#البوسيفي 38
كلمت أوس قتله عندي مشوار تمشي معاي ؟ قالي هيا ..
طلعنا و في الطريق قتله روح تغذاء معاي و بعدها نمشوا لان حتى الوالد بيمشي معاي ..
قالي بتخطب و لا شنو ؟ 😁
قتله كان بنخطب بنرفعك انت 👊🏻 ..
روحنا للحوش تغذينا و قعمزنا نهدرزوا أنا و بوي و بشير و شربنا قهوة ..
قلت لي بوي هيا نتوكلوا ؟
قالي هيا ..
طلعنا بالسيارة و في الطريق بوي يهذرز ع الديه و في الي يقبلها و في الي لا و و و ..
و أوس 😳😳 مش فاهم شي ..
وصلنا لشارع جبريل .. نزلت نسأل و نعتوني الحوش .. طقيت الباب و فتحلي شاب و قتله نبي ندوي معاك .. طلع و سكر الباب و قعدت واقف انا و أياه في الشارع ..
قتله و الله أنا جاي بنتدخل صلح بأذن الله بينكم و بين جيرانكم أهل جبريل .. و أنا أسمي البوسيفي و نخدم في كذا و نسكن في المكان الفلاني و و و ..
قالي هيا تفضلوا ..
شاورت لي أوس و بوي و نزلوا من السيارة و خشينا للمربوعه ..
قالي الشاب و الله أنا نسيبهم لكن الحاج جاي و ولده الكبير حتى هو ..
قعدنا ساكتين و كيف حالك انت و الحمدلله كيف حالكم انتو و خلاص ..
لين جى الحاج و ولده و ولد خوه .. خشوا سلموا علينا و الوجوه مكشره ..
عرفت بنفسي و بي الوالد و أوس .. و أطمنوا شويه ..
قاله الوالد أحنا ما جايين نبوا نتكلموا اليوم لكن جايين بناخذوا منكم موعد نقعمزوا فيه و نحلوا هالمعضله و نتفاهموا ..
الولد في ضمانتي و الي تبوه احنا فيه .. تبو تتفضلوا عندي مرحبتين .. تبو تكلموا هلكم و ناسكم و اديروا موعد و احنا كذلك اللهم بارك ..
و احنا ما جايين الا بالصلح { وَالصُّلْحُ خَيْرٌ } .. و أوس 😳😳
رد علينا خوه الكبير و قال ان شاءالله بأذن الله نردوا عليكم و نديروا يوم ..
شربنا قهوتنا و أستاذنا .. و أحنا طالعين اعطاني رقمه خوه الكبير و قتله تبي نهذرزوا مع بعض تبي نحلوه الموضوع مع رجاله كبار كيف ما تبوا أنتو يصير بأذن الله .. قالي استنى تليفوني بأذن الله ..
و ركبت السيارة و طلعنا حطيت بوي في الحوش و مشيت للأستراحه باش أوس ياخد سيارته ..
قالي أنا قدام بوك ما فهمت شي .. لكن الي فهمته ان في مصيبه ..
قتله الولد الي جى معانا للعرس ..
قالي جبريل ؟؟
قتله ايه .. عنده موضوع طايحه فيه رقبه و نبوا نحلوه خلي يصفي ذمته مع ربي و يخدم و ينظم أموره ..
قالي رافعني لي حوش المقتول يا راجل 😳👊🏻 .. طلعت من عينها أنا معناها 😄 ..
قتله ما تقولش لي جبريل لين نوصلوا لي حل معاهم .. مرات يتعشم و يفرح و بعدين ما نتفاهموش ينتكس ..
قالي تم به ..
وصلنا للاستراحه و خشينا لقينا الشباب يتفرجوا ع الكورة .. و الي تكلمه ما يردش عليك عيونه في التلفزيون 😮 ..
خدا أوس سيارته و روح .. و أنا طلعت انظف في الرجيله و نولع في الفحم ..
و كل مرة نسمع اوووووووووووو 😩😩 .. شني شكله جول !!
سجلوا ؟
_ لا لا ..
خشيت بي رجيلتي و ع أساس بنتفرج .. و أنا ما نفهم شي في الكورة 🤪 حي حي حي قريب سدد .. قالي وسام تي هذا فريق الخصم يا راجل ..
_ أهااا به 😅
أتصلت بيا أمي .. قتلي شن صار مع بوك و عمك ؟ قتلها خيرهم ؟
قتلي امته بنمشي لي حوش عمك ؟
قتلها علاش ما فيش من يرفعك ؟
قتلي و الله في لكن كان نلقى ترفعني انت ..
قتلها امته تبي تمشي ؟؟ توا ؟؟
قتلي عاد هكي من غير ما نقول للناس ..
قتلها من ناس الي بتقوليلهم ؟؟
قتلي حوش عمك ..
_ حاجة ..
_ نعم 😊 ؟؟
_ تبي تمشي و لا ما تبيش تمشي ؟؟
_ ماهو عليك أنت .. أنا سألت بوك و لا أعطاني حق و لا باطل ..
_ الصبر 🤦🏻♂️ حق و باطل في شنو ؟؟
_ تي مش بنمشي نخطب بنت عمك ؟
_ 😳😳 لي من بتخطبيها ؟؟
_ ليك أنت شن لي منو ؟
_ أن شاءالله غير ما كلمتي حد بس 🤦🏻♂️
_ كلمت أخواتك أهو جوا هنا نتفقوا آمته بنمشوا ..
_ أهااا تتفقوا آمته بتمشوا و متصله تبيني نرفعك ! هادي كيف جت !
_ عاد مخلييني زي الأطرش في الزفه ما نعرف شي ..
أمي .. موضوعي مع بوي و عمي لا ليه علاقة بخطبة لا زواج ..
_ 😳 أمالا شن تبيه عمك ؟
_ موضوع تاني بيني و بينهم .. و لما نبي نتزوج ح نجيك أنتي مش بوي و نعطيك علم ..
و سكرنا الخط و هي تمتم مش عاجبها ..
كملت نأرجل و التليفون في إيدي و الاولاد مرة مرة يعيطوا ع الكوره ..
المشكله نعرف روحي كان بنكلمها بنرضيها بنغلط غلطه تانيه تزيد تعقد الموضوع 🤦🏻♂️..
و ع أساس بندير روحي نطلعها غالطه و ظالمتني المهم ما تبات فيا 😄 ..
في الليل و أحنا مقعمزين برا جاني أتصال من العمل لازم نمشي ..
وقتها كانوا ضاربين معيتيقه بي قذائف ..
مشيت للخدمة و قعدت غادي طوارئ .. و توقعتها تتصل تطمن عليا لكن فعلا كانت لبوة 👌🏻🔥
بعتلها رسالة .. ( يا طيارتي ♥️ )
بعتتلي .. ( حتى الرقم غالط فيه ؟؟ )
بعتتلها .. ( لا مستحيل نغلط فيه )
و معاش ردت عليا ..
أنا مش عارف ليش البنات يصعبوا فيها علينا 🤦🏻♂️ .. بعتلك رسالة خلااااص هوني الموضوع ليش تزيدي تعقدي فيها ..
تاني يوم ما جتش الخدمة ع خاطر الطوارئ .. و كلمني خو الولد الي توفى و قالي موعدنا الجمعه بأذن الله ..
قتله تم خلاص ..
روحت الضهر دوشت و غيرت حوايجي و بنرجع للخدمة تاني .. و أنا طالع قلت لي بوي راهو العيله كلموني و قالوا الجمعه يستنوا فينا ..
قالي مفروض يمشوا معانا حتى أعمام الولد او خواله او اي حد من طرفه ..
قتله لا لا بروحنا خير ..
كيف طلعت ما وصلتش راس الشارع كلمتني أمي قتلي تعالي نبيك .. قتلها خيرك شن في ؟
قتلي نبيك تاخدلي حاجات .. قتلها قولي شن تبي نجيبهملك علاش نجي للحوش ؟
قتلي غير تعالى تسخر ..
قلنا هي نتسخروا 🤦🏻♂️
رجعت للحوش و كلمتها قتلها انا تحت .. فجأة نفتح باب الحوش و بدل ما تطلع أمي لقيتها بنت عمي 😳😳 ..
نزلت من السيارة .. قتلي كيف حالك بوسيفي 😊 .. قتلها الحمدلله .. قتلي قتلك مرت عمي نبي شيشة عطر ..
نعم !! 😳😳 خشي ناديها الله يربحك 🤦🏻♂️
طلعت أمي و هي في قمة السعادة 😊😊 قتلها جايبتيني من راس الشارع على شيشة عطر ؟؟
قتلي بنديروا حلويات ..
قتلها و منزله البنت باش تقولي نبي شيشة عطر !!
_ أيه هذا هو تو نمشي بروحي و خلاص ☹️ ..
تلفتت لقيت ولد جيرانه ناديت عليه .. أعطيته فلوس قتله جيب بيهم عطر و خود شن تبي .. و ركبت السيارة ماشي خدمتي ..
وصلت الخدمة و قعدت أنا و أوس ساهرين للفجر و بعدها رقدنا و فقت الساعه 12:00 ..
شطبت أموري و خديت قهوة و طلعت برا نشوف فيها ..
لقيتها هي و بنت تانيه و وقف عليهم راجل كبير في العمر .. و الباين كان صاحب الشركة المتعاقدة .. لا كلمتها و لا شي .. و هي كيف جايه أتجاهي جاني تليفون من عمي ..
سلمت عليا و قتلي لو تبي ترد عادي .. قتلها لا مش مهم ..
قتلي أنا جيت نسلم لأن شغلي ح تستلمه المهندسه الي معاي .. قتلها ليش 😳 ؟
قتلي بابا خايف عليا و تشوف في القذائف الي مرة مرة يطيحوا و ظروف تانيه ..
_ يعني مش ح نشوفوك هنا تاني ؟
_ قتلي ايه 😊 .. بكرة آخر يوم ..
و مدت إيدها و قتلي تشرفت بمعرفتك أفندي ..
_ أهاااا 🤔 أفندي !! .. به تمام تشرفنا باش مهندسه ..
مشت ركبت سيارتها و أنا نقول تكلم .. كلمها توا .. اعزمها به على اي شي .. قوللها خلي نحكوا شويه .. برر موقفك .. قوللها نحكوا تليفون ع الاقل .. قوللها ما تحوليش من هنا ..
اتصررررررررررررررف دير اي لقطه 😤..
بس للأسف كنت واقف جامد 🤦🏻♂️
مشت بسيارتها و أنا واقف .. و العصر روحت للأستراحة ..
و كتبت كلمة آسف في رساله عشرة مرات و نمسح فيها 🤦🏻♂️ ...
تاني يوم و أنا ماشي للخدمة كنت متأكد إني ح نشوفها و مش ح تروح لين تشوفني ..
و لي أول مرة في حياتي نوقف بنشري ورد .. مش عارف ليش لكن البنات يحبوه 🤪 في الوقت الي تركيبة دماغنا الندم و الأسف عندنا إني نتصل او نبادر بالكلام بعني داخلي .. حسي .. مش ورد أو هديه او ........
به كم وردة ناخد ؟؟ ناخد باقه ؟ لا لا كيف بننزل بيها 🤪 .. به ناخد وردة وحدة ؟ ..
وقفت قتله أعطيني باقة صغيره .. قالي شن الورد الي تبيه ؟
قتله حطهم كلهم ..
خدينا الباقه و مشينا للخدمة .. قعدت في السيارة و اتصلت بيها .. ردت عليا ..
قتلها وين أنتي ؟ .. قتلي داخل مع المهندسه .. قتلها تعالي نبيك ..
قتلي وين أنت ؟
قتلها قدام الادارة .. نشبح فيها جاية و نزلت من السياره سلمت عليها ..
قتلها ح تخلي مكانك هنا .. قتلي لا ليش .. مرات أنت لفتت نظر غيري ..
قتلها كيف هادي !! 🙄
قعدت ساكته .. قتلها ليش التغيير هذا كله ؟ خيرك هكي بديتي ؟؟ نحس في روحي ما نعرفكش .. انتي الي جيتي جهة الحبس بس باش تطمني عليا ؟؟
_ أهااا حلو كلامك بوسيفي 🤚🏻 أنا من أول يوم شفتك فيه و انت هنا 👈🏻🧠 في ذاكرتي .. و شاء القدر و جمعني بيك مرة و مرتين .. كنت كل ما نشوفك نغرق .. نغرق لدرجة ربحت كفتك و تلخبطت الموازين عندي .. شفتك رجل .. محترم .. خلوق .. جدع .. و من كثر 👌🏻 ما كنت نبي نكسبك و خايفه نخسرك معاش عرفت نتصرف ..
بس أنا ما نقدرش نكون بديلة على أنسانه تانيه .. و لا نداوي جروح حد .. و لا شي ..
بس سؤال .. مدام في بنت في مخيلتك ليش تكلمني ؟ ليش تعطيني مجال أصلاً ؟؟
لحضه لحضه 🤚🏻 هذا كله ع خاطر غلطت في أسم !!
_ صح 👌🏻 .. صح بوسيفي تصرفاتكم ديما بسيطه و ما تستحق مشاكل .. و أحنا الي مكبرينها ديما .. تناديني بي أسم بنت تانية و مفروض عادي أنا .. ماهو المشكلة إنك شخص مش عادي .. و زعلي بحجم مكانتك عندي ..
شديت إيدها .. و كانت متوترة و متضايقه مني و زاد توترها ..
_ به أنا آسف ♥️
و حسيت إنها ح تبكي 💔 .. شديتها من إيدها و رفعتها للسيارة .. فتحت السيارة و أعطيتها باقة الورد .. و نقول إن شاءالله ما يطلع حد يشوفنا بس 🤦🏻♂️🤦🏻♂️
خدتها مني و مشت بتحطها في السيارة .. اوووووووف مجهود أرضاء إنثى و الله مجهود 🤦🏻♂️🤦🏻♂️
No name ♥️🌺
