#البوسيفي 15
و كملنا طريقنا للمقبره .. المقبره الي كنت نخشلها نحضر الدفن و نعزي و نطلع .. اليوم أنا بي أيديا الزوز هادوا بندفن و بنوقف نقبل العزاء ..
وصلنا للجامع الي كان مقابل المقبره .. و صلينا صلاة لا ركوع فيها و لا سجود .. و قمنا جثمانا و قصينا بيه الطريق للمقبره .. شعور 👌🏻بتمزق 👌🏻روحي 👌🏻 .. بهاء على أكتافنا أنا و وبوي و بدر و بشير .. يعني لو الرجل ما يعايش ألم في الدنيا بينما المرأه تعايش ألم الولاده في الدنيا .. فهو يدفن ما ولدتي 👌🏻 و الزوز بنفس الألم 🤷🏻♂️🖤🍂
و خطوات والدي الي كانت تتمايل من شدة الصدمة .. و ملامح وجهه الحزينه .. يتخطى القبور .. و كل ما يقرب من قبر طفله تزيد خطواته في التمايل .. نسمع في صوت بكاءه الخفيف .. يزيد يقوى بشويه بالشويه .. لين وصلنا للقبر .. و بأستسلام لقضاء الله و قدره نزل على ركبيه و شد راسه .. و بدا يبكي .. نزلت للقبر أنا و بدر و مديت إيديا تلقيناه و نزلناه بالشويه بالشويه و كأني خايف عليه ينخلع .. او ينوض .. أو يتوجع .. و حطيناه ع جنبه اليمين .. و ركبنا كملنا الدفن ..
الله يرحمك يا بهاء .. الله يرحمك يا بهاء .. اللهم ثبته عند السؤال .. اللهم ثبته عند السؤال .. و من كثر الزحمة يومها وقفت و قتلهم عزاكم مقبول 🖐🏻🖐🏻 ..
و بدت تفضى بالشويه بالشويه .. و أنا نواسي في حاشية القبر بي إيدي و الشيمنت قاعد أخضر .. و كتبت بعود سواك كان في فمي ( قبر المرحوم بأذن الله بهاء الدين البوسيفي )
و روحنا و موقف المشكله و انا مروح انا و وسام بين عيوني ..
في خيمة الرجاله كل مرة يخش حد يعزي .. و نتفاجأ بي أمجد و السيفاو جوا يعزوا .. و كثرت الأسئله .. مات مقتول ؟؟ قالوا قتله ولد ( ....) قالوا الي قتله يومها هارب ..
قعمز جنبي أمجد و كل مرة يجيني حد يعزي يطلع السيفاو يعرفه .. و المغرب روحوا ..
و بموقفهم هذا و كأنهم يقولولي إحنا ما نعيبوا فيك شي و جينا عزينا و قمنا بالواجب .. بس عادات قبيله ما نقدروا نخالفوها 🤷🏻♂️ ..
فاتت أيام العزاء و كل يوم تتقبل الفكرة أكثر من اليوم الي قبله ..
بعد أسبوع من الوفاة .. إتجهت لمقر البحث الجنائي .. و سألت ع القضيه .. و عرفت شكون الي طعن بهاء يومها .. و من كثر ما سمعت تفاصيل يومها .. روحت مريض ..
و قعد نفكر كيف نوصل في أخت أشرف .. و كيف نتلاقى معاها !!
قعمزت أنا و بدر الي كنت خايف من رد فعله .. و عرفت من الاولاد انه يدور في ناصر الي قتل بهاء .. قتله تليفون المرحوم وين ؟؟
خش داخل جابهولي .. لقيته فيه أثر دم .. اعطيته لي بدر .. قتله ما تقدرش تفتحه ؟؟
قالي لا ..
قتله معناها دبرلي رقمها البنت .. نبيها نبي نتكلم معاها .. قالي هادي أسهل من شربة الميه ..
قمت راسي فيه .. للدرجة هادي ؟
قالي اييح ..
مشيت سهرت في الاستراحة .. و الساعه 11 في الليل بعتلي بدر رساله .. ( 0900000000 حنان ) .. إتصلت بيه .. قتله شن هذا ؟؟
قالي رقم أخت أشرف .. قتله أسمها حنان ؟؟ قالي ايه .. قتله تمام ..
وقتها حسيت إن الوقت متأخر .. بعتتلها رسالة ..( السلام عليكم و رحمة الله أنا بوسيفي خو بهاء ارجوا الأتصال )
لحضات و عاودت اتصلت بيا .. خليت التليفون يرن لين فصل و عاودت اتصلت بيها .. قتلها أنا بوسيفي خو بهاء الله يرحمه .. و نبي نتكلم معاك في موضوع .. قتلي توا ؟؟
قتلها لا لا 😳😳
قتلي الصبح ؟؟
قتلها ياريت ..
قتلي تمام ..
و سكرنا الخط ..
قعمزت ع الأرجيله و الشباب داخل يلعبوا في كارطه ..
و كل مرة نتفكر موقف .. لين طلع وسام من داخل و يقولي بدر ماشي لي حوش ناصر و شاد خوه و و و ...
طلعت انا و وسام و الاولاد .. و مشيت لي جهة حوش ناصر .. لقيت اولاد شارعهم برا و قالولي بدر مهناش ..
قعدت نتصل بيه .. رد عليا .. قتله وين انت ؟؟
قالي في مكان ..
قتله وووووين انت ؟؟
قالي في استراحة وليد صاحبي .. قتله رجع الولد لي أماليه .. قالي و الله ماهو راجع لين يجي ناصر .. قتله قتلك رجع الولد لي أماليه توا بلا تصرفات فروخ ..
سكر الخط و هو ما يبيش يرجع خو ناصر .. مشيت انا و وسام لي أستراحة وليد ..
بدر : يا بوسيفي خليه عندنا هنا لين يجيف و لا خوه يسلم روحه ..
ضربته بي إيدي دفيته و خديت الولد طلعته معاي .. و بدر مش عاجبه ..
روحت بيه حطيته ع الرئيسي و قتله حوشكم طول .. كان الولد ساكت و خايف ..
و رجعت للاستراحة .. قعدت مع الاولاد للفجر .. صلينا و رقدت ..
تاني يوم فقت الضهر متأخر .. لقيت حنان متصله بيا ..
دوشت و طلعت و اتصلت بيها .. قتلها آسف خدتني نومة ..
قتلي وين نتلاقوا ؟
قتلها وين ما تبي .. قتلي تعالى للمصحة .. قتلها هكي احسن مكان ..
مشيت و قعمزت معاها .. قتلها مش ح ناخد من وقتك هلبا ..
نبيك في خدمة ..
قتلي تم ..
قتلها من قبل ما تعرفي !!
قتلي تم خلاص ..
قتلها سمعت ان ناصر يبيك .. قتلي ايه .. قتلها مبارح صارت مشكله بين بدر و أمالي ناصر .. و جت في وقتها ..
قتلي كيف !!!
قتلها نبيك تتواصلي مع ناصر ..
قتلي أنا ؟ 😳
قتلها مش قلتيلي تم !!
قتلي ايه لكن ناصر الوسخ 🤨
قتلها ناصر ايه ..
قتلي به !!
قتلها بعد ما تتواصلي معاه .. نعطيك شفره تكلميه بيها و تقوليله معاش يتصل ع رقمك لانك خايفه عليه ..
قتلي به !!
قتلها و ح نفتحلك بيها مسنجر الشفره و تتكلمي معاه ..
قتلي به كيف ما تبي ..
أنا نبيك تعرفي مكانه أو تخليه يتلاقى معاك في مكان .. و خودي وقتك شهر .. شهرين .. 6 شهور ..
قتلي 6 شهور باش نتلاقى معاه ؟؟ تي كان نكلمه توا يجيني ..
قتلها بجد ؟
قتلي ايه ..
قتلها تمام .. معناها تتواصلي معاه و ما تخليشي يشك فيك لين يتطمن و يعطيك معلومات ع مكانه او يجيك في مكان ..
قتلي تبي تقتله ؟؟
قتلها لا .. نبي نسلمه ..
قتلي موافقه .. و لا نعرفك لا تعرفني .. قتلها هكي متفقين احنا ..
نضنا وقفنا .. لقيت ريان واقفه تشبحلي .. هادي شن جابها للمصحه هادي !!
قتلي حنان امته تجيبلي الشفره ؟؟
قتلها انتي قاعده هنا لي آمته ؟؟ قتلي للمغرب .. قتلها تمام ساعه تانيه نجيبهالك بي جهازها .. قتلي لا عندي جهاز .. قتلها هداكا كلميه منه و اطمني ع خوه الي مبارح خطفه بدر .. اهي سبله جت لي عندنا ..
قتلي و خيره ما قتله بدر ؟؟ و لا اعطاه طريحه برد على قلبي 🤨
قتلها متفقين ع كلامنا ؟؟
قتلي ايه متفقين ..
جت ريان وقفت علينا .. قتلي البقاء و الدوام لله عظم الله لكم الاجر ..
قتلها أجرنا و أجركم ..
تلفتت لي حنان و قالتلها كيف حالك حنان ؟ قتلها الحمدلله باهيه 😏
إستاذنت من حنان و نزلت .. و يا دوبك ركبت سيارتي اتصلت بيا ..
قتلها شن في ؟؟ قتلي لا غير بنقولك الدكتوره ريان سألتني عليك و انا قتلها إنك على علاقه بصديقتي و متخاصمين و جيت تبي نتوسطلك 😌😌..
قتلها نعم !!!!!!!!!!! 😳😳😳😳
قتلي ما نبيش حد يشك في حاجة و هذا الي طلع معاي ..
قتلها تمام به و معاش تكثري اتصالات ..
قتلي تم ..
و لحضات و وصلتني رسالة من ريان .. ( ما كنتش نتوقع منك هكي ) ..
قريتها و مش عارف ليش لا رديت و لا بررت 🤷🏻♂️
No name ♥️🌺
