#البوسيفي25
و خشة الأنفرادي هادي كانت في وقتها .. كل شي تحطه ع ميزان الحق 👌🏻
تعاود كل حساباتك .. فكرت في أمي الي سيطرت ع تفكيري و هان كل شي بعدها ..
و ريان كانت طلقه طلعت من بيت النار 👌🏻 و معاش ترجع خلاص 🤷🏻♂️ ..
الدار ضلام .. اليوم طويل .. معاش تقدر تحس بالخوف او الألم خلاص .. تفكر في الجاي و بس .. شن مصيري ؟ و شن بيصير فيا ؟
تاني يوم طلعوني حققوا معاي تاني .. و لأول مرة يسألني شن تخدم ؟؟
قتله ضابط في سلاح الجو ..
تفاجأ 😳😳
قالي وين تبعيتك ؟؟
قتله قاعدة معيتيقة الجويه ..
تغير أسلوب التحقيق و المعامله .. قالي هذرز معاي يا بوسيفي راجل لي راجل ..
قتله صاحب الحوش ما نعرفاش .. قالي سيارتك في الفيلا داخل ..
قتله فعلا خشيت داخل بناء على طلب صديقي الي كان خاش بياخد فلوس خدمته ..
قالي ليش هربت ؟؟
قتله لأني شفت بنات و خفت يكون الموضوع فيه دعارة ..
قعد ساكت ... و يحرك في قلمه بطريقه تزيد من توتري ..
قالي الي وصلته شن اسمه ؟
قتله محمد ..
قالي هدا الي ابيض هكي و قصير شويه ؟؟
قتله ايه ..
قالي هدا طلع .. قعد 3 أيام ممكن و طلع ..
قتله تقدر تجيبه و تسألوه .. مدام طلع معناها أموري طيبه ..
قعد ساكت .. و رجعوني التوقيف تاني .. و قالولي بنرفعوك للمركز و هما يحولوك للنيابه ..
رفعوني للمركز قعدت واقف في الممر .. جاني وسام جابلي حوايج و قعد واقف معاي شويه و بعدين طلعوه ..
قعدت للمغرب بين .. أوقف باهي .. لفت وجهك للحيط .. هدا خيره ؟ شن موضوعه ؟ دور لفت وجهك .. 🤷🏻♂️💔
سمعت آذان المغرب .. تلفتت قتله بنخش الحمام نتوضأ و نصلي ..
قالي توا عرفتها الصلاة يا كلب .. توا كيف عرفت ربي ؟؟ ...
أستغفرت و سكتت ..
في الليل دخلوني التوقيف و نحولي الكليبشات .. رقدت و انا مش قادر نحرك ايديا و رجليا ..
الصبح ضربوا الباب بقوة نضت مخلوع جيت واقف .. قالولي اطلع ..
طلعت و ركبت سيارة و رفعوني للنيابه و منها حولوني للسجن .. خشيت للسجن .. دخلوني غرفة شؤون النزلاء .. أعطوني نمودج أستبيان عبيته .. كتبت أسمي .. مواليدي .. و جيت في أسم أمي 💔 و رجفت أيدي .. و لسان حالي يقول أنا آسف كتبت أسمك هنا .. ما كنتش نتمنى يوم ينكتب أسمك ك والدة سجين .. كنت نتمنى نرفعك للحج .. نحج بيك على ظهري .. كنت نتمنى تعيشي عمرك كله فخورة بيا ..
عبيت الأستبيان و أنا ضايقه بيا الدنيا .. و جابولي حلاق .. حلقولي شعري و لحيتي ..
و رفعوني للقسم الثالث .. خشيت الدار .. و على طول خشيت الحمام و طلعت صليت ..
قعمزت .. الدار فيها 4 أشخاص .. عبدالصبور ملتحي متدين .. المبروك من سبها .. جبريل .. و أشرف 🤦🏻♂️🤷🏻♂️💔
قالي شن في ؟ شن جابك هنا ؟
قتله موضوع طويل .. عظم الله لكم الأجر ..
قالي أجرنا و أجركم ..
و على طول قالي شن تبي تاكل ؟ و جابلي حوايج قالي كان تبي تدوش و تشطب أمورك ..
و جابلي فراش من دار تانيه قالي استريح عليه لين انظملك امورك ..
قال لي الشباب هيا كل واحد يحط قداش عنده خلي نمشي للدكان ناخد باش نطيبوا عشانا قبل ما يسكروا علينا ..
نشبح في كل واحد حط فلوس الا جبريل ..
قالي اشرف شن دخانك ؟
قتله مالبورو ...
طلع مشى للدكان .. اتكيت في مكاني و حطيت ايدي على راسي ..
أشرف خو حنان هو الي يعول عليا .. و أنسى يوم خشيتله لي حوشهم و ضربته و بهدلته ..
يعني خصيمك أمس معينك اليوم 🤷🏻♂️💔
قعدت في مكاني لين جى أشرف .. جايب معاه حاجات .. قالي نوض شطب يا راجل خلي نهدرزوا .. نضت خشيت دوشت و لبست و طلعت ..
وضع جديد لازم نتماشي معاه .. قتله نبي نغسل حوايجي .. طلع صابون من جنب فراشه .. غسلت حوايجي .. و قالي خليهم في الحمام لان مصكرين علينا برا ..
قتله كيف ؟
قالي عندنا يوم معين نغسلوا فيه حوايجنا و ننشروهم برا في الجنان ..
قعمزت و أشرف يقص في الخضرة .. و جابلي طرف شامية مغلفه في كاغط زي الشكلاطه و عصير .. قالي راهو قايمينها بيك 😆
قالي السجناء كلهم كارهين الشاميه .. قتله علاش ؟ قالي يوزعوا فيها فطور الصبح لين كرهوها ..
قتله و الدكان !!
قالي يفتح كل يوم لكن كل عنبر مسموحله بيوم واحد يمشي للدكان .. يعني الحاجة الي برا بي 10 دينار هنا بي 50 دينار ..
كمل و حط الغذاء ع النار و جى جنبي قالي يسكروا البيبان بعدين و نعطيك تكلم العيله ..
قتله في تليفون ؟
قالي فيه ايه .. لكن توا الشرطة تدور ما تقدرش تتكلم ..
قتله تمام به ..
جابولنا الغداء .. مكرونه ..
قالي قداش ليك ما شفتش السوس ؟
شبحتله مستغرب !!
قالي أهو كان خاطرك في رز مسوس .. مكرونه مسوسه .. ماكلة سامطه أي عفن زود كول ..
ضحكت قتله مفروض مسقي بالمسير ..
قالي نظام كول باش ما تموتش بس ..
عبدالصبور شاد مصحفه ..
المبروك جى قعمز يهدرز معانا ..
جبريل متكي و مغمض عيونه .. هنا ما فيش شي الا النوم ..
قالي المبروك أنا من الجنوب غادي ع الاقل انت لقيت واحد تعرفه ..
قتله كلكم بركه ♥️
قالي هنا في كارطه بس .. قتله تمشي عادي ضيقه و تفوت ..
غطينا المكرونه و أشرف عطل بالغذاء و المبروك يقوله حتى المسوس باهي 😆😁
حط أشرف الغذاء و قدمنا كلنا نتغذوا الا جبريل ..
أستغربت !! بالرغم ما كانش عندي نيه ناكل بكل .. و أشرف و المبروك شادين فيا مشي يا راجل و أرميها على الله ..
قلت لي أشرف خيره الشاب هدا ما جاش ياكل ؟؟ قالي فوته يا راجل ..
قتله كيف !
قالي انت في حبس يعني الي يحط 💶💷 ياكل ..
نزل الكاشيك من إيدي من غير وعيي 😰
تلفتت لي جبريل .. متكي و مغطي وجهه بي إيده .. قلت لي اشرف شن بياكل الولد ؟
قالي اهو غذاء الحكومه ..
قتله نوض يا راجل ناديه و الله ما تنزلي اللقمه هكي .. قالي فوته ..
قتله حتى انا مش حاط فيها قرش التغدايه هادي . غمزلي المبروك 😉 متع فوتهم و كول ..
نادى اشرف على جبريل و ناض غسل وجهه و جى قعمز يتغذى معانا .. منزل راسه .. يدس في عيونه في الأرض ..
🤷🏻♂️💔
تغذينا و الي ينوض من السفرة يقيم كاشيكه يغسله .. استغربت فيهم و قمت كاشيكي حتى انا غسلته .. و الي فهمته انك لو نضت و خليت كاشيكك يغسلوه هما أحتمال تتعرض للضرب ..
و جبريل يضم في حوسة التطييب ..
يعني ما فيش حاجة هنا free 🤷🏻♂️
قعمزنا و كل واحد يحكي شن دخله الحبس .. حكيت لي أشرف كل شي .. و قالي شن أسمها البنت التونسيه ؟؟ قتله ما نعرف عليها شي ..
قال شن اسم القهوة الي تخدم فيها ؟؟
قتله (.............)
قالي بعدين ندير تليفوناتي و يجيبولي معلومات عليها ..
في الليل سكروا علينا البيبان و كل واحد طلع تليفونه يكلم في عيلته 💔
متكي و بالي مشغول ..
اتصلت بي بدر و سألت على أمي .. قالي مشت تونس هي و بوك و بشير .. و أعطاني رقمهم التونسي .. قالي جابلك وسام حوايج ؟ قتله جابهم و خدوهم في المركز ..
أول ليلة في الحبس 👌🏻 لازم تفقد فيها فراشك .. حوشكم .. خوتك .. أمك .. و تحس بنعمة الراحة الي كنت عايش فيها ..
المبروك يقولي تعالى العب طرح 😉
و أنا فكري مش معاي بكل ..
هنا 👌🏻 ليلهم نهار .. يطيبوا .. يهدرزوا .. يلعبوا بلايستيشن .. يضموا ..
و الفجر يرقدوا للمغرب ..
هنا 👌🏻 بتخالط كل أصناف البشر .. القاتل .. المتعاطي .. المشكلجي .. العصبي .. الي عنده حالة نفسيه .. المتدين .. الهادي ..
أهم شي تكسبهم كلهم و تعرف كيف تتعامل معاهم .. حاولت نرقد و ما قدرتش ..
جى أشرف جنبي .. قالي توا كنت نكلم في واحد و قالي غدوة يكون عندك كل شي ..
قتله منور الله يبارك فيك ..
قالي ناصر هنا ..
قتله من ناصر ؟
قالي الي غذر بي المرحوم بهاء ..
سكتت .. .. .. .. .. .. .. ..
قالي في قسم تاني لكن .. و مرات يحولوا فيهم لأنه كان هنا هو في الدار التانيه ..
هو يحكي و أنا نقول في داخلي يارب ما نظلم حد و لا نعتدي على حد لين نطلع ..
كلمني بدر قالي اتصل بيا هيثم و قالي تعالى .. قتله خيره شن يبي ؟
قالي حاجاتك بناخدهم من غادي .. قتله في مفاتيح سيارة جنب الفراش خودهم و تو نقولك لمن تعطيهم ..
قالي تمام الصبح نكلمك ..
قتله لا لا الصبح أتصالات لا ..
قالي لمن نرفعهم ؟؟
قتله امشي للمقر و أسأل على مهندسه أسمها ملاك .. قالي تم خلاص ..
قتله أعطيها المفاتيح و فمك ساكت ما فيش داعي للدوة الزايدة ..
قالي تحزر !! 😉😆 ..
قتله كلمت أمك ؟
قالي لازم تكلمها لأنها تسأل عليك و على كنتنا المهندسه 😚
قتله خليك لحضه ..
ناديت أشرف قتله يكلموني العيله ع الرقم هدا عادي ؟
قالي على طول ..
قتله أعطي الرقم لي خوك بشير و قوله يكلمني هو باش نكلمها ..
قالي تم ..
و لأني الكبير و الكبير الله ☝🏻 حسيت روحي صغير قدام خوي .. بدل ما نعانيهم أنا يعانوا فيا هما 💔💔💔
No name ♥️🌺
