عداوة عشاق

7

#عداوة_عشاق_7
عمر:رشا خلينا نهربو والله نربي ولدك كانه ولدي
شبحت رشا لي عمر نظرة استحقار
رشا:اني مش رخيصة مش نبيع الراجل يلي شراني براجل في يوم من الايام باعني
عمر:شن قصدك
رشا:نكرهك عمر ونوعدك نهايتك ح تكون على يد الطفل يلي في بطني
عمر مسح دموعه وناض
عمر:نفهم منك ح تعلني الحرب ضدي
رشا:واقسم بدين الله لي اخر نفس ح نسعى ونستنا اليوم يلي نشوفك فيه منهار ياولد العنود
طلع عمر المسدس وحطه في بطن رشا
عمر:من قال نكون نهايتي على يد الولد يلي في بطنك مرات نهاية الولد يلي في بطنك يلي قاعد مشافش النور تكون على يدي يامرت السيد ...  
رشا:اطلع
عمر:الحساب يجمع
وهوا عمر كيف طالع اليس كانت على الباب
شاف عمر اليس وطلع
عمر:انتي شن اديري هني
اليس:ولا شي
عمر:هه كنتي تسمعي فينا
اليس:والله لا
عمر:اسمعي لو في حد عرف بالموضوع انتي يلي تنضري
اليس:بس انا ماسمعت شي
عمر:به
ومشي وخلها
______
فاطمة: طمنيني عليك مرتاحة يابنتي
منى:اي ياماما الحمد لله
فاطمة:عيونك ميقولوش هكي
منى:مرتاحة والله
فاطمة:به اصلاً اني شن نبي الا راحتك انتي واختك
منى:اي اكيد ماما بنسالك قداش ليها رشا حامل
فاطمة:من بعد زواجها باشهر
منى:اها
فاطمة:علاش تسالي
منى:لالا شي
عمر:منى هيا بنروحو
منى:به خليني نشوف رشا شوية
عمر:تمام
___________
اليس كانت مقعمزة مقابل رشا وتشبحلها
رشا:خيرك
اليس:ولا شي
رشا:وينهم مجوش معاك
اليس: اجو معاي عندهم زيارة تحت
رشا:اها
وخشو منى وامها
فاطمة:اختك بتروح
رشا:اها
منى:ردي بالك على يلي في بطنك وردي بالك على روحك ملياش غيرك في الدنيا
رشا:هههه ان شاء الله
حضنت منى امها
منى:ماما تعالي زوريني
فاطمة:انتي يلي مفروض تجيني يامنى
منى:بس ياماما
فاطمة:مفيش بس اني عارفه انه ام راجلك لفعه بس ضروري تواجهي
منى:ان شاء الله خير
_____________________
وهيا منى طالعه خاشين فريال والقرياشية
فريال:ايي كنة الغالية العنود
منى:اهلين كيف حالكم
القرياشية:شن عزوزتك جت معاك تتشمت ولا قعمزت تتشمت براحتها في الحوش
منى:علاش شن الشي يلي يخليها تتشمت
القرياشية:اني وانتي وكل يلي في الدار يعرفو
فاطمة:منى جت مع راجلها
منى:مع السلامة
القرياشية:بنتي رشا كيف حالك توا
رشا:الحمد لله احسن من امبكري
القرياشية:ريحتينا ونبوك تردي بالك على روحك وانتي ياليس نفس الشي
اليس:ان شاء الله
__________________
اما عند زينب كانت مقعمزة في مكتبها في الخان متاع بوها
مصطفى:السلام عليكم
مصطفى:كيف حالك
زينب:بخير الحمد لله وانت
مصطفى:اني كنت مش كويس ولمه شفتك ارتحت
زينب:شن الكلام هدا
مصطفى:انسة زينب اطمني اني جاية بنوريك الموضوع يلي طلبتيه مني
زينب:شن هو
مصطفى:من فترة طلبتي مني نتحرا على موضوع يخش السيد عمر
زينب:اي ندكر
مصطفى:السيد عمر واخد من حساب البنك حوالي3مليون بدون علم والدك والاراضي يلي خسروتهم وقصر الابش يلي على البحر هوا يلي قنع صاحبه انه ميبيعاش
زينب:كيف
مصطفى:عطاه 3مليون بس ميبعاش ليكم وكسب 3مليون وفي نفس الوقت كسب قصره وهدو المستندات يلي توثق الشي هدا
قعدت زينب تقرا في كل شي
زينب:مجاش للخان اليوم
مصطفى:مجاش لانه مشي للمستشفى يزور في السيدة رشا
زينب:تمام شكراً بس اني نبي دليل ثاني هوا المشروع يلي مدايره في العاصمة منين راس المال
مصطفى:عطيني وقت وح نجيبلك منين راس المال
_________________________
مرو4شهور ورشا حامل في الثامن والكل يسحابه حامل بتؤام بطنها كبيرة وكلهم يسحبوها في السادس بس يلي ساترها انه هيا ضعيفه
كانو الكل مقعمزين يفطرو
السيد:جهزتو كل شي لغدوا
زينب:اي بابا كل شي تمام
فريال:ربي يتمتم عليك بخير يابنتي
زمزم:ان شاء الله
القرياشية:خطبة زمزم ح يتكملو عليها كلهم
اليس:عقبالك جواهر
جواهر:اني منبيش نتزوج نبي نحقق حلمي
السيد:دورك انتي بعد اختك وغصباً عنك
جواهر:هههه حكم القوي على الضعيف وخيرها زينب مفروض قبلي واني مفروض قبل زمزم
زينب:في شي اسمه نصيب
القرياشية:والنصيب يصيب يابنتي
السيد:اصلاً في عريس جاية بيتقدم لي زينب من فترة بس اني اجلت موضوعه
زينب:بس بابا اني منبيش نتزوج
السيد:زيك زي خواتك
وناض السيد
____________
رشا:صحتين اني تاعبه بنرتاح في داري شوية
القرياشية:اي ارتاحي بنتي متتعبيش روحك
زينب:اني ماشيه الخان بعد الظهر
القرياشية:ياريت تخف رجلك شوية منه
زينب:ومن امتى الكلام هدا الكل يعرف انه اني اليد اليمين لي بوي
القرياشية:حتى لو
زينب:صحتين
اليس:الله يعينك ياستنا محد بدو يسمع كلامك
القرياشية:الهي في نفسك انتي هي كملى ماكلة زمزم وفريال وجواهر شوفو شن ناقص للخطوبة
_________________
اما عند منى في كانت في الحمام ترجع
العنود:خيرك
منى:بنموووت بطني
العنود:وجهك تصفر
منى:تعرفي ليلة كامله واني على الحال هدا
العنود:منى بالك تطلعي حامل
منى:كيف
العنود:ياسالمة
سالمة:نعم
العنود:بسرعه  بري جيبي القابله
سالمة:هي حاضر
العنود:اركبي لدارك
منى:تمام
عمر:خيرك امي شن في
العنود:مرتك مريضه
عمر:خيرها
العنود:منعرفش ياولدي ان شاء الله المرض يلي في بالي
عمر:مرض شن
العنود:انت امتى ماشي للخان
عمر:بعد الظهر عندي شغل غادي
العنود:به برا قعمز في الصالون توا نقول للخدامه اديرلك قهوة
عمر:لالا بنقعمز في المكتب عندي خدمه
العنود:به
______________
اما عند رشا كانت في دارها طلعت شال لي عمر وقعدت تشم فيه
رشا:قداش استاحشتك
وقعدت تبكي
__________
اما عمر خش لمكتبه وطلع صورة ومذكرة
وقعد يتامل في رشا
عمر:ح يجي يوم ويجمعنا القدر مره ثانيه نوعدك ح يجي يوم نوعدك
فتح المدكرة
{ استاحشت كل شي فيك استاحشت وقت نكون مضايق ونشوفك ينتهي كل ضيقي استاحشت ابتسامتك يلي لمه نشوفها نرتاح استحشت وقت نسمع صوتك نبدا زي الطفل الصغير يلي محتاج حضن وراحة محتاجة رشا محتاجة حضن منك محتاج لمسة يدك محتاجة كلمة لو وقفو الدنيا كلها ضدك اني معاك رشا اميرتي حبي ليك كل يوم يزيد ولا يوم ح يقل حاولت ننساك بس اني مقدرتش حبي ليك اقوة من كل شي ولو اختلف العالم كله علينا اني وياك ح يجي يوم ويجمعنا القدر اني وياك اقوة من كل شي اني متاكد انه ح تصير معجزة تجمعنا زي مافي قصة ح تفرقنا}
العنود:عمر
صكرت عمر الكتاب ويشبح في امه الفرحة
عمر:شن في
العنود:منى حامل ياعمر
شبح عمر للكتاب يلي في يده ونزلت منه دمعه
________________
كانو زمزم وجواهر وفريال في السوق
جواهر:اييي مرت بوي تعالي شوفي
فريال:حي محلاه القفطان
جواهر:يطلع عليا
فويال:اي بنتي الحلوة يطلع عليها كل شي خشي قيسيه
كانت زمزم في عالم ثاني
فريال:زمزم خليك هني جواهر بتمشي تقيس القفطان بنمشي معاها
زمزم:تمام
ومشو جواهر وفريال
وهيا. واقفه جي وقف خالد
خالد:تجهزي لخطوبتك
زمزم:خالد
خالد:كيف جي من قلبك تقطعي علاقتك بيا فجاة
زمزم:خالد امشي يشوفنا حد
خالد:خوفك هدا يلي وصلك لهني
زمزم:غدوا الظهر نتلاقو في نفس المكان الاول بس امشي توا
خالد:هه نستنا فيك
_____________