أحببته ولم أراه للكاتبه سالمه خالد عبدالله الحوتي

رواية أحببته ولم ٱراه

الحلقة السادسة من رواية:
احببته ولم اراه:-
عهوود:😢😢
فراس:ارجوك ارجوك ارجوك عطيني فرصة وحدة بس
يقين:منو هذا يا عهود
عهوود:والله ما نعرفه
لجين:اموقفنا في الشارع الساعة 7:30دايرلنا شبهة
فراس:باهي اسمعي عطيني فرصة نحكي امعاك
لجين:والله يا بابا شن اتحق فينا نحنا نحكو مع اي واحد ولا شنو
فراس:مش هكي قصدي بس والله انا انحب اختك هذي ونعرف كل حاجة عليها نعرف اسمها عهود جمال ونعرف عندها 3 خوات و3 خوت ونعرفها تقرا2 ثنوي ونعرفها ليا اكثر من سنتين من المدرسة للحوش من الحوش للمدرسة وبجد نا عجبتني ورايدها بالحلال بس نبي منك تعطيني فرصة
لجين:الله قعدناا جو فيلم هندي مدامك تعرف كل حاجة علينا تعرف ان عندها حوش والحوش هذا فيه مربوعة او توا اتشاو باي هيا بناات
وعدن البنااات للمدرسة
انجو عند افنان في الحافلة
نور صاحبة افنان:انعن شكلك يا افنان بكل
افنان:تي كنك
نور:لا شي بس قصة مروان غريبة معمرش بين انه معجب بيك ديما شاب محترم وفي حاله
افنان:ما غريب الا الشيطان حبيبتي
انجو عند الياس في الجامعة وهيا طالعة
دكتور اسلام:الياس وقفي اشويا نبيك
الياس:خير ان شاء الله يا دكتور
د اسلام:والله شن بنقولك متفهمينيش غلط بس والله والله انا نيتي نضيفة راه وانا معجب بيكي واسمعي راني انا ناوي الحلال يعني ان شاء الله بكرة بنجو نخطبو
الياس:بس
د اسلام:مفيش بس تو انجو وانشوف شروطك واتشوفي شروطي وبعدين كان في نصيب ايصير خير
الياس:قعد وجها زي الطمطة☺️اوكي استاذ
د اسلام:لو سمحتي معش اتقولي استاذ
الياس:حاااضر
ومشى الوقت البنات في المدرسة حصص عندهن وافنان  حتى هيا عندها جو محاضرات والياس عندها عملي في مستشفى 1200 جو اختبارات
جت الساعة12:30روحن البنات3 مع بعضهن يقين خشت للحوشها ولجين وعهود روحن للحوشهن دقن الباب فتحتلهن امهن خشن يجارن من الحمو خشت لجين هيه الاولى خذت دبش وخشت دوشت واطلعت خشت عهود
خشت لجين للدار تمشط في شعرها
لجين:وووه عليك حمو اتقول قاعدين في الصحراء هذيصما مفروض ايديرولنااا مكيفات في الشوارع ع الاقل طالب العلم يصير منه ازح يييي عليك شعر يا اميييي يا اميييي
امينة:كنك اتعيطي يا فرخة الربا قاعدين ع الشارع
لجين:تعالي سلكيلي شعري كره
امينة:جديدة حتى هذي انتي اطولي في شعرك وانا نمشط
لجين:والله يا امي شعري وحلت فيه واجد او طويل راه حرام عليكم راعو شعوري اشويا
مع خشة افنان للحوش
افنان:كنكم شن فيه صوتكم عالي خير ان شاء الله
لجين:مش توجع هذي اشعري واجد او طويل وانا كلمت ماما قلتلها سلكيلي شعري قالتلي لالا مش هذا ظلم🥺🥺
افنان:لالا صاح يا امي هذا ظلم لجوني اشويا نغسل او تو انجي انسلكه لكي ما يجمل عليك حد مدام افنان قاعدة
لجين:نجيها خيتي السمحة
افنان:منو في الحمام متقوليش عهود
لجين:من غيرها عارفتيها انتي بعد اتخش للحمام تجوز وتضنى حتى الضنو (اهااا يلي ما يعرفوش كلمة تضنى معناها اتجيب او تولد)
افنان:😂😂والله صدقتي
مع طلعة عهوود
عهود:انا جاني بوفهاق كنكم شن في تحكو عليا
افنان:سبحان الله
لجين:صاااح بعد خطرها عدي اجري خشي للحمام اصلا اقريب اتجي الياس بيش اتخش طول لاني عندي لكن موضوع وبحتت في عهود😏😏
افنان:احكي شن في
مع خشة الياس
الياس:فيش تحكن وانتي ههههيي كنك خاشة بكويشك
افنان:والله كنت امصبية برة بس قالتلي لجين عندي لكن موضوع خشيت نجري
الياس:وووه خطرتني حتى انا عندي لكن موضوع
افنان،لجين،عهوود:شنووو
الياس:اصبرن انخش للحمام قبل موتن هن برضكن😝😝
لجين:ازي ازي ازي عليك باهي
الياس:امباااه اوكي توا بنخش الحمام
افنان:في عرسك انا انخش قبل
وعدن هنه الاثنين يجارن للحمام افنان خشت تجري والياس ادف عليها في الباب
الياس:وراس امك حلي
افنان:عدي في عرسك
الياس:وراس امك وراس مروان باهي
اطلعت افنان من الحمام
الياس:😳😳
لجين:حي على امها اطلعت بعد قالت مروان😱😱
عهوود:لا رسمي البنت امكبدة
خشن البنات للحمام ومني منك مني منك عرايك طبعا وضحك ولعب كاي خوات نين طاب الغداء عدن تغدن عاااد وخشن يغسلن في الماعين هنه 4 مع بعضهن لان امهن ضامة الحوس ما امعقبة شي
لجين:انا تسليت ومسح الغاز
افنان:انااا التسديف والتسيق
الياس:اناا المصميص وحك الارضية
عهود:قصدكن انا الحك عدن ملحن
لجين:اشطري يا حنة ماهو هذي ديما اتقولن فيها ليا هيا ابدي يا حنة
عهود:باهي انعن محماط وانتي ركبتي فيا
الياس:غير هيا كره
كملت لجين هيا الاولى لان التسليت هوا الاول هوا ومسح الغاز وجت ع الثلاجة اتعبيها امية امجمدة وخذت كشيك وجت ورا الياس وهيا اتمصمص ودارت ماليتها من لاورة بالشويا وصبت هذك المية
الياس:ووووووووووه🤯🤯🤯
البنات:😂🤣😂🤣
الياس: اعرفتها لجين لان الخصايل السود هيا يلي ادير فيهن يا لجييين🤬🤬
لجين:ريلاكس حبيبتي بالشويا راه ايطق فيك عرق😂😂
الياس:تو انوريك العرق بعد ايطق شن شكله وتاخذ صونية اتمصمص فيها امعبية امية وتقعد تجري وراهااا ولجين اتعيط
لجين:وووه وووه وووه عليا وووه يا نعلي يا باااتي وووه يا اميي
اطلعت علليهن امينة تجري
امينة:كنكن شن فيه
لجين:يا امي تبي تقتلني ووه وووه وجت وراه امها
افنان،عهود:😂😂😂
لجين:الله ايربحك اخر مرة وراسك وراسك وراس مروان خطيب افنان
افنان:😳😳
عهود،الياس:بحتن فيها بنضرة امتاع اسكتي
امينة:منو منو 😡😡
لجين:اااااء ااء
الياس:ماما اصلا نحنا بنقولولك موضوع
امينة:كنكن شن في
الياس:..........وهذا يلي صار دوتلها موضوعها ع موضوع افنان
البنات:😳😳😳
امينة:اقعدت 😃😭 لا عرفت تفرح لا تبكي
الياس:هااا شن قلتي يا ماما راه اهم حاجة رايك
امينة:تبكي والله كبرتن وبتعدن وتسيبني واقعدت تبكي واتقول صدق اللي قال البنت اتربو فيها للراجلها توا خلاص ايكسد الحوش بلاكن معش في من يضحك ومن يلعب ومن يهزا عليا نا وباتك 😭😭
البنات:كلهن 😭😭وجن اضبطن امهن
لجين:انا مش امسيبتك يا ماما مش كل حاجة جواز تو انعيش ونخدمك ونخدم باتي هذا عندي كيف الدنيا وما فيها
عهود بتغيرلهن جوهن
عهود:يا بتي نحنااا بكرة عندنا خطبة والله انتن مش اتقولن خاطرناا في فرح ومدرعناا شنو اهو جانا فرح الله عليك جوو
البنات:😅😅😅
كملت البنات الحوسة وخشن قيلن ناضن الساعة 4:30دارن عصرية وعصرن واغسلن الحوسة واقعدن يقرن ويكتبن بيش في الليل يبن يصهرن بيدرن حاجات ع العرب يلي جاية تخطب
جا وقت العشاء تعشن البنات وبعدها عدت الياس اعجنت عجينة بيتزا وبوريك وبدن البنات اللي اتضرب واللي اطيب في المفروم
لجين:بناات اشويا وانجيكن انشوف فوني اكيد يقين رنت ولا شي حاجة وصبت افتحت الواي فاي جنها رسائل من الواتس فتحتهن لقتهن😳😳

انتهت روايتنا اليوم قولكن شن يصير في خطوبة البنات وبذات الياس لان بكرة وسن الرسائل يلي جن للجين لانها انصدمت كله حنعرفوه في الحلقة الجاية

كانت معكم الكاتبة:-
سالمة خالد الحوتي❤️🔥