عزبة الخديوى (مكتملة)

الفصل الأول "رمية نرد"

أنا ناظله بنت صلاح حربى .. عندى 100 سنه و بحكم عزبة الخديوى ... حكايتى تشيب الشابه وتصبى العجوز.

Lina Basyouni

أمى مصريه انما بابا فى الاصل أيطالى وكان أسمه "جيورجيو جارو "  والملك فاروق  منحه الجنسيه المصريه وغير أسمه وبقى ليه أسميين ، جيور  الايطالى ،و صلاح حربى المصرى .

بابا كان أكتر حد مقرب للملك فاروق كان الحلاق بتاعه ، وكاتم أسراره .

الملك فاروق رفعه فى المناصب لدرجة أنه كان بيتحكم فى البلد كلها  .. حتى الوزرا والحكومه نفسها بتمشى كلمته ... ده ليه ؟
Lina Basyouni

علشان بابا كان دايما وشه حلو على الملك فاروق ..

الملك فاروق كان بيحب القمار أوى وكان بيتباشر بوش بابا وهو على ترابيزة القمار .. واليوم اللى يغيب فيه   .. الملك يخسر وخساره كبيره اوى.

طبعا هو لا وشه كان حلو عليه ولا حاجه .. أصلا محدش كان يقدر يكسب الملك فى القمار كله كان بيخسر بالعمد أو يعمل نفسه مش واخد باله والملك بيغش .

هى مره أو مرتين اللى غاب فيهم بابا بالعمد لما عرف أن قريب الملك الامير سعيد جاى يقعد معاه فى النادى وهيلعب ضده فى القمار .

بابا عارف أن الامير سعيد ذكى جدا وشاطر أوى فى القمار ومبيجاملش الملك  ..
Lina Basyouni

فعمل نفسه مريض وغاب  علشان لو الملك خسر  يفتكر أن السبب غيابه .

فى يوم أتفاجأ بابا  بالامير سعيد فى النادى، وقعد على ترابيزه القمار قدام الملك  ، ساعتها بابا مالحقش يعمل نفسه مريض ومكنش ينفع يمشى ويسيب الملك .

الملك ضحك أول ماشاف الامير سعيد  وقاله :

حظك مش سعيد  ياسعيد   ..

الليله معايا تميمة حظى " صلاح حربى ".

بابا كان واقف جمب الملك ورجليه الاتنين بتترعش , الملك بيراهن على فلوسه أنما هو بيراهن على حياته .

فضلوا يلعبوا والملك يكسب شويه والامير سعيد يكسب  شويه ..

كانت ترابيزه القمار زى الميزان ماطبتش كفتها لحد منهم .

الامير سعيد قال للملك :    Lina Basyouni

أنا شايف ان حربى بتاعك مالوش لازمه ... لسه لحد دلوقتى مش قادر تكسبنى ياملك مصر والسودان !!

الملك أنفعل شويه وقاله :

حربى تميمة حظى كفايه أنى مخسرتش منك الليله.

الامير سعيد أستفز الملك وقاله:

الخديوى أسماعيل كان طموح وعمره ما قبل بأقل من النصر ... الملك فاروق ممكن يقبل بالتعادل ؟!!

هنا غضب الملك فاروق وقاله :

اللعب لسه ماخلصش .. انت عايز تنسحب ولا أيه ؟