#البوسيفي1
بوسيفي .......
بوسيفي ..........
هيا جهز روحك بيجي بوك بنمشوا لي حوش عمك ..
لا مش ماشي معاكم 🤨 حوش عمي كله بنات و ما نبيش نمشي 🤨🤨
الوالده : هذا حوش عمك مش برانيه و هادوا بنات عمك ..
ندى : هذا ولدك من صغره متعقد 😌 ..
أنا مش معقود 🤨
ندى : متعقد يا ذكي افهم شن معناها قبل ..
.......................
و مشيت حوش عمي و أنا في قمة غضبي 🤨 و قعدت مقعمز برا في الشارع ..
بنت عمي الصغيره كل ما بتطلع تلعب في الشارع نحذفها بحاجة و نقوللها خشي داخل 🤨
قعدت مقعمز برا لين خداني النوم ع الرصيف و لما جى الوالد بيروح بي العيله قامني و قالي علاش راقد ع الرصيف !!
قتله ما نخشش حوش فيه بنات بس 🤨
روحنا و من يومها معاش نطلع مع الوالده بكل ..
————————-
بوسيفي أسمي ♥️ قبيلتي و عيلتي كبيره هلبا و متفرعه .. عندي 11 عم و 3 عمات ..
مواليد 1985 .. اكبر واحد في خوتي على 3 بنات و 4 اولاد ترتيبهم بعد البنات ..
————————
أمي .. يا أمي ...
_ نعم !!!!
بنطلع نلعب في الشارع ..
_ لا ما فيش طلوع تو تروحلي مداير عركة ..
بنلعب فم الحوش مش متعارك مع حد ..
_ الصبر و خلاص بما اني عارفه بتدير عركة ..
خالتي : مش عارفه علاش ولدك هذا نحس فيه راجل صغير 😁😁 تصرفاته كبيره على عمره ...
أمي : مداير في اخواته حاله ..
هيا يا أمي بنطلع نلعب كوره ..
_ لا ما فيش طلوع قلنا ..
خشيت للصاله 🤨🤨 لقيت ندى اختي اتدير في زمالطوا في ايديها .. قتلها شن اتديري 😳 !!
قتلي خديته من بنت عمي امس 😌 ....
خديته منها و كسرته و مسحتلها ظوافرها في قفطانها و هي تبكي .. جت امي شن في ! شن في ! قتلها شوفي بنتك شن اتدير 🤨🤨
قتلي اطلع العب كوره و فكني منك ..
طلعت للشارع نجري و مشيت نلعب كوره 😄
و روحت المغرب رجليا كلهم جروح من اللعب .. و تاني يوم مشيت للمدرسه .. قعمزت في المقعد عادي زي اي يوم .. طق الباب .. في بنت جديده جت معانا في الفصل ..
الأبله : هادي زميلتكم رحاب جديده بتبدا تقرا معانا .. امشي يا رحاب قعمزي في المقعد الثالث .. جنب البوسيفي ..
أنا : 😳😳 نضت وقفت و بعدها قعمزت حاشية المقعد و اعطيتها بالضهر .. و نستنى امته الحصه تكمل 🤦🏻♂️
و غيرت انا و ايمن اماكننا في المقاعد ..
أيمن : شعرها حلو رحاب مفتوح مش زي باقي بنات فصلنا 😁
أنا : تي اسكت عيب راه 🤨🤨 .. نضربك راه 🤨🤨
طلعنا الاستراحه و كل شوي رحاب تبكي و مش مستريحه للمدرسه بكل .. و اولاد فصلي كلهم مهتمين بيها ..
في المرواح نستنى في الوالد يروح بيا .. المدرسه فضت .. اغلبهم روحوا ..
رحاب تبكي تحت شجرة التوت 😭 .. هادي خيرها زعمه !!
مشيت لها قتلها خيرك ؟ قتلي بابا عطل و انا خايفه ...
قتلها عادي حتى انا بوي عطل 🙄
جى بوي و قعد مدرس سيارته برا يستنى فيا و ما بيتش نطلع لين جى بو رحاب روح بيها ..
طلعت روحت مع بوي و هو يعارك و يقولي اكيد كنت تلعب في كوره و لا راكب فوق في شجرة التوت ...
روحت الحوش و كتبت واجباتي كلهم و ندى تقولي راهو عبدالعاطي الي في الشارع الي ورانا كل ما نمشي للدكان يقعد يقولي يا فلونه يا فلونه ..
طلعت من الحوش و مشيت لي وسام ولد شارعي و صاحبي قتله تعالى معاي بندير عركة في الشارع الي ورانا 🤨🤨
مشيت انا و وسام للولد و ضربناه و روحت للحوش قلت لي ندى معاش تطلعي للدكان بكل 🤨🤨
————————-
و فاتت سنيني و من بعد الابتدائي قريت أعدادي و ثانوي في مدرسه للبنين فقط ..
كنت نقرا الصبح و نخدم في العشيه .. أي شي نخدمه .. نصلح كهرباء .. نخدم شبكات اميه .. نزوق .. نخدم في القهاوي ..
و بعد الثانوي خشيت كلية الطيران الحربي .. و لأني دفعتي أمتياز جتنا دورة تدريبيه في السودان ...
و قبل ما نمشي الدوره .. كلمني محمد صديقي .. قالي عندي خدمة بنمشي نركب كاميرات تجي معاي ؟؟ قتله اخطم عليا تلقاني نستنى فيك ..
جى محمد و خديت العده متعي و مشينا .. ڤيلا كبيره الله يبارك ..
قتله هذا حوش او مقر شركة ؟؟
قالي كلموني ع أساس حوش ..
خشينا و ركبنا ع السطوح نهندسوا في طريقة توصيل الكاميرات و كيف بنحفروا ..
و بدينا في الخدمة من فوق السطح و لاحظت محمد شاد جهة و يشبح من فوق ..
صفرت له .. تلفتلي .. قالي شنو ؟؟
قتله في شن لاهي ؟؟
قالي في طرف هنا 😍
شديت مفتاح كبير 🔧🔧 في ايدي و قتله تعالي سقد اخدم خدمتك ..
كملت خدمتي و نزلت بثبت الكاميرات في مقدمة الحوش و بديت نوصل في الخيوط ..
و انا مطبس نخدم في الخيوط سمعت صوت السلام عليكم ..
انتبهت و ما قمتش راسي و رديت و عليكم السلام و رحمة الله ..
قتلي بارك الله فيك يا ولدي .. وحسيت وقتها انها صاحبة الحوش ..
رديت عليها و قتلها فيك بارك الله ..
قتلي مزال نبي كاميرة تعطي في الاتجاه المعاكس لمدخل الشارع ..
قتلها بس انتو طلبتوا 3 كاميرات ..
قتلي نحساب كاميره وحدة تكفي فم الحوش .. قتلها معناها بتصبري لي بكره ..
قتلي ما يصيرش اليوم ؟؟ لاني بصراحه نتعرض لمضايقات و مهمة هلبا الكاميره ..
قتلها ما يساعدنيش الوقت نمشي ناخدها و نجي نركبها .. المفروض من الاول فهمتوا محمد ..
و انا قاعد نحكي معاها جت بنتها جابت سفرة قهوة .. سلمت و حطت القهوة و خشت ..
نزل محمد .. قالي يا راجل شفتها طالعه بالقهوة قريب حذفت روحي من فوق السطح 😄
قتله ريتك درتها 😒
كملت خدمتي و انا نلم في العده و بنحطها في السياره برا .. لقيت سياره فيها شباب .. ضحك .. موسيقى عاليه .. تسطريب في الشارع نفسه .. كانوا مستفزين بس ما لياش علاقه بيهم ..
بديت نخش للجنان نلم عدتي و نطلع نحط في السياره .. و لما خشيت اخر مره لقيت صاحبة الحوش تحكي لي محمد ع السياره الي تضايق فيهم برا .. سمعت ضربه و طلعت انا و محمد و لقينا مرش السياره كله مكسر ..
و السياره الي فيها شباب واقفين و يضحكوا .. جيت سألته شكون ضرب السياره ؟؟
قالي بكل استهزاء ( مش ركبتوا كاميرات !! برا شوف شكون ضربها السياره علاش تسأل فيا 😆😆 )
فتحت باب سيارته و جبدته منها و شديته من رقبته من الخلف و ضربت راسه ع مرش سيارته لين تكسر و الشاب فقد الوعي و الي معاه هرب ..
تلقطت الدنيا و كان وجهه كله دم و محمد يشد فيا و يقولي بنديروا مشكله للناس ..
و ركبنا سيارتنا و روحنا ..
خشيت الحوش و دوشت و نسيت الي صار بكل .. تاني يوم الصبح جى اتصال لي والدي ان في بلاغ مفتوح ضدي ..
مشيت للمركز و تم توقيفي و تاني يوم حولوني للنيابه .. و بعد اسبوع طلعت ..
اول ما خشيت الحوش امي تحضن فيا و تبكي اخواتي البنات و خالاتي و الحوش كله زحمة ..
قتلهم بنخش ندوش و نرقد .. خشيت داري دوشت و رقدت .. نضت المغرب لقيت العدد زاد و نساوين عمي عندنا ..
نزلت قتلي ندى المرأه الي ركبتولها الكاميرات يوميا تتصل تسأل عليك ..
قتلها تسأل عليا انا ؟؟
قتلي ايه .. تاني يوم ما نحبست جت حوشنا نعتها محمد صاحبك ..
قتلها اها به تمام ..
و انا طالع امي قتلي تعالى سلم ع مرت عمك .. وقفت ع باب المطبخ و قلت السلام عليكم كيف حالك مرت عمي ؟ ..
قتلي الحمدلله كيف حالك انت ؟ .. و قالت لي بنتها سلمي ع ولد عمك ..
جت بتسلم عليا قتلها كيف حالك و طلعت من قبل ما توصل فيا ..
لقيت محمد برا .. ركبت معاه و مشينا استراحة صاحبنا .. و طول الطريق يقولي المرأه عايشه هي و بناتها بروحهم و بوهم متوفي و الباين في من يضايق فيهم و و و و ..
سهرنا في الاستراحه .. هذا يحكي ع صاحبته .. و هذا يكلم فيها قدامنا .. و هذا يوري في صور صاحبته للتاني و التاني ياخد منه التليفون و يكمل هو الدردشه +18 و لما تتصل بيه يرد التليفون لي صاحبه ..
نلعب بلايستيشن كل مرة مع حد .. مرة نهدرز و مره نلعب ..
تاني يوم روحت للحوش و امي قتلي المرأه صاحبة الحوش الي ركبتلهم كاميرات جت هنا تتحمدلك بالسلامة و تبي تسلم عليك ..
قتلها أمي أعفيني من تعالى سلم 🤨 تعالى سلم .. قوليلها ما روحش مزال ..
و خشيت الدار رقدت ..
في الليل جتني امي قتلي راهو خوك بدر مداير مشكلة و تعبني هلبا و نشم عليه في ريحة دخان و نخاف نقول لي بوك ما يصيرش طيب ..
قتلها تمام تو نعرف كيف نتفاهم معاه ..
no name ♥️🌺
