الحلقة الرابعة من رواية:
احببته ولم اراه:-
افناان:بنات😳😳
بثينة:كنك اتقول مفجوعة
افنان:مروان ايرن
لجين:طاح سعدك امتى خذيتي رقمه
افنان:تي هوا امعاطيه للبنات اللي امعاه في الحافلة او واخذ ارقامنا بيش كان وحدة اتغيب ولا تمرض تبي اتروح ولا حاجة انرنو عليه ومرات هوه ايصيرله ظرف ايقول بكرة منيش جايكن فهمتي
لجين:ايوه ايوه
عهووود،سحرر:باهي ردي
الياس:ازي صايعات
يقين:والله ردي وديري مكبر خلينا انكسدو
الياس:لنقنكن مفرخ بالجوو ردي يا افنان شوفيه شن يبي او ديري مكبر
عهوود:حسستيني انتي يااا مكبر😂😂
افنان ردت
مروان:الووو افنان امعايا
لجين:بصوت واطي لا جتي
البناات:😂😂😂😂
افنان:اهاا تفضل استاذ مروان تبي شي
مروان:معليش معش اتقوليلي استاذ مروان قولي مروان طول
افنان:حاضر
مروان:حضرلك الجنة😍😍
افنان:تسلم
مع طلعت لجين وردينة من الدار خشن للكوجينة
ردينة:توا شن انديرو من خطة لازم ما نفجعوهن
لجين:اخطرت ع بالي حاجة بس عدي جوا عدروحك اتكلمي يقين وسكري عليهن الباب قوليلهن مرات خالي جمال يسمعكن ولا شي حاجة
ردينة:تم اي اوامر اخرى
لجين:لالا تمام خلاص عدي هي
عدت ردينة كلمت يقين وسكرت عليهن الباب قالتلهن خالي جمال مرات يسمع الهدريز وطلعت
ردينة:توا شن انديرو
يقين:طاح سعدكن شن بديرن
لجين:انتن اسكتن ونفذن بس
يقين،ردينة:تمام
اطلعن البنات للحاجر برا وخذن امعاهن صطل امية امسقعة وجن يلا الروشن فتحنها بالشويا طبعا البنات مكننش منتبهات كانن يسمعن في هدريز مروان وافنان وتنقج عليهن هذك المية المسقعة
رانياا:ووووه يا نعلي شن هذي
بثينة:اشهد او ان لا اله الا الله واشهد او ان محمدا رسول الله يا بناات اشهدن
الياس:يا نعلي مزلت بنعيش
افنان:ووووه شنو شنو يا نعلي يا نعلي ناار نااار
عهود،سحر:بنات كل وحدة تاخذ زاوية شكله قصف
يقين،ردينة،لجين:من عند الروشن منسحنات من الضحك وووه اجنااابي خلاص وووه😂😂😂😂😂😂😂
ويطلعن عليهن البنات كلهن ويقعدن يجارن في الحاجر
لجين:وووه والله خلاص جنبي معش نقدر😂😂
يقين:لا وراسكن عهود وسحر من بختي وطياح سعدي ما لحقتني الا انتن
ردينة:يا نعلي افنان ورانيا خلاص بحتن بحتن الياس كيف تجري في جرت لجين😂😂
هنه بحتن وهيه عدت تجري مع طلعة امل وامينة
امينة:كنكن يا بنيات اتعايطن
امل:وووك وووك كنه دبشكن مبلول حتى انتي امعاهن يا رانيا
رانيا:تضحك 😂😂الله غالب مزلت اصغيرة كيف ما ايجيك الزمان تعاله محد قاللكن خوذني للولدكن
امينة،امل:😂😂😂
خشن البنات للدار غيرن دبشهن
الياس:انا جيعااانة بكل🥺🥺
لجين:حتى انااا شن رايكن اندير محشي
البنات:امباااه😳😳
لجين:بس بشرط طبعا انخشو انا ويقين وردينة والياس انديروه وافنان وبثينة يغسلن لماعين تموم
البنات:تموم
اطلعن البنات للكوجينة دارن هذك المحشي الساعة 3 ليل بدن فيه وحدة اتقرض في الكسبر او وحدة في المعدنوس او وحدة في الطماطم والفلفل والبصل او وحدة في الشحمة (بناات متقولنش كذبة راه والله حقيقة نحنا انديرو فيها انا او دوسة واهنيوة وبيسوو)
المهم كملن البنات وحطنه ع النار طاب عذك المحشي او صورنه البنات ونزلنه والدنيا كلها انقلبت عليه محشي الساعة 5 الفجر واصحرن هذك التصحيرة واغسلن افنان وبثينة الماعين ورقدن ناضن ع صوت امل او امينة
امل:هيا يا بنات نوضن ما خبر شي نوم هذا
امينة:هيا راه والله كان متنوضن انجيبلكن امية
لجين:الساعة كم توا
امل:الساعة عشرة
ردينة:تؤتؤتؤ موعياتنا من جهيم الله هذيصما
رانيا:ناضت وخشت للحمام اغسلت وخشت للكوجينة دارت هذك الصفرة تفتح العبن المغمضة تن او جبنة وهريسة عربية ودحي وزيتون وطماطم وخيار وشاهي وعصير هيااا بنااات نوضن فطور واينوضن البنات كلهن يجارن للحمامات وحدة خشت للجواني وحدة خشت للبراني او وحدة اطلعت للبرا بكل امتاع المخزن
امل:ريتي البنات كان نندرو عليهن اينوضن راه درنالهن فطور من بدري
امينة:والله الله
واطلعن البنات يلي في الحمام وقعمزن كلهن ع السفرة
لجين:ان شالله يا عهود او سحر يا امخمجات مغسلتنش اوجوهكن
ردينة:ازي امخمجاات
رانيا:طاح يعدكن يا بتي صبن اغسلن اوجوهكن
عهود:والله تبيهن ايكملن علينا الفطور
سحر:وبعدين كيف تبينا انخشو محقيتيش الهجوم يلي صار ع الحماام كولن كولن كره
افنان:ازي امخمجات
عهود:واقسم بالله كان ما تاكلي نزقب عليك يا امتاع مروان
افنان:اشرقت اح اح اح
بثينة:شرقتن البنت يا بتي عطنها امية
لجين:سبحان الله مش قلتلكن اني انا طيحة سعد من يوم خلقني العالي ديما جاية يلايا المية
ردينة:والله صااح فعلا
ولفطرن البنات وصبن خشن الصبايا ايديرن في غداء الجمعة طبعا عصبان وكسكسو والبنات انتشرن في الحوش يلي خذت الدار ويلي الصالة ويلي الحمامات ويلي المربوعة ويلي دار المقعد ويلي الحاجر المهم قسمن عااد مع خشة عمتهن اسماء انجي انعرفكن ع اسماء(عمتهن اصغيرة طولت وهيا مقرية فاتحتها فتعلقت بيهن واسرارهن وحاجاتهن كلهن عندها لمهم عندها بنت او وليدين ميرال و رائد ورءوف اصغار طبعا)المهم خشت والبنات كلهن سلمن عليها (اهااا يلي ماقولوش عليش ما كلمنهش هيه تسكن في الساحل بعيد وهنه في بنغازي)كملن البنات حوستهن وقعمزن واقعدن ايهدرزن دارن قهوة وطاب الغداء حطوه او تغدو وبعدها خشن البناات للماعين وسحر وعهود للحوش وميرال الشلايك(اهاا يلي متعرفش كلمة شلايك معناها الكنادر او المداس باللهجة الغرباوية لان في بنات غرباويات يقرن في الرواية )المهم كملن البنات حوستهن اطلعن فرشن في الحاجر برة واقعدن ايهدرزن مع بعضهن ع خشة حسااام
انتهت حلقتنا اليوم قولكن شن مستني افنان ومروان وشن قصص البنات وشن قصة حسااام يلي خش عليهم توا كله حنعرفوه في الحلقة الجاية
كانت معكم الكاتبة:-
سالمة خالد الحوتي❤️🔥
أنت تقرأ
أحببته ولم أراه للكاتبه سالمه خالد عبدالله الحوتي
General Fictionاهلين بنااات طبعا انا هذي تعتبر اول رواية ليا لان من قبل كاتبة رواية بس مش امكملتها تمااام وهيه رواية: احببته ولم اراه🥺💚:- المقدمة: تحكي على 4 قصص واقعية وفيها اشويا من خيالي بس مش واجد طبعا انجو للاول بطلة اسمهااا اليااس عمرها 20 سنة كانت بنت جر...
