قعدت تعيط عليها ولزيتها
عمر:اني كيف جتني الجراء انه نلمسها
منى:هي سلماتك نفسها وربي مش كاتب تكون ليك كان هدا ح اطلقها طول
عمر:بس رشا يلي نعرفها نقوللها نبي نبوسك ونشد يدك تقولي كل شي بالحلال
منى:اختي ونعرفها كانت تكدب عليك
عمر:منى احلفي انك تقولي في الحق
منى:اي والله
عمر:صدقيني انه حبل الكدب قصير وايا كدبة ح يجي يوم من الايام وتنكشف
منى:هي تاخرنا
ولع عمر سيارته ومشو
_______________
اما عند رقيا روحت  الحوش
زمزم:ها شن وصلتي المكتوب
رقيا:ملقيتاش اني وصلت وهوا كيف كان طالع
زمزم:بجديات يلي يبعى عليكم انتو الخدم صح والله الجاهله واختها يجيبو فيها للحوش هدا
رقيا:علاش تهزبي فيا اني شن دنبي وين تبيني نلقاه
زمزم:هاتي المكتوب واقلبي وجهك من عليا
رقيا:تفضلي واسفة
جواهر:شن في
رقيا:الخدامه الزبالة هادي متعرفش تشوف شغلها
جواهر:احترمي نفسك
رقيا:والله ماذنبي ياسيدتنا جواهر والله اني تاخرت شوية شكلي بس
زمزم:صكرس فمك لا نطلعك برا القصر توا
جواهر:حبيبتي رقيا بري شوفي شغلك
رقيا:اسفه مره ثانيه
وخشت رقيا المطبخ
جواهر:قدامي اركبي لدار
زمزم:علاش ادفعي على وحدة عبدة جايها بوك مش تخدمنا
فجاة جواهر ضربت زمزم كف قدام الخدم
زمزم:تمدي عليا في يدك
جواهر:اقلبي وجهك لدارك قتلك
ركبت زمزم تبكي
جواهر:اني اسفة يارقيا
رقيا:عادي
وركبت جواهر
ام السعد:اشربي اميه يارقيا متزعليش هدا القصر هكي قانونه
رقيا:[حسبي الله ونعم الوكيل فيها ربي ياخد فيها الحق عن قريب في كل كلمة قالتها عليا ]
_________________
فريال:يعني مش الزبدة
القرياشية:ام السعد شماته وقالت مفيشي ريحة زبدة
فريال:اي اشبح شن القصة
القرياشية فتحت دولابها
فريال:شن اديري
القرياشية:بندس الشبشب
فريال:اللطف علاش
القرياشية:عن قريب تعرفي
____________
اما عند رشا
فاطمة:بنتي انتي كويسة
رشا:ماما نطلب منك طلب
فاطمة:عيوني ليك
رشا:ركبيني في الكروسة نبي ندهور شوية في المستشفى
فاطمة:حاضر
وجابت فاطمة الكروسة لبنتها وقعدو يدهورو في المستشفى خطمت من جنب دار سمعت البنت تبكي وكان في راجل يعلي في صوته
رشا:ماما دخليني لدار هادي
فاطمة:بس عيب يابنتي
رشا:ماما متنسيش انه اني ح نكون القرياشية متاع هادي المدينة والقبيله بصفة عامه
فاطمة:السلام عليكم
محمود:وعليكم السلام من انتو
البنت كانت تبكي
رشا:حبيبتي خيرك تبكي
محمود:قلت من انتو وشن قلة الادب هادي
فاطمة:هادي ولية العهد متاع كرسي القرياشية
محمود:سيدتنا رشا احترامي اسف والله ماعرفتك
رشا:اطلع برا
محمود:كيف
رشا:قتلك اطلع برا
محمود:اااا حاضر حاضر
وطلع محمود
رشا:خيره الحلو زعلان ويبكي فكرك العيون هدو يحتاجو الحزن
نرجس:اي يحتاجو الحزن والموت
رشا:علاش تدعي روحك بالموت انتي صغيرونه قاعدة
نرجس:الموت ارحم من العيشه هادي
رشا:قداش عمرك
نرجس:13سنة
رشا:هدا من يكون
نرجش:راجلي
ضحكة رشا
رشا:ماما
فاطمة:نعم بنتي
رشا:ممكن تخلينا بروحنا
فاطمة:به
وطلعت فاطمة
رشا:زواج اجباري
نرجس:اي سرقو من فرحتي وطفولتي البراء يلي كانت في عيوني كنت نلعب في الشارع لقيت روحي لابسه الابيض كنت حاطه لعبتي على اساس بنتي لقيت روحي حامل
رشا:رشا جسمك كيف تحمل
نرجس:والله اني نتعدب خاطري نقرا ونكون متفوقه في قرايتي خاطري نقرا في جامعة
رشا:الله غالب مفيش فرق بيني وبينك
نرجس:سيدتي رشا انتي الامل الوحيد
رشا:كيف
نرجس:احني البنات متاكدين انك اول ماتشدي مانصب القرياشية ح يتغير كل شي في القبيلة هادي والاحلام ح تكون حقيقه
رشا:علاش اني بدات
نرجس:لانه لو استمر الحكم من القرياشيه ومن بعدها زينب نفس النمط ح يمشي دم وزواج قاصرات وقتل احلام
رشا:باذن الله كل شي ح يتغير نرجس نوعدك
نرجس:شكرا ليك ممكن نطلب منك طلب بسيط سيدتي رشا
رشا:عيوني ليك
نرجس:ممكن تبدي صاحبتي وتزوريني كل فترة
رشا:حاضر من عيوني من اللحظه هادي اني اختك مش بس صاحبتك اني معنديش خوات وتبدي انتي اختي
نرجس:شكراً
رشا:تنوضي بالسلامة حبيبتي
نرجس:حتى انتي تنوضي بالسلامة يارب
________________
كانت جواهر تشرب في القهوة حطتها وخشت لي زمزم لقتها تبكي
جواهر:انتي شن صايرلك تكلمي
زمزم:انتي مش في نفس النار يلي فيها اني اني محروقه
جواهر:اي محروقة به لمه تكوني محروقة وموجوعة تحرقي الناس وتوجعيهم معاهم
زمزم:وطي صوتك
جواهر:بنعلي صوتي وبنمد يدي
زمزم:احترمي نفسك ياقليلة الادب
زينب:شن في
فجاة زمزم وجواهر قعدو يرعشو
زينب:اني قلت شن في تكلمي انتي وياها
جواهر:زمزم طولت لسانها على الخدامه وقتلها انتوا عبيد عندنا
زينب:صح يلي تقول فيه اختك
زمزم:اي صح
زينب:وعلاش ياهانم
زمزم:لانه نقرفت منك ومن بوك ومن كل العائلة الوسخه هادي مش تبوني نقبل الواقع قبلته مش تبوني نكون حقيرة زيكم اهو بديت احقر منكم مش تبو يكون قلبي قاسي بدي اقسى منكم افرحو هي مش تشوفو في الناس كلهم عبيد عندكم والناس كلهم مش مستواكم بديت زيكم افرحو افرحو
وبدت زمزم تخبط على وجها وتبكي
جواهر:زمزم خلاص اهدي
زمزم:سيبوني في حااااالي نكرهكم كلكم الله يلعنكم
كانت زمزم تبكي بالعبرة وقلبها محروق
زينب:جواهر هي السواق يستنا فينا برا
جواهر:منقدرش نسيب زمزم
زينب:كلمة وقلتها هيا
وشبحت لي زينب لي خواتها الزوز شبحه استحقار وطلعت وهيا طالعه من الدار خنقتها العبرة
_____________
وصلو عمر ومنى المستشفى
منى:ووووه مطولها الطريق
عمر:متعبه بس في يوم من الايام ح تكون المدينة هادي كلها لينا
منى:باذن الله حبيبي
_____
فاطمة:حبيبتي انتي كويسة
رشا:اي في وجع يجي ويمشي
فاطمة:معليشي كله يمشي
فجاة خشو منى وعمر
منى:السلام عليكم
فاطمة:بنتي حبيبتي
وجرت منى لحضن امها وقعدت تبكي
وعمر كان يشبح لي رشا ورشا تشبحله
فاطمة:استاحشتك هكي تهون عليك امك
منى:اسفة ياتاج راسي بالله سامحيني
فاطمة:مسامحاتك يابنت بطني
تلفتت منى لي وشا
منى:حبيبتي رشا الحمد لله على سلامتك
رشا:شكراً
عمر:بس اهم حاجة كيف حال الوريث ان شاء الله صحته كويسه
رشا:بخير
غمز عمر لي منى
منى:مانا حبيبتي تعالي نبيك شوية بروحنا
فاطمة:بس كيف نخلي اختك بروحها
منى:عمر جنبها
عمر:هي
{ قبل ساعات }
عمر:اسمعي
منى:نعم
عمر:نبي نطلب منك طلب
منى:تطلب روحي نعطيك
عمر:نبيك تخليني بروحي اني ورشا في كلمتين نبي نقولهم
منى:مستحيل
عمر:معناها ح نطلقك وبالثلاثه
منى:عمر
عمر:كلمتي تمشي فهمتي
___________
قعدو عمر ورشا بروحهم في الدار
جي عمر قعمز على حاشيه السرير
عمر:القلب قاسي
رشا:انت يلي قسيته
عمر:والعمر ماشي
رشا:انت يلي مشيته يوم بعت العشرة يلي ماكانت تنهان يوم حبي ليك كان بحر و وديان
كان عمر يبكي قرب من رشا
عمر:والله ماتنهان يانور العين ونبض العشق الولهان
رشا:قسيت قلبي وجرحتني ويوم قلت ماتهوني هنت جاية توا تقول ماتنهان
عمر:اقسم بالله وحق لااله الاالله ماهنتي ولايوم تهوني
فجاة رشا وعمر بدو يبكو
رشا:عمر اطلع
عمر:رشا مقدرتش مقدرتش نلمس اختك لينا متزوجين 4شهور مقدرتش اني مش قادر حتى نشبحلها
رشا:عمر اطلع
عمر:اني غلطت في حقك
رشا:انت صدقت الكلام يلي قالوه عليا
عمر:لعبو بدماغي اني اسف يارشا والله ماقصدي
رشا:ضيعتلي حلمي ضيعت فرحتي وطفولتي ضيعت كل شي
كانت رشا تبكي هلبا
عمر:رشا خلينا نهربو والله نربي ولدك كانه ولدي
شبحت رشا لي عمر نظرة استحقار
رشا:اني مش رخيصة مش نبيع الراجل يلي شراني براجل في يوم من الايام باعني
عمر:شن قصدك
رشا:نكرهك عمر ونوعدك نهايتك ح تكون على يد الطفل يلي في بطني
عمر مسح دموعه وناض
عمر:نفهم منك ح تعلني الحرب ضدي
رشا:واقسم بدين الله لي اخر نفس حنسعى ونستنا اليوم يلي نشوفك فيه منهار ياولد العنود
طلع عمر المسدس وحطه في بطن رشا
عمر:من قال نكون نهايتي على يد الولد يلي في بطنك مرات نهاية الولد يلي في بطنك يلي قاعد مشافش النور تكون على يدي يامرت السيد ... ...يتابع

نهاية الحلقة السادسة #كتابة_يقين_البشتي