#البوسيفي32
قتله جبريل أعطيني خريطة شارعكم باش الواحد يدرس الهربة كويس .. قالي بدر قصدك تهندسهة 😄 ..
مشينا لحوش جبريل .. و قلت لي بدر أنزل أنت طق ع الباب و أسأل على واحد من خوته .. ما بين ما دورت انا السيارة .. تلفت بدر يسلم و قال ما تنسونيش في الزيارة ✋🏻😄 الحبس يرحب بيكم .. قتله انزل يا راجل سقد روحك ..
كانوا عيوني في المرايا على جبريل الي لولا كبرياء رجولته كان بكاء بالصوت ..
حنينه لشارعهم 💔 هنا كبر .. هنا لعب كورة مع اولاد شارعه .. جدران الحوش هدا حتى هي تستحق الأحتضان 🤷🏻♂️❤
يطبس في راسه من الروشن يشوف في حوشهم و باقي الشارع ..
فتحوا الباب و طلع ولد صغير .. قلت له شكون هذا ؟؟ قالي ما نعرفش ..
قتله مرات ولد جيرانكم .. قالي مرات ايه ..
كان متوتر لدرجة ترهق النفس ..
لحضات و خش الولد الصغير و طلعت امرأة كبيرة في السن ..
حط راسه بين رجليه و يقول أمي هادي أمي 🤷🏻♂️💔 .. قاله وسام أنزل يا راجل ..
و أنا و الله ما قادر ننطق بحرف .. نعض بسنوني من التوتر ..
و جبريل من كثر ما مستاحش أمه هرب من شعور و رهبة لقاءها و أحتضانها 🤷🏻♂️💔 و نزل راسه تحت 😔...
تلفتت طبطبت ع كتفه و قتله أنزل جبريل أنزل ❤..
فرد صدره و خدا نفس و زادوا عيونه نفتحوا 😳 بس باش ما تنزلش دمعته ✋🏻و انزل .. و من كثر خوفه عليها 👌🏻❤ كان يمشي عادي كأنه مش مصاب قبلها بيوم 🤷🏻♂️ هذا كله باش ما تنخلعش عليه ..
خش جبريل و أنا حاس قلبي مغموم و متضايق .. و جى بدر قعمز جنبي ..
و احنا الثلاثه مقعمزين في السيارة و عيوننا في الشارع .. أي سيارة تخش نركزوا عليها .. أي حركة في الشارع ..
مقعمزين نستنوا و على أعصابنا لأن الي تعارك معاه جبريل و قتله بالخطأ هو ولد شارعهم ..
يعني أي أشتباه في وجود جبريل في حوشهم ح يهدوا عليه طول خوت المقتول ..
كنت في داخلي نقول هيا اطلع جبريل اطلع .. في الوقت نفسه نتمناه يقعد مع امه ..
نفتح باب حوشهم و طلعت أمه تطلع في الكناسه حاشاكم .. كانت تحط فيها و تتلفت يمين و يسار .. و عرفنا إنها جولة إستطلاعيه باش تشوف الشارع و تطمن على طلعة ولدها ..
و بالرغم حلاوة حرصها و حبها ❤ لكن توجع توصل بي أمك اتدير هكي ع خاطرك 💔 ..
طلع جبريل .. و ولعت انا طول و ركب معانا و مشينا ..
كان جوه كئيب .. و كلنا ساكتين في السيارة ..
روحنا و قعدت أنا و أياه و بدر في الجنان نهدرزوا على قضيته ..
قال الولد الصغير الي فتح الباب ولد اختي طلع ..
و هكي الحبس 👌🏻 تطلع منه لا تعرف صغار اختك و لا صغار خوك .. و لا حتى نساباتك .. و تقول هدا ولد شكون ؟ و هادي بنت شكون ؟؟
لا تعرف من مات .. لا من تزوج .. لا من سافر .. كل شي توقف من يوم حبستك ..
قعد يحكي ع قضيته .. قال كنت في المحل كيف مروح .. قعمزت فم الحوش .. و معاي اولاد شارعي الزوز .. و واحد منهم و أحنا نهدرزوا صار نقاش حاد لعن لفظ الجلالة .. ضربته على فمه سنه طاحت .. بدا يحز الي معانا .. و كنت انا نضرب و هو يضرب لين تيشيرتي تقطع عليا .. و لما حزونا مشى سيارته و هو يقول انا اطيحلي سني يا جبريل .. و انا شادني الولد الي معانا ..
فجأة جى الولد و جاب معاه مسدس من سيارته .. و بدينا نتعافروا و طلعت طلقه ضربت في القطران و ردت عليه هو و لانه كان مطبس كانت ماكنة ..
رفعوه للمستشفى و توفى الله يرحمه و يسامحه 😔💔 .........
كنت نسمع فيه يحكي و في داخلي نقول أنسان 👌🏻 ضرب ع خاطر غيريته ع لفظ الجلالة هدا و الله ربي يحبه ❤ و ح يفرج عليه بعد ضيق أكيد ..
قتله شكون العيلة الي ولدهم توفى ؟
قالي عيلة (.........)
قتله جربتوا تتواصلوا معاهم و تدفعوا ديه او تاخدوا تنازل ؟؟
قالي من الي بيتواصل معاهم ؟؟ إذا كان بوي ما يكلمش فيا بكل .. من الي بيجري عليا 🤷🏻♂️
قاله بدر و الله بدل العم عندنا 10 نلمهم كلهم بي أولادهم و نجيبهملك 😄
قاله تمشي الله غالب و خلاص 😔..
قتله فكر فيه الموضوع و تو نقول لي واحد من الأولاد يسأل ع العيلة بالك نتواصلوا معاهم ..
قالي كيف بندفع انا ؟ تشوف في الحال ..
قتله تو ربي يسخر ..
جى وسام و قالي محمد يسأل عليك .. قتله بيجي ؟؟ قالي ما يعرفش إنك هنا .. قتله أحسن .. قالي البنت التونسيه مرات تعرف إنك هارب من الحبس و تخاف منك و ما تجيش تشوفك..
قتله قاعدة تخدم في قهوة الرجيلة ؟؟ قالي ايه .. قتله غدوة نمشولها ..
خشينا رقدنا و تاني يوم الصبح نضت أنا و بدر و مشينا للحوش لأن الوالدة روحت الفجر .. و خشيت و أنا نتخايل في يوم الي نشديت فيه ..
خشيت لقيت بوي في الجنان يشرب في شاهي سلمت عليه و بوست راسه ..
و قعمزت جنبه و بدر ركب فوق ..
سألته على أمي و شن قالولها .. و بعدها قتله أنا آسف ع الي صار يومها ..
قالي أنا لليوم حتى خوك ما سألته علاش جو هنا يومها .. و حتى الي يسألني من عمامك نقوله أنا ولدي و نعرفه مش متع دوة فاضية ..
لكن يا ولدي رد بالك من الرفقة 👌🏻 ..
قتله أن شاءالله خير ..
قالي تسكر الموضوع ؟ قتله لا .. ان شاءالله ح يتسكر ..
نضت نشوف في أمي و أنا متحشم من بوي و الدوة الي صارت معاه ..
خشيت لقيتها متكية .. بوست راسها و قعمزت جنبها و هي تبكي ..
خشت ندى سلمت عليها و حضنتها .. و منى و نمارق .. قتلها نبي نمشي للخدمة و في الليل نجيك .. قتلي اقعد بحداي .. قتلها تو في الليل نجي نقعد بحداك ..
و أنا مقعمز في الحوش و متوتر ..
سلمت عليها و طلعت مشيت للخدمة طول .. لقيت أوس سلمت عليه و قعد يسأل فيا وينك و وين الغيبه و و و ..
قتله صارلي موضوع و ان شاءالله خير .. قالي عندي علم بيه ..
قتله كيف !! 😳
قالي مشيت ناخد في طروف لي سيارة أختي .. و لقيت واحد عند أمجد في المحل و عرفه أمجد بيا و لما عرف إني نعرفك و دفعتي قالي إنك محبوس ..
قتله من هو ؟؟
قتله أوس الراجل هدا لو مشى و شهد و قال إني ما ليا علاقه بشي و مجرد إني وصلته ح تنحل أموري وقتها ..
قالي بس هو ما ليشي علاقه ..
قتله كيف !!
قالي يعني هو يحسابك انت الي واخد الفلوس ..
قتله لا طبعاً ..
قالي ح نفهم كل شي و نقولك .. قتله تمام به نستنى تليفونك ..
و أنا طالع كلمت ملاك قتلها وين انتي ؟؟
قتلي في الشركة .. قتلها ما جيتيش لي معيتيقه ؟؟ قتلي لا اليوم ما مشيتش ..
انت غادي ؟؟
قتلها ايه ..
قتلي خسارة 😭 لو نعرف كنت جيت ..
قتلها بنروح أنا عندي موضوع بعدين نكلمك .. و سكرت الخط ..
مشيت للأستراحه لقيت جبريل يصلح في الضي صاير التماس كهربائي ..
قتله فالح الله يبارك .. قالي نعاونوا الراجل مدام قاعدين عنده ..
و بعد ما كمل قالي بوسيفي نبي نسأل ع المبروك .. قتله فوت يا راجل مرات تليفوناتهم مراقبه ..
قالي نتطمنوا بس ..
قتله كيف ؟؟
قالي نعرف رقم أمه .. قتله كيف تعرفه ؟ قالي لما تصير مشكلة و يدخلوه المنفردة يقعد عندي تليفونه و نرد على أمه ..
قعدت ساكت ..
ناديت بدر خديت منه تليفونه .. و أعطيته لي جبريل يتصل ..
أتصل و ردت أمه .. و قاللها أنا جبريل .. و طول عرفاته .. و الصدمة كانت إنها سألاته ع المبروك ..
تفاجأنا .. و جبريل قاللها انا طلعت و معاش نندري عليه قلت نكلمك و نتطمن ..
قتله قداش ليا نستنى في أتصاله و فرحت بصوتك تقول المبروك كلمني ..
قاللها جبريل كان سمعت حاجة نقولك طول .. و قعدت تدعيله و سكر الخط ..
قالي زعمه سعفوه ؟ أو مزال مش مبلغين أماليه ؟؟ قتله الله أعلم ..
قالي أمه من سكان الجنوب .. تجي في تاكسيات هي و بنتها باش تشوفه و تطمن عليه ..
كانت كل ما تجي تجيب معاها زيت زيتون و رب .. ان شاءالله يطلع مصاب و يرجعلها يارب ..
قعدنا مقعمزين و كل واحد فينا يتذكر شن صار .. رن تليفوني .. شفت للرقم ما عرفتاش .. ما بيتش نرد ..
وصلتني رسالة .. ( الف الحمدلله ع السلامة يا طبيب قلبي ) ...
أستغربت في الرقم و في داخلي نقول ان شاءالله مش ريان ..
رن تليفون تاني ..
فتحت الخط .. قلت الو ..
نسمع في ..
متيم بالهوى يروي حكاية حب مخفية 🎵 .. مع من عاش و أياهم 🎵
و لولا الأمر ما يحوي ما قلت الذي بيا و لكن بعد فرقاهم 🎵
لقيت القلب يهواك 🎵 خطاي و الخطا ماهو خطاهم .. مكتوب الشقى ليا معاهم صادق النيه 🎵
خلوني مع نفسي و شوقي زاد حنيه من اللهفة لي عيناهم 🎵
و تسكر الخط ..
بدر ..
نعم ؟؟
شكلي نشبه عبدالحليم حافظ ؟؟
قالي لا لا 😳😳😂😂
نبي نفهم انا الي يتصلوا يسمعوا فيا في أغاني بي شنو نفكر فيهم أنا 🤦🏻♂️..
حسيت بيها ريان و ما كنتش نبي نرجع للخلف بكل .. تاني يوم مشيت للخدمة و كان مفروض نخش للآمر و نحكي معاه ..
تلاقيت أنا و ملاك .. كانت جايتني و عيونها يضحكوا .. سلمت عليا و قتلي ما تتصورش قداش فرحانة أنا 🙈❤
قتلها كل يوم ح تشوفيني هنا .. غير أن شاءالله المهندسه الي معاك ما نشوفهاش ..
قتلي به 😄😄
قتلي بوفتي انت معطل هنا ؟؟
نعم !!! 😳😳😳
قتلي بناديك بوفا من اليوم 🙈
لا و الله 🙄🙄 من جدك انتي ؟؟
قتلي بوسيفي يعني بوفا 😌..
أها .. طلعت بوفا انا في الاخير 🤦🏻♂️ .. بوسيفي يعني بوسيفي ..
لما نولدت بوي ذبح عليا عقيقة زوز خرفان ✌🏻.. و أمي دارتلي طهور عزمة فيه الشارع كله .. و ما خليت ما خدمت من و انا صغير .. و خشيت كلية حربيه و سافرت للصحراء نتدرب و ناكل في التراب .. و ندرب في طلبه و لما نوقف كلهم يضربولي التحيه ✋🏻.. و خشيت للحبس و تمرمدت باش في الاخير تناديني بوفا 🤦🏻♂️
معاش نبي نسمعها الكلمة هادي بكل ملاك ..
قتلي أنا ما فهمتش خيرك جدي 🤨 ..
لا جدك لا حناك عندي أسم تناديني بيه ..
بوسيفي 🙄🙄
No name ❤🌺
