#البوسيفي43
روحت للحوش متأخر .. و الصبح مشيت للخدمة .. و كلمني بدر قالي جبريل بيجي يشوف اختك العشيه .. قتله آمته صار ؟ مبارح كنت معاه ما قالش ..
قالي متحشم منك 😄 .. قتله كلمت أمك ؟ قالي ايه ..
روحت الضهر للحوش تغذيت و رقدت .. فقت العشيه .. خشيت المطبخ بندير قهوة .. خشت نمارق و لما شافتني طلعت هربت .. على خشت بدر يضحك عليها 😄😄 ..
يا بوسيفي أختك طالقه شعرها راه 😠 تي البسي تستمال و لا شن يقولوله 😆
درت قهوة و نزلت للجنان .. لقيت بوي و جبريل مقعمزين ..
أوووووو أنت هنا .. سلمت و قلت لي بدر جيب قهوة بالله .. قالي أشقى بروحك داروله قهوة و حلويات ما تفهم شي و بكلاوة .. و انت خاش اتطيب في قهوتك بروحك ..
قالي جبريل جيت العصر لان العشيه تزحم في المحل و ما نبيش نسكر ..
قتله ميه ميه الله يباركلك فيه .. ناداه بدر للمربوعه و طلعت انا و بوي فم الحوش قعمزنا ..
و كل مرة يقعمز معانا حد شوي .. بعد نص ساعه طلع جبريل .. قعمز معانا برا و مشيت أنا و أياه للمحل ..
قالي بأذن الله ما نقصر معاها بكل .. قتله توكل على الله ♥️🌺
و عدت أيامنا نتسابقوا على هالدنيا و لهيت أنا في تشطيب حوشي و كملته .. و جبريل في المحل و كل مرة بدر يجيبله خدمة لي واحد من جماعته .. بدت زحمة عليه في المحل و خدمته كل يوم أحسن من الي قبله .. و كل مرتب ياخده يجي يعطيه لي بوي .. و وسام قاله اي خدمة برا المحل هي ليك خالصه ..
حكيت مع ملاك و أتفقنا انديروا العرس و بعدها كل مرة ناخدوا حاجة للحوش ..
و لما هذرزت مع جبريل قالي و الله أنا عندي مبلغ بسيط لو العيله يوافقوا نأجر حوش و ناخد دار نوم و اللازم بس و نديروا يوم واحد ..
قتله أنا في هادي ما نقدرش نعطيك رأيي .. لكن روح معاي و هذرز على بوي .. و أحكيله وضعك كله و شوف شن يقولك .. قالي به تمام ..
كان جبريل يرقد في المحل في الليل و مصروفه قليل جداً ..
روحنا للحوش و حطولنا عشاء تعشينا .. و بعد العشاء حكي جبريل لي بوي على أقتراحه ..
سكت بوي في الأول و بعدين قاله الأيجار مش ح يخليك لا تاخذ أرض و لا توقف على رجليك .. الي بتخدم بيه بتحطه في الأيجار ..
قاله جبريل نشوف أيجار على قدي و نزيد نشوف كيف نطلع خدمة تانيه ..
قاله بوي نعطيك سنة بس أيجار .. ع الاقل تكون ملقط مبلغ تاخد أرض او نص المبلغ ..
قاله جبريل تم خلاص ..
كان بوي يعامل فيه و كأنه ولده مش زي باقي نساباته و يحبه هلبا ..
لدرجة أن بوي نادى على نمارق و قاللها تسكني في أيجار ؟ قالتله عادي .. قاللها راهو الشاب منقص على روحه كل شي .. لا اتعبيه بي طلبات لا تشكيله حال 🤚🏻 قالتله حاضر 😊♥️
و كأن نمارق تخطت مراحل طويله من عمرها باش توصل للتعلق الروحي هذا ..
و مشت أيامي هاديه جدا .. حياتي روتينيه .. من الخدمة للحوش او الاستراحه و خلاص ..
رفعت أماليه لي حوش ملاك يتفقوا على موعد العرس .. و حددوا موعد العرس ..
و لما كلم جبريل أمه و قاللها قولي لي بوي يجي يتكلم مع العيلة .. كان بو جبريل رافض و أمه تقوله نمشيلهم حتى أنا بروحي ..
و على قد ما كنت متضايق على خاطره كنت خايف عليه تصيرله حاجة ..
بدا معاش ياكل و يدور في أيجار .. و وقت الخدمة بدر يدور ع أيجار ..
لين حصل حوش .. أنا كنت نركب في دار النوم .. و بدر يزوق في حوش جبريل و جبريل اول ما يسكر المحل يقعد يشطب في حوشه لي قرب الفجر يصلي و يرقد و تاني يوم يمشي للمحل ..
و الوقت يجري ما بين تشطيبات الحوش و العرس ..
قبل الفاتحه بي عشرة أيام مشيت درت تحليل الثلاثي .. و مشيت خدمتي .. و أشتبهت بنفس الشخص متع الحبس ..
وقفت نشوف فيه وين بيمشي .. لقيته خاش مقر أمني داخل معيتيقه ..
كلمني جبريل قالي أنا ماشي أنا و بدر بندير تحليل ثلاثي .. قتله خلاص بعد بكرة نمشي ناخدهم الزوز مع بعض .. قالي تمام متففين ..
كنت مقعمز أنا و أوس في العمل و عرفت أن أسمي نازل في الدورة برا ليبيا ..
قتله أوس جت في وقتها خلي الواحد يسافر بعد العرس ..
روحت الحوش .. قتلي أمي اليوم جايه أم جبريل .. قتلها به كويس ..
قتلي بنشرط لي بنتي ..
أنا 🤦🏻♂️🤦🏻♂️😤😤 ... باهي شن بتشرطي لي بنتك ؟؟ قتلي ع الاقل تاكم ذهب و حدايد ..
_ ايه و شن تاني ؟؟
_ و الي بيجيبه بيرجعله كله أنا ما بناخد منه شي ..
_ صح عندك حق .. شوفي شن مزال بتشرطي و قولي لي أمه بعدين لما بتجي ..
قتلي نتكلم معاك بالحق انا .. قتلها حتى أنا نتكلم بالحق .. البنت بنتك و نظمي أمورك ..
خشيت رقدت و نضت العشيه ركبت للحوش بنركب السخانه و شيشمات المطبخ و الحمام أكرمكم الله ..
كلمني بدر قالي راهو جبريل جاب أمه في تاكسي .. خيره ما خداش مني سياره ؟؟
قتله و الله ما نعرف .. وينه هو توا ؟
قالي رجع للمحل .. قتله روح بيهم أنت بعدين .. أنا عندي ما ندير ..
أتصلت بي بشير قتله تعالى عاونني .. و لما ركب و بدا يعاون فيا ..
قتله تشوف في الوضع كيف .. عرسي و عرس أختك .. بعد العرس نعطيك باش تاخد سيارة .. و فوتها الخدمة عند ولد عمك ..
قالي أنا مش ح نتزوج لين بدر يتزوج لان ما نقدرش نجيبها في دار و هي مختمرة ..
قتله و شن أمك قالت يبي ياخد توا !!
قالي كنت هكي مفكر .. لكن صعب .. ع الاقل كان تزوج بدر نبدا انا و انك بس في الحوش ..
قتله و بوك وين !!
في الحالتين بنت الناس مش ح تاخد راحتها .. قالي بني ما نقدرش عليه ..
قتله خود السيارة تسبب و بعدها يصير خير ..
قالي نبي أمي تمشي تتكلم فيها بس ..
قتله تعرفها انت ؟
قالي لا لا 😧😧
قتله هذا كله و مش شايفها 🤦🏻♂️ .. تو ربي يسخر ان شاءالله ..
كملت خدمة و نزلت فم الحوش ..
كلمتني ملاك .. قتلي آمته النظرة الشرعيه ؟ 🤨 .. قتلها رسمي كان ما خطبتكش خير 😄 .. قتلي حضرتك بديت مش فاضي ..
قتلها بين الحوش هنا و حوش نمارق كل مرة نخدم حاجة ..
و أتفقنا نشوفها تاني يوم ..
و جى بدر روح بي جبريل و أمه .. قعمزت شويه فم الحوش و بعدها ركبت للدار فوق ..
خديت جيتاري و كيف بنبدا نضرب عليه .. خشت عليا نمارق ..
قتلي فاضي ؟
قتلها تعالي ..
قعمزت جنبي 😔 .. قتلها خيرك شن في ؟
قتلي أمك بكري شرطت على أم جبريل عرس تام .. قتلها كيف ؟
قتلي تبي قفه و تبي سبيزة كامله و تبي خرفان و تبي بدلة كبيره و تبي بدله صغيره ..
قتلها اييه !!
قتلي جبريل ما عنداش كيف يدير هذا كله .. قصدي هو دار النوم و بدر قالي خداها عاديه جدا .. كيف بيدير هذا كله !!!
قتلها أمه شن قالت ؟ ..
قتلي قالت الي يقدر عليه يديره ..
به قتلها عادي الي يقدر عليه تو يديره ..
قتلي به كلم أمي أنا خلاص بديت على أعصابي 😔💔 ..
خش بدر .. قالي نتصل بيك من بكري .. قتله في الشحن .. قالي كلمني جبريل و احنا مروحين .. قالي حاضر الي تبيه أمك نديره بأذن الله لكن يصبروا عليا شويه .. يعني الراجل بيأجل عرسه ........
قعدت نمارق تبكي و ناضت من جنبنا .. قتله يا عليك نفخ يا راجل 🤦🏻♂️🤦🏻♂️
مش عارف كيف يفكروا هادوا و الله ما فهمت .. هو أنا الي بي مرتبي و أموري طيبه نص الي طلباته أمك مش مدايره ..
حذفت الجيتار و نضت نزلت لي أمي .. لقيتها مقعمزه هي و ندى ..
قتلها أمي .. هما كلمتين بنقولهم ✌🏻 ولدك بهاء الله يرحمه و يسامحه يوم توفى خلى فلوس يلقط فيهم سنين باش ياخد بنت الناس .. و مات و خلى كل شي لا رفعهم معاه و لا تزوج بنت الناس ..
يعني يوم بنتك تخسره تي و الله لا نافعها ذهب و لا نافعتها بذله كبيره ..
بنتك راضيه بي ولد الناس .. و الراجل هذا أحنا أكثر ناس عارفين وضعه .. ما ليشي شهور يخدم و أجر حوش و خدا دار نوم و يلقط بالشويه و عالج بوه و ولدك بدر جني تحته ما فيش ..
ادعيلها ربي يهنيها و الرزق عند الله .. و كان بتبدوا تذهبولها في شيرتها كلموا الراجل قولوله ما فيش نصيب خير ..
و ركبت الدار اتكيت ع الفراش .. شروط شروط شروط .. النساوين ما يعرفوش الا الشروط 🤦🏻♂️
تاني يوم الصبح كلمتني ملاك .. قتلها وين انتي ؟ قتلي كيف بنطلع ..
قتلها انا في الطريق للخدمة .. نخش شويه و نتلاقوا في نفس الكافى ..
قتلي تمام ..
خشيت للخدمة ع السريع و أوس قالي في مشية لي مصراته ..
قتله ليش ؟
قالي في ضربات في سرت .. قتله آمته ؟؟
قالي بعدين الأجتماع ..
قتله انا عندي مشوار بعدين جاي .. طلعت مشيت للكافى و كنت نبي نوصل قبلها .. لاااازم نوصل قبلها ..
سمعت يا بوسيفي ؟ لازم توصل قبلها 🙃😍
وصلت للكافى و كيف خشيت اتصلت بيا .. قتلي وينك ؟ قتلها من بكري نستنى فيك 🤪🤪
قتلي ما لقيتش وين ندرس السياره .. طلعت قتلها خشي قعمزي و خديت منها سيارتها .. لقيت الكرسي لاصق في الستيرسو 🤦🏻♂️ ..
هادي فعلاً السيده ملعقه 😄 وحرت الكرسي كله .. و درست السياره و نزلت خشيت للكافى ..
قعمزت .. قتلي شكلك لحيه و شعرك يهبل 🙈♥️ ..
قتلها تو بنحلق خلاص .. قتلي الشعر لا خليه محلاه ..
نخلوه 🤪 و علاش ما نخلوشي .. تبي حتى تظفريه عادي ♥️
قتلي متوترة أنا 🥺♥️ .. كل ما يقرب العرس نتوتر أكثر 🥺♥️ ..
شديت أيدها .. و حضنت أيدها بي أيديا الزوز .. قتلها خايفه ؟
قتلي مش عارفه شن يسموه رهبه .. توتر .. حب 🥺♥️ ..
قتلها ما خاض شوط العاشقين جبان 😉😘
_ بوسيفي 🥺♥️
_ عيونه 😘
_ مش جبانه أنا متوترة بس 🥺 ..
_ أنتي متوترة !! و يوم طلعت من الحبس جايتيني و الدنيا كلها سلاح 🤪🤪
_ شن دخل هذا في هذا 🤨
نحبها طيارتي أنا ♥️ توتري توتري .. خودي راحتك في التوتر لي يوم الدخول العشيه بس 👌🏻 بعدها أحتمال نتحول لشخص تاني راه 🤚🏻🤷🏻♂️😄
اهو قتلك من توا ..
قتلي به 🙈😌♥️ ..
نضنا طلعنا و فتحتلها باب سيارتها ركبت قعمزت و قتلي خيره هكي الكرسي موخر هلبا .. طبست عليها و قدمتلها كرسيها كله لصقتها في الستيرسو ..
و رجعت خدمتي .. لقيتهم في أجتماع .. و أوس قالي بتمشي أنت لي مصراته و معاك فلان و فلان .. قتله توا ؟
قالي هكي سمعت ..
و كنت بناخد نتيجة التحليل الثلاثي .. لكن جتني أوامر نمشي لي مصراته ..
مشينا مصراته و صلت العصر و خشينا أجتماع طول .. الطلعات الأولى كانت كلها مستهدفه مواقع لي دواعش في سرت ..
بعدها جتني أوامر بتنفيذ ضربات على موقع تاني .. جهزت نفسي و صليت ركعتين و طلعت ..
نفذت الضربات و رجعت للكليه الجويه .. بعد الفجر طلعت من مصراته واتجهت لخدمتي طول .....
No name ♥️🌺
