#البوسيفي22
قتله إنت شن ادير هنا ؟؟ قالي أنا نسكن هنا .. شاف رجلي لقاها دم ..
و الغريب إنه لا خاف و لا انخلع .. قالي تعالى معاي حوشنا هنا 👈🏻 ..
قتله لا نبي جامع بس .. قالي هنا في جامع .. و قعد ينعت فيا على مكان الجامع ..
قتله روح انت توا ليل عليك ..
و نضت مشيت للجامع .. كنت نمشي و نمسح بالتراب قطرات الدم ع الارض ..
خشيت الجامع غطيت رجلي بالتراب الي لصق ع الدم .. قعدت مقعمز نستنى في الدنيا تهدأ و نطلع نروح للحوش ..
مره مره نحس بدوخه .. و تحس براحة في بيت الله 👌🏻 المكان الي مستحيل اتداهمه الدوله ..
حسيت بي حد خش الجامع .. نضت نبي نخش الحمام نلبد فيه .. لقيت مكاني فيه دم .. ح يزبطوا ان في حد جريح ..
بزعت سطل اميه و خشيت .. قعدت مقعمز .. في الحمام .. أوذاني برا .. من كثر التركيز نحس في روحي بندوخ ..
نسمع في طفل يقول و الله كان هنا في الجامع انا جيت معاه .. و معاه راجل يقوله بالك جى حد خداه ..
قعدت في الحمام .. قرب صوتهم هلبا .. نسمع في الابواب تنفتح ..
يااارب 🤦🏻♂️
أول باب نفتح .. مش هنا مش هنا .. تاني باب نفتح .. فاضي يا جدي فاضي .. ثالث باب 👌🏻 تحركت إيد الباب .. نزلت .. و ركبت .. ما نفتحش الباب ..
بدا الراجل يطق ع الباب .. و أنفاسي كانت ح تفضحني ..
الراجل يقول هيا نروحوا ما فيش حد هنا .. و الولد مستمر في الحلف و يقوله رجله دم و انا جبته هنا ......
طلعوا و حسيت إن الراجل يكذب و كان يسمع فيا في صوته بس و كأنه يبي يعطيني الأمان ..
قعمزت ع الأرض تحت و الحمام كان ضيق هلبا ما قدرتش نمد رجلي ..
زادت الدوخه و كنت خايف نفقد الوعي و يفتحوا عليا الباب في صلاة الفجر و يسلموني ..
فتحت طوبوا الميه ..و حطيته ع راسي .. و كل ما نحس بدوخه نفتح طوبو الميه ..
فاتت ساعه .. ساعتين ..
حاولت انوض نطلع .. فتحت الباب و خليت الميه مفتوحه باش بمشي الدم ..
طلعت و مشيت مسافه برا الجامع و زادت عليا الدوخه قعمزت تحت سور ..
حدفت راسي ع الحيط .. نبي تليفون .. نبي نكلم بدر ..
فجأه نشوف في حد جاي يجري ..
خلاص معاش قدرت انوض .. قرب مني طلع نفسه الولد الصغير .. و كان في حد وراه ..
يقولي جدي يبيك جدي يبيك ..
قرب مني الحاج و اتصل بي ولده .. جى و ركبت معاهم السياره و رفعوني حوشهم ..
قعدت متكي ع الفراش .. قرب مني الراجل و قالي أنا هيثم ولد الحاج و هذا ولدي ..
هزيت بي راسي به ..
قالي رجلك مصابه في مداهمة حوش (...........) ؟
قتله انصبت ايه بس ما نعرفش حوش شكون .. قالي لازم يشوفك دكتور .. قتله اعطيني نكلم خوي و تو يجي يرفعني ..
قالي الأفضل ما تطلعش من هنا و ما تمشيش مستشفى ..
قتله ليش ؟
قالي أكيد معممين ع بياناتك ..
قتله أنا مش مداير شي ..
قالي الحوش الي داهموه متع أكبر تاجر مخدرات .. قتله كيف !! 😳😳
قالي مش وقتها الدوة هادي .. لازم دكتور يشوفك توا ..
و ما كانش في حد في بالي غير ريان .. قتله أعطيني تليفون ..
اتصلت بيها .. ما ردتش عليا .. بعتت رساله ( بوسيفي ) ....
عاودت اتصلت بيا .. قتلها وين إنتي ؟ قتلي في المصحه .. قتلها آمته تروحي ؟؟
قتلي الصبح الساعه 8:00 ...
قتلها نبعتلك حد تعالي معاه .. قتلي شن في ؟؟ قتلها انصبت بطلقه و ما نقدرش نمشي المستشفى ..
عيطت 😱 ..
و قعدت نقوللها أهدي و شوفي شن بتجيبي معاك .. قتلي به به ..
سكرت الخط ..
و قلت لي الراجل الدكتوره تستنى فيكم في المصحة (..........)
قالي خلي نقول للعيله يمشوا معاي باش ما يشكش حد ..
طلع الراجل و اتصلت بي بدر .. رد عليا طول .. قتله شن الجو ؟
قالي وين انت ؟
قتله الأمور تمام ؟
قالي ايه .. وين أنت ؟
قتله ما نعرفش وين .. لكن قريب من قرقارش ..
قالي جايك ..
قتله لا .. لين نكلمك أنا ..
قالي تمام و سكرت الخط ..
جى الراجل و قالي العيله جاهزين بنطلعوا أحنا .. قالي خلي التليفون هذا عندك و تواصل مع الدكتوره ..
قتله تمام ..
طلع الراجل و بعد نص ساعه اتصل من رقم مرته و قالي انا برا المصحه ..
قعدت نتصل بي ريان ما تردش .. مره .. 2 ... 10 ......... 🤷🏻♂️🤷🏻♂️
ما ردتش ريان ..
بعتت رساله ..( الراجل برا هو و مرته يستنى فيك ) ....
ما ردتش عليها ..
بديت ندوخ هلبا .. يفيقني الولد الصغير .. نفيق و نعاود نتصل ..
نبضات قلبي بدت تضعف و كأن عروق قلبي تتمزق ..
ردي يا ريان بنموت أنا ..
عاودت اتصلت مره و 2 و 10 و ما تردش ..
فقدت الوعي ..
نسمع في الولد الصغير يعيط .. جده يبخ فيا بالميه .. بس مش قادر نتحرك .. بين الحياة و الموت ..
لين غبت ع الوعي تماماً ..
فقت لقيت بدر واقف على راسي .. قتله وين أنا ؟؟ ..
قالي في نفس المكان قاعد .. قتله وين ريان ؟؟ قالي استريح توا ..
قرب مني .. قالي الحوش الي مشيتوله مبارح حوش تاجر حشيش و الدوله تصطاد فيه قداش ليها .. و لما داهموا المكان كنت انت و سيارتك داخل و في سيارتك في كيس فلوس ..
يعني التهمة البديهية إنك تخدم معاهم و مخلصينك أو متصرفلهم في بضاعة ..
قتله محمد وين ؟
قالي قاعد في التوقيف ..
قتله يقدر يقول ان انا موصله و الفلوس فلوسه .. قالي ماهو المشكله إنه ما قالش ..
قتله كيف ؟؟
قالي محمد قال إن ما يعرفش الفلوس لي منو ..
ضربت على راسي و ضحكت ..
و غلطة الشاطر بألف 👌🏻🤷🏻♂️
شن يعني !! كيف يصير ؟؟
قالي ح تقعد هنا لين محمد يتكلم ..
قتله تمام ..
ما تخليش أمك تعرف شي ..
قالي ما تدور شي ..
خش شاب يسأل عليا كيف حالي توا ؟؟
قتله الحمدلله ..قالي صحتك تمام هذا الي يساعدك ..
قتله كيف !!
قالي رجلك نزفت دم هلبا ..
تلفتت لي بدر !!!
قالي الدكتور الي عالجك ..
ايه صح 😳 ريان أمس ما تردش .. أعطيني تليفونك بدر .. أتصلت بيها لقيته مقفل ..
قتله توا تمشي لمصحة ( ........ ) و أسأل على دكتورة ريان ..
قالي به تمام ..
قتله بدر نخاف محمد مدايرلها حاجة ..
قالي كيف ! 😳
قتله قصة طويله ما فيش داعي تعرف .. لكن ضروري تطمن عليها توا .. و كان ما لقيتهاش في العياده اصبر للساعه 8:00 المغرب موعدها في المصحه ..
قالي تم تو نمشي غادي طول ..
أعطاني جهاز و شفرة و طلع بيروح بالدكتور ..
و أول رسالة كتبتها كانت ليها ( طمنيني عليك .. بوسيفي )
و نفكر في الحصله الي حصلتها .. لين خداني النوم ..
فقت في الليل .. طول اتصلت بي رقمها لقيته مقفل .. و اتصلت بي بدر ..
قتله شن صار ؟
قالي كيف وصلت قدام المصحه .. قتله مش قتلك برا بكري ..
قالي جيت بكري و قالولي مهناش .. و توا جيت تاني .. قتله ما تسألش عليها مرات تخاف .. خود واصل ع اساس بتعاين ..
قالي تم ..
دقايق و اتصل بيا .. و ما باش يتكلم و خلى الخط مفتوح ..
نسمع في صوتها 😰😰 و هي تسأل في بدر ..
قاللها بدر انا خو البوسيفي .. هدوووووووء ..
نسمع فيها تقول انا خفت مبارح و جى خوي روح بيا و من كثر ما خفت عليه لين صارلي هبوط و دخت و دارولي التغذيه ..
سكرت الخط 🤦🏻♂️💔
و عادي 🤷🏻♂️ معذرة الي ربي باش معاش يأنبني ظميري
No name ♥️🌺
