#البوسيفي 40
كمل صلاته و قعد في مكانه مقعمز .. و كأنه يرجع في شريط حياته .. و كل الي مقعمزين أعتبروه صلاة شكر لله .. ألا أنا .. كنت نعرف حجم الجروح الي خلاها الحبس فيه .. حجم الأهانة و الذل و المعاناة .. و كأنه بدموعه هادي يقول أنا حر .. طليق .. نبي نشوف أمي علناً من غير خوف .. نبي نتدهور في البلاد بشوارعها .. نبي معاش نخاف من سيارات البوليس .. نبي نوقف في أي دورية شرطة نبرز أوراقي .. نبي نتنفس .. نبي نرقد 🕊💚
ناض من صلاته و هو مطبس راسه مني .. و جى وقف قدامي و فتحت أيديا باركتله بالحضن .. و كل طبطبه على كتافه كنت نقوله فيها إنك تستحق يا جبريل و الله ..
و مشى باس راس بوي و سلم على عمامي و هما يقولوله أثبت بأذن الله 🤷🏻♂️💚
ركبت لي أمي نشوف في العشاء لقيتها حايسه هي و نمارق ..
قتلها نعاونك ؟ ...
قتلي شنو ! 😳😳
قتلها نعاونك 🤷🏻♂️ ..
قتلي لا .. الشاهي تبوه توا و لا بعد العشاء ؟
قتلها هاتيه توا خير .. بعد العشاء حطوا فواكه .. قتلي نمارق تو نوتيه و نكلم بدر و لا بشير ياخدوه .. قتلها تمام و طلعت ..
أتصلت بي وسام قتله تعالى .. و قعمزنا نهدرزوا .. لين أذن لصلاة العشاء ..
و ناضوا كلهم داروا عليهم الوضوء للصلاة و طلعنا للجنان بنصلوا جماعة ..
قدم عمي بشير باش يصلي بينا ..
و وقف جبريل وراء بشير .. و خديت نمسح في أيديا من الميه و نقوله يا عمي { لِيؤُمكمْ أَكثَركُم قُرآنا } 👌🏻😀
تلفت لي و قالي بشير أكثر واحد حافظ .. شاورتله بي صبعي ع جبريل 👈🏻 خاتم كتاب الله حفظ ..
قعد يقول الله يبارك الله يبارك ..
و خدا جبريل من أيده و قدمه يصلي بينا 🤷🏻♂️💚 .....
و أنت 👌🏻 .. أنت 👌🏻 ... وين تحط ذريتك 🤷🏻♂️ أحتويتها .. كل يوم ح تزيد فخر بيها ♥️♥️ .. صلاة و أخلاق و شهامة و عفه ..
نبذتها .. كل يوم ح تكون حياتهم للأسوء 🖤🖤 .. خمر و سرقه و رفقة سوء ..
و لا تقول ولدي راجل يعرف مصلحته و لا شي .. ردود أفعالنا كلها عناد و تسكير راس و تنمر ..
صلينا و خشينا للمربوعه و جبريل قعد بروحه يصلي في الشفع ..
كلمتني نمارق قتلي تعالى العشاء واتي .. ركبت .. قتلي قبل ما نتصل بيك اتصلت بي بدر 🥺🥺 .. قتلها به !!
قتلي قالي نزلي حطي جهة الباب 🥺🥺
به !!!
قتلي لما نزلت ما لقيتاش و تلاقيت أنا و واحد جهة الباب 🥺🥺 لكن و الله أسأل بدر هو الي قالي و قسم بالله 😢😢
قتلها به تمام ..
جى بدر .. قالتله نمام مش انت قتلي نزلي و حطي جهة الباب ؟
قاللها اوووو نسيتك بكل 😅
ضربته على كتفه قتله نزل نزل ..
حطينا العشاء و تعشينا و قعمزنا نهدرزوا و كل واحد روح حوشه ..
قعدت أنا و وسام و جبريل .. و نضنا طلعنا مروحين للأستراحة ..
قعدت في الجنان ناخد في رجيله .. أتصلت بي ملاك .. قتلها كنت لاهي شويه ..
قتلي كنت في العيادة و تعبانه 😔 ..
قتلها خيرك شن في ؟ 😳
قتلي بردة ..
قتلها باهي خديتي دواء ؟ شن دارولك ؟
قتلي أعطوني أبرة في التغذيه و دواء ..
قتلها باهي أستريحي و تو نتطمن عليك مرة مرة ..
جى جبريل قعمز جنبي و جايب معاه مذكرة و قلم .. قالي كيف نكتبه الطلب ؟
قتله و الله ما نعرف 😄 ..
قالي اعطيني الصيغه كيف بتكون ؟
على جية بدر .. قاله شن بتكتب رسالة لي بوك ؟ 😄 ... قاله جبريل فكني منك يا راجل ..
قاله بدر أكتب طلب فيه أسمك و بياناتك قضيتك و بيانات القضيه رقمها يعني .. و اشرح فيه ظروفك ...
قتله تعرف ... فوته توا لين عمي يقولك شن تكتب و مرات يكتبهولك هو الطلب بمعرفته ..
سكر المذكرة و قعد يحكي في أحلامه 🕊💚 .. قال بيتم الموضوع 👌🏻 خدمة و بس .. ليل نهار خدمة ..
و مرتبي بنعطيه لي بوك بوسيفي يقيمهولي لين نوقف على رجليا 👌🏻.. ع الاقل لين ندير مشروعي بروحي ..
🤷🏻♂️♥️
و مرات من ظروفك تنسى أنتمائك 💔😔 .. و تنتمي لي ناس تانيه .. عرفت تقدر جوهرك 💎 عرفت تعطيك قدرك .. لقيت روحك فيهم ..
تاني يوم مشيت الخدمة و كنت كل شويه نكلم ملاك نتطمن عليها ..
و أنا مروح كلمني بدر قالي عمك يبي يفهم من جبريل و أنا ماشي أنا و أياه توا ..
قتله شن بيفهم منه ؟
قالي بيكتب الطلب قال بيقدمه غدوة لجنة ..
قتله لجنة شنو ؟
قالي متع الزكاة ..
قتله به تمام ..
روحت الحوش تغذيت و رقدت .. نضت العشيه نزلت لقيت جبريل و بدر و بوي في الجنان ..
قعمزت معاهم شربنا قهوة و نضنا طلعنا .. نزلنا للبلاد قعمزنا في قهوة رجيله ..
و عيون جبريل في الطرق و المحلات و 8 سنين تغير فيهم كل شي ..
نضنا بنمشوا ناكلوا حاجة .. و بمعرفة بدر مشينا لي قهوة خدينا عشاء .. و جبريل يقول تو شن أسمه هذا ؟
و بدر يقوله هذا باجيت و هذا لفائف و هادي ليباني ..
قال يا حسرة أيام بيتزا السياحيه بي 1.50 😅 ..
رجعنا للأستراحه .. و اتصلت بي ملاك ما تردش .. مرة و مرتين و ثلاثه ..
تاني يوم كذلك نتصل ما تردش .. و كلمني عمي قالي قدمت الطلب للجنه و اليوم يردوا عليا بالموافقه ..
قتله تمام أنشاءالله خير ..
روحت الحوش تغديت و قعدت نتصل بيها .. تليفونها مقفل !!
غريبه ! خيرها زعمه ..
و فات عليا اليوم و أنا نتصل نلقى فيه مقفل .. تاني يوم الصبح و أنا في الخدمة أتصل بيا عمي و قالي وافقت اللجنة ع طلب المقدم من جبريل ..
يبو حساب يحولوا فيه المبلغ .. قتله تم تو نكلم بوي يكلمك و يعطيك حسابه .. قالي تمام ..
و بالرغم فرحت بالخبر و ربي كيف سخر كل شي .. بس كنت مشغول على ملاك هلبا ..
نزلت لقيت المهندسه الجديدة .. قلت السلام عليكم ..
ردت عليا و عليكم السلام ☺️
قتلها بنسألك ع المهندسه ملاك ..
قتلي ااااه و الله ما نعرف خيرها 😏 ..
قتلها تمام شكرا ..
و طلعت من الخدمة متجه للحوش بناخد غذاء و بنمشي للأستراحة ..
مشيت خديت الغذاء و مشيت للأستراحه .. و بعد الغذاء قلت لي بدر شوف موضوع المصرف و نظم الامور مش فاضي انا الصبح ..
و فاتت يومين هكي .. الصبح نمشي للخدمة و نروح نقعد في الاستراحه معاش نطلع بكل .. و ملاك تليفونها مقفل ..
يوم الأربعاء و أنا مروح من العمل كلمني بوي قالي المبلغ كامل عندي .. كلم العيلة نمشولهم العشية او الجمعة ..
قتله لين أنسقوا مع محامي .. قالي ساهلة هادي .. قتله لا لا مش ساهلة .. خلي نفهموا كيف التنازل ؟ مرات في المحكمة ..
قالي به نظم الامور ..
أتصلت بي خو المتوفي .. و قالي أحنا مدايرين محامي من قبل و تو نشوفه و نكلمك ..
و عاود كلمني قالي تمام موعدنا غدوة أن شاءالله بحضور المحامي و يوم الأحد نمشوا للمحكمة ..
كلمت بوي قتله كلم عمامي غدوة نتوكلوا العصر ..
و كل شويه نتصل بي ملاك .. تليفونها مقفل .. تاني يوم طلعت مشيت جهة حوشهم ..
سيارتها مدرسه قدام الحوش .. خيرها مسكرة تليفونها !!
ان شاءالله غير ما نخطبتش 🤦🏻♂️
مشيت للحوش خديت فلوس و طلعت خديت خروف و قضيه كامله للحوش .. قتلي امي شن هذا ؟ قتلها الجمعه بنذبح ..
و ركبت قلت لي نمارق طلعيلي الزبون حدديه .. خشيت دوشت و طلعت لبست الزبون و نزلت لقيت بوي في الشارع مع جبريل و بدر و راجل ندى .. جى عمي و جى عمي التاني ..
و تجمعنا و ركبنا في السيارات .. و توكلنا على الله ..
كانت في داخلي رهبة مع فرحة مع رضى من الله عز و جل ♥️🌺 تحس روحك قاعد تدير في حاجة كويسه في حياتك تعطيك طاقة صلاح داخلي و خارجي عمر ..
وصلنا حوش الناس و كانوا جايبين حتى جيران من الشارع ..
تكلم عمي و بوي بحضور المحامي و وقع الاب و أولاده ع التنازل و خدينا صورة منه و باقي الاجراء يكون في المحكمة .. و قعمزنا شربنا شاهي و قعدوا يحكوا و طلعنا بنروحوا ..
و بمجرد 👌🏻 ما عفست رجلي باب الحوش و أنا طالع للشارع .. كانت أم جبريل واقفه ع الباب و بدت تزغرط ..
الموقف الي خلى عيوني يدمعوا 💔🤷🏻♂️
ركبت السيارة و ركبوا الي معاي و شدينا الطريق .. اتصل بيا بدر قالي ماشي بناخد ام جبريل .. قتله به نحط عمك و نجي للحوش ..
خطمت حطيت عمي في حوشه و روحت للحوش لقيت بدر سابقني و أول ما خشيت أستقبلتني أم جبريل تزغرط بعيون باكية ..
تزغرط و العيون دموع يقطروا ..
و لو ربي أعطاك فوق العمر اثنين ✌🏻 مش ح تكفي جميلها 🤷🏻♂️♥️
قعدت تحضن فيا و تبي تبوس إيدي و أنا نباعد في إيدي و نقوللها حشاك حشاك ..
و وقفت عليها و هي شادة إيدي بقوة و كأني أنا ولدها .. قتلها ولدك 👈🏻 ربي شاء إني نخش الحبس حتى أنا و نتعرف عليه و نكون سبب في هذا كله ..
و هي تدابير الله 🤷🏻♂️♥️
قعدت مقعمز نهدرز عليها و امي مقعمزة و جبريل مقعمز .. و أستاذنت منهم بنركب نغير العربي .. لقيت بدر مداير دوشه .. قتله شن ادير ؟
قالي جايب نوبه ..
نوبة شنو ! 😳
نوبه يعني زكرة يعني فنون ليبيه يعني تراث ليبي ..
رن تليفوني و رديت .. لقيتها ملاك ..
قتلها وينك ؟
قتلي تعبانه في المصحه ليا 4 أيام ..
_ خيرك شن في ؟
_ البردة قويه و حرارة .. رقدوني في المصحه ..
_ وين المصحه ؟
_ في (....)
_ أنا جايك ..
_ أستنى تروح ماما و بابا قبل ..
_ مسافة الطريق أكيد يكونوا روحوا ..
_ به ..
سكرت الخط و طلعت بالسيارة .. وصلت للعيادة و كلمتها .. قتلها قاعدين ؟
قتلي كيف نزلوا من الدروج ..
قعدت واقف لين طلعوا و خشيت .. لقيت أختها .. سلمت عليها و خشيت شفتها ..
لقيتها متكيه .. في إيدها في تغذيه .. في إيدها تانيه مكان التحاليل ..
سلمت عليها و قعمزت جنبها ..
قتلها كويسه توا ؟
قتلي توا توا كويسه 🙈♥️
_ أنشغلت عليك هلبا ..
_ قلت لي أختي تكلمك بس تحشمت منك ..
_ أستاحشتك ♥️
_ 🙈♥️ هكي بتزيد الحرارة بوسيفي 🤒
قتلي فيروز تقصدك أنت لما غنت يا حلو يا مغرور .. يا حبق و منثور ع سطح العالي ♥️♥️
زدت قربت منها .. أنا مغرور ؟ قتلي مغرور و حلو ♥️ .. به أنا حبق ؟
ضحكت و قتلي عاد فيروز هكي غنتها 🤭 .. قتلها نحسابك زعلتي مني ..
قتلي لا راح الزعل .. هو صح أنت صعب بس حلو 🙈♥️ ..
به شن تبي تغيري فيا ؟
تخايلي روحك جنّيه 🧚🏻♀️و عندك عصا سحريه ✨و تبي تغيري فيا حاجات .. شن تغيري ؟
قربت إيدها من لحيتي و كأنها كانت تبي تمسها و تحشمت ..
قتلي نغير التوقيت الي عرفتك فيه .. نقدم فيه هلبااااااا .. و نختصر سنين كانت من غير روح .. سنين كنت ميته فيهم ..
خديت إيدها و حطيتها على لحيتي .. و العيون تغمضوا و الخدود بدوا حمر 🥺♥️
به يعني أنا توا نبوسها و لا شن اندير يعني 🤦🏻♂️♥️
طق الباب .. وخرت شويه و قعمزت عادي .. خشت أختها و قتلها محمد جاي بيجيب عشاء و جايب معاه نتيجة التحاليل ..
قتلها تمام معناها انوض خير ما نسببلك مشكله .. شديت إيدها و قتلها خلي تليفونك عندك يا مجيرتي ♣️👸🏻 .. ضحكت و قتلي أنا مُجيرة 🙈😍 ؟ .. أنتي ايه 😘 ..
طلعت و الحمدلله الي كنت لابس عربي 🤦🏻♂️🤪 و ركبت السيارة روحت .. لقيت الشارع مقلوب تقول عندنا عرس ..
نوبة تهيج و تنوير .. درست و نزلت لقيت وسام واقف يصفق 👏🏻👏🏻 و جبريل جنبه .. و بدر و اولاد عمي و اولاد الشارع في وسطهم يهيج ..
قتلهم شكون خدا تنازل بدر و لا جبريل ؟
قالي وسام شكله بدر ..
يتلفت لي بدر .. نقوله هكي 🤨🤚🏻 ما تجيش جهتي بكل ..
و أولاد الشارع هيا يا بوسيفي هيا ..
و متع النوبه جى جنبي و تلقطوا كلهم عليا .. يا ودي أخطوني أنا أنسان معقد مش متع شطيح 😄😄 ..
No name ♥️🌺
